खासे़न्लोःम्बा 9 - लिम्बुअबिमेलेके़न् सकेमओ युक्साबा पोङ् 1 यरुब-बालरे़ कुस्सा अबिमेलेके़न् सकेमओ खुने़ॽ कुङ्ग्वासिरो पे, हे़क्क्याङ् कुङ्ग्वासिओबा हिम्सयङ्हाॽ के़रे़क् खुने़ॽ मे़त्तुसि, 2 “सकेमबा के़रे़क् तुम्म्याङ्हाङ्हाॽ खिनिॽ कन् पाःन्निन् सेःन्दोसाम्से़ॽ—‘यरुब-बालरे़ नुबोङ् कुस्साहाॽरे़ खिनिॽ सम्धाङ् युक् चोःक्मा नुबाबि इ थिक्पारे़क् युक् चोःक्मा नुबाबि?’ आङ्गाॽ खिनिॽए मे़म्भे़क्मनाबा काॽइआ के़लॽबा पाःन्निन् खिनिॽ निङ्वाॽ इःत्ते़म्मे़ॽओ॥” 3 आल्ल खुने़ॽ कुङ्ग्वासिरे़ खुने़ॽ ले़प्माङ् सकेमबा के़रे़क् तुम्म्याङ्हाङ्हाॽ कन् के़रे़क् पाःन्हाॽ मे़मे़त्तुसिल्ले़, खे़ङ्हाॽ अबिमेलेक ले़प्माङ् पप्मारे़ लागि मे़मुन्छिङ्, थेआङ्भे़ल्ले़ खे़ङ्हाॽरे़ मे़बात्तु, “खुने़ॽग आनिॽ आप्फेक् काॽइरो॥” 4 खे़ङ्हाॽरे़ खुने़ॽ बाल-बरितबा माङ्हिम्मोलाम् नुबोङ् युप्पा याङ्इत्छेॽ मे़बिरु, हे़क्क्याङ् खुने़ॽ खे़न् तेॽरुआङ् कुसुम्मे़न्दम्मना फे़क्के़लाॽबा मनाहाॽ याःल्लेक् साङुसि, खे़ब्याङ् खे़ङ्हाॽ खुने़ॽ कुएगाङ् मे़धासिङ्॥ 5 खे़न् एगाङ् खुने़ॽ कुम्बारे़ कुहिम् ओप्रा पे, हे़क्क्याङ् खुने़ॽ नुबोङ् कुम्भुॽ कुन्साॽ यरुब-बालरे़ कुस्साहाॽ लत्छा लुङ्जङ्ङो से़रुसि॥ कर यरुब-बालरे़ कुस्सा फोःक्वाबा योतामे़न् चिङ्सिङ्ङाङ् हिङे़ याःक्ते़॥ 6 खे़ब्याङ् सकेमबा तुम्म्याङ्हाङ्हाॽ नु बेथ-मिल्लोबा मनाहाॽ के़रे़क् मे़जुप्से़आङ् सकेमओ के़युङ्बा यम्बा यहिबा सिङ्बुङ् पेसाङ्बा सित्लाङ्ङो अबिमेलेके़न् हाङ् मे़जोगुरो॥ योतामरे़ कुदाॽदि खे़दाॽ 7 आल्ल कन् पाःन्निन् योतामे़न् मे़मे़त्तुल्ले़ खुने़ॽ पेआङ् गिरिज्जिम कोःक्माल्ले़ कुसम्धाङ् ये़म्सिङ्, हे़क्क्याङ् अक्खे पाःत्तुआङ् यम्बा इक्लाओ अःक्ते़रो, “सकेमबा तुम्म्याङ्हाङ्से, आबाःन्निन् खे़प्से़म्मे़ॽओ, खे़ब्याङ् निङ्वाॽफुमाङ्ङिल्ले़आङ् खिनिॽ पाःन्निन् खे़प्सुररो॥ 