खासे़न्लोःम्बा 8 - लिम्बुमिद्यानिहाॽ कुनुप्मो हारिमे़द्ये़ 1 एफ्राइमबा मनाहाॽरे़ गिदोने़न् मे़मे़त्तु, “खे़ने़ॽ थेआङ् आनिगे़नु अक्खे के़जोगुबाबे? मिद्यानिहाॽनु थङ् चोःक्से़ के़बेःल्ले़ खे़ने़ॽ आनिगे थेआङ् याप्मि के़न्उःत्ते़न्बाबे?” हे़क्क्याङ् खे़ङ्हाॽरे़ खुने़ॽ मुरा मे़दोसुर आप्तिक् मे़गुःत्तु॥ 2 कर गिदोनरे़ खे़ङ्हाॽ मे़त्तुसि, “खिनिॽ के़जोगुम्बान्नु तङ्मे़ल्ले़ आङ्गाॽ थे चोगुङ्ङाङ् वाॽबे? थे एफ्राइमबा चे़ल्ले़क्सेॽओ कोःप्मनाबा सिलाहाॽ अबिएजेररे़ के़रे़क् कुजे़ल्ले़क्सेॽ सुम्मनाबान्नुःल्ले़ नुबा मे़जोःक्ने़म्बि? 3 निङ्वाॽफुमाङ्ङिल्ले़ मिद्यानबा युक्साबा ओरेब नु जएबे़न् खिनिॽ हुक्को थासुसिआङ् वाॽसि॥ खिनिॽ के़जोगुम्बा कुइसिक् आङ्गाॽ थे चोःक्मा सुक्तुङ्ङाङ् वाॽबे?” खुने़ॽ कन् कुबाःन्हाॽरे़ खे़ङ्हाॽरे़ खुन्छिॽ सिक् चिःक्तु॥ 4 गिदोने़न् यर्दन वहःङ्ङो ये़, हे़क्क्याङ् खुने़ॽ नु किप् सुम्सि कुमनाहाॽ पना मे़नासे़आङ् मे़वये़साङ् यर्दन नाधाःम्बि मे़गाःक्तुआङ् निङ्मिहाॽ मे़नाःत्तुसिआङ् मे़बत्छे़॥ 5 खुने़ॽ सुक्कोतबा मनाहाॽ मे़त्तुसि, “आङ्गाॽ कन् आमनाहाॽ कुभा चामा कुजा पिरे़म्सिम्मे़ॽ, थेआङ्भे़ल्ले़ खे़ङ्हाॽ साॽरिक् मे़नासे़आङ् मे़वाॽ, हे़क्क्याङ् आङ्गाॽ मिद्यानबा हाङ्हाॽ जेबह नु सल्मुन्नाःन् नाःत्तुङ्सिङ्ल पत्ता॥” 6 कर सुक्कोतबा लाम्लोबाहाॽरे़ नोगप् मे़बिरु, “थे जेबह नु सल्मुन्नाःन् खे़ने़ॽ के़हुक्को के़धासु के़सुरुसिआङ् वाॽसिबि? खे़ने़ॽ के़धक्सुबाहाॽ आनिगे थेआङ् कुजा पिरुम्सिम्बे़बे?” 7 गिदोनरे़ मे़त्तुसि, “हे़क्केने़भग्र आल्ल यहवे दाङ्बे़ल्ले़ जेबह नु सल्मुन्नाःन् आङ्गाॽ आहुक्को थासुसिॽ खे़ब्याङ् आङ्गाॽ मुरे़क् खारे़क् थेआङ् के़होःप्पादे़न्नोबा तिङ्ग्रेक् नु आलक्लक्पा याःन्हाॽरे़ खिनिॽ होरिक्किन् अक्खुङ्ॽ॥” 8 खुने़ॽ खे़प्मोलाम् पनिएल पे, खे़ब्याङ् खे़प्मोबा मनाहाॽ हे़क्केलॽरिक्के पेलि फाक्तुसि॥ पनिएलबा मनाहाॽरे़आङ् सुक्कोतबा मनाहाॽरे़ मे़मे़त्तुआङ् वये़बा कुइसिःक्के मे़मे़त्तु॥ 