खासे़न्लोःम्बा 21 - लिम्बुके़हिङ्बा बेन्यामिनि थाःक्हाॽरे़ लागि खुन्छिॽ मेःत्हाॽ 1 इस्राइलिहाॽरे़ मिस्पाओ अक्तङ्बा माङ्हे़क् मे़जोगुआङ् वये़, “आनिॽ आत्तिन्हाॽरे़आङ् आनिॽ मे़न्छुमा साहाॽ बेन्यामिनिहाॽ मेःक्खिम्ले़ लागि पिरुम्सिम् मेःन्॥” 2 हे़क्क्याङ् मनाहाॽ बेथेल मे़बेआङ् युःन्छिक् थारिक्के खे़प्मो निङ्वाॽफुमाङ्ङिल्ले़ कुदगि मे़युङे़, हे़क्क्याङ् साॽरिक् यम्बा इक्लाओ उःक्काङ् उःक् मे़हाबे़॥ 3 खे़ङ्हाॽरे़ मे़बाःत्तु, “यहवे दाङ्बा, इस्राइलबा निङ्वाॽफुमाङ्ङे, इस्राइलिहाॽरे़ लागि थेआङ् अक्खे पोःक्खे़बाबे? थेआङ् आइन्बा ये़न्नो इस्राइलबा थाःक् थिक् मये़बेबाबे?” 4 कुदाःन्दिक्मा तानाम् मनाहाॽ आन्देन् मे़बोगे़, हे़क्क्याङ् खे़प्मो लत्छा ले़त्ति तोःम्मादे़न् मे़जोगुआङ् मिधिङ्मनादेमनाबा नु तङ्जुम् सिदुङ्जभा मे़दोन्दु॥ 5 खे़ब्याङ् इस्राइलबा के़रे़क् थाःक्हाॽओबा कुभा थाःक् यहवे दाङ्बे़ल्ले़ कुदगि मे़न्द्ये़ने़म्बि फाॽआङ् इस्राइलिहाॽ खुन्छिॽ लुम्मो सेःन्मे़दोसिङ्, थेआङ्भे़ल्ले़ यहवे दाङ्बे़ल्ले़ कुदगि मे़न्जुम्मनाबान् से़प्माए पोङ्ॽ फाॽआङ् खे़ङ्हाॽरे़ मिस्पाओ के़साक्पा माङ्हे़क् मे़जोगुआङ् वये़॥ 6 आल्ल इस्राइलिहाॽ खुन्छिॽ फुॽनुसाॽ बेन्यामिनिहाॽरे़ लागि खुन्छिॽ निङ्वाॽ तुगे़, हे़क्क्याङ् खे़ङ्हाॽरे़ मे़बाःत्तु, “आइन्बा ये़न्नो इस्राइलओ थाःक् थिक्के मये़बेरो॥” 7 खे़ङ्हाॽ सेःन्मे़दोसिङ्, “यहवे दाङ्बे़ल्ले़ कुदगि आनिॽ मे़न्छुमा साहाॽ मेःक्खिम्ले़ लागि खे़ङ्हाॽ पिमासि मेःन् फाॽआङ् माङ्हे़क् आजोगुम्माङ् वये़॥ के़हिङ्बा के़याःक्पाहाॽ मेःत् कोःप्मा पिमासिरे़ लागि आनिॽ थे चोःक्मा पिमासि आसुक्तुम्बे?” 8 खे़ब्याङ् खे़ङ्हाॽरे़ सेःन्मे़दोसुसि, “इस्राइलबा के़रे़क् थाःक्हाॽओलाम् यहवे दाङ्बाओ मिस्पा मे़म्बेःक्मनाबा कुभा मे़वाॽबि?” हे़क्क्याङ् याबेस-गिलादलाम् आत्तिन्हाॽआङ् चुम्लुङ्ले़ लागि साःङ्गाहिम्हाॽओ मे़म्भे़रे़न्लत्छ फाॽआङ् खे़ङ्हाॽरे़ निङ्वाॽ मे़घोसु॥ 9 थेआङ्भे़ल्ले़ खे़ङ्हाॽरे़ मनाहाॽ मे़निरुसिल्ले़ याबेस गिलादबा आत्तिन्हाॽआङ् मे़भे़रे़बा मे़ङ्घोसुसिन्॥ 