8 आप्फेक् लागि थिक्ले़ङ् सिङ्बुङ्हाॽ लत्छा हाङ् युक्तिङ् चोःक्मारे़ लागि मे़जुप्से़रो, हे़क्क्याङ् खे़न् सिङ्बुङ्हाॽरे़ चैतुने़न् मे़मे़त्तुरो, ‘खे़ने़ॽ त्ये़ॽआङ् आनिगे हाङ् पोःक्खे़ॽओ॥’ 9 कर चैतुन सिङ्बुङ्ङिल्ले़ मे़त्तुसिरो, ‘माङ्हाॽ नु मनाहाॽ इङ्धाङ् के़बिबा इमे़ल्लुङ्बा आङ्गाॽ आनिःङ्गेन् ले़रुङ्बाबि हे़क्क्याङ् सिङ्बुङ्हाॽओ युक् चोगुङ्बाबि?’ 10 “खे़ब्याङ् सिङ्बुङ्हाॽरे़ पःत्छेॽबुङ्मान् मे़मे़त्तुरो, ‘खे़ने़ॽ त्ये़ॽआङ् आनिगे हाङ् पोःक्खे़ॽओ॥’ 11 कर पःत्छेॽबुङ्माल्ले़ मे़त्तुसिरो, ‘के़लिम्बा नु कुजा के़नुॽबा कुजाॽइन् आङ्गाॽ ले़रुङ्बाबि हे़क्क्याङ् सिङ्बुङ्हाॽओ युक् चोगुङ्बाबि?’ 12 “खे़ब्याङ् सिङ्बुङ्हाॽरे़ चे़ल्ले़क्सेॽबुङ्मान् मे़मे़त्तुरो, ‘खे़ने़ॽ त्ये़ॽआङ् आनिगे हाङ् पोःक्खे़ॽओ॥’ 13 कर चे़ल्ले़क्सेॽबुङ्ङिल्ले़ मे़त्तुसिरो, ‘माङ्हाॽ नु मनाहाॽरे़ खुन्छिॽ निङ्वाॽ तामा आङ्गाॽ आजे़ल्ले़क्सेॽ सेजङ्वान् ले़रुङ्बाबि हे़क्क्याङ् सिङ्बुङ्हाॽओ युक् चोगुङ्बाबि?’ 14 “कुनुप्मो के़रे़क् सिङ्बुङ्हाॽरे़ तिङ्ग्रेक् पुङ्ङिन् मे़मे़त्तुरो, ‘खे़ने़ॽ त्ये़ॽआङ् आनिगे हाङ् पोःक्खे़ॽओ॥’ 15 तिङ्ग्रेक् पुङ्ङिल्ले़ सिङ्बुङ्हाॽ मे़त्तुसिरो, ‘से़क्खाए खिनिॽ आङ्गाॽ हाङ् पोङ्मारे़ लागि माङ्थोःक्ना पिमा निङ्वाॽ के़जोगुम्ने़भग्र आङ्गाॽ आसिगाङ् इःप्तुङ्बादे़न्नो इःम्सिङ्से़ त्ये़म्मे़ॽओ॥ मेःन्ने़भग्र, तिङ्हाॽओलाम् मि लःन्लरो हे़क्क्याङ् ले़बनानबा साम्माङ्सिङ्हाॽ खाप्पुथ्यःङ् चोगुररो॥’ 16 “अबिमेलेके़न् हाङ् के़जोगुम्माङ् खिनिॽ से़क्खा नु कुलिङ्दो के़गे़प्पा याःम्बक् के़जोगुम्माङ् के़वयिबि? हे़क्क्याङ् यरुब-बाल नु खुने़ॽ कुहिम्सयङ्हाॽनु के़वाॽबा याःम्बक् के़जोगुम्माङ् के़वयिबि? खे़ल्ले़ चोगुबा कुइसिक् खे़ङ्हाॽ नुरिक् के़मे़त्तुम्सिम्माङ् के़वयिबि? 