9 खुने़ॽ पनिएलबा मनाहाॽ मे़त्तुसि, “आङ्गाॽ नुरिक् तारिक् नुःङ्ङाआङ् खिनिॽ कन् चङ्हिम्मिन् थुप्सुङ् पिनिङ्ॽ॥” 10 जेबह नु सल्मुन्नाःन् खुन्छिॽ १५,००० थक्सुबाहाॽनु कर्कोरओ वये़त्छि॥ नाङ्गे़न् पिसाङ्बा मे़न्छाम् सुवाङ्हाॽरे़ खुन्छिॽ के़रे़क् मनासुम्हाॽलाम् के़नम्बा थक्सुबाहाॽ के़रे़क् कम्म्यालक् मे़वये़॥ खजुम्घया फे़जुम्भे़यारे़ काप्तुसिबा १,२०,००० मनाहाॽ ते़न्धङ्ङो मे़से़रुसिआङ् वये़॥ 11 नोबह नु योगबहाबा नाङ्गे़न् ले़प्माङ् साःङ्गाहिम्मो के़युङ्बाहाॽ लाङ्मे़घेगे़बा लाम् पोःक्खे़आङ् गिदोने़न् तगि थासिङ्, हे़क्क्याङ् खे़ङ्हाॽ सिङ्सिङ् मे़न्लॽरे़म्बा ये़म्मो खुने़ॽ थक्सुबाहाॽ थङ्ङो फत्तुसि॥ 12 जेबह नु सल्मुन्नाःन् खे़त्ने़सि, कर खुने़ॽ कन् मिध्यानि हाङ्हाॽ नाःत्तुसि, हे़क्क्याङ् ने़प्माङ् ते़म्सुसिआङ् खुन्छिॽ के़रे़क् थक्सुबाहाॽ हारिमे़द्ये़॥ 13 आल्ल योआसरे़ कुस्सा गिदोने़न् ते़न्धङ्ङोलाम् हेरेसबा चिहुॽहुॽबादे़न् पोःक्खे़आङ् नुःक्खे़ल्ले़, 14 खुने़ॽ सुक्कोतबा नालिगे़न् थाङ्बे़न् थिक् ते़म्सुआङ् सेःन्दोसु, हे़क्क्याङ् खे़ल्ले़ सुक्कोतबा नुबोङ्ङाङ् नुसि लाम्लोबाहाॽ नु ये़क्यक्कोबा तुम्भाक्साहाॽरे़ खुन्छिॽ मिङ्हाॽ गिदोने़न् साप्तु पिरु॥ 15 खे़न् एगाङ् गिदोने़न् सुक्कोतबा मनाहाॽओ फे़रे़आङ् मे़त्तुसि, “जेबह नु सल्मुन्नाःन् कप्मो वाॽसि, खुन्छिॽ याःम्बेओ खिनिॽ अक्खे के़बाःत्तुम्माङ् आङ्गाॽ याप्मि पान् के़मे़त्तिआङ् याप्मि तुक्खे के़जाःत्ते़आङ् वये़, ‘ओमे़त्ते़ॽ कप्मो जेबह नु सल्मुन्नाःन् खे़ने़ॽ के़हुक्को थ्ये़जुरे़सिआङ् वाॽसि हे़क्क्याङ् थेआङ् आनिगे खे़ने़ॽ के़मनाहाॽ कुजा पिरुम्सिम्बे़बाबे?’” 16 खे़ब्याङ् खुने़ॽ ये़क्यक्कोबा खे़न् तुम्भाक्साहाॽ तेॽरुसि, हे़क्क्याङ् खे़न् सुक्कोतबा मनाहाॽ मुरे़क् खारे़क् थेआङ् के़होःप्पादे़न्नोबा तिङ्ग्रेक् नु आलुक्लुक्पा याःन्हाॽरे़ हिप्तुसिआङ् खुम्दिङ् पिरुसि॥ 17 खुने़ॽ पनिएलबा चङ्हिम्मिन् थुप्सुदेसु हे़क्क्याङ् खे़न् ये़क्यक्कोबा मनाहाॽ से़रुसि॥ 