10 कल्ले़चोगुल्ले़ खे़न् ये़जुम्भोहाॽरे़ याबेस गिलादबा ये़म्बित्छा, मे़न्छुमा नु हिन्जाॽबित्छाहाॽ ताभेःल्ले़ से़प्मासिरे़ लागि १२,००० थक्लिहाङ्हाॽ इङ्जाङ् मे़बिरुसिआङ् मे़बाङ्घुसि॥ 11 खे़ङ्हाॽरे़ मे़मे़त्तुसि, “खिनिॽ के़रे़क् ये़म्बित्छाहाॽ हे़क्क्याङ् ये़म्बित्छानु के़इम्मा मे़न्छुमाहाॽ से़रे़म्सिम्मे़ॽ, कर सिसागे़न् मे़न्छ्याहाॽग ले़रे़म्सिम्मे़ॽ॥” 12 खे़ङ्हाॽरे़ हे़क्केए मे़जोगु॥ याबेस-गिलाद के़युङ्बाहाॽओ किप् लिसि सिसागे़न् मे़न्छ्याहाॽ मे़दुमुसि, खे़ङ्हाॽ आत्तिन् ये़म्बित्छाहाॽनुआङ् मे़न्इम्मे मे़वये़॥ खम्भ्याङ् खे़ङ्हाॽरे़ कन्हाॽ कनान सिलोबा साःङ्गाहिम्हाॽओ मे़दारुसि॥ 13 खे़ब्याङ् के़रे़क् ये़जुम्भोहाॽरे़ रिम्मोनबा याक्पेॽओ के़याक्पा बेन्यामिनिहाॽ तङ्मा पान् चोःक्मारे़ लागि खुन्छिॽ इङ्घङ् मे़हाक्तुसि॥ 14 कल्ले़चोगुल्ले़ बेन्यामिनिहाॽ मे़नुःक्खे़ मे़ये़, हे़क्क्याङ् इस्राइलिहाॽरे़ मे़दाङ्घुसिआङ् के़वाॽमा खे़न् याबेस गिलादबा मे़न्छुमाहाॽ खे़ङ्हाॽ मे़बिरुसि, कर खे़ङ्हाॽ कन् मे़न्छुमाहाॽरे़ मे़दे़क्तुसिन्॥ 15 मनाहाॽ आल्लसाङ् बेन्यामिनिहाॽरे़ खुन्छिॽ लागि निङ्वाॽ तुगे़र वये़, थेआङ्भे़ल्ले़ इस्राइलबा थाःक्हाॽओ कन् लाःत्लाःत् पोङ्मा पाःन्निन् यहवे दाङ्बे़ल्ले़ चोगुआङ् वये़॥ 16 हे़क्क्याङ् ये़जुम्भोओ लाम्लोबाहाॽरे़ मे़बाःत्तु, “बेन्यामिनबा के़रे़क् मे़न्छुमाहाॽग मे़से़रुसि मेःत्ले़ मे़न्दे़क्मनाबाहाॽ मेःत् कोःप्मा पिमासिरे़ लागि आनिॽ थे आजोगुम्बाबे?” 17 खे़ङ्हाॽरे़ मे़बाःत्तु, “के़घे़त्छिङ्बाआङ् के़हिङ्बा बेन्यामिनिहाॽरे़ खुन्छिॽ लक्के़घोबा मे़वाॽरए पोङ्ॽ, मेःन्ने़भग्र इस्राइलबा थाःक्हाॽओलाम् लत्छा थाःक्किल्ले़ कुमिङ् माबेःक्॥ 18 आनिॽ आप्फेक् मे़न्छुमा साहाॽ खे़ङ्हाॽनु ते़न्धाम् मेःक्खिम् मे़प्मा आन्छुक्तुम्सिम्मे़न्, थेआङ्भे़ल्ले़ बेन्यामिनिःन्नु कुस्सा मे़न्छुमा मेःक्खिम् के़मे़प्पा मनाओ माङ्दे साङ्ग्रा था फाॽआङ् माङ्हे़क् आजोगुम्माङ् वाॽ॥” 