यहोसु 20 - लिम्बुसे़ःप्सिङ्मादे़न् ये़क्यक्हाॽ 1 खे़ब्याङ् यहवे दाङ्बे़ल्ले़ यहोसुन् अक्खे मे़त्तु, 2 “खे़ने़ॽ इस्राइलिहाॽ मे़त्ते़से़ॽ, ‘आङ्गाॽ मोसान् लाम्बा खिनिॽ मे़त्निङ्बा कुइसिक् से़ःप्सिङ्दे़न् ये़क्यक्हाॽ निःन्धो चोगे़म्मे़ॽ॥ 3 निङ्वाॽ मे़ङ्घोए इग्र आन्जानिःल्ले़ कुभारे़ मना से़रुने़भग्र खे़न् मना के़से़प्पे़न् खे़त्छिङ्ङाङ् खे़प्मो पेःक्ल, हे़क्क्याङ् कुले़क्वा नुःक्मा के़गोःप्पाहाॽलाम् खे़न् ये़क्यक्हाॽ से़ःप्सिङ्मादे़न् पोङ्ॽ॥ 4 “‘खे़न् ये़क्यक्हाॽओबा कुभा लत्छाओ खे़न् खे़त्छिङ् पेःक्ल हे़क्क्याङ् खे़न् ये़क्यक्को लाःप्मा लाम्धेःत्तो ये़म्सिङ्ल, खे़ब्याङ् खुने़ॽ कुबाःन्निन् ये़क्यक्कोबा साम्योसिक्साम्बाहाॽ चे़क्तुसिर॥ हे़क्क्याङ् ये़क्यक् सिगाङ् खुन्छिॽओ मे़देॽरुआङ् खे़न् युङ्मादे़न् मे़बिरुर हे़क्क्याङ् खे़न् खे़ङ्हाॽनु सोरिक् युङ्ल॥ 5 मना से़रुबाल्ले़ कुले़क्वा नुःक्मा के़गोःप्पे़ल्ले़ खे़न् नाःत्तुने़भग्र खे़ङ्हाॽरे़ खे़न् मना के़से़प्पे़न् खे़न् कुले़क्वा नुःक्मा के़गोःप्पे़न् हुक्मे़न्छुप्तुन्ल, थेआङ्भे़ल्ले़ खे़ल्ले़ कुहिम्बेसाङ्बे़न् आन्जानिःल्ले़ से़रुआङ् वये़, हे़क्क्याङ् खे़न्नु खुने़ॽ थे़माआङ् निङ्मि होःप्ते़॥ 6 हे़क्क्याङ् खासे़न्ले़ लागि सङ्जुम्भोहाॽरे़ खुन्छिॽ तगि मे़न्ये़प्पे थारिक् नु खे़न् ये़म्मोबा तुम् निङ्वाॽफुसाम्बे़न् मे़न्छिए थारिक् खे़न् हाबा खे़न् ये़क्यक्को वाॽर॥ खे़न् एगाङ् खे़न् मना के़से़प्पे़न् खुने़ॽ आप्फेक् कुहिम्मो आप्फेक् कुये़क्यक्को, आत्तिनु खुने़ॽ खे़त्छिङ्ङाङ् वये़, हाबा खे़न् ये़क्यक्को पेःक्ल॥’” 7 हे़क्क्याङ् खे़ङ्हाॽरे़ यर्दन नाम्धा पिसाङ् गालिलओ नप्तालिबा कोःक्मा फाङ्जङ् लाजेॽओ केदेस, एफ्राइमबा कोःक्मा फाङ्जङ् लाजेॽओ सकेम नु यहुदाबा कोःक्मा फाङ्जङ् लाजेॽओ किर्यत-अर्बान् (खे़न् हेब्रोन मे़मे़त्तु) मे़दोन्दु॥ 8 यरिहोबा यर्दन नाङ्गे़न् ले़प्माङ्, रुबेनरे़ कुधाःक्हाॽरे़ खुन्छिॽ मुरे़क् खारे़क् थेआङ् के़होप्पादे़न्नो के़ने़बा ने़ने़बादे़न्नो बेसे़रे़न्, गादरे़ कुधाःक्हाॽरे़ खुन्छिॽ गिलादओ के़ने़बा रामोते़न्, मनस्सेरे़ कुधाःक्हाॽरे़ खुन्छिॽ बासानओ के़ने़बा गोलाने़न् खे़ङ्हाॽरे़ मे़सेगु॥ 9 कुभारे़ कुभा मनान् आन्जानिःल्ले़ से़रुने़भग्र चुम्लुङ् तगि खे़ल्ले़ कुघासे़न् मे़म्बोङ्ङे थारिक् मना से़रुबाल्ले़ कुले़क्वा हुङ्मा के़गोःप्पे़ल्ले़ कुहुक्कोलाम् सिमा मे़बोङ्ने़ल्ल फाॽआङ् खे़न् खे़त्छिङ्माआङ् पेःक्मारे़ लागि, के़रे़क् इस्राइलिहाॽ हे़क्क्याङ् खुन्छिॽनु सोरिक् के़युङ्बा वेॽ लाजेॽबाहाॽरे़ लागि निःन्धो के़बोङ्बा ये़क्यक्हाॽ आम्भा कन्हाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.