17 आङ्गाॽ आम्बारे़ खिनिॽ लागि थङ् थक्ते़ हे़क्क्याङ् खुने़ॽ सिमालिङ्दो थारिक्पा के़साक्पो थ्ये़आङ् मिद्यानिहाॽरे़ खुन्छिॽ हुक्कोलाम् खिनिॽ के़से़ःप्ति, 18 कर आइन् आङ्गाॽ आम्बारे़ कुहिम्सयङ्हाॽरे़ खुनिॽ तक्ले़ङ्वाओ खिनिॽ के़बोगिआङ् के़वयि, हे़क्क्याङ् खुने़ॽ नुबोङ् कुस्साहाॽ लत्छा लुङ्जङ्ङो के़ज्ये़प्तुम् के़से़रुम्सिम्माङ् वाॽ, खे़ब्याङ् खुने़ॽ कुयोःग्माल्ले़ कुस्सा अबिमेलेके़न् आनिॽ काॽइ फाॽआङ् सकेमबा यक्युङ्बाहाॽरे़ खुन्छिॽ हाङ् के़जोगुम्माङ् वाॽ— 19 “खिनिॽ आइन् यरुब-बाल हे़क्क्याङ् खुने़ॽ कुहिम्सयङ्हाॽरे़ लागि से़क्खा नु कुलिङ्दो के़गे़प्पा याःम्बक् के़जोगुम्माङ् के़वयिने़भग्र, अबिमेलेके़न्नु खिनिॽ निङ्वाॽ तासे़म्मे़ॽ खे़ब्याङ् खुने़ॽ खिनिॽनु कुनिङ्वाॽ ताररो! 20 मेःन्ने़भग्र, अबिमेलेकोलाम् मि लःन्ल हे़क्क्याङ् सकेमबा तुम्म्याङ्हाङ्हाॽ नु बेथ-मिल्लोन् खाप्पुथ्यःङ् चोगुर! सेकेमबा नु बेथ-मिल्लोबा तुम्म्याङ्हाङ्हाॽलाम्बाआङ् मि लःन्नाङ् अबिमेलेके़न् खाप्पुथ्यःङ् चोगुर!” 21 खे़न् एगाङ् योतामे़न् सुल्लि खे़त्छिङ्ङाङ् खुने़ॽ बेअर मे़प्मनाबादे़न्नो के़रे़, हे़क्क्याङ् खे़प्मोए युङ्मा हेःक्ते़, थेआङ्भे़ल्ले़ खुने़ॽ कुम्भुॽ अबिमेलेके़न्नु किसे़रो॥ सकेमबा यक्युङ्बाहाॽरे़ अबिमेलेके़न् मे़अत्तु 22 अबिमेलेके़न् इस्राइलिहाॽरे़ खुन्छिॽ युक्साबा पोःक्खे़बा तङ्बे सुम्सि एगाङ् 23 निङ्वाॽफुमाङ्ङिल्ले़ अबिमेलेके़न् नु सकेमबा तुम्म्याङ्हाङ्हाॽरे़ खुन्छिॽ लुम्मो ये़मे़न्दङ् ताप्फे़ःम्बा साम्धिक् पाङ्घु तासु, हे़क्क्याङ् सकेमबा मनाहाॽरे़ अबिमेलेके़न् इङ्ले़क्को मे़धासु॥ 24 यरुब-बालरे़ नुबोङ् कुस्साहाॽ मे़से़रुसिबा फे़न्याःम्बक्किल्ले़ लागि खे़ङ्हाॽ के़से़प्पा खुन्छिॽ नुसाॽ अबिमेलेकओ हे़क्क्याङ् खे़न् के़हुबा के़बङ्बा सकेमबा तुम्म्याङ्हाङ्हाॽओ कुले़क्वा मे़नुःक्तुर फाॽआङ् यहवे दाङ्बे़ल्ले़ कन् चोगुआङ् वये़॥ 