18 खे़ब्याङ् खुने़ॽ जेबह नु सल्मुन्नाःन् मे़त्तुसि, “तबोरओ खिनिॽ के़से़रुम्सिम्बा मनाहाॽ आक्तङ्बा मे़वये़?” खुन्छिॽ पाःत्ते़सु, “खे़ङ्हाॽ खे़ने़ॽ हे़क्तङ्बाए मे़वये़, के़रे़क्ले़ खुन्छिॽ नारान् हाङ्सा हे़क्तङ्बा चोगे़॥” 19 गिदोनरे़ मे़त्तुसि, “खे़ङ्हाॽ आङ्गाॽ आम्मारे़ कुस्सा आङ्गाॽ आम्भुॽ आन्साॽसि मे़वये़॥ यहवे दाङ्बे़न् कुहिङ्वे़त् वाॽबा कुइसिक् आङ्गाॽ माङ्हे़क्सिङ्ङाआङ् पाःत्तुङ्ॽ, खिनिॽ खे़ङ्हाॽ कुहिङ्वे़त्ते के़ले़रुम्सिम्बा हे़क्केःल्ले़ग आङ्गाॽ खे़न्छिॽ मे़से़त्ने़सिङ्ङिन्बा वये़॥” 20 खे़ब्याङ् खुने़ॽ कुस्सा तुम्बा येतेरे़न् मे़त्तु, “खे़ने़ॽ पोगे़ॽआङ् खे़ङ्हाॽ से़रे़से़ॽ!” कर खे़न् ये़म्मो खुने़ॽ चुक्सा हिन्जाॽ वये़, हे़क्क्याङ् खुने़ॽ कुदाभेन् मे़भिःक्खुन्, थेआङ्भे़ल्ले़ खुने़ॽ किसे़॥ 21 कल्ले़चोगुल्ले़ जेबह नु सल्मुन्नारे़ गिदोने़न् मे़त्ते़सु, “आदाङ्बा ये़म्बित्छाने़ने़भग्र आप्फेक् फे़रे़ॽआङ् आन्छिगे आसे़रे़ॽ॥” खे़ब्याङ् गिदोने़न् पोगे़आङ् ने़प्माङ् से़रुसि, खे़ब्याङ् खुन्छिॽ उमेहाॽरे़ निगिःङ्मो के़बप्पा लाबाखे़ःक्वाहाॽ फे़न्दुआङ् तेॽरु॥ 22 इस्राइलिहाॽरे़ गिदोने़न् मे़मे़त्तु, “मिद्यानिहाॽरे़ खुन्छिॽ हुक्कोलाम् आनिगे आग्से़ःप्ते़आङ् वाॽ॥ आल्ल खे़ने़ॽ आनिगे युक्साबा पोःक्खे़ॽ, खे़न् एगाङ् के़स्सा, के़म्मे़न्छाॽइन् आनिगे युक्साबा पोङ्ल॥” 23 कर गिदोनरे़ मे़त्तुसि, “आङ्गाॽ इग्र आस्सान् मेःन् कर यहवे दाङ्बे़न्ने खिनिॽ सम्धाङ् युक्साबा पोङ्ॽ॥” 24 हे़क्क्याङ् खुने़ॽ मे़त्तुसि, “आङ्गाॽ खिनिॽ लत्छा पान् पेलि फाक्मा आनिङ्वाॽ वाॽ॥ खिनिॽ के़रे़क्ले़ के़नाप्तुम्सिम्बा खिनिॽ चिगक्वाहाॽओलाम् आङ्गाॽ लत्छा कुन्दुल्लो आबिरे़म्मे़ॽ॥” खे़न् निङ्मि इस्माएलिहाॽओ साम्म्याङ् कुन्दुल्लो वाःप्मा साक्थिम् वये़॥ 25 खे़ङ्हाॽरे़ मे़मे़त्तु, “निस्सेसाङ्, आनिगे खे़न् पिआसिगे़॥” खे़ब्याङ् चिरिक् थिक् मे़भे़सु, हे़क्क्याङ् के़रे़क्ले़ मे़नाप्तुसिबा खुन्छिॽ चिगक्वाहाॽलाम् खे़प्मो साम्म्याङ् कुन्दुल्लो थिक्थिक् लाप्मे़भुसु मे़बिरु॥ 