खासे़न्लोःम्बा 7 - लिम्बुगिदोनरे़ मिद्यानिहाॽ नाःन्दुसि 1 यरुब-बाल, खुने़ॽ गिदोन मे़मे़त्तु, हे़क्क्याङ् खुने़ॽनु के़वाॽबा के़रे़क् मनाहाॽ आन्देन् तानाम्सा मे़बोगे़आङ् हरोदबा च्वाःत् वाबुन्दाक्वाओ साःङ्गाहिम्हाॽ मे़घिङ्घु॥ मिद्यानिहाॽरे़ग इस्राइलिहाॽरे़ खुन्छिॽ थोहाङ् ले़प्माङ् मोरे कोःक्माबा ने़ने़बादे़न्नो साःङ्गाहिम्हाॽ मे़जोगु॥ 2 यहवे दाङ्बे़ल्ले़ गिदोने़न् मे़त्तु, “मिद्यानिहाॽ खिनिॽ हुक्को थामासिरे़ लागि खे़ने़ॽनु के़वाॽबा मनाहाॽ आङ्गाॽ चाहाॽ चोःक्काबानुःल्ले़ यरिक् मे़वाॽ, खे़ल्ले़चोगुल्ले़ मिद्यानिहाॽ आङ्गाॽ के़हुक्को थामासि मे़सुक्कान् मेःन्ने़भग्र इस्राइलिहाॽ आङ्दिङ् मे़लॽ, हे़क्क्याङ् खे़ङ्हाॽरे़ खुन्छिॽ आप्फेक् मुक्साम्मिल्ले़ कन् थङ्ङिन् नाःन्दुम्बे़बा फाॽआङ् खे़ङ्हाॽरे़ मे़बाःत्तुॽ॥ 3 आल्ल मनाहाॽरे़ मे़घे़प्सुर यारिक् लत्छा इङ्भन् चोगे़ॽ, हे़क्केलॽरिक् कप्मो किमे़ल्ले़ के़यङ्बा कुभा मे़वाॽने़भग्र खे़ङ्हाॽ गिलाद कोःक्मालाम्मे खिमो खुन्छिॽ हिम्मो मे़नुःङ् मे़बेःक्ल॥” कम्भलॽरिक् निबोङ्ङाङ् ने़त्छि हे़न्छिङ् मे़नुःक्खे़ मे़बे, हे़क्क्याङ् थिबोङ् हे़न्छिङ् मे़वये़ मे़याःक्ते़॥ 4 कर यहवे दाङ्बे़ल्ले़ गिदोने़न् मे़त्तु, “आल्लसाङ् मनाहाॽ यरिक् मे़वाॽ॥ खे़ङ्हाॽ यो वहःङ्ङो तेॽरे़से़ॽ, हे़क्क्याङ् खे़ने़ॽ के़लागि खे़ङ्हाॽलाम् आङ्गाॽ से़न्दुङ्सिङ्ॽ॥ आल्ल आङ्गाॽ अक्खे पाःत्तुङ्ॽ, ‘कन् मनान्ग खे़ने़ॽनु पेक्॥’ खे़ब्याङ् खे़न् पेक्॥ हे़क्क्याङ् आङ्गाॽ अक्खे पाःत्तुङ्, ‘कन् मनान् खे़ने़ॽनु मे़बेःक्ने़न्॥’ खम्भ्याङ् खे़न् मे़बेःक्ने़न्॥” 5 कल्ले़चोगुल्ले़ गिदोनरे़ मनाहाॽ यो वहःङ्ङो युरुसि, हे़क्क्याङ् यहवे दाङ्बे़ल्ले़ खुने़ॽ मे़त्तु, “ख्याबा कुइसिक् खुन्छिॽ ले़सोःप्पाल्ले़ च्वाःत् के़लाक्पाआङ् के़धुङ्बाहाॽ के़रे़क् थिक्ले़प्माङ् ये़प्से़से़ॽ, हे़क्क्याङ् थिक्नाहाङ् ले़प्माङ् चैँ थुङ्बोःल्ले़ के़दक्सिङ्बाआङ् च्वाःत् के़धुङ्बाहाॽ ये़प्से़से़ॽ॥” 