खासे़न्लोःम्बा 10 - लिम्बुतोलान् इस्राइलबा खासे़न्लोःम्बा पोङ्ॽ 1 अबिमेलेकरे़ कुये़म् के़रे़आङ् एगाङ् इस्साखाररे़ लत्छा कुमना, पुवारे़ कुस्सा दोदोरे़ कुम्मे़न्छाॽ, एफ्राइमबा कोःक्मा फाङ्जङ् लाजेॽबा सामिर के़युङ्बा तोलान् इस्राइलिहाॽ ताङ्से़ःप्मासिरे़ लागि पोगे़॥ 2 खुने़ॽ निबोङ्ङाङ् सुम्सि तङ्बे थारिक् इस्राइबा लाम्लोबा पोःक्खे़, हे़क्क्याङ् खुने़ॽ मासिङ्ङाङ् सामिरओ मे़जिक्खुरो॥ याइरे़न् इस्राइलबा खासे़न्लोःम्बा पोङ्ॽ 3 खुने़ॽ कुएगाङ् गिलादि याइरे़न् पोगे़॥ खुने़ॽ निबोङ्ङाङ् ने़त्छि तङ्बे थारिक् इस्राइलबा लाम्लोबा पोःक्खे़॥ 4 खुने़ॽ सुम्बोङ् कुस्सा ये़म्बित्छा मे़वये़, खे़ङ्हाॽरे़ खुन्छिॽ आप्फेक् आप्फेक् अदङ्हाॽ मे़युक्तुसिआङ् लाङ्मे़घेगे़॥ गिलाद लाजेॽओ खे़ङ्हाॽरे़ खुन्छिॽ आप्फेक् आप्फेक् सुम्बोङ् ये़क्यक्हाॽ ने़स्से़, खे़ङ्हाॽ आइन् थारिक् हब्बात याइर मे़मे़त्तुॽ॥ 5 याइरे़न् मासिङ्ङाङ् खुने़ॽ कामोनओ मे़जिक्खुरो॥ अम्मोनिहाॽरे़ इस्राइलिहाॽ मे़युक्तुसि 6 याम्मो इस्राइलिहाॽरे़ अराम, सिदोन नु मोआब हे़क्क्याङ् अम्मोनिहाॽ नु पलिस्तिहाॽरे़ खुन्छिॽ माङ्साम्माङ्हाॽ खे़ब्याङ् बाल नु अस्तोरेत माङ्हाॽ से़वा मे़मे़त्तुसिआङ् यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने मे़जोगु॥ खे़ङ्हाॽरे़ यहवे दाङ्बे़न् मे़ले़रुआङ् खुने़ॽ माङ्से़वा मे़म्मे़त्तुन्॥ 7 कल्ले़चोगुल्ले़ यहवे दाङ्बे़न् इस्राइलिहाॽनु कुसाक्के़न् पोगे़, हे़क्क्याङ् खुने़ॽ खे़ङ्हाॽ पलिस्तिहाॽ नु अम्मोनिहाॽरे़ खुन्छिॽ हुक्को सङ्घुदेसुसि, खे़ङ्हाॽरे़ खे़न् तङ्बेओ इस्राइलिहाॽ हिहोत् चिहोत् मे़मे़त्तुसि॥ 8 खे़ङ्हाॽरे़ यर्दन नाङ्गे़न् पिसाङ् एमोरिहाॽरे़ खुन्छिॽ लाजेॽ गिलादओ के़युङ्बा इस्राइलिहाॽ थिबोङ्ङाङ् ये़त्छि तङ्बे थारिक् ताप्फे़ःल्लिक् मे़मे़त्तुसिर मे़वये़॥ 9 खे़ब्याङ् यहुदाःल्ले़ कुधाःक् बेन्यामिन नु एफ्राइमबा हिम्सयङ्हाॽ थङ्ङो फप्मासिरे़ लागि अम्मोनिहाॽरे़ यर्दन नाधाःम्बि मे़गाःक्तु॥ हे़क्क्याङ् इस्राइलिहाॽ साॽरिक् के़साक्पा तुक्खेओ मे़ध्ये़॥ 10 हे़क्क्याङ् कुभाॽरे़ लागि इस्राइलिहाॽरे़ यहवे दाङ्बे़न् पेलि मे़भाक्तुआङ् मे़मे़त्तु, “आनिगे खे़ने़ॽ के़दक्ले़ङ्वाओ लायो चोगुम्बे़आङ् वयिगे़॥ खे़ने़ॽ आनिगे निङ्वाॽफुमाङ्ङिन् ले़त्तासिगे़आङ् बाल माङ्ङिन् से़वा मे़त्तुम्बे़आङ् वयिगे़॥” 11 यहवे दाङ्बे़ल्ले़ इस्राइलिहाॽ मे़त्तुसि, “मिस्रि, एमोरि, अम्मोनि, पलिस्ति, 12 सिदोनि, अमाले़कि नु मिद्यानिहाॽ के़रे़क्ले़ खिनिॽ ताप्फे़ःल्लिक् के़म्मे़त्ति, हे़क्क्याङ् कुभाॽरे़ लागि आङ्गाॽ याप्मि पेलि के़भाक्ति, खे़ब्याङ् आङ्गाॽ खे़ङ्हाॽरे़ खुन्छिॽ हुक्कोलाम् मे़से़ःप्निङ्ङिन्बि? 13 कर खिनिॽ याप्मि के़ले़रिआङ् वेॽ माङ्हाॽ से़वा के़मे़त्तुम्सिम्॥ कल्ले़चोगुल्ले़ आल्ल आङ्गाॽ खिनिॽ याम्मो मे़से़ःप्निङ्ङिन्॥ 14 पेगे़म्मे़ॽआङ् खिनिॽ के़सेगुम्सिम्बा माङ्हाॽ कुभाॽरे़ लागि पेलि फाक्ते़म्सिम्मे़ॽ, हे़क्क्याङ् खे़ङ्हाॽरे़ खिनिॽ तुक्खेवा ये़म्मो के़म्से़ःप्तिररो॥” 15 कर इस्राइलिहाॽरे़ यहवे दाङ्बे़न् मे़मे़त्तु, “आनिगे लायो चोगुम्बे़आङ् वयिगे़॥ खे़ने़ॽ आनिगे आक्खे मे़प्मा निङ्वाॽ के़जोगुॽ हे़क्केए ओमे़त्ते़ॽ॥ कर आल्ल आनिगे आसे़ःप्ते़ॽ फाॽआङ् पेलि फाक्कासिगे़॥” 16 खे़ब्याङ् खे़ङ्हाॽरे़ वेॽ लाजेॽबा माङ्हाॽ मे़ले़रुसिआङ् यहवे दाङ्बे़न् माङ्से़वा मे़मे़त्तु॥ हे़क्क्याङ् खुने़ॽ इस्राइलिहाॽरे़ खुन्छिॽ आल्लसाङ् तुक्खे लाक्खेहाॽ ओमे़प्मा मे़सुक्तुन्॥ 17 खे़ब्याङ् अम्मोनिहाॽ थङ्ले़ लागि मे़भुक्खुसिआङ् गिलादओ साःङ्गाहिम्हाॽ मे़जोगे़आङ् मे़ने़स्से़, हे़क्क्याङ् इस्राइलिहाॽग मे़जुप्से़आङ् मिस्पाओ थक्सुबा ने़त्ना साःङ्गाहिम् मे़जोगु॥ 18 खे़ब्याङ् गिलादबा मनाहाॽरे़ खुन्छिॽ लाम्लोबाहाॽ अक्खे मे़मे़त्छिङ्, “आत्तिन् मनाःल्ले़ तगि अम्मोनिहाॽ थङ्ङो फत्तुसि हाबा खुने़ॽए गिलाद के़युङ्बा के़रे़क् मनाहाॽरे़ खुन्छिॽ युक्साबा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.