अयुब 1 - लिम्बुअयुबरे़ कुये़प्ले़क् 1 उज लाजेॽओ अयुब मिङ् के़वाःप्पा मनाधिक् वये़॥ खुने़ॽ निङ्वाॽफुमाङ्ङो से़वा के़जोःक्पा नु नसाःन्साबा वये़॥ खुने़ॽ कुदोःप्मा नु नुबा मना वये़ खे़ब्याङ् खुने़ॽ निङ्वाॽफुमाङ्ङिन् मिङ्सो इङ्धाङ् के़बिबा वये़ हे़क्क्याङ् ताप्फे़ःम्बा याःम्बक् चोःक्मालाम् के़से़ःप्सिङ्बा चोगे़॥ 2 खुने़ॽ कुस्सा ये़म्बित्छा नुसि नु कुस्सा मे़न्छुमा सुम्सि मे़वये़॥ 3 खुने़ॽ ७,००० मे़ल्लुक् नु ३,००० उमे, १,००० पित्, ५०० अदङ्हाॽ कत्तुसि॥ खुने़ॽ यरिक् से़वारोबा से़वारोमाहाॽ कत्तुसि॥ तॽइ नाङ्गे़न् पिसाङ्बा मनाहाॽओ खुने़ॽ के़रे़क्नुःल्ले़ यम्बा नु याङ्साकुन्धेसाबा वये़॥ 4 अयुबरे़ कुस्साहाॽ मे़दङ्सिङ्ङाङ् हिम्मो पाःल्लोबा मे़ज्ये़र साभःङ्जा मे़बिसिङ्॥ खे़न् साभःङ्जाओ के़रे़क् मे़द्ये़॥ खे़ङ्हाॽरे़ खुन्छिॽ आबाङे सुम्सि चेलिमा नुसाॽहाॽआङ् साभःङ्जाओ मे़उःत्तुसि॥ 5 साभःङ्जा मे़जबा ये़न्निल्ले़ कुदाःन्दिक् तानाम्सा अयुबे़न् पोगे़आङ् आबाङे के़रे़क् कुस्साहाॽरे़ खुनिॽ मिङ्ङो मिधिङ्मनाबा सिदुङ्जभा तोःन्दुर यागे़॥ खुने़ॽ हे़क्केलॽरिक् आबाङे कुस्साहाॽ सेसेसुत्थो चोगुसिर वये़॥ कुस्साहाॽरे़ मे़न्नि मे़न्धाए निङ्वाॽफुमाङ्ङिल्ले़ कुजाःत्थि मे़देसुआङ् लायो लासोत् मे़जोगुबि फाॽआङ् खुने़ॽ सेसेसुत्थो चोगुसिर वये़॥ माफे़न्साम्मिल्ले़ अयुबे़न् हङ्साॽरु 6 थिक्यान् साङ्ग्राम्पेदाङ्बा माङ्लाइङ्बाहाॽ यहवे दाङ्बे़ल्ले़ कुदगि मे़द्ये़ःल्ले़ माफे़न्साम्मिन्नाङ् खे़ङ्हाॽनु के़रे़द्ये़॥ 7 यहवे दाङ्बे़ल्ले़ खे़न् सेःन्लाप्तु, “खे़ने़ॽ आत्तान् के़बेआङ् के़वये़?” माफे़न्साम्मिल्ले़ नुगप् पिरु, “इक्सादिङ् खाम्बेःक्मो के़रे़क् पिसाङ् ना नु कत्ना ताक्कन्नि वयाङ्॥” 8 हे़क्केःल्ले़ यहवे दाङ्बे़ल्ले़ सेःन्लाप्तु, “थे आङ्गाॽ आसे़वारोबा अयुबे़न् खे़ने़ॽ के़निसुबि? इक्सादिङ् खाम्बेःक्मो खे़न् हे़क्तङ्बा कुदोःप्मा नु नुबा मना हाःत्ताङ् होप्॥ खे़ल्ले़ आङ्गाॽ मिङ्सो इङ्धाङ् पिआ हे़क्क्याङ् ताप्फे़ःम्बा याःम्बक् चोःक्मालाम् सिङ्सिङ् ये़क्ये़क् लॽरिक् से़ःप्सिङ्ङाङ् वाॽ॥” 9 माफे़न्साम्मिल्ले़ नुगप् पिरु, “थे अयुबरे़ थेनाधे खे़ने़ॽ सेसे माङ्से़वा के़मे़प्पि? 10 सदादिङ् खे़ल्ले़ कुहिम्सयङ् नु कुयाङ्साकुन्धेहाॽ खे़ने़ॽ कम्ब्राङ् के़मे़त्तुआङ् वाॽ॥ खे़ल्ले़ चोगुबा के़रे़क् याःम्बक्को खे़ने़ॽ मुॽइसाम् के़बिरुआङ् काक् लाजेन् सिदे़प् ते़प्तुर पित्थक्साहाॽ के़बिरुआङ् वाॽ॥ 11 कर खे़ल्ले़ के़रे़क् कुजिगक्वाहाॽ नाप्ते़ साॽरे़, खे़ल्ले़ खे़ने़ॽ के़दगिए माङ्दे साङ्ग्रा के़मे़त्!” 