यसैया 12 - लिम्बुनुगे़न् साम्लो 1 खे़न् ये़न्नो खे़निॽ अक्खे के़बाःत्तुम्लो, “यहवे दाङ्बाए, खे़ने़ॽ नुगे़न् पिने़रो! खे़ने़ॽ आङ्गाॽनु के़याःक्ले़ॽरे़आङ् वये़रो, करसाङ् आल्लोग खे़ने़ॽ के़सिक्के़न् चिःक्तुरो, हे़क्क्याङ् आल्लो आङ्गाॽ हाङ्हाङ् के़मे़त्ताङ्ङाङ् वाॽरो॥ 2 से़क्खासाङ् निङ्वाॽफुमाङ्ङिन् आङ्गाॽ आसे़न्लप्दाङ्बारो, आङ्गाॽ नसान् चोगुङ् हे़क्क्याङ् मे़गिआन्लो॥ यहवे दाङ्बा, यहवे दाङ्बे़न्ने आङ्गाॽ आमुक्साम् नु आसाम्लोरो, खुने़ॽए आङ्गाॽ आसे़न्लप्दाङ्बा पोःक्खे़आङ् वाॽरो॥” 3 खे़ने़ॽ सेसेबा च्वाःत्तिन् के़धुङुल्ले़ के़सःत्लो, हे़क्केलॽरिक्के निङ्वाॽफुमाङ्ङिल्ले़ कुमनाहाॽ खुने़ॽ से़ःप्तुसिल्ले़ खे़ङ्हाॽ खुन्छिॽ निङ्वाॽ तारो॥ 4 खे़न् ये़म्मो खिनिॽ अक्खे के़बाःत्तुम्लो, “यहवे दाङ्बान् नुगे़न् पिरे़म्मे़ॽओ, खुने़ॽ पयम् यम्बा चोक् फाॽआङ् यम्बा इक्लाओ इङ्भोसे़म्मे़ॽओ॥ खुने़ॽ चोगुबा याःम्बक्किन् इक्सादिङ् खाम्बेःक्कोबा मे़न्छाम् सुवाङ्हाॽ चे़क्ते़म्सिम्मे़ॽओ, हे़क्क्याङ् खुने़ॽ कुमिङ्ङिन् के़रे़क्नुःल्ले़ यम्बा पोःक्खे़आङ् वाॽ फाॽआङ् उवा चोगे़म्मे़ॽओ॥ 5 यहवे दाङ्बाओ साम्लोराम्मे़ॽओ, थेआङ्भे़ल्ले़ खुने़ॽ निङ्वाॽ के़माबा याःम्बक्हाॽ चोगुआङ् वाॽरो, कन् पाःन्निन् इक्सादिङ् खाम्बेःक्कोबा के़रे़क्ले़ कुसिङ् मे़निःत्तुररो॥ 6 सियोन ये़क्यक्कोबा मनासे, यम्बा इक्लाओ अःक्ताम्मे़ॽ हे़क्क्याङ् सःत्ताम्मे़ॽर साम्लोराम्मे़ॽओ, थेआङ्भे़ल्ले़ खे़निॽ लुम्मो के़वाॽबा इस्राइलबा सेसे निङ्वाॽफुमाङ्ङिन् पयम् यम्बा चोक्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.