खासे़न्लोःम्बा 6 - लिम्बुगिदोने़न् इस्राइलबा खासे़न्लोःम्बा पोङ् 1 याम्मो इस्राइलिहाॽरे़ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने मे़जोगु, हे़क्क्याङ् खुने़ॽ खे़ङ्हाॽ मिद्यानिहाॽरे़ खुन्छिॽ हुक्को तङ्बे नुसि थारिक् थासुसि॥ 2 मिद्यानिहाॽ साॽरिक् मुक्साम्साबा मे़जोगे़, हे़क्क्याङ् खे़ङ्हाॽरे़ मे़जोगुल्ले़ इस्राइलिहाॽ कोःक्माहाॽओ, लुङ्फुक्कोहाॽओ नु से़ःप्सिङ्मादे़न्हाॽओ पेःक्माआङ् युङ्मा पोःक्खे़॥ 3 आल्ल इस्राइलिहाॽरे़ कुजा मे़हेॽरु मे़लेःत्तुल्ले़ मिद्यानिहाॽ नु अमाले़किहाॽ हे़क्क्याङ् नाङ्गे़न् ले़प्माङ्बा मे़न्छाम् सुवाङ्हाॽ मे़भे़रे़॥ 4 खे़ङ्हाॽरे़ लाजेॽओ साःङ्गाहिम्हाॽ मे़जोगुआङ् मे़युङ्सिङ् हे़क्क्याङ् गाजा कुया थारिक्पा कुजा इक्ताप्हाॽ मे़होःप्तु मे़देसु, कम्म्याक्लक् मेःन् इस्राइलिहाॽरे़ लागि मे़ल्लुक्, पित् नु अदङ् वेॽ कुहिङ्वे़त् थे़माआङ् मे़ल्ले़रुसिन्॥ 5 खे़ङ्हाॽरे़ खुन्छिॽ पिप्मा पित् लुप्हाॽ नु साःङ्गाहिम् कुघाप्माहाॽ मे़दारुआङ् निःङ्घुक्वाःल्ले़ कुबन्ज्याङ्मा कुइसिक् मे़द्ये़॥ मनाहाॽ नु खे़ङ्हाॽरे़ खुन्छिॽ उमेहाॽ निःप्मे़न्दे़त् आत्तातान्ने यरिक् मे़वये़॥ खे़ङ्हाॽरे़ लाजेन् वरे़ङ्ले़ङ् मे़ङ्मारे़ लागि मे़भत्तु॥ 6 कम्भलॽरिक्के मिद्यानिहाॽरे़ इस्राइलिहाॽ याङ्गे़साॽबा मे़जोगुसि, हे़क्क्याङ् कुभाॽरे़ लागि इस्राइलिहाॽरे़ यहवे दाङ्बे़न् पेलि मे़भाक्तु॥ 7 मिद्यानिहाॽरे़ तुक्खे मे़जाःत्तुसिबाल्ले़ चोगुल्ले़ इस्राइलिहाॽरे़ यहवे दाङ्बे़न् पेलि मे़भाक्तुल्ले़, 8 खुने़ॽ खे़ङ्हाॽरे़ खुन्छिॽ लागि माङ्निङ्वाॽपान् के़बाःप्पा थिक् पाङ्घु तासु, खुने़ॽ खे़ङ्हाॽ मे़त्तुसि, “यहवे दाङ्बा इस्राइलबा निङ्वाॽफुमाङ्ङिल्ले़ अक्खे पाःत्तुॽ—मिस्रबा योक् लाजेॽलाम् आङ्गाॽ खिनिॽ लःत्निङ् फे़त्निङ्॥ 9 मिस्रिहाॽरे़ खुन्छिॽ हुक्कोलाम् नु खिनिॽ तुक्खे के़जाःप्पाहाॽरे़ खुन्छिॽ हुक्कोलाम् आङ्गाॽ खिनिॽ चोःक्युम्भो पिनिङ्॥ आङ्गाॽ खे़ङ्हाॽ खिनिॽ तगिलाम् नाःत्तुङ्देसुङ्सिङ्, खम्भ्याङ् खे़ङ्हाॽरे़ खुन्छिॽ लाजेन् खिनिॽ पिनिङ्॥ 10 आङ्गाॽ मे़त्निङ्, ‘आङ्गाॽ यहवे खिनिॽ निङ्वाॽफुमाङ्आ॥ खिनिॽ के़युङिबा एमोरिहाॽरे़ खुन्छिॽ लाजेॽओबा माङ्हाॽ से़वा मे़मे़त्ते़म्सिम्मिन्ने़ॽ॥’ कर आङ्गाॽ आबाःन्निन् खिनिॽ मे़ङ्घे़म्मे के़वयिॽ॥” 11 आल्ल यहवे दाङ्बे़ल्ले़ कुमाङ्लाइङ्बे़न् ये़आङ् अबिएजेरि योआसरे़ ओप्रा मे़प्मनाबा कुलाजेॽओबा यहिबा सिङ्बुङ् सिगाङ् युङ्सिङ्॥ योआसरे़ कुस्सा गिदोने़न्ग मिद्यानिहाॽलाम् चिङ्सिङ्मारे़ लागि चे़ल्ले़क्सेॽ एःम्मादे़न्नो मासि हिप्नु यागे़॥ 12 खे़ब्याङ् यहवे दाङ्बे़ल्ले़ कुमाङ्लाइङ्बे़न् गिदोनरो ओसेःन्धाक्सिङ्ङाङ् खुने़ॽ मे़त्तु, “खे़ने़ॽ मुक्के़गुबा थक्सुबाने़, हे़क्क्याङ् यहवे दाङ्बे़न् खे़ने़ॽनु वाॽरो॥” 13 गिदोनरे़ खे़न् मे़त्तु, “आदाङ्बे, खे़प्से़ॽओ, यहवे दाङ्बे़न् से़क्खाए आनिगे़नु वाॽने़भग्र कन् के़रे़क् पाःन्हाॽ आनिगे थेआङ् तुमुम्बे़बे? खे़न् के़रे़क् निङ्वाॽ के़माबा खुने़ॽ कुयाःम्बक्हाॽ थे़मा पोःक्खे़बे, आनिगे पाधे़बाहाॽलाम् खे़न् खे़म्सुम्बे़आङ् वाॽ, खे़ङ्हाॽरे़ अक्खे मे़बाःत्तुआङ् वये़, ‘थे यहवे दाङ्बे़ल्ले़ मिस्र लाजेॽलाम् आनिॽ आलःत्ते़ आभे़त्ते़बा मेःम्बि?’ कर आल्लग यहवे दाङ्बे़ल्ले़ आनिॽ आनाॽरे़आङ् वाॽ, हे़क्क्याङ् मिद्यानिहाॽरे़ खुन्छिॽ हुक्को आनिॽ हुक्आसुप्ते़ आदेसे़आङ् वाॽ॥” 14 खे़ब्याङ् यहवे दाङ्बे़न् हिसिङ्ङाङ् मे़त्तु, “पेगे़ॽ, इस्राइलिहाॽ मिद्यानिहाॽरे़ खुन्छिॽ हुक्कोलाम् से़ःप्मासिरे़ लागि खे़ने़ॽओ के़याक्पा कन् मुक्साम्मिन् ओगप् चोगे़ॽ॥ खे़ने़ॽ के़बाङ्बे़न् आङ्गाॽएरो॥” 15 गिदोनरे़ मे़त्तु, “आदाङ्बे, खे़प्से़ॽओ, आङ्गाॽ आक्खेलॽरिक् इस्राइलिहाॽ से़ःप्मा सुक्तुङ्सिङ्बे? आङ्गाॽ आधाःक्हाॽ ओमे़त्ते़से़ॽ खे़न् मनस्सेओ के़रे़क्नुःल्ले़ मे़न्धुम्मनाबा चोक्, हे़क्क्याङ् आङ्गाॽ आम्बारे़ कुहिम्सयङ्ङो आङ्गाॽ के़रे़क्नुःल्ले़ चुक्पा वाॽआ॥” 16 यहवे दाङ्बे़ल्ले़ नोगप् पिरु, “कर आङ्गाॽ खे़ने़ॽनु वाॽआ, हे़क्क्याङ् खे़ने़ॽ के़रे़क् मिद्यानिहाॽ लत्छा मना कुइसिक् चिधक् चिधक् के़धगुसिॽ॥” 17 गिदोनरे़ मे़त्तु, “आदाङ्बारे़ आङ्गाॽ लुङ्माॽ के़दुक्काने़भग्र, खे़ने़ॽ आङ्गाॽनु के़बाःप्पे़न् यहवे दाङ्बाने़ के़लॽबा मिक्सेन् पिराङ्ङे़ॽ॥ 