खासे़न्लोःम्बा 4 - लिम्बुदबोरा नु बाराक 1 एहुदे़न् मासिङ्ङाङ् एगाङ् इस्राइलिहाॽरे़ यहवे दाङ्बे़ल्ले़ कुनिमो थे़माःन् ताप्फे़ःम्बा चोगे़ याम्मो हाबा खे़न्ने मे़जोगु॥ 2 कल्ले़चोगुल्ले़ यहवे दाङ्बे़ल्ले़ खे़ङ्हाॽ हासोरओ युक् के़जोःक्पा कनानि हाङ् याबिनरे़ कुहुक्को सङ्घुसि॥ खे़ल्ले़ कुधक्मोबा सिसराःन् वये़, खुने़ॽ हरोसेत हग्गोयिमओ युङे़॥ 3 सिसराःल्ले़ किप् फाङ्सि फे़न्जेॽ अन्लाधाहाॽ कत्तुसि, हे़क्क्याङ् खुने़ॽ इस्राइलिहाॽ निबोङ् तङ्बे थारिक् साॽरिक् तुक्के चाःत्तुसि॥ खे़ल्ले़चोगुल्ले़ इस्राइलिहाॽरे़ आभाॽरे़ॽ फाॽआङ् यहवे दाङ्बे़न् पेलि मे़भाक्तु॥ 4 खे़न् ये़म्मो लप्पिदोतरे़ कुमेत् दबोराःन् इस्राइलिहाॽरे़ खुन्छिॽ लाम्लोमा वये़॥ खुने़ॽ माङ्निङ्वाॽपान् के़बाःप्मा वये़॥ 5 खुने़ॽ एफ्राइमबा कोःक्मा फाङ्जङ्बा लाजेॽ रामा नु बेथेल लुम्मो के़ने़बा दबोराःल्ले़ कुघे़बक्सिङ्ङिल्ले़ कुसिगाङ् युङे़र वये़, हे़क्क्याङ् इस्राइलिहाॽ खुने़ॽओ खासे़न्ले़ लागि मे़द्ये़र मे़वये़॥ 6 खुने़ॽ नप्तालिबा केदेसलाम् अबिनोअमरे़ कुस्सा बाराके़न् उःप्मा पाङ्घुसिआङ् खुने़ॽ खे़न् मे़त्तु, “यहवे दाङ्बा इस्राइलबा निङ्वाॽफुमाङ्ङिल्ले़ कुइङ्जाङ् अक्तङ्बा वाॽ—‘खे़ने़ॽ पेगे़ॽआङ् नप्तालि नु जबुलुनबा थिबोङ् हे़न्छिङ् मनाहाॽ फुक्खे़से़ॽ हे़क्क्याङ् खे़ङ्हाॽ खे़ने़ॽनु सोरिक् तबोर कोःक्माओ तेॽरे़से़ॽ॥ 7 आङ्गाॽ याबिनरे़ कुधक्मोबा सिसराःन् किसोन वहःङ्ङो खुने़ॽ कुअन्लाधाहाॽ नु खुने़ॽ के़रे़क् कुधक्सुबाहाॽआङ् लःत्तुङ् फे़त्तुङ्सिङ् हे़क्क्याङ् खे़ङ्हाॽ खे़ने़ॽ के़हुक्को पिने़रो॥’” 8 बाराके़ल्ले़ मे़त्तु, “खे़ने़ॽ आङ्गाॽनु सोरिक् के़बेःक्ने़भग्र आङ्गाॽ पेःक्का, कर खे़ने़ॽ के़म्बेःक्ने़न्ने़भग्र आङ्गाॽआङ् मे़बेःक्कान्॥” 9 दबोराःल्ले़ मे़त्तु, “से़क्खासाङ् आङ्गाॽ खे़ने़ॽनु पेःक्का, कर खे़ने़ॽ के़बेःक्साङ् मिङ्सो इङ्धाङ् के़ङ्घोसुन्ॽ, थेआङ्भे़ल्ले़ यहवे दाङ्बे़ल्ले़ सिसराःन् मे़न्छुमा थिक्ले़ कुहुक्को थासुॽ॥” खे़ब्याङ् दबोराःन् पोगे़आङ् बाराके़न्नु केदेस थासिङ्॥ 10 बाराके़ल्ले़ जबुलुन नु नप्तालिन् केदेसओ उःत्तुसि, हे़क्क्याङ् थिबोङ् हे़न्छिङ् मनाहाॽरे़ खुने़ॽ मे़दिम्दु, हे़क्क्याङ् दबोराःन्नाङ् खुने़ॽनु पे॥ 11 आल्ल केनि हेबेररे़, इग्र मोसाःल्ले़ कुङ्गुङ्बा होबाबरे़ कुमुॽइदाङ्साःल्ले़ वेॽ केनिहाॽ तिम्मा नाॽरुसिआङ् केदेस कुबेसाङ्बा सानन्निमओ के़युङ्बा यहिबा सिङ्बुङ् निःत्ताङ् खुने़ॽ कुसाःङ्गाहिम्मिन् खिङ्घुआङ् ने़स्से़॥ 12 अबिनोअमरे़ कुस्सा बाराके़न् तबोर कोःक्माओ पेआङ् याक् के़लॽबा सिसराःन् मे़मे़त्तु॥ 13 खे़ब्याङ् खुने़ॽ किप् फाङ्सि फे़न्जेॽ कुअन्लाधाहाॽ नु कुधक्सुबाहाॽ हरोसेत हग्गोयिमलाम् किसोन वहःङ्ङो फुक्खुसि॥ 14 खे़ब्याङ् दबोराःल्ले़ बाराके़न् मे़त्तु, “पोगे़ॽ, आइन्बा ये़न् यहवे दाङ्बे़ल्ले़ सिसराःन् खे़ने़ॽ के़हुक्को के़बिरे़आङ् वाॽ॥ यहवे दाङ्बे़न् खे़ने़ॽ के़दगि पेआङ् वाॽ॥” कल्ले़चोगुल्ले़ बाराके़न् तबोर कोःक्माओलाम् यो थासिङ् ये़, खम्भ्याङ् थिबोङ् हे़न्छिङ् मनाहाॽ खे़ल्ले़ कुएगाङ् कुएगाङ् मे़ये़॥ 15 बाराके़ल्ले़ थङ्ङो फप्मासिनुःल्ले़ तगिए यहवे दाङ्बे़ल्ले़ सिसराःन्, खुने़ॽ के़रे़क् कुअन्लाधाहाॽ नु सोरिक् थक्सुबाहाॽआङ् मे़नाक्ते़र याःन्दुसि हे़क्क्याङ् ताभेःल्ले़ च्ये़प्तुसि॥ सिसराःन् कुअन्लाओलाम् थासिङ्ङाङ् लाङ्घेगे़आङ्ङे खे़त्छिङ्॥ 16 बाराके़ल्ले़ अन्लाधाहाॽ नु थक्सुबाहाॽ हरोसेत हग्गोनियम थे़म्बा नाःत्तुसि, हे़क्क्याङ् के़रे़क् थक्सुबाहाॽ ताभेःल्ले़ मे़क्खुसि॥ लत्छाआङ् मे़न्हिङे़न्॥ 17 कत्ना सिसराःन्ग लाङ्घेगे़र खे़त्छिङ्ङाङ् केनि हेबेररे़ कुमेत् याएलरे़ कुसाःङ्गाहिम्मो लासे़, थेआङ्भे़ल्ले़ हासोरबा हाङ् याबिन नु केनि हेबेररे़ खुन्छिॽ हिम्सयङ् लुम्मो मे़दङे़आङ् मे़वये़॥ 18 याएले़न् सिसराःल्ले़ कुदुम्से़ लःन्दे़, हे़क्क्याङ् खुने़ॽ मे़त्तु, “आदाङ्बे, आङ्गाॽ ले़प्माङ् थाङे़ॽ, सिगाङ् थाङे़ॽ॥ मे़गिसे़न्ने़ॽ॥” कल्ले़चोगुल्ले़ सिसराःन् साःङ्गाहिम्मो लासे़, हे़क्क्याङ् खुने़ॽ खे़न् खाम्देःत् थिक्ले़ खाप्तु॥ 19 सिसराःल्ले़ खुने़ॽ मे़त्तु, “आङ्गाॽ चबे़ःत्छिक् च्वाःत् थुङ्मा पिराङ्ङे़ॽ॥ आङ्गाॽ साॽरिक् आवामिःक्ते़आङ् वाॽ॥” खे़ब्याङ् खुने़ॽ पित्नुःल्ले़ के़दिम्बा सिहोॽबा सुक्वान् फाःक्खुआङ् खे़न् थुङ्मा पिरु, खम्भ्याङ् खुने़ॽ याम्मो खाम्देःत्तिल्ले़ खाप्तु॥ 20 सिसराःल्ले़ मे़त्तु, “साःङ्गाहिम् लाम्धेःत्तोए खे़ने़ॽ ये़बेगरे़ॽ, हे़क्क्याङ् कुभा मे़दाआङ् खे़ने़ॽ अक्खेलॽरिक् से़ःन्के़म्दोॽ, ‘कप्मो कुभा मना वाॽबि’ हे़क्केःल्ले़ खे़ने़ॽ मे़त्ते़से़ॽ ‘होप्लो॥’” 21 कर हेबेररे़ कुमेत् याएलरे़ साःङ्गाहिम्मोबा लक्चु थिक् नु मरःङ्ग्या थिक् याङ्सिङ् हे़क्क्याङ् सिसरान् पना नासे़आङ् मुरुक् खारुक् इप्से़बा ये़म्मो स्वाःत्ताङ् खुने़ॽ कुबेसाङ् पे॥ याएलरे़ सिसराःल्ले़ कुन्सिःन्बे़न् फ्याक् लस्सुआङ् खाम्बाङ्ङिन् सुसुर थारिक् लक्चुःन् थे़प्तु, हे़क्क्याङ् खे़न् स्ये़॥ 22 बाराके़ल्ले़ सिसरान् नाःत्तुर त्ये़ःल्ले़ याएले़न् खुने़ॽ कुदुम्से़ त्ये़आङ् खे़न् मे़त्तु, “फे़रे़ॽ, खे़ने़ॽ के़गोःत्तुबा मनान् आङ्गाॽ ओःन्धाक्ने़॥” बाराके़न् खुने़ॽनु सिगाङ् लासे़, हे़क्क्याङ् सिसरान् कुन्सिःन्बो लक्चुःल्ले़ लेःत्तुआङ् चोःन्दे़आङ् स्ये़आङ् ने़स्से़बा निसु॥ 23 खे़ल्ले़ याःन्दिक् निङ्वाॽफुमाङ्ङिल्ले़ इस्राइलिहाॽरे़ कनानबा हाङ् याबिने़न् मे़नाःन्दुर याःन्दुसि॥ 24 खे़न् थ्यःङ् मे़न्देए थारिक् कनानिहाॽरे़ खुन्छिॽ हाङ् याबिनरे़ कुदक्ले़ङ्वाओ इस्राइलिहाॽ मुक्साम्बा मे़बोःक्खे़र मे़बेरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.