6 हुक्किल्ले़ मे़बागुआङ् च्वाःत् के़लाक्पाआङ् के़धुङ्बाहाॽ किप् सुम्सि मे़योरे़, हे़क्क्याङ् वेॽहाॽरे़ थुङ्बोहबत् मे़भन्छिङ्ङाङ् च्वाःत् मे़धुङु॥ 7 यहवे दाङ्बे़ल्ले़ गिदोने़न् मे़त्तु, “कन् किप् सुम्सि आत्तिन्हाॽरे़ मे़लागुआङ् च्वाःत् मे़धुङु हाबा कन्हाॽलाम्बाए आङ्गाॽ खिनिॽ से़ःप्निङ्ॽ, हे़क्क्याङ् मिद्यानिहाॽ आङ्गाॽ खे़ने़ॽ के़हुक्को थासुङ्सिङ्ॽ॥ वेॽहाॽ के़रे़क् खुन्छिॽ आप्फेक् आप्फेक् ते़न्हाॽओ मे़बेःक्ल॥” 8 कल्ले़चोगुल्ले़ गिदोनरे़ कन् वेॽ के़रे़क् इस्राइलिहाॽ खुन्छिॽ आप्फेक् आप्फेक् साःङ्गाहिम्हाॽओ पाङ्घुदेसुसि, हे़क्क्याङ् खे़न् किप् सुम्सि मनाहाॽ लारुसि॥ हे़क्क्याङ् खे़ङ्हाॽरे़ वेॽ मनाहाॽरे़ मे़गत्तुबा चामा कुजाहाॽ नु सादाङ्हाॽ मे़लारु॥ मिद्यानिहाॽरे़ खुन्छिॽ साःङ्गाहिम्हाॽ योहाङ् ले़प्माङ् ने़ने़बादे़न्नो ने़स्से़॥ 9 खे़न् से़न्दिक् यहवे दाङ्बे़ल्ले़ खुने़ॽ मे़त्तु, “पोगे़ॽआङ् यो साःङ्गाहिम्हाॽओ पेगे़ॽ, थेआङ्भे़ल्ले़ आङ्गाॽ खे़ङ्हाॽ खे़ने़ॽ के़हुक्को थासुङ्सिङ्ङाङ् मे़वाॽ॥ 10 हे़क्के चोःक्मा खे़ने़ॽ के़गिने़फग्र तगि खे़ने़ॽ के़से़वारोबा पुराहःन्नु यो साःङ्गाहिम्हाॽओ पेगे़ॽ, 11 हे़क्क्याङ् खे़ङ्हाॽरे़ थे़मा मे़बाःत्तुर मे़याक्पि खे़प्से़ॽ॥ हाबा खे़न् पाःन्निन् के़घे़प्सुआङ् एगाङ् साःङ्गाहिम्हाॽ फप्मारे़ लागि खे़ने़ॽ आःन्छिङ्मा के़घोसुॽ॥” कल्ले़चोगुल्ले़ खुने़ॽ नु खे़न् कुसे़वारोबा पुराहःन् थङ् चोःक्मारे़ लागि मनाहाॽ मे़युङे़ मे़गरे़बा साःङ्गाहिम्हाॽरे़ कुयाओ थक्सुबा ये़प्नाओ पेसे़त्छि॥ 12 आल्ल मिध्यानि, अमाले़कि नु नाङ्गे़न् ले़प्माङ्बा वेॽ मे़न्छाम् सुवाङ्हाॽ यरिक् निःङ्घुक्वा कुइसिक् सधे़क् ने़ने़बादे़न्नो मे़ने़स्से़॥ उमेहाॽग निःप्माए मे़न्निःत्छे मे़वये़॥ खानिःत्तो खे़ङ्हाॽ वरःङ्ङोबा ये़ःङ्घा चेक् यारिक् मे़वये़॥ 13 आल्ल गिदोने़न् निःत्ताङ् के़रे़बा ये़म्मोए मनाधिक्ले़ कुन्जुम्मिन् खुने़ॽ कुसे़प्माङ्ङिन् चे़क्तुर युङे़॥ खे़ल्ले़ मे़त्तु, “ओमे़त्ते़ॽ आङ्गाॽ से़प्माङ्मो ले़प्पे़प्पा हःक्सि खरे़ःङ् थिक् मिद्यानिहाॽरे़ खुन्छिॽ साःङ्गाहिम्हाॽओ लोःक्ते़र के़ङे़र त्ये़बा माक्तुङ्॥ खे़न् खरे़ःङ्ङिल्ले़ साःङ्गाहिम्हाॽ ले़क्खुआङ् चोःन्दे़र थारिक् खे़न् खरे़ःङ्ङिन् साःङ्गाहिम्हाॽओ साॽरिक् तोःक्ते़॥” 14 खुने़ॽ कुजुम्मिल्ले़ नोगप् पिरु, “से़क्खासाङ् कङ्ग इस्राइलि योआसरे़ कुस्सा गिदोनरे़ कुदाभेरो॥ निङ्वाॽफुमाङ्ङिल्ले़ मिद्यानिहाॽ नु के़रे़क् थक्सुबाहाॽ खुने़ॽ कुहुक्को थासुसिआङ् वाॽ॥” 15 आल्ल गिदोनरे़ ताॽदि से़प्माङ्ङिन् नु खे़ल्ले़ कुबेन् खे़प्सुआङ् खुने़ॽ निङ्वाॽफुमाङ्ङिन् साबन् फन्छिङ्ङाङ् से़वा मे़त्तु॥ खे़न् एगाङ् खुने़ॽ इस्राइलिहाॽरे़ खुन्छिॽ साःङ्गाहिम्हाॽओ नुःक्खे़द्ये़आङ् मे़त्तुसि, “पोगे़म्मे़ॽ, यहवे दाङ्बे़ल्ले़ मिद्यानिहाॽरे़ खुन्छिॽ थक्सुबा ने़त्ना साःङ्गाहिम्मिन् खिनिॽ हुक्के़सुप्तिआङ् वाॽ॥” 16 खुने़ॽ खे़न् किप् सुम्सि मनाहाॽ कुलुप् सुम्सि चोगुसि, हे़क्क्याङ् के़रे़क् मनाहाॽ लत्छा लत्छा सादाङ् नु सिगाङ् ले़प्माङ् मिजोत् के़दिःप्पा थेआङ् मे़न्याक्मनाबा फुजिक् थिक्थिक् पिरुसि॥ 17 खे़ब्याङ् खुने़ॽ खे़ङ्हाॽ मे़त्तुसि, “आङ्गाॽ ओआमे़त्ते़म्मे़ॽ, आङ्गाॽ आदिम्दे़म्मे़ॽ॥ आल्ल आङ्गाॽ साःङ्गाहिम्हाॽरे़ कुयाओ के़त्ताआ, खे़ब्याङ् आङ्गाॽ थे़मा चोगुङ्ॽ खिनिॽआङ् हाबा हे़क्केए चोगे़म्मे़ॽ॥ 18 आल्ल आङ्गाॽ हे़क्क्याङ् आङ्गाॽनु के़वाॽबा के़रे़क् आमनाहाॽरे़ सादाङ्ङिन् मुःत्तुम्बे़, खे़बे़ल्ले़ खिनिॽआङ् साःङ्गाहिम्हाॽ के़रे़क् पिसाङ् खिनिॽ सादाङ्हाॽ मुःत्ते़म्मे़ॽ, खम्भ्याङ् अःक्ते़म्मे़ॽआङ् पाःत्ते़म्मे़ॽ, ‘यहवे दाङ्बे़ल्ले़ कुलागि नु गिदोनरे़ कुलागिरो!’” 19 इक्के़गोबा कम्ब्राङ्हाॽ खारक् मे़ले़क्सिङ्ङाङ् मे़ये़बे़॥ खे़ङ्हाॽरे़ खुन्छिॽ सादाङ्हाॽ मे़मुःत्तु, गिदोन हे़क्क्याङ् खुने़ॽनु के़वाॽबा किप् थिक् मनाहाॽ से़न्दिक् थिबोङ् मुक्ते़ल्ले़ साःङ्गाहिम्हाॽरे़ कुयाओ मे़गे़रे़॥ हे़क्क्याङ् खुन्छिॽ हुक्को मे़गत्तुबा फुजिक्हाॽ मे़हे़रु॥ 