25 अबिमेलेके़ल्ले़ कुदक्ले़ङ्वाओ सकेमबा तुम्म्याङ्हाङ्हाॽरे़ कोःक्माल्ले़ कुसम्मो लाङ्गे़घेःक्पाहाॽ के़रे़क् सुक्मासि नु नाप्मासिरे़ लागि मनाहाॽ मे़युक्खुसि, हे़क्क्याङ् कन् इङ्घङ्ङिन् अबिमेलेकरो मे़गे़त्तु॥ 26 आल्ल एबेदरे़ कुस्सा गाले़न् खुने़ॽ कुन्साॽ कुम्भुॽहाॽनु सकेमओ फे़रे़, हे़क्क्याङ् सकेमबा तुम्म्याङ्हाङ्हाॽरे़ खुन्छिॽ के़रे़क् सिक्लुङ्मान् खुने़ॽ ले़प्माङ् मे़हिसु॥ 27 खे़ङ्हाॽ खुन्छिॽ चे़ल्ले़क्सेॽ इक्ताप्हाॽओ मे़बेआङ् के़दुम्बा कुजाॽहाॽ मे़दुबु, हे़क्क्याङ् चे़ल्ले़क्सेॽ एःम्मादे़न्नो मे़एःप्सु॥ खे़न् एगाङ् खुन्छिॽ माङ्ङिल्ले़न् माङ्हिम्मो तङ्नाम् तोसे़ मे़बे॥ खे़प्मो खे़ङ्हाॽरे़ कुजाहाॽ मे़ज मे़धुङुआङ् अबिमेलेके़न् साक्मुरा मे़मे़त्तु॥ 28 खे़ब्याङ् एबेदरे़ कुस्सा गालरे़ मे़त्तुसि, “अबिमेलेके़न् हाःप्पे? हे़क्क्याङ् थेआङ् आनिॽ सकेमबाहाॽरे़ खुने़ॽ कुयाःम्बक् चोःक्मना पिमनाबाबे? थे खुने़ॽ यरुब-बालरे़ कुस्सा मेःम्बि? हे़क्क्याङ् खुने़ॽ कुभाॽबाङ्ङिन् जबुले़न् मेःम्बि? खे़न्नुःल्ले़ग सकेमरे़ कुम्बा हमोररे़ कुमनाहाॽ आनिॽ याःम्बक् चोःक्मा पिमासिल्ले़ नुबा पोङ्ॽ॥ आनिॽ थेआङ् अबिमेलेके़न् याःम्बक् चोःक्मना पिमनाबाबे? 29 कन् मनाहाॽ आङ्गाॽ आयुक्को मे़वये़बा हे़क्केःल्ले़ आङ्गाॽ अबिमेलेके़न् लाःत्लाःत् चोगुङ्बा वये़मे़न्॥ आङ्गाॽ खुने़ॽ अक्खे मे़त्तुङ्बा वये़, ‘खे़ने़ॽ के़धक्सुबाहाॽ के़रे़क् उःत्ते़से़ॽआङ् थङ् चोगे़ॽ॥’” 30 आल्ल ये़क्यक्कोबा सुहाङ्युक्पा जबुलरे़ एबेदरे़ कुस्सा गालरे़ कुबाःन्निन् खे़प्सुआङ् खुने़ॽ कुयाःक्ले़ॽरे़॥ 31 खुने़ॽ स्वाःत्ताङ् अबिमेलेकओ अक्खे मे़त्तुसिआङ् इङ्साबाहाॽ पाङ्घुदेसुसि, “एबेदरे़ कुस्सा गाले़न् नु खे़ल्ले़ कुन्साॽकुम्भुॽहाॽ सकेम मे़भे़रे़आङ् ये़क्यक्कोबा मनाहाॽ खे़ने़ॽ के़दक्ले़ङ्वाओ मे़हुसुसि मे़बक्खुसिर मे़याक्॥ 32 कल्ले़चोगुल्ले़ से़न्दिक्सा पोगे़ॽआङ् खे़ने़ॽ हे़क्क्याङ् खे़ने़ॽनु के़वाॽबा मनाहाॽरे़ इक्ताप्हाॽओ सुगे़म्सिम्मे़ॽआङ् युङे़म्मे़ॽ॥ 