26 खुने़ॽ नाःक्तुसिबा साम्म्याङ् कुन्दुल्लोहाॽ १,७०० सेकेल यारिक् पोःक्खे़॥ कङ्ग लाबाखे़ःक्वा हे़क्क्याङ् वेॽ वाःत्ति सामाहाॽ नु मिध्यानि हाङ्हाॽरे़ मे़जाक्खुबा पारान्ला चाङ्हाॽनुःल्ले़ वेॽ वये़॥ खे़ङ्हाॽरे़ खुन्छिॽ उमेहाॽरे़ निगिःङ्मो मे़वारुबा सिक्रिहाॽग निःप्माए मे़न्निरुन्॥ 27 खे़न् साम्म्याङ्हाॽलाम् गिदोनरे़ लत्छा लगेःप् चोगुआङ् खुने़ॽ कुये़क्यक् ओप्राओ खे़न् फत्छु॥ के़रे़क् इस्राइलिहाॽरे़ खे़न् से़वा मे़मे़त्तुआङ् कन्नु याम्बोःप्मा याःम्बक् मे़जोगु, हे़क्क्याङ् खे़न् गिदोन नु खुने़ॽ कुहिम्सयङ्हाॽ खुम्मासि लत्छा चे़न् पोःक्खे़॥ 28 मिद्यानिहाॽ इस्राइलिहाॽरे़ खुन्छिॽ युक्को मे़ध्ये़॥ खे़ङ्हाॽरे़ खुन्छिॽ नारान् चाङ्जाङ् मे़प्मा मे़न्छुक्तुन्॥ गिदोनरे़ कुहिङ्हिङ् आल्लसाङ् लिबोङ् तङ्बे थारिक् लाजेॽओ सनारुङ् पोःक्खे़रो॥ गिदोने़न् मासिङ् 29 खे़न् एगाङ् योआसरे़ कुस्सा यरुब-बाले़न् आप्फेक् कुहिम्मो पेआङ् युङ्मा हेःक्ते़॥ 30 खुने़ॽ नुबोङ् कुस्सा ये़म्बित्छा मे़वये़, थेआङ्भे़ल्ले़ खुने़ॽ यरिक् कुमेत् मे़वये़॥ 31 सकेमओआङ् खुने़ॽ कुजक्मेःत् थिक् वये़, खे़ल्ले़आङ् ये़म्बित्छा साधिक् कत्तु पिरु, हे़क्क्याङ् खे़ल्ले़ कुमिङ् खुने़ॽ अबिमेलेक वाःत्तु॥ 32 हे़क्क्याङ् योआसरे़ कुस्सा गिदोने़न् काप्पोबा तुम्से़आङ् मासिङ्, खम्भ्याङ् अबिएजेरिरे़ कुहिम्सयङ्हाॽरे़ खुन्छिॽ लाजेॽ ओप्रा मे़प्मनाबादे़न्नो मे़जिक्खु॥ 33 खुने़ॽ मासिङ्ङाङ् खिमो इस्राइलिहाॽरे़ याम्मो बाल माङ्हाॽनु याम्बोःप्मा याःम्बक् चोक् मे़हेःक्तु हे़क्क्याङ् बाल-बरिते़न् खुन्छिॽ माङ् मे़जोगु॥ 34 खे़ङ्हाॽरे़ खुन्छिॽ के़रे़क् पिसाङ्बा निङ्मिहाॽरे़ हुक्कोलाम् चोःक्युम्भो के़बिबा यहवे दाङ्बा खुन्छिॽ निङ्वाॽफुमाङ्ङिन् निङ्वाॽ मे़भेःत्छु॥ 35 यरुब-बाल, इग्र गिदोनरे़ इस्राइलिहाॽरे़ लागि चोगुबा के़रे़क् नुबा याःम्बक्हाॽ खे़ङ्हाॽरे़ निङ्वाॽ मे़भेःत्छुआङ् खुने़ॽ कुहिम्सयङ्हाॽ नुरिक् मे़प्मासि याःम्बक् मे़न्जोगुन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.