यर्मिया 26 - लिम्बुयर्मियान् से़त्तासिगे़ मे़मे़त्तु 1 यहुदाबा हाङ् योसियाहःल्ले़ कुस्सा यहोयाकिमे़ल्ले़ हाङ्युक् चोःक्मा हेःक्तुबा ये़म्मो यहवे दाङ्बे़ल्ले़ कुइङ्घङ्ङिन् यर्मियाओ के़रे़॥ 2 यहवे दाङ्बे़ल्ले़ अक्खे पाःत्तु, “यहवे दाङ्बे़ल्ले़ कुहिम् लक्खुम्मो ये़बे़ॽ हे़क्क्याङ् आङ्गाॽ इङ्जाङ् पिने़बा के़रे़क् पाःन्हाॽ यहुदाओबा ये़क्यक्हाॽलाम् माङ्हिम्मो माङ्से़वा चोःक्से़ के़दाबा मनाहाॽ लत्छा पाःन्नाङ् मे़न्याःक्के मे़त्ते़से़ॽ॥ 3 से़क्खा मनाहाॽरे़ खे़न् पाःन्निन् मे़घे़प्सुआङ् खुन्छिॽ ताप्फे़ःम्बा याःम्बक्हाॽ मे़ले़रुबि हाग॥ हे़क्केने़भग्र खे़ङ्हाॽरे़ खुन्छिॽ ताप्फे़ःम्बा सुत्नाःल्ले़ चोगुल्ले़ आङ्गाॽ खे़ङ्हाॽरे़ खुन्छिॽ सम्धाङ् ताःप्मा इःत्तुङ्ङाङ् वयाङ्बा खे़न् मे़क्मासिमे़न् खे़त्तुङ्ॽ॥ 4 “खे़ङ्हाॽ अक्खे मे़त्ते़से़ॽ, ‘यहवे दाङ्बे़ल्ले़ अक्खे पाःत्तुॽ, आङ्गाॽ मे़त्निङ्बा पाःन्निन् खिनिॽ के़ङ्घे़प्सुम्मिन्नाङ् के़न्इःत्तुम् के़न्नाःत्तुम्मिन्ने़भग्र, 5 हे़क्क्याङ् आङ्गाॽ खिनिॽओ ये़त्ले़ङ् ये़त्ले़ङ् पाङ्घुङ्सिङ्बा आसे़वारोबा माङ्निङ्वाॽपान् के़बाःप्पाहाॽरे़ खुन्छिॽ पाःन्निन् के़ङ्घे़प्सुम्मिन्ने़भग्र आङ्गाॽ आइङ्जाङ्ङिन् खिनिॽ इःप्मा नाःप्मा के़न्दे़न्दिन्॥ 6 खे़ब्याङ् खिनिॽ हे़क्तङ्बा के़जोगुम्ल के़वयिने़भग्र आङ्गाॽ सिलोःन् मे़क्खुङ्बा कुइसिक् कन् माङ्हिम्मिन् मे़क्खुङ् हे़क्क्याङ् के़रे़क् मे़न्छाम् सुवाङ्हाॽरे़ कन् ये़क्यक्किन् माङ्दे साङ्ग्रा थामालाम् मे़जोगुॽ॥’” 7 निङ्वाॽफुसाम्बाहाॽरे़, माङ्निङ्वाॽपान् के़बाःप्पाहाॽरे़ हे़क्क्याङ् के़रे़क् मनाहाॽरे़ कन् पाःन्निन् यहवे दाङ्बे़ल्ले़ कुहिम्मो यर्मियाःल्ले़ पाःत्तुबान् मे़घे़प्सु॥ 8 हे़क्क्याङ् यहवे दाङ्बे़ल्ले़ इङ्जाङ् पिरुसिबा के़रे़क् पाःन्हाॽ यर्मियाःल्ले़ पाःत्तु सुरु, खे़ब्याङ् खे़ङ्हाॽरे़ खुने़ॽ मे़दे़म्सुआङ् अक्खे मे़बाःत्तुर मे़भिःक्ते़, “आल्ल खे़ने़ॽ से़क्खाए के़सिःॽ॥ 9 कन् माङ्हिम्मिन् सिलोःन् हे़क्के पोङ्ॽ हे़क्क्याङ् कन् ये़क्यक्किन् खाप्पुथ्यःङ् पोङ्ॽ खे़म्ब्याङ् कप्मो हाःत्ताङ् मे़युङ्ने़न् फाॽआङ् खे़ने़ॽ थेआङ् यहवे दाङ्बे़ल्ले़ कुमिङ्ङो माङ्निङ्वाॽपान् के़बाःत्तु?” खे़न् एगाङ् यहवे दाङ्बे़ल्ले़ कुहिम्मो के़रे़क् मनाहाॽरे़ खुने़ॽ किर्गप् मे़गबु॥ 