18 पेलि फाक्ने़, आङ्गाॽ आहुक्वान् तारुङ्ङाङ् खे़ने़ॽ के़दगि मे़न्दोःन् मे़न्ने़ए थारिक् खे़ने़ॽ कप्मोलाम् मे़बेगे़न्ने़ॽओ॥” हे़क्क्याङ् खुने़ॽ मे़त्तु, “खे़ने़ॽ के़न्दाने़न्ल थारिक् आङ्गाॽ आम्भा कप्मो हाङ्ने़॥” 19 खे़ब्याङ् गिदोने़न् हिम्मो पेआङ् मे़ःन्दसाःत् सा थोःक्तु, हे़क्क्याङ् एफाधिक् फेॽरुम् के़भङ्बा सिदाॽ मे़न्याक्केबा खरे़ःङ् ले़ःङ्सु॥ खुने़ॽ सान्ग लत्छा नाॽइमाओ याक्तु हे़क्क्याङ् कुवान्ग लत्छा खोर्याओ केःत्तुआङ् यहिबा सिङ्बुङ् सिगाङ् यहवे दाङ्बे़ल्ले़ कुमाङ्लाइङ्बे़ल्ले़ कुदगि तारुआङ् तोःन्दु॥ 20 निङ्वाॽफुमाङ्ङिल्ले़ कुमाङ्लाइङ्बे़ल्ले़ खुने़ॽ मे़त्तु, “खे़न् सान् नु के़भङ्बा सिदाॽ मे़न्याक्केबा खरे़ःङ्ङिन् कन् लुङ्जङ्ङो युक्खे़ॽ, हे़क्क्याङ् कुवान्ग हुक्खे़देसे़ॽ॥” खे़ब्याङ् गिदोनरे़ हे़क्केए चोगु॥ 21 खे़ब्याङ् यहवे दाङ्बे़ल्ले़ कुमाङ्लाइङ्बे़ल्ले़ हुक्को कत्तुबा तक्काःत्तिन् सन्छुआङ् कुसम्मिल्ले़ खे़न् सान् नु खरे़ःङ्ङिन् सुसु॥ खे़ब्याङ् लुङ्जङ्ङोलाम् मि तिरे़आङ् खे़न् सान् नु खरे़ःङ्ङिन् थ्यःङ् मिधिक्खुदेसु॥ हे़क्क्याङ् यहवे दाङ्बे़ल्ले़ कुमाङ्लाइङ्बे़न् मये़बे॥ 22 खे़ब्याङ् गिदोनरे़ खे़ङ्ग यहवे दाङ्बे़ल्ले़ कुमाङ्ला इङ्बारे़त्छ के़लॽबा निङ्वाॽ खोसुआङ् पाःत्तु, “आम्बि, मुक्साम्दाङ्बा यहवे दाङ्बे! आङ्गाॽ यहवे दाङ्बे़ल्ले़ कुमाङ्लाइङ्बे़न् नादुम्दुम्बा निसुङ्!” 23 कर यहवे दाङ्बे़ल्ले़ खुने़ॽ मे़त्तु, “सनारुङ्! मे़गिसे़न्ने़ॽ, खे़ने़ॽ के़न्छिने़न्॥” 24 गिदोनरे़ यहवे दाङ्बे़ल्ले़ कुलागि खे़प्मो लत्छा ले़त्ति तोःम्मादे़न् चोगु, हे़क्क्याङ् खे़ल्ले़ कुमिङ् यहवे दाङ्बे़न् सनारुङ्दाङ्बा युक्खु॥ खे़न् आइन् थारिक्काङ् अबिएजेरिरे़ कुलाजेॽ ओप्राओ ने़रो॥ 25 आम्भा खे़न् से़न्दिक् यहवे दाङ्बे़ल्ले़ गिदोने़न् मे़त्तु, “खे़ने़ॽ के़म्बारे़ कुधक्सा लुप्पोलाम् तङ्बे नुसि के़गे़प्पा निसिगेक्पा से़गम्बा पित् थिक् तारे़ॽ, के़म्बारे़ कुबाल माङ्ङिल्ले़ कुले़त्ति तोःम्मादे़न्निन् यन्छे़देसे़ॽ, हे़क्क्याङ् खे़ल्ले़ कुयाओ के़युङ्बा असेरा माङ् नावाइत्लान् सोःन्दे़ॽ॥ 