यसैया 19 - लिम्बुमिस्र लाजेॽबा मनाहाॽ निङ्वाॽफुमाङ्ङिल्ले़ खुम्दिङ् पिरुसि 1 मिस्र लाजेःल्ले़ कुयाःम्बेओ के़दाबा माङ्निङ्वाॽपान्निन् अक्तङ्बा वाॽरो— ओमे़त्ते़म्मे़ॽ, यहवे दाङ्बे़न् खाॽमिःत्तिन् युक्तुआङ् मिस्र लाजेॽओ युर पत्लो॥ खुने़ॽ युःल्ले़ मिस्र लाजेॽबा नावाइत्लाहाॽ मे़गिआङ् थे़गक्कक्ना मे़यङ्लो, हे़क्क्याङ् मिस्र के़युङ्बा मनाहाॽ खुन्छिॽ किमे़ल्ले़ युम्सुङ्मा मे़बोङ्ङाङ् साम्मिक्ले़ ले़रुसिरो॥ 2 “आङ्गाॽ मिस्रबा मनाहाॽरे़ खुन्छिॽ तक्ले़ङ्वाओ मिस्रबा मनाहाॽए हुसुङ्सिङ् पक्सुङ्सिङ्लो॥ फुॽनुसाॽहाॽ खुन्छिॽ आबाङे फुॽनुसाॽहाॽनुए मे़घे मे़धक्लो, हिम्बेसाङ्बाहाॽ आबाङे खुन्छिॽ हिम्बेसाबाहाॽनुए मे़दन्छिङ्लो, ये़क्यक्को के़युङ्बाहाॽ आबाङे खुन्छिॽ ये़क्यक्को के़युङ्बाहाॽनु मे़घे मे़जुङ्लो, हे़क्क्याङ् हाङ्जुम्हाॽ हाङ्जुम्हाॽनुए मे़धक्लो॥ 3 मिस्रबा मनाहाॽरे़ खुन्छिॽ सावेःत् यङ्लो, आङ्गाॽ मिस्र के़युङ्बा मनाहाॽरे़ चोःक्मा पाःप्मा मे़गोःत्तुबा पाःन्हाॽ फोःत्तुङ् पिरुङ्सिङ्लो॥ खे़ङ्हाॽरे़ माङ्साम्माङ्हाॽ, सिसाम्हाॽ, कित्चाक् के़जोःक्पाहाॽ नु फे़दाङ्माहाॽ मे़बेःक्काङ् सेःन्मे़लाप्तुसिरो॥ 4 हे़क्क्याङ् आङ्गाॽ मिस्रबा मनाहाॽ साॽरिक् ताप्फे़ःल्लिक् आमे़प्मे़प्पा लत्छा दाङ्बाधिक्ले़ कुहुक्को पाङ्घुङ्सिङ्लो, हे़क्क्याङ् तल्लिक् के़जिःप्पा हाङ्धिक्ले़ खे़ङ्हाॽरे़ खुन्छिॽ सम्दाङ् हाङ्युक् चोगुरो,” कन् पाःन्निन् आङ्गाॽ मुक्साम्दाङ्बा यहवे दाङ्बे़ल्ले़ पाःत्तुङ्ङाङ् वाॽरो॥ निल वहःङ्ङो तुक्खे 5 निल वहःङ्ङोबा च्वाःत्तिन् हेर पेःक्लो, हे़क्क्याङ् वहःङ्ङिन् अङेःक्काङ् चप्प्रे़क् चप्तुरो॥ 6 हे़क्केलॽरिक् च्वाःत्तिन् थिक्याःन्धक् चप्ल पेःक्किल्ले़ वालाम्हाॽ नाम्सुरो॥ मिस्र लाजेॽओबा यङ्घङ् वहःङ्हाॽ युम्माङ् हेबेःक्लो, हे़क्क्याङ् सिदाक्पाहाॽ नु साराहाॽ इरे़म्माङ् हेसिरो॥ 7 खे़न्नु सोसोरिक् निल वहःङ्ङिल्ले़ कुयाओ के़युङ्बा के़रे़क् लेःत्ताङ्बा याःन्सुङ्हाॽ नु इक्ताप्हाॽ हेसिरो॥ खे़ब्याङ् खे़न् सुरित्ते़ल्ले़ पक्खु तेॽरुआङ् खे़ॽयो थेधिक्काङ् मे़ने़ने़न्लो॥ 8 ङा के़से़प्पाहाॽ मे़हाःप्लो, खेःङ् के़देबाहाॽ मे़रिङ् मे़धक्लो हे़क्क्याङ् निल वहःङ्ङोबा च्वाःत्तो योःङ् के़ले़प्पाहाॽ खुन्छिॽ निङ्साङ् पुक्लो॥ 9 खि के़लःम्बाहाॽ निङ्साम्मो मे़धारो, हे़क्क्याङ् नाइनासुःत् के़धाक्पाहाॽ खुन्छिॽ साॽइ यङ्लो॥ 