10 हे़क्केःल्ले़ यहुदाबा लाम्लोबाहाॽरे़ कन् पाःन्निन् मे़घे़प्सु, खे़ब्याङ् खे़ङ्हाॽ हाङ्हिम्मोलाम्बा माङ्हिम्मो मे़द्ये़ हे़क्क्याङ् कुसङ् मा ताःक्हन् मे़प्मनाबा लाम्धेःत्तिल्ले़ कुबेसाङ् मे़युङ्सिङ्॥ 11 खे़ब्याङ् निङ्वाॽफुसाम्बाहाॽ हे़क्क्याङ् माङ्निङ्वाॽपान् के़बाःप्पाहाॽरे़ खे़न् लाम्लोबाहाॽ नु मनाहाॽ अक्खे मे़मे़त्तुसि, “कन् मनाःल्ले़ सिमे़ल्ले़ खुम्दिङ् खोमा पोङ्ॽ थेआङ्भे़ल्ले़ कल्ले़ आनिगे ये़क्यक्किल्ले़ कुदक्ले़ङ्वाओ पाःत्तुआङ् वाॽ॥ खे़ल्ले़ कुबाःन्निन् खिनिॽ आबाङे ने़क्खोॽबाल्ले़ के़घे़प्सुम्माङ् के़वयिॽ॥” 12 हे़क्क्याङ् यर्मियाःल्ले़ के़रे़क् सुहाङ्युक्पाहाॽ नु काक् मनाहाॽ मे़त्तुसि, “कन् माङ्हिम्मिन् नु कन् ये़क्यक्किल्ले़ कुदक्ले़ङ्वाओ खिनिॽ के़घे़प्सुम्बा के़रे़क् पाःन्हाॽ माङ्निङ्वाॽपान् पाःप्मारे़ लागि यहवे दाङ्बे़ल्ले़ आङ्गाॽ पाङ्घाङ्बा॥ 13 आल्ल खिनिॽ आबाङे हिङ्मन्बा सुत्नाःन् नु याःम्बक्हाॽ तोःम्माए पोङ् हे़क्क्याङ् यहवे दाङ्बा आबाङे निङ्वाॽफुमाङ्ङिल्ले़ कुइङ्जाङ्ङिन् इःप्मा नाःप्माए पोङ्॥ खे़ब्याङ् खिनिॽ सम्धाङ् ताःप्मा इःत्तुबा खाप्पुथ्यःङ् चोःक्मा पाःन्नो कुनिङ्वाॽ नुःक्तुॽइ॥ 14 आङ्गाॽग, आल्ल खिनिॽ हुक्कोए वाॽआ॥ खिनिॽ थे़मा चोःक्मा नुबा नु के़लाॽबा चोक् फाॽआङ् के़इःत्तुम्, हाबा खे़न्ने आङ्गाॽ ओमे़त्ते़ॽ॥ 15 कर खिनिॽ आङ्गाॽ याप्मि के़से़रिने़भग्र खिनिॽ नु कन् ये़क्यक्कोबा मनाहाॽ फोत्या मेःन्नेबा लत्छा मना के़से़प्पा के़बोःक्खिॽ के़लॽबा कन् पाःन्निन् से़क्खाए खे़प्से़म् युक्खे़म्मे़ॽ थेआङ्भे़ल्ले़ यहवे दाङ्बाल्ले़ए खिनिॽ कन् साम्दिङ्ङिन् पिमानिङ् फाॽआङ् आङ्गाॽ पाङ्घाङ्बा॥” 16 खे़ब्याङ् लाम्लोबाहाॽ नु के़रे़क् मनाहाॽरे़ निङ्वाॽफुसाम्बाहाॽ हे़क्क्याङ् माङ्निङ्वाॽपान् के़बाःप्पाहाॽ अक्खे मे़मे़त्तुसि, “कन् मनाःल्ले़ यहवे दाङ्बा आनिॽ निङ्वाॽफुमाङ्ङिल्ले़ कुमिङ्ङो कन् पाःन्निन् पाःत्तुबारो, कन् सिमे़ल्ले़ खुम्दिङ् पिमा मे़नुॽने़न्॥” 