33 खे़न् एगाङ् तानाम् नाम् के़त्नुमे़ःन्ने ये़क्यक्किन् फत्ते़म्मे़ॽ, हे़क्क्याङ् आल्ल खे़न् नु खुने़ॽनु के़वाॽबा मनाहाॽ लाःक्कात् मे़लःन्निल्ले़ थे चोःक्मा पोङ्ॽ खे़न् चोगे़म्मे़ॽ॥” 34 कल्ले़चोगुल्ले़ अबिमेलेके़न् हे़क्क्याङ् खुने़ॽनु के़वाॽबा मनाहाॽ से़न्दिक्सा मे़बोगे़, हे़क्क्याङ् कुलक् लिसि मे़बोःक्खे़आङ् सकेम्मिन् फप्मारे़ लागि मे़जिङ्सिङ्ङाङ् मे़युङे़॥ 35 आल्ल एबेदरे़ कुस्सा गाले़न् लाःक्कात् पेआङ् ये़क्यक्कोबा यम्बा लाम्धेःप्पो लाःप्मादे़न्नो ये़बे़गरे़, हाबा खे़न् ये़म्मो अबिमेलेके़न् नु खुने़ॽ कुमनाहाॽ मे़जिङ्सिङ्बा दे़न्नोलाम् लाःक्कात् मे़लःन्दे़॥ 36 गालरे़ खे़ङ्हाॽ निसुसिआङ् जबुले़न् मे़त्तु, “ओमे़त्ते़ॽ, कोःक्माल्ले़ कुसम्मोलाम् मनाहाॽ यो मे़युर मे़बत्॥” जबुलरे़ मे़त्तु, “खे़ने़ॽ के़निसुसिबाहाॽग कोःक्मा फाङ्जङ्हाॽरे़ इःप्तुबादे़न्हाॽरो, मनाहाॽ हे़क्तङ्बाए खे़न् निधाःप्ल पत्॥” 37 कर याम्मो गालरे़ मे़त्तु, “कोःक्माहाॽरे़ कुलुम्मोबा ते़न्हाॽओलाम् मनाहाॽ यो मे़युर मे़बत्, हे़क्क्याङ् कुलुप् थिक् चैँ थुम्या के़इबाहाॽरे़ खुन्छिॽ यहिबा सिङ्बुङ् ले़प्माङ्लाम् मे़युर मे़बत्॥” 38 खे़ब्याङ् जबुलरे़ मे़त्तु, “खे़ने़ॽ के़बाःत्तुबा यम्बयम्बा पाःन्हाॽ आल्ल आत्ति वाॽ? खे़ने़ॽ के़बाःत्तुआङ् वये़, ‘अबिमेलेके़न् हाःत्ताङ् आनिॽ खुने़ॽ कुयुक्को वाॽमाबे?’ खे़ने़ॽ थेनाधेबा के़लेःत्तुसिआङ् मे़वये़बा मनाहाॽ हाबा कन्हाॽए मे़ःन्छिबि? आल्ल पेगे़ॽआङ् खे़ङ्हाॽनु थक्ते़ॽ॥” 39 कल्ले़चोगुल्ले़ गालरे़ सकेमबा यक्युङ्बाहाॽ तेॽरुसिआङ् अबिमेलेके़न् थङ्ङो फत्तु, 40 कर अबिमेलेकरे़ खुने़ॽ हारिजाःत्तुआङ् खे़न् खे़त्छिङ्॥ यम्बा लाम्धेःत्तो लाःप्मादे़न् थारिक्के लाम् कुले़ःम् चेहाॽ मे़से़रे़आङ् मे़ने़स्से़॥ 41 अबिमेलेके़न् पेआङ् अरुमाह मे़प्मनाबादे़न्नो आप्फेक् युङ्सिङ्, खम्भ्याङ् जबुलरे़ गाल नु खुने़ॽ कुन्साॽकुम्भुॽहाॽ सकेमलाम् लःत्तुदेसुसि॥ 