26 खे़ब्याङ् हाबा खे़न् चन्जम्बादे़न्नो यहवे दाङ्बा के़निङ्वाॽफुमाङ्ङिल्ले़ कुलागि कुइःत् के़दाबा ले़त्ति तोःम्मादे़न् थिक् चोगे़ॽ, हे़क्क्याङ् खे़न् निसिगेक्पा से़गम्बा पित्ते़न् याङ्सिङ्ङे़ॽआङ् खे़ने़ॽ के़सोःन्दुबा असेरा नावाइत्ला सिङ्ङिल्ले़ मिधिङ्मनादेमनाबा सिदुङ्जभा तोःन्दे़ॽ॥” 27 खे़ब्याङ् गिदोनरे़ खुने़ॽ कुसे़वारोबाहाॽओबा थिबोङ् मनाहाॽ याङ्सिङ्ङाङ् यहवे दाङ्बे़ल्ले़ खुने़ॽ मे़त्तुबा कुइसिक् चोगु॥ कर खुने़ॽ कुम्बारे़ कुहिम्सयङ् हे़क्क्याङ् ये़क्यक्कोबा मनाहाॽनु किसे़, कल्ले़चोगुल्ले़ खुने़ॽ कन् याःम्बक्किन् ले़न्दिक् मेःन् कर से़न्दिक् चोगु॥ 28 आल्ल ये़क्यक्कोबा मनाहाॽ तानाम् मे़बोगे़ल्ले़ खे़ङ्हाॽरे़ बाल माङ्ङिल्ले़ कुले़त्ति तोःम्मादे़न्निन् मे़यस्सुआङ् ने़स्से़बा नु खे़ल्ले़ कुबेसाङ् के़युङ्बा असेरा माङ् नावाइत्लान् मे़सोःन्दुआङ् ने़स्से़बा हे़क्क्याङ् ले़त्ति तोःम्मादे़न्नो खे़न् निसिगेक्पा से़गम्बा पित्ते़न् मिधिङ्मनादेमनाबा सिदुङ्जभा मे़दोन्दुबा मे़निसु॥ 29 खे़ङ्हाॽ अक्खेलॽरिक् सेःन्मे़दोसिङ्, “कन् हाःत्ले़ चोगुबाबे?” खे़ङ्हाॽरे़ नुरिक्काङ् योःक्मे़धक्तुसिआङ् एगाङ् अक्खे मे़मे़त्तुसि, “योआसरे़ कुस्सा गिदोनरे़ चोगुबारो॥” 30 खे़ब्याङ् ये़क्यक्कोबा मनाहाॽरे़ योआसे़न् मे़मे़त्तु, “खे़ने़ॽ के़स्सान् लाःक्कात् लःत्ते़ॽ॥ खे़ल्ले़ बाल माङ्ङिल्ले़ कुले़त्ति तोःम्मादे़न्निन् यन्छुदेसुरे़त्छ, हे़क्क्याङ् खे़ल्ले़ कुबेसाङ् के़युङ्बा असेरा माङ् नावाइत्लाःन्नाङ् सोःन्दुदेसुरे़त्छ॥ खुने़ॽ से़प्माए पोङ्ॽ॥” 31 कर योआसरे़ कुदगि के़रे़क् पिसाङ्बा के़ये़प्पा के़अप्पा हयङ् किल्लिङ्हाॽ मे़त्तुसि, “थे खिनिॽ बाल माङ्ङिल्ले़ लागि के़धक्तिबाबि? बाल माङ्ङिन् ताङ्से़ःप्मा याःम्बक्किन् आनिगे़न् फाॽआङ् खिनिॽ के़इःत्तुम्बि? बाल माङ्ङिल्ले़ लागि पाःन्धङ् के़जोःक्पाहाॽ तानाम् थारिक्ले़ मे़से़रुसिॽ? बाल माङ्ङिन् माङ्ङेने़भग्र हे़क्क्याङ् खे़ल्ले़ कुले़त्ति तोःम्मादे़न्निन् कुभारे़ मे़यस्सु मे़बिरुबाने़भग्र, खे़न् कुलागि आप्फेक् पाःन्धङ् चोःक्ल॥” 32 खे़ल्ले़ याःन्दिक् खे़ङ्हाॽरे़ गिदोनरे़ कुमिङ् यरुब-बाल मे़मे़त्तु॥ थेआङ्भे़ल्ले़ खे़न् बालरे़ कुले़त्ति तोःम्मादे़न्निन् खुने़ॽए यस्सुआङ् ने़रो, खे़ङ्हाॽरे़ अक्तङ्बा मिङ् मे़वाःत्तु, खे़ल्ले़ कुबेन्, “कन् मनाःल्ले़ कुदक्ले़ङ्वाओ बाल माङ्ङिन् आप्फेक् थक्ल॥” गिदोनरे़ लत्छा मिक्सेन् नाःक्तु 33 के़रे़क् मिद्यानिहाॽ, अमाले़किहाॽ नु नाङ्गे़न् ले़प्माङ्बा मे़न्छाम् सुवाङ्हाॽ थिक्हुप् मे़बोःक्खे़, हे़क्क्याङ् यर्दन वहःङ्ङिन् मे़गाःक्तुआङ् यिजरेलबा ने़ने़बादे़न्नो थक्सुबा ने़त्ना साःङ्गाहिम् मे़घिङ्घु॥ 34 खे़ब्याङ् यहवे दाङ्बे़ल्ले़ कुयाम्साम्मिन् गिदोनरो ये़॥ खुने़ॽ सादाङ्ङिन् मुःत्तुआङ् अबिएजेरिहाॽ खुने़ॽ तिम्मारे़ लागि उःत्तुसि॥ 35 खुने़ॽ मनस्से के़रे़क् पिसाङ् इङ्घङ् के़देॽबा इङ्साबाहाॽ पाङ्घुसि॥ खुने़ॽ आसेर, जबुलुन नु नप्तालि हे़ङ्घात्तिआङ् इङ्घङ् के़देॽबा इङ्साबाहाॽ पाङ्घुसि, हे़क्क्याङ् खे़ङ्हाॽआङ् खुने़ॽ कुदुम्से़ मे़द्ये़॥ 36 गिदोनरे़ निङ्वाॽफुमाङ्ङिन् मे़त्तु, “खे़ने़ॽ माङ्हुप् के़जोगुबा कुइसिक् इस्राइलिहाॽ आङ्गाॽ आहुक्कोलाम् के़से़ःप्तुसिबाने़भग्र, 37 आल्ल ओमे़त्ते़ॽ, आङ्गाॽ मे़ल्लुक् मुरिक्हाॽ चानुक्मादे़न्नो ने़स्सुङ्ॽ॥ मे़ल्लुक् मुरिक्कोरक् सेःक्वा थासुआङ् खे़न् के़रे़क् पिसाङ् खाम्बाङ्ङिन् से़ङ्से़ङ् लॽने़भग्र, खे़ने़ॽ माङ्हुप् के़जोगुबा कुइसिक् आङ्गाॽ आहुक्कोलाम् इस्राइलिहाॽ ताङ्के़से़ःप्तुसिॽ के़लॽबा आङ्गाॽ से़क्खाए निङ्वाॽ निःन्धो खोसुङ्ॽ॥” 38 खे़ब्याङ् हे़क्केए पोःक्खे़॥ खुने़ॽ तानाम् पोगे़आङ् खे़न् सामुरिक्किन् यॽरु, हे़क्क्याङ् सामुरिक्कोलाम् खोर्याधिक् कुदिम्दिम् सेःक्वा लःन्दे़॥ 39 खे़ब्याङ् गिदोनरे़ निङ्वाॽफुमाङ्ङिन् मे़त्तु, “आङ्गाॽनु के़याःक् मे़ले़ॽरे़न्ने़ॽओ, कर आल्लसाङ् आङ्गाॽ पाःप्मा फाःक्ताङ्ङे़ॽ॥ पेलि फाक्ने़, आङ्गाॽ याम्मो थिक्ले़ङ् कन् सामुरिक्किन् साॽमा पिराङ्ङे़ॽ॥ कन्छलाम्बाग खे़न् सामुरिक्किन्लक् से़ङ्से़ङ् लॽररो, हे़क्क्याङ् के़रे़क् पिसाङ् खाम्बाङ्ङिन् सेःक्वाःल्ले़ वाबिःन्ल॥” 40 निङ्वाॽफुमाङ्ङिल्ले़ खे़न् से़न्दिक्काङ् हाबा हे़क्केए चोगु॥ सामुरिक्किन्लक् से़ङ्से़ङ् लॽरे़, हे़क्क्याङ् खे़न् के़रे़क् पिसाङ्बा खाम्बाङ्ङो सेःक्वा थासुआङ् ने़स्से़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.