17 खे़न् एगाङ् कुभा तुम्भाक्साहाॽ मे़बोगे़आङ् मे़ये़म्सिङ् हे़क्क्याङ् खे़प्मो के़जुम्बा मनाहाॽ अक्खे मे़मे़त्तुसि, 18 “हिजकियान् यहुदाबा हाङ् वये़ल्ले़ मोरेसेतलाम् के़दाबा माङ्निङ्वाॽपान् के़बाःप्पा मिकाःल्ले़ के़रे़क् मनाहाॽ कन् कुबाःन्जाक्किन् अक्खे मे़त्तुसि, मुक्साम्दाङ्बा यहवे दाङ्बे़ल्ले़ अक्खे पाःत्तुरो, “‘इक्ताप्पिन् के़क्चु थोङ्मनाबा हे़क्के सियोने़न् मे़दोःक्खुरो, यरुसले़ःम्मिन् लुःन्नाङ् लुङ्सिङ्हाॽ लुम्सिङ्लो हे़क्क्याङ् माङ्हिम्मोबा कोःक्मा फाङ्जङ्हाॽ ताम्भुङ् पोःक्ला के़बोबा के़धाङ्बा थुप्थाॽ कुइसिक् पोङ्लो॥’ 19 “हे़क्केःल्ले़ थे हिजकिया हाङ्ङिन् नु यहुदाओ के़युङ्बाहाॽरे़ मिकान् मे़से़रुबि? मे़न्छे़रुन्, खे़ल्ले़ कुले़क्वाग हिजकियान् यहवे दाङ्बान्नु किसे़ हे़क्क्याङ् खुने़ॽ कुलुङ्गुम् खोमा तम्सिङ् चोगु॥ खे़ब्याङ् यहवे दाङ्बे़ल्ले़ तारुङ् फाॽआङ् खे़ङ्हाॽ मे़त्तुसिबा मे़क्मासिमा पाःन्निल्ले़ कुयाःम्बेओ कुनिङ्वाॽ नुःक्तु॥ कर आल्लो यम्बा ये़त्तुक्खेन् आबाङे आनिॽ सम्धाङ् ताःप्मा आइःत्तुम्माङ् आवाॽ॥” 20 (वेॽ मना थिक्काङ् खे़प्मो वये़, खे़ल्ले़ यहवे दाङ्बे़ल्ले़ कुमिङ्ङो यर्मियाःल्ले़ कुइसिक् कन् ये़क्यक्किन् नु मे़न्छाम् सुवाङ् तक्ले़ङ्वाओ माङ्निङ्वाॽपान् पाःत्तुआङ् वये़॥ खे़न् किर्यत-यारिम्मो के़युङ्बा समायाहरे़ कुस्सा उरियाहःन् वये़॥ 21 यहोयाकिम हाङ्ङिन् नु कुधक्तुम्बाहाॽरे़ हे़क्क्याङ् वेॽ सुहाङ्युक्पाहाॽरे़ उरियाहरे़ कुबाःन्निन् मे़घे़प्सु खे़ब्याङ् हाङ्ङिल्ले़ खुने़ॽ से़प्मा निङ्वाॽ चोगु॥ खे़न् पाःन्निन् उरियाहःल्ले़ खे़प्सुआङ् खुने़ॽ किसे़ हे़क्क्याङ् खे़त्छिङ्ङाङ् मिस्र लाजेॽ पे॥ 22 कर यहोयाकिम हाङ्ङिल्ले़ उरियाहःन् नुःक्मा फे़प्मारे़ लागि अक्बोरे़ल्ले़ कुस्सा एल्नाताने़न् नु वेॽ कुभा मनाहाॽ मिस्र लाजेॽ पाङ्घुसि॥ 23 खे़ङ्हाॽरे़ उरियाहःन् यहोयाकिम हाङ्ङिल्लो मे़नुःक्तु मे़दारु॥ हे़क्क्याङ् हाङ्ङिल्ले़ खुने़ॽ ताभेःल्ले़ स्ये़रुआङ् खे़ल्ले़ कुजे़ःन् मे़न्जोबा मनाहाॽरे़ खुन्छिॽ इपुङ्ङो लाप्मे़भुसु॥) 24 कर सापाने़ल्ले़ कुस्सा अहिकामे़न्नाङ् यर्मियान् ले़क्खाङ् पोःक्खे़बाल्ले़ चोगुल्ले़ खुने़ॽ मनाहाॽरे़ खुन्छिॽ हुक्को से़त्छे़ हुक्मे़न्छुःप्तुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.