20 खे़न् सुम्सिए लुप् के़रे़क्ले़ खुन्छिॽ आप्फेक् आप्फेक् सादाङ्हाॽ मे़मुःत्तु खे़ब्याङ् फुजिक्हाॽ मे़हे़रु॥ फे़ङ्वा हुक्को मिजोत् नु चुक्वा हुक्को सादाङ्ङिन् मे़याङ्सिङ्ङाङ् खे़ङ्हाॽ मे़अःक्ते़, “यहवे दाङ्बे़ल्ले़ कुलागि नु गिदोनरे़ कुलागि ताभे!” 21 खे़ङ्हाॽ के़रे़क् आप्फेक् मे़ये़म्सिङ्बादे़न्नोए साःङ्गाहिम्हाॽ के़रे़क् पिसाङ् मे़ये़बे़ मे़गरे़, हे़क्क्याङ् के़रे़क् मिध्यानि थक्सुबाहाॽ मे़अःक्ते़ मे़भिःक्ते़र मे़घे़त्छिङ्॥ 22 खे़न् किप् सुम्सि मनाहाॽरे़ खुन्छिॽ आप्फेक् आप्फेक् सादाङ्हाॽ मे़मुःत्तुल्ले़, यहवे दाङ्बे़ल्ले़ थक्सुबा ने़त्ना साःङ्गाहिम् कुले़ःम् थिक्किन् वेॽइल्ले़ कुदक्ले़ङ्वाओ फोःक्खुसि॥ खे़ब्याङ् मिध्यानि थक्सुबाहाॽ ससेराबा बेथ-सित्ताओ तब्बातरे़ कुयाओबा हाबिल-महोलाबा इःन्दोओ थारिक् मे़घे़त्छिङ्॥ 23 गिदोनरे़ नप्तालि, आसेर थाःक्हाॽ नु मनस्से थाःक्हाॽरे़ खुन्छिॽ ने़प्माङ् ले़प्माङ्बा आल्लसाङ् यरिक् इस्राइलिहाॽ उःत्तुसि, हे़क्क्याङ् खे़ङ्हाॽरे़ मिद्यानिहाॽ मे़नाःत्तुसि॥ 24 गिदोनरे़ एफ्राइमबा के़रे़क् कोःक्मा फाङ्जङ्बा लाजेॽहाॽओ कन् इङ्घङ्ङिन् तेॽमाआङ् से़मारे़ लागि मनाहाॽ पाङ्घुसि, “खिनिॽ यो थाआसिम्मे़ॽआङ् मिद्यानिहाॽ मे़क्खे़म्सिम्मे़ॽ, हे़क्क्याङ् बेथ-बरा थारिक् यर्दन वहःङ्ङो च्वाःत् के़ने़बादे़न्हाॽ खे़ङ्हाॽरे़ खुन्छिॽ तगि हुक्काप् चोगे़म्मे़ॽ॥” कल्ले़चोगुल्ले़ के़रे़क् एफ्राइमिहाॽ मे़उःत्तुसि, खम्भ्याङ् बेथ-बरा थारिक् यर्दन वहःङ्ङो च्वाःत् के़ने़बाहाॽ खे़ङ्हाॽरे़ हुक्काप् मे़जोगु॥ 25 खे़ङ्हाॽरे़ ने़प्फु मिध्यानि युक्साबा ओरेब नु जएबे़न् मे़दे़म्सुसि॥ ओरेबे़न् खे़ङ्हाॽरे़ ओरेबबा याक्पेॽओ मे़से़रु हे़क्क्याङ् जएबे़न्ग जएबबा चे़ल्ले़क्सेॽ एःम्मादे़न्नो मे़से़रु, खे़ब्याङ् मिद्यानिहाॽ पुबेलाप्सा चक्मे़ल्लॽए मे़नाःत्तुसि॥ याङ्सि खे़ङ्हाॽरे़ ओरेब नु जएबरे़ खुन्छिॽ थे़गेक्पाहाॽ यर्दन कत्नाहाङ्दाङ् गिदोनरो मे़भे़त्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.