खासे़न्लोःम्बा 5 - लिम्बुदबोरा नु बाराके़ल्ले़ खुन्छिॽ से़वासाम्लो 1 खे़ल्ले़ याःन्दिक् दबोरा नु अबिनोअमरे़ कुस्सा बाराके़ल्ले़ कन् से़वासाम्लोन् साम्मे़त्ते़सुरो— 2 “आल्ल इस्राइलबा लाम्लोबा मनाहाॽरे़ लाम्लोमा याःम्बक् मे़जोगुबाल्ले़ चोगुल्ले़, मनाहाॽ खुन्छिॽ निङ्वाॽ त्ये़आङ् मे़दोन्छिङ्बाल्ले़ चोगुल्ले़ यहवे दाङ्बे़ल्ले़ कुनारा फोसे़म्मे़ॽओ॥ 3 “हाङ्से, खे़प्से़म्मे़ॽओ! युक्साबासे, निङ्वाॽ पिरे़म्मे़ॽओ! आङ्गाॽ साम्लोआरो, यहवे दाङ्बे़ल्ले़ कुनारा फोसुङ्लो, यहवे दाङ्बा, इस्राइलबा निङ्वाॽफुमाङ्ङिल्ले़ कुलागि से़वासाम्लो थिक् साम्मे़त्तुङ्लो॥ 4 “यहवे दाङ्बाए, खे़ने़ॽ सेइरलाम् तगि के़धासिङ्ङे़ल्ले़, खे़ने़ॽ एदोमरे़ कुलाजेॽलाम्, तगि के़बोरे़ल्ले़ इक्सादिङ् खाम्बेःक्मे़न् यक्खे़रो, ताङ्साङ्बे़ल्ले़ थासुरो, खाॽमिःत्तिल्ले़ वहित् थासुरो॥ 5 यहवे दाङ्बे़ल्ले़ कुदगि, ओरो, सिनैबा यहवे दाङ्बे़ल्ले़ कुदगि, यहवे दाङ्बे़ल्ले़ कुदगि, इस्राइलबा निङ्वाॽफुमाङ्ङिल्ले़ कुदगि, कोःक्मा फाङ्जङ्हाॽ किमे़ल्ले़ थे़गक्कक्ना यक्खे़रो॥ 6 “अनातरे़ कुस्सा समगररे़ कुये़म्मो, याएलरे़ कुये़म्मो लाम्दिःक्पाहाॽ माराम्हाॽओ लाङ्मे़ङ्घेगे़न्लो, मनाहाॽ इलाम्हाॽओ लाङ्मे़घेगे़रो॥ 7 आङ्गाॽ दबोराःन् मे़म्बोःक्के थारिक्, इस्राइल पाङ्भेॽबा हिङ्मन् नुबे़रो, इस्राइलरे़ मानुदिङ् कुम्मा हे़क्के पोगाङ्लो॥ 8 आल्ल खे़ङ्हाॽरे़ कुसङ् माङ्हाॽ मे़सेगुसिल्ले़, ये़क्यक्हाॽओबा यम्बा लाम्धेःत्हाॽओ ते़न्धङ् पोःक्खे़रो, हे़क्क्याङ् इस्राइलबा लिबोङ् हे़न्छिङ् थक्लिहाङ्हाॽरे़ खो इग्र लाःक्काङ् मे़गत्तुबा निमे़दे़त्ते़न्लो॥ 9 मना लुम्हाॽओबा निङ्वाॽलाम्बाबा कम्ब्राङ्बाहाॽनु आङ्गाॽ आसिक्लुङ्मान् इस्राइलबा लाम्लोबाहाॽनु वाॽरो, यहवे दाङ्बे़ल्ले़ कुनारा फोसे़म्मे़ॽओ! 10 “खिनिॽ, फदाङ्बा अदङ्हाॽ के़युक्पाहाॽरे़, सिङ् युक्नादे़न्नोबा तारिहाॽ के़युक्तुम्माङ् के़युङिरो, हे़क्क्याङ् खिनिॽ, लाङ्गे़घेःक्पाआङ् लाम्गे़धासिङ्बाहाॽरे़, 11 कन् पाःन्निन् खिनिॽ नुरिक् निङ्वाॽ इःत्ते़म्मे़ॽओ, साम्गे़लोबाहाॽरे़ खुन्छिॽ इक्लान् खे़म्दे़त्ल पत्लो, खे़प्मो मे़न्छुमाहाॽ च्वाःत् फाःत्छे़ मे़दारो॥ यहवे दाङ्बे़ल्ले़ चोगुबा साम्योबा याःम्बक्हाॽ इस्राइलओ मुक्के़गुबाहाॽरे़ खुन्छिॽ साम्योबा याःम्बक्हाॽ खे़प्मो खे़ङ्हाॽरे़ याम्मो मे़इःत्तुआङ् मे़बाःत्तुरो॥ “खे़न् ये़म्मो यहवे दाङ्बे़ल्ले़ कुमनाहाॽ यो ये़क्यक्कोबा यम्बा लाम्धेःत्हाॽओ मे़बेरो॥ 