42 कुदाःन्दिक्मा सकेमबा मनाहाॽ लाःक्कात् ताम्दाम्बादे़न्नो मे़बे, हे़क्क्याङ् कन् पाःन्निन् अबिमेलेके़न् मे़जे़क्तु॥ 43 कल्ले़चोगुल्ले़ खुने़ॽ कुमनाहाॽ तारुसिआङ् खे़ङ्हाॽ कुलुप् सुम्सि चोगुसि, हे़क्क्याङ् ये़क्यक् लाःक्कात् ताम्दाम्बादे़न्नो सुगुसिआङ् युङे़॥ आल्ल खुने़ॽ मनाहाॽ ये़क्यक् लाःक्कात् मे़लःन्दे़ मे़भे़रे़बा निसुसि, खे़ब्याङ् खुने़ॽ पोगे़आङ् खे़ङ्हाॽ थङ्ङो फत्तुसि॥ 44 अबिमेलेक हे़क्क्याङ् खुने़ॽनु के़वाॽबा मनासुम्हाॽ मे़जात्ते़र तगि मे़बोरे़ हे़क्क्याङ् ये़क्यक्को लाःप्मादे़न् यम्बा लाम्धेःप्पो थक्मारे़ लागि यारिप् मे़बोःक्खे़॥ खे़ब्याङ् वेॽ कुलुप् ने़त्छि मनाहाॽ मे़भे़रे़आङ् ताम्दाम्बादे़न्नो के़वाॽबाहाॽ मे़भत्तु मे़देॽरुसि, हे़क्क्याङ् खे़ङ्हाॽ मे़से़रुसि॥ 45 अबिमेलेकरे़ नाम्धाधा खे़न् ये़क्यक्को थङ् चोगु, हे़क्क्याङ् खे़न् हुक्काप् चोगु॥ खुने़ॽ खे़प्मोबा मनाहाॽ से़रुसि, ये़क्यक्किन् मे़यन्छु मे़देसु, खे़ब्याङ् खे़न् ते़न्नो युम्मिन् से़सु॥ 46 आल्ल सकेमबा चङ्हिम्मो के़याक्पा के़रे़क् मनाहाॽरे़ कन् पाःन्निन् मे़घे़प्सु, खे़ब्याङ् खे़ङ्हाॽ एल-बरित माङ्हिम्मोबा हाङ्यक्को मे़बे॥ 47 खे़ङ्हाॽ खे़प्मो सोरिक् मे़जुप्से़आङ् मे़वाॽ के़लॽबा पाःन्निन् अबिमेलेके़न् मे़जे़क्तु॥ 48 कल्ले़चोगुल्ले़ खुने़ॽ हे़क्क्याङ् खुने़ॽनु के़वाॽबा मनाहाॽ सल्मोन कोःक्माओ मे़धोःक्सिङ्॥ खुने़ॽ तःन्देन् याङ्सिङ्ङाङ् सिङ्बोराःक्किन् आःत्तु, हे़क्क्याङ् खुने़ॽ कुभक्ताङ्ङो पक्खु॥ खुने़ॽ कुमनाहाॽ मे़त्तुसि, “आङ्गाॽ थे चोगुङ्ल पत्ता ओमे़त्ते़म्मे़ॽ, हे़क्क्याङ् हाराहारा खिनिॽआङ् हे़क्केए चोगे़म्मे़ॽ॥” 49 कल्ले़चोगुल्ले़ के़रे़क् मनाहाॽरे़ सिङ्बोराःक्हाॽ मे़आःत्तु॥ खे़ब्याङ् खे़ङ्हाॽरे़ अबिमेलेके़न् मे़दिम्दु, हे़क्क्याङ् सिङ्बोराःक्हाॽ हाङ्यक् के़रे़क् पिसाङ् मे़लुप्सुआङ् मि मे़याक्तु॥ खम्भ्याङ् सकेम चङ्हिम्मोबा के़रे़क् मनाहाॽ मे़स्ये़, खे़ङ्हाॽ हप्मे़न् हे़न्छिङ् थिक् ये़म्बित्छा नु मे़न्छुमा मे़वये़॥ 50 खे़न् एगाङ् अबिमेलेके़न् तेबेस ये़क्यक्को पे, हे़क्क्याङ् खे़न् कब्रिङ् किर्गप् कबुआङ् हुक्काप् चोगु॥ 51 खे़न् ये़क्यक्किल्ले़ कुलुम्मो थधप् मे़ल्लॽमनाबा हाङ्यक् थिक् ने़स्से़, हे़क्क्याङ् ये़क्यक्कोबा के़रे़क् मनाहाॽ, ये़म्बित्छा नु मे़न्छुमाहाॽ खे़प्मो मे़से़ःप्सिङ्ङाङ् मे़युङे़॥ खे़ङ्हाॽरे़ हाङ्यक्किन् मे़सुबुआङ् खे़ल्ले़ कुसम्धाङ् मे़बे॥ 52 अबिमेलेके़न् हाङ्यक्को पेआङ् खे़न् थङ्ङो फत्तु॥ आल्ल खे़न् हाङ्यक्को मि केःप्मा फाॽआङ् खे़प्मोबा लाम्धेत् पेसाङ् पेःल्ले़, 53 मे़न्छुमा थिक्ले़ खुने़ॽ कुधे़गेःक्पो लुङ्सुम्मिन् लुम् मक्थाःन्दुआङ् खे़ल्ले़ कुमिक्खोःक्किन् यःप्सु पिरु॥ 54 अबिमेलेकरे़ खिमो खुने़ॽ कुभे़जुम् कुभे़या के़बङ्बा थाङ्बे़न्निन् उःत्तुआङ् मे़त्तु, “हारा के़दाभेःन् तरप् फिःक्खे़आङ् आङ्गाॽ से़राङ्ङे़ॽ, मेःन्ने़भग्र मे़न्छुमा थिक्ले़ खुने़ॽ से़रु फाॽआङ् मनाहाॽरे़ मे़बाःत्तुॽ॥” कल्ले़चोगुल्ले़ खे़न् थाङ्बे़न्निल्ले़ चिधुप् थुबुआङ् खे़न् स्ये़॥ 55 आल्ल इस्राइलिहाॽरे़ अबिमेलेके़न् स्ये़बा मे़निसुआङ् खे़ङ्हाॽ खुन्छिॽ आप्फेक् आप्फेक् हिम्मो मे़नुःक्खे़॥ 56 कम्भलॽरिक्के अबिमेलेकरे़ खुने़ॽ नुबोङ् कुम्भुॽकुन्साॽहाॽ से़रुसिआङ् कुम्बारे़ कुदक्ले़ङ्वाओ चोगुबा फे़न्याःम्बक्किल्ले़ कुले़क्वा निङ्वाॽफुमाङ्ङिल्ले़ खुने़ॽओ नुःक्तु, 57 हे़क्क्याङ् सकेमबा मनाहाॽरे़ मे़जोगुबा के़रे़क् फे़न्याःम्बक्हाॽरे़ कुले़क्वा निङ्वाॽफुमाङ्ङिल्ले़ नुःक्तु पिरुसिआङ् खुन्छिॽए थे़गेःक्पो थासु पिरुसि॥ यरुब-बालरे़ कुस्सा योतामरे़ माङ्दे साङ्ग्रा मे़त्तुसिबान् खे़ङ्हाॽओ से़क्खाए थ्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.