19 खे़ब्याङ् बेथेल थाङ्गे़त् पिसाङ्, बेथेललाम् सेकेम पेःक्मा माराम्मोनु नाङ्गे़न् ले़प्माङ् हे़क्क्याङ् लबोनाबा लाङ्गे़त् ले़प्माङ् सिलोओ यहवे दाङ्बे़ल्ले़ कुलागि तङ्बे थक्मा के़दाबा तङ्नाम्मिन् खे़ङ्हाॽरे़ खुनिॽ निङ्वाॽ सुम्लॽरे़॥ 20 कल्ले़चोगुल्ले़ बेन्यामिनिहाॽ मे़मे़त्तुसि, “खिनिॽ पेगे़म्मे़ॽआङ् चे़ल्ले़क्सेॽ इक्ताप्हाॽओ चिङ्ङासिम्मे़आङ् युङे़म्मे़ॽ॥ 21 हे़क्क्याङ् सिलोबा सिसागे़न् मे़न्छ्याहाॽ लाःङ्से़ मे़दाःल्ले़ चे़ल्ले़क्सेॽ इक्ताप्हाॽओलाम् खिनिॽ लिगक् लःन्दे़म्मे़ॽ हे़क्क्याङ् खिनिॽ आप्फेक् आप्फेक् मेःत् चोःक्मासिरे़ लागि लत्छा लत्छा मे़न्छ्या ते़म्से़म्सिम्मे़ॽ॥ खे़ब्याङ् खिनिॽ आबाङे हिम् बेन्यामिनरे़ कुलाजेॽ ले़प्माङ् पेगे़म्मे़ॽ॥ 22 खे़न् एगाङ् खे़ङ्हाॽरे़ खुन्छिॽ पाहाॽ इग्र फुॽनुसाॽहाॽ मे़दाआङ् आनिगे मे़मे़त्तिगे़ने़भग्र, आनिगे मे़त्तुम्सिम्बे़, ‘आनिगे पेलिन् खे़प्साम्मे़ॽआङ् खे़ङ्हाॽ फाॽरे़म्सिम्मे़ॽ, थेआङ्भे़ल्ले़ थङ्ङो खे़ङ्हाॽरे़ खुन्छिॽ लागि मेःत् आनिगे ताःप्मा पिमासि मे़सुक्तुम्बे़न्॥ खिनिॽ कुदोःप्मा के़जोगि, थेआङ्भे़ल्ले़ खिनिॽ मे़न्छुमा साहाॽ कन्हाॽ के़म्बिरुम्सिम्मिन्॥’” 23 खे़ल्ले़चोगुल्ले़ मे़न्छ्याहाॽ मे़लाःक्खे़र मे़यागे़बा ये़म्मो बेन्यामिनि ये़म्बित्छा के़रे़क्ले़ आप्फेक् आप्फेक् मेःत् चोःक्मासिरे़ लागि लत्छा लत्छा मे़न्छ्या मे़दे़म्सु मे़देॽरुसि॥ खे़न् बेन्यामिनिहाॽरे़ कन् के़रे़क् पाःन्हाॽ मे़जोगु॥ खे़ब्याङ् खुन्छिॽ लाम् मे़धासिङ्, हे़क्क्याङ् खे़ङ्हाॽरे़ खुन्छिॽ पाले़प्माङ्बा याङ्साकुन्धे के़ने़बादे़न्नो मे़बेआङ् खुन्छिॽ ये़क्यक्हाॽ याम्मो मे़जोगु, खम्भ्याङ् खे़प्मो मे़युङे़॥ 24 खे़न् ये़म्मो इस्राइलिहाॽआङ् आप्फेक् आप्फेक् खुन्छिॽ थाःक्हाॽ नु हिम्सयङ्हाॽ मे़से़रे़, हे़क्क्याङ् खे़प्मोलाम् के़रे़क् खुन्छिॽ आप्फेक् आप्फेक् पानुदिङ् पाले़प्माङ्बा याङ्साकुन्धे के़ने़बादे़न्नो मे़बे॥ 25 खे़न् ये़म्मो इस्राइलओ हाःत्ताङ् हाङ् होःप्ते़, हे़क्क्याङ् के़रे़क् मनाहाॽरे़ आत्तिन् पाःन्निन् नुबा चोगे़ हाबा खे़न्ने मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.