12 यहवे दाङ्बे़ल्ले़ खे़न् मे़त्तु, “ओक् नुॽ, खे़ल्ले़ कत्तुबा के़रे़क् पाःन्हाॽ खे़ने़ॽ के़युक्को पिने़॥ खे़ल्ले़ कुधक्किन्लक् खे़ने़ॽ हुक् मे़याक्ते़न्ने़ॽ॥” हे़क्क्याङ् माफे़न्साम्मिन् यहवे दाङ्बे़ल्ले़ कुदगिलाम्बा लःन्दे़आङ् पे॥ 13 थिक्ये़न् अयुबरे़ कुस्सा तुम्बाल्ले़ कुहिम्मो खुने़ॽ कुस्सा ये़म्बित्छा मे़न्छुमाहाॽरे़ सा नु थि मे़ज मे़धुङुर मे़युङे़॥ 14 लत्छा मनाधिक् अक्तङ्बा इङ्घङ् तारुआङ् अयुबरो लोःक्ते़र त्ये़, “आनिगे के़क्चु थोङ्नु यागिगे़, निःत्ताङ् अदङ्हाॽआङ् चामे़रामे़र मे़वये़॥ 15 सबि मे़प्मनाबा सुवाङ्हाॽरे़ चिभत् मे़भत्तिगे़ हे़क्क्याङ् खे़न् थक्साहाॽ मे़देॽरुसि॥ वेॽ के़रे़क् के़से़वारोबाहाॽ मे़से़रुसि॥ आङ्गाॽरक् खे़त्छिङ्ङाआङ् खे़ने़ॽ इङ्घङ् पिमारे़ लागि के़राङ् त्याङ्॥” 16 खे़ल्ले़ पाःत्तुर पत्छे़ल्ले़ वेॽसमा से़वारोबान् फे़रे़आङ् पाःत्तु, “मे़ल्लुक्हाॽ नु मे़ल्लुक्कम्बाहाॽ सेरिःल्ले़ खे़रु से़रुसि॥ खे़ने़ॽ इङ्घङ् पिमारे़ लागि आङ्गाॽरक् हिङाङ्ङाङ् त्याङ्॥” 17 खे़ल्ले़ पाःप्माए मे़न्छुःत्ते वेॽसमा से़वारोबान् त्ये़आङ् पाःत्तु, “कुलुप् सुम्सि कल्दि खुन्द्रिःक्पाहाॽरे़ आनिगे चिभत् मे़भत्तिगे़ हे़क्क्याङ् उमेहाॽ मे़नाप्तिगे़आङ् मे़देॽरुसि॥ आङ्गाॽरक् ताङाङ्ङाङ् वेॽ के़रे़क् के़से़वारोबाहाॽ खे़ङ्हाॽरे़ मे़से़रुसि॥ खे़ने़ॽ इङ्घङ् पिमारे़ लागि के़दाङ्बाआङ् के़दाबा आङ्गाॽरक् पोःक्खाङ्॥” 18 खे़न्नाङ् पारे़र पत्छे़ल्ले़ वेॽसमा से़वारोबान् त्ये़आङ् पाःत्तु, “खे़ने़ॽ के़स्सा तुम्बाल्ले़ कुहिम्मो के़स्सा ये़म्बित्छा मे़न्छुमाहाॽरे़ सा नु थि मे़ज मे़धुङुर मे़युङे़॥ 19 खे़न् ये़म्मो ये़ःङ्घादे़न्नोलाम् खइक् खइक् के़इक्सिङ्बा सुरित् केजङ् हुरे़द्ये़आङ् हिम्मिन् यस्सुल्ले़ खे़ने़ॽ के़स्साहाॽ के़रे़क् हदॽ मे़स्ये़॥ खे़ने़ॽ इङ्घङ् पिमारे़ लागि आङ्गाॽरक् हिङाङ्॥” 20 खे़न् के़रे़क् खे़प्सुआङ् अयुबे़न् पोगे़ हे़क्क्याङ् मिङ्वाःल्ले़ कुधिम् पोःक्खे़र आबाङे कुजाङ्तेःत्तिन् ते़रे़क् थे़ःक्खु॥ खुने़ॽ कुधे़गेक्पान् नःक्खुआङ् खाम्मो साम्बोन् हबत् फन्छिङ्ङाङ् माङ्से़वा चोगे़॥ 21 खुने़ॽ पाःत्तु, “आङ्गाॽ आम्मारे़ कुसाप्पोःक्कोलाम् ले़क्चाॽबे़धिक् त्याङ्लो हे़क्क्याङ् ले़क्चाबे़धिक्के आङ्गाॽ नुःङ्ङा पेःक्कारो॥ यहवे दाङ्बे़ल्ले़ पिराङ्लो हे़क्क्याङ् यहवे दाङ्बे़ल्ले़ए तेॽरुरो, यहवे दाङ्बे़ल्ले़ कुमिङ्ङिन् मिङ्सो इङ्धाङ् पोङ्लरो!” 22 कन् के़रे़क् पोःक्खे़साङ् अयुबरे़ निङ्वाॽफुमाङ्ङिन् पाःन्मे़धिक्तुन् हे़क्क्याङ् लायो मे़जोगुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.