12 “‘दबोराए, खे़ने़ॽ आप्फेक् सोरे़ॽओ, सोरे़ॽओ खे़ने़ॽ आप्फेक् सोरे़ॽओ, सोरे़ॽओ! के़म्ब्राःन् हन्दे़ॽआङ् खे़ने़ॽ साम्लोरे़ॽओ॥ अबिनोअमरे़ कुस्सा बाराकए, पोगे़ॽओ, पोगे़ॽओ आनिॽ निङ्मिहाॽ ते़म्से़ तेॽरे़से़ॽओ!’ 13 “खे़न् ये़म्मो के़वाॽबा के़याःक्पा मनाहाॽ तुम्म्याङ्हाङ्हाॽओ यो मे़ये़रो॥ यहवे दाङ्बे़ल्ले़ कुमनाहाॽ आङ्गाॽओ मुक्के़गुबा थक्सुबाहाॽनु मे़द्ये़रो॥ 14 कुभा एफ्राइमलाम् ने़ने़बादे़न्नो मे़ये़रो, खे़ङ्ग थिक्ले़ङ् अमाले़किहाॽ मे़युङे़बादे़न् ने़स्से़रो॥ खे़ने़ॽ के़दिम्बाहाॽनु सोरिक् बेन्यामिने़न्नाङ् वये़रो, माकिरलाम् थक्पेबाहाॽ मे़ये़रो, जबुलुनलाम् थक्मोबाल्ले़ कुदक्कात् के़बङ्बा मनाहाॽ मे़ये़रो॥ 15 इस्साखाररे़ कुलाम्लोबाहाॽ दबोराःन्नु मे़ये़रो, ओरो, इस्साखारे़न् बाराक्के़न्नु वये़रो॥ खे़ङ्हाॽ खे़ल्ले़ कुएगाङ् यो ने़ने़बादे़न्नो मे़लोःक्ते़ मे़ये़रो॥ रुबेनरे़ कुधाःक्कोबाहाॽरे़ खुन्छिॽ थुम्हाॽओ पेःक्मा इ मे़म्बेःक्माइ के़लॽबा साॽरिक् निङ्वाॽ पिर्बेःम्बो मे़ध्ये़रो॥ 16 खे़ङ्हाॽ थेआङ् मे़ल्लुक्हाॽ तिम्मासिरे़ लागि साःङ्गाहिम्मो मे़युङे़ मे़लारे़बाबे? थे मे़ल्लुक्कम्बाहाॽरे़ मे़ल्लुक्हाॽ फिःक् मे़मे़त्तुसिबा इक्लान् खे़म्मारे़ लागिबि? नाॽराङ्लो, रुबेनरे़ कुधाःक्हाॽ मे़से़रे़रो, आत्ति ले़प्माङ् पेःक्मा फाॽआङ् खे़ङ्हाॽरे़ निःन्धो चोःक्मा मे़न्छुक्तुन्लो॥ 17 गिलादे़न् यर्दन नाधाःम्बिए युङ्सिङ्लो, हे़क्क्याङ् वालाधाहाॽरे़ कुयाओ दानरे़ थेआङ् हाङ्घुआङ् युङे़बाबे? आसेरे़न् वरःङ्ङिल्ले़ कुयाओए युङे़रो, खुने़ॽग कुवालाधा ये़म्मादे़न्नोए युङे़लारे़रो॥ 18 जबुलुनबा मनाहाॽरे़ खुन्छिॽ हिङ्मे़न्ने के़साक्पो मे़धासुरो, नप्तालिःल्ले़आङ् ते़न्धङ् चोःक्मादे़न्नो हे़क्केए चोगुरो॥ 19 “हाङ्हाॽ मे़द्ये़आङ् खे़ङ्हाॽरे़ थङ् मे़जोगुरो, कनानबा हाङ्हाॽरे़ मगिद्दोबा वहःङ्हाॽरे़ कुयाओबा तानाकओ ते़न्धङ् मे़जोगुरो॥ कर खे़ङ्हाॽरे़ कुभा युप्पा, कुभा मे़नाप्तुसिबा चिगक्वाहाॽ थे़माआङ् मे़न्देॽरुन्लो॥ 20 खेःम्सिक्पाहाॽरे़आङ् ताङ्साङ्बोलाम् थङ् मे़जोगुरो, आप्फेक् आप्फेक् खुन्छिॽ इमादे़न्नोलाम् खेसेबाहाॽ सिसराःन्नु मे़धक्ते़रो॥ 21 किसोन उन्छेःन्छमा तगिबा वहःङ्, किसोन वहःङ्ङिल्ले़ खे़ङ्हाॽ पक्खुदेॽरुसिरो, आङ्गाॽ मे़त्छिङ्ङा, खे़ने़ॽ मे़ङ्गिए लाङ्घेगे़ओ॥ 22 खे़ब्याङ् अन्हाॽरे़ खुन्छिॽ लाङ्तोॽभे़ःत्हाॽ मे़धाप्सुरो, खे़प्मोबा अन्हाॽ पजात् मे़जात्ते़र मे़लोःक्ते़रो॥ 