10 चिरिक्ले़ याःम्बक् के़जोःक्पाहाॽ खुन्छिॽ सिक्फे़क्लो, हे़क्क्याङ् निम्याक्को याःम्बक् के़जोःक्पा के़रे़क्ले़ खुन्छिॽ ले़म्दॽरुरो॥ 11 सोअनबा युक्साबाहाॽ चाॽरिक् अदङ् मे़जोक्लो! मिस्र लाजेॽबा फारो हाङ्ङिल्ले़ सिक्कुम्साबा कुसुजादाङ्बाहाॽरे़ कुसुम् मे़न्दम्मनाबा पान् मे़बाःत्तुरो॥ खिनिॽ आक्खेलॽरिक् फारो हाङ्ङिन् अक्खे के़मे़त्तुम्बे, “थे सिक्कुम्साबाहाॽओ आङ्गाॽआङ् लत्छाआ मेःम्बि? हे़क्क्याङ् उन्छोन् उनाहुरिबा हाङ्हाॽरे़ खुन्छिॽ हुॽसाम्बाआ मेःम्बि?” 12 मिस्रबा फारो हाङ्ङे! सिक्कुम्साबा के़सुजादाङ्बाहाॽ आत्ति मे़बेबे? मिस्र लाजेॽबा मनाहाॽ मुक्साम्दाङ्बा यहवे दाङ्बे़ल्ले़ थे मे़प्मासि कुनिङ्वाॽ वाॽ के़लॽबा पाःन्निन् खे़ङ्हाॽरे़ खे़ने़ॽ के़म्मे़त्ल हे़क्क्याङ् के़म्जे़क्लरो॥ 13 सोअन ये़क्यक्कोबा युक्साबाहाॽ अदङ् मे़बोःक्खे़आङ् मे़वाॽरो॥ हे़क्क्याङ् मेम्फिसबा ये़क्यक्कोबा सुहाङ्युक्पाहाॽ इङ्ले़क्को मे़ध्ये़आङ् मे़वाॽरो॥ खे़न् के़रे़क् मनाहाॽ हाङ्जुम्मोबा लाम्लोबासिरो, कर खे़ङ्हाॽरे़ मिस्र लाजेॽओबा खुन्छिॽ मनाहाॽ ताप्फे़ःम्बा सुजा मे़बिरुसिआङ् वाॽरो॥ 14 यहवे दाङ्बे़ल्ले़ खे़ङ्हाॽ खुन्छिॽ निङ्वाॽ के़इबा चोगुसिआङ् मे़वाॽरो, खे़ल्ले़चोगुल्ले़ मिस्रबा मनाहाॽरे़ के़रे़क् याःम्बक्हाॽ फे़त्मे़लाःन्दुआङ् मे़वाॽरो॥ हे़क्क्याङ् थिःल्ले़ के़मबा मनान् आप्फेक् कुबे़ॽमाःत्तो सॽसिङ्बा कुइसिक् मिस्र लाजेन् थो ना योबा मे़जोगुआङ् वाॽरो, 15 मिस्र लाजेःल्ले़ थेआङ् चोःक्मा मे़सुक्तुन्लो॥ कुधे़गेक् नु कुमिन् हे़क्क्याङ् खे़बक्सिङ् पोराःक्हाॽ नु सिदाक्पाहाॽ के़रे़क् कुभाॽ पिमा मे़न्छुक्मनाबा मे़बोःक्खे़आङ् वाॽरो॥ मिस्रबा मनाहाॽरे़ यहवे दाङ्बान् से़वा मे़मे़त्तुॽ 16 खे़न् ये़म्मिन् ताःल्ले़ मिस्रबा मनाहाॽ ताङ्से़ःप्मा मे़न्छुक्सिङ्मनामा मे़न्छुमा हे़क्तङ्मा मे़बोङ्॥ मुक्साम्दाङ्बा यहवे दाङ्बे़ल्ले़ खे़ङ्हाॽ खुम्दिङ् पिमासिरे़ लागि कुहुक्किन् सन्छुआङ् पत्, खे़ङ्हाॽरे़ खे़न् मे़निसुआङ् किमे़ल्ले़ चिरिम्लिम्ना मे़यङ्॥ 17 हे़क्क्याङ् यहुदा लाजेॽबा मनाहाॽरे़ मिस्रओ किमा यङ्मा पाःन्हाॽ मे़दारुॽ॥ यहुदा लाजेःल्ले़ कुमिङ् के़घे़म्बा के़रे़क् मनाहाॽ पगि मे़गिरो, थेआङ्भे़ल्ले़ मुक्साम्दाङ्बा यहवे दाङ्बे़ल्ले़ खे़ङ्हाॽ खुम्दिङ् पिमासि निङ्सेःक् चोगुर वाॽ॥ 18 खे़न् ये़म्मिन् ताःल्ले़ मिस्र लाजेॽओ के़ने़बा ङासि ये़क्यक्कोबा मनाहाॽ हिब्रु पाःन्दाङ् मे़बाःत्, हे़क्क्याङ् खे़ॽयोबा मनाहाॽ मुक्साम्दाङ्बा यहवे दाङ्बान् से़वा मे़प्मारे़ लागि माङ्मे़हे़क्सिङ्ॽ॥ खे़न् ये़क्यक्हाॽओ लत्छा ये़क्यक्थिक् मे़क्मासिमा ये़क्यक् मे़मे़त्तुॽ॥ 19 खे़न् ये़न्नो मिस्र लाजेःल्ले़ कुलुम्मो यहवे दाङ्बे़ल्ले़ कुलागि लत्छा ले़त्ति तोःम्मादे़न्धिक् मे़जोगुॽ, हे़क्क्याङ् मिस्र लाजेःल्ले़ इःन्दोओ यहवे दाङ्बाओ लत्छा निङ्वाॽसो लुङ् सित्लाङ्धिक् मे़लेःत्तुॽ॥ 20 मिस्र लाजेॽओ खे़न् लुङ् सित्लाङ्ङिन् मुक्साम्दाङ्बा यहवे दाङ्बे़ल्ले़ कुलागि लत्छा मिक्सेन् नु तोःन्दि पोङ्ॽ॥ आयुक्युक्पा नु साक्के़ल्ले़क् के़जोःक्पा मनाहाॽरे़ मे़जोगुल्ले़ यहवे दाङ्बान् कुभाॽरे़ लागि पेलि मे़भाक्तुॽ, हे़क्क्याङ् खुने़ॽ खे़ङ्हाॽरे़ खुन्छिॽ लागि लत्छा से़न्लप्दाङ्बाधिक् नु के़से़ःप्पाधिक् पाङ्घुयुसुॽ, खे़ब्याङ् खे़ल्ले़ खे़न् मनाहाॽ खुन्छिॽ निङ्मिहाॽलाम् से़ःप्तुसिॽ॥ 21 अक्खेलॽरिक् यहवे दाङ्बान् मिस्र लाजेॽबा मनाहाॽओ ओसेःन्धाक्सिङ्ॽ, हे़क्क्याङ् खे़न् ये़न्नाङ्धो खे़ङ्हाॽरे़ यहवे दाङ्बान् नसान् मे़जोगुॽ॥ खे़ङ्हाॽरे़ वयागे़न् सिदुङ्जभा नु चा मिधिङ्मनादेमनाबा सिदुङ्जभालाम् खुने़ॽ से़वा मे़मे़त्तुॽ, हे़क्क्याङ् खे़ङ्हाॽरे़ यहवे दाङ्बे़ल्ले़ कुलागि माङ्हे़क् मे़जोगुआङ् खे़न् पाःन्निन् मे़गे़त्तुॽ॥ 22 यहवे दाङ्बे़ल्ले़ मिस्र लाजेॽओ पयम् यम्बा मिन्देॽ पोःक्ल याःन्दुॽ॥ खुने़ॽ खे़ॽयो के़युङ्बा मनाहाॽ मे़दुक्ल याःन्दुसिॽ, हे़क्क्याङ् खे़ङ्हाॽ याम्मो वेःन्दुसिॽ॥ खे़ब्याङ् खे़ङ्हाॽ यहवे दाङ्बान् ले़प्माङ् मे़नुःङ्ॽ॥ हे़क्क्याङ् खुने़ॽ खे़ङ्हाॽरे़ खुन्छिॽ पेलिन् खे़प्सुआङ् वेःन्दुसिॽ॥ 23 खे़न् ये़न्नो मिस्र लाजेॽलाम् अस्सुर लाजेॽ थारिक् लत्छा माराम्धिक् पोङ्ॽ॥ अस्सुरबा मनाहाॽ मिस्र लाजेॽओ मे़बेःक् हे़क्क्याङ् मिस्रबा मनाहाॽ अस्सुर लाजेॽओ मे़बेःक्॥ खे़ब्याङ् मिस्रबा मनाहाॽ नु अस्सुरबा मनाहाॽ सोरिक् माङ्से़वा मे़जोक्॥ 24 खे़न् ये़न्नो इस्राइल लाजेन् मिस्र नु अस्सुर लाजेॽहाॽओ सोरिक् फुङ्सिङ्ॽ, हे़क्क्याङ् कन् सुम्सि लाजेॽहाॽलाम् इक्सादिङ् खाम्बेःक्मोबा के़रे़क् मनाहाॽरे़ हाङ्वागे़न् मुॽइसाम् मे़घोसुॽ॥ 25 मुक्साम्दाङ्बा यहवे दाङ्बे़ल्ले़ खे़ङ्हाॽ अक्खे मे़त्तुसिआङ् हाङ्वागे़न् मुॽइसाम् पिरुसिॽ, “मिस्रबा मनाहाॽ आङ्गाॽ आमनासि, अस्सुरिहाॽ आङ्गाॽ आहुक्किल्ले़ चोगुङ्सिङ्बासि हे़क्क्याङ् इस्राइलिहाॽ आङ्गाॽ आबाङे सेगुङ्सिङ्बा लक्के़घोबा आमनासिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.