23 यहवे दाङ्बे़ल्ले़ कुमाङ्लाइङ्बे़ल्ले़ अक्खे पाःत्तुरो, ‘मेरोजे़न् माङ्दे साङ्ग्रा मे़त्ते़ॽओ खे़प्मो के़युङ्बाहाॽ कुजाभे़न्ल माङ्देसे़से़ॽओ, थेआङ्भे़ल्ले़ यहवे दाङ्बे़न् चबे़ःत्छिक्काङ् मे़म्भाॽरुन्लो, के़धुम्बाहाॽरे़ खुन्छिॽ तक्ले़ङ्वाओ खे़ङ्हाॽरे़ यहवे दाङ्बे़न् कुभाॽ मे़म्बिरुन्लो॥’ 24 “केनि हेबेररे़ मे़ल्लिङ्गे़न् कुमेत् याएले़न् के़रे़क् मे़न्छुमाहाॽनुःल्ले़ मुॽइसामा पोङ्लरो॥ साःङ्गाहिम्मो के़युङ्मा मे़न्छुमाहाॽओ के़रे़क्नुःल्ले़ चाॽरिक् मुॽइसामा पोङ्लरो॥ 25 सिसराःल्ले़ च्वाःत् नाःक्तुरो, कर खुने़ॽ खे़न् पित्नु पिरुरो, तुम्म्याङ्हाङ्हाॽरे़ लागि मे़यारुबा खोर्याओ खुने़ॽ खे़न् नुदाक्वा पिरुरो॥ 26 खुने़ॽ कुहुक्किन् साःङ्गाहिम्मोबा लक्चुओ सन्छुरो, खुने़ॽ कुजुक्वा हुक्को मर्यान् पक्खुरो॥ खुने़ॽ सिसराःन् मर्याःल्ले़ हिप्तुरो, खुने़ॽ खे़ल्ले़ कुधे़गेक्पान् यःप्सुरो, खुने़ॽ खे़ल्ले़ कुन्सिःम्बे़न् लक्तुरो हे़क्क्याङ् ये़त्च्रिङ्मा चोगुरो॥ 27 कुलाङ्हाॽरे़ मे़दक्तुन्नाङ् सिसराःन् चोःन्दे़रो, खे़न् पेर्जुसा चोःन्दे़आङ् खे़न् मे़न्छुमाःल्ले़ कुलाङ्जक्पो ने़स्से़गरे़रो, कुलाङ्हाॽरे़ मे़दक्तुन्नाङ् खे़न् मे़न्छुमाःल्ले़ कुलाङ्जक्पो साम्बोन् पत्छे़रो॥ खे़न् साम्बोन् चुक्ते़बादे़न्नो चोःन्दे़आङ् स्ये़रो॥ 28 “सिसराःल्ले़ कुम्मारे़ हङ्हङ्दाङ्बा पेधाःप्पोलाम् थोःप्सुआङ् ओमे़त्तु, पेधाःप्पोलाम् थोःप्सुरो हे़क्क्याङ् फिःक्ते़आङ् अक्खे लॽरे़रो, ‘खे़ल्ले़ कुअन्लाधान् के़प्मा थेआङ् कम्म्याक् सुसे़बाबे? खे़ल्ले़ कुअन्लाधाहाॽ खन्द्रङ् खन्द्रङ् लॽमा इक्लान् हे़न्नाङ् कम्भ्यारिक् पसुसुबाबे?’ 29 “खे़ल्ले़ कुमे़न्छुमाहाॽ लुम्मोमा के़रे़क्नुःल्ले़ सिक्कुम्सामे़ल्ले़ अक्तङ्बा नोगप् पिरुरो, से़क्खाए खुने़ॽ आप्फेक्काङ् अक्खे पाःत्तुरो, 30 ‘मे़नाप्तुसिबा चिगक्वाहाॽ मे़गोःत्तुर मे़याक्पिला, हे़क्क्याङ् खे़ङ्हाॽरे़ मे़भःक्खुर मे़याक्पिला, के़रे़क् ये़म्बित्छा थक्मा मे़न्छ्या थिक्, पोङ्मा सुक् सिसागे़न् मे़न्छ्या ने़त्छि, सिसराःल्ले़ कुलागि चाःम्मनाबा चाङ्हाॽ, कुभुङ् लक्मनाबा चाःम्मनाबा चाङ्हाॽ, कुभुङ् इसेःङ् लक्मनाबा तेःप्फुङ्हाॽ, आङ्गाॽ आसित्लाओ वाःप्मारे़ लागि कन्हाॽ के़रे़क् नाप्मनासिबा चिगक्वा कुइसिक् पोङ्लो॥’ 31 “यहवे दाङ्बाए, कम्भलॽरिक्के के़रे़क् के़निङ्मिहाॽ मे़मे़क्लरो, कर खे़ने़ॽ मिःम्जि के़मे़प्पाहाॽ के़रे़क् नाम्लाःङ्मो नाम् के़गे़प्पा नाम् कुइसिक् मे़बोङ्लरो॥” खे़ब्याङ् लिबोङ् तङ्बे थारिक् लाजेॽओ सनारुङ् पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.