हबकुक 3 - लिम्बुहबकुकरे़ कुबेलि 1 सिग्गिओनोथ इक्लालाम् माङ्निङ्वाॽपान् के़बाःप्पा हबकुकरे़ फाक्तुबा पेलि॥ 2 यहवे दाङ्बाए, खे़ने़ॽ के़मिङ्सो के़धाङ्सोन् आङ्गाॽ खे़प्सुङ्ङाङ् वाॽआरो, यहवे दाङ्बाए, खे़ने़ॽ के़याःम्बक्हाॽ खे़प्सुङ्लो हे़क्क्याङ् आङ्गाॽ साॽरिक् आनिङ्वाॽ मारो॥ आनिगे ये़न्नो खे़ङ्हाॽ खे़ने़ॽ कुसङ् चोगे़ॽओ हे़क्क्याङ् खे़ङ्हाॽ आनिगे ओसेन् आधाक्ते़ॽओ आनिगे ये़म्मो खे़ङ्हाॽ कुसिङ् निःप्मा आबाङ्घे़ॽओ, साॽरिक् के़साक्के़न् पोःक्पा ये़म्मो लुङ्माॽ आदुक्ते़ॽओ॥ 3 निङ्वाॽफुमाङ्ङिन् ते़मानलाम्बा फे़रे़रो, सेसे निङ्वाॽफुमाङ्ङिन् पारानबा कोःक्माहाॽलाम् फे़रे़रो॥ खुने़ॽ कुमिमिदिङ्ङिल्ले़ साङ्ग्राम्पेदाङ्ङिन् ते़प्तुरो, इक्सादिङ् खाम्बेःक्मान् कुनारा फोमा पाःन्निल्ले़ तिम्लो॥ सेला 4 खुने़ॽ कुहाङ्वा कुमाङ्वान् नाम् के़गे़प्पा हे़क्के लॽरे़रो, खुने़ॽ कुहुक्कोलाम् नाम्साङ्ङिन् ओःत्ते़ लःन्दे़रो, खे़प्मोए खुने़ॽ कुमुक्साम्मिन् चिङ्सिङ्ङाङ् वये़रो॥ 5 खुने़ॽ कुदगि कुदगि मिङ्देन् पोरे़र पेरो, माङ्दुक्मान् खुने़ॽ कुएगाङ् कुएगाङ् थासिङ्बेरो॥ 6 ये़म्सिङ्ङिल्ले़ खुने़ॽ इक्सादिङ् खाम्बेःक्मान् मुन्दुरो, खुने़ॽ ओमुये़आङ् मे़न्छाम् सुवाङ्हाॽ चिरिम्लिम् मे़यक्खे़रो॥ उन्छेःन् उन्छेःन्नाङ्धोबा कोःक्माहाॽ फयःप्फयःप् यबे़रो, खे़न् काप्पोबा थे़गु माङ्वाहाॽ चोःन्दे़ लासे़रो, खुने़ॽ कुलाम्हाॽ आभे़ल्ले़आङ् मे़म्नुप्मनाबा चोक्लो॥ 7 आङ्गाॽ कुसनबा मनाहाॽ तुक्खेलाक्खेओ मे़ध्ये़बा निसुङ्लो, मिद्यानबा मे़न्छाम् सुवाङ्ङिन् किमा यङ्माओ थ्ये़बा निसुङ्लो॥ 8 थे खे़ने़ॽ के़साक्के़न्निन् वहःङ्हाॽरे़ कुदक्ले़ङ्वाओ वये़बि, यहवे दाङ्बाए? थे खे़ने़ॽ के़याःक्ले़ॽमान् हःङ्गुहाॽरे़ कुदक्ले़ङ्वाओ वये़बि? खे़ने़ॽ के़अन्हाॽओ नु थङ् के़नाःम्बा के़अन्लाधाहाॽओ के़लोःक्ते़र के़बत्छे़ल्ले़ थे खे़ने़ॽ वरःङ्ङिल्ले़ कुदक्ले़ङ्वाओ खे़ने़ॽ के़सिक् पोगे़आङ् वये़बि? 9 खे़ने़ॽ आप्फेक् के़लिॽइन् के़लःत्तुरो, खे़ने़ॽ यरिक् तोःङ्हाॽ ताराम्मे़ॽ फाॽआङ् के़बाःत्तुरो, सेला खे़ने़ॽ वहःङ्हाॽलाम् इक्सादिङ् खाम्बेःक्मान् के़जे़रुरो॥ 10 कोःक्मा फाङ्जङ्हाॽरे़ खे़ने़ॽ के़म्निसे़आङ् मे़यक्खे़रो, वधोःक्कोलाम् हुङ्मनाबा हे़क्के च्वाःत्हाॽ कुक्खे़बेरो, वरःङ्ङिन् हुःक्ते़आङ् वाभे़ल्ले़ङ्हाॽ थाःङ् पोगे़रो॥ 11 तिल्ले़क् तिल्ले़क् के़बे़बाआङ् के़बप्पा के़दोःङ्हाॽरे़ हे़क्क्याङ् से़ल्ले़ङ् से़ल्ले़ङ् के़ले़क्पा के़लाःक्किल्ले़ चोगुल्ले़, नाम्मिन् नु लाबे़न् ताङ्साक्पो स्वाःत् फन्ने़सिरो॥ 12 खे़ने़ॽ के़साक्के़न्नो इक्सादिङ् खाम्बेःक्मो लाङ्गे़घेगे़रो, खे़ने़ॽ के़याःक्ले़ॽमो मे़न्छाम् सुवाङ्हाॽ के़दोॽरुसिरो॥ 13 खे़ने़ॽ आबाङे के़मनाहाॽ ताङ्से़ःप्मासिरे़ लागि, के़सेःन्दुबा के़मनान् से़ःप्मारे़ लागि के़लःन्दे़रो॥ कुॽइगे़भे़म्बा लाजेॽबा लाम्लोबान् खाप्पुथ्यःङ् के़जोगुरो, खे़न् कुधे़गेःक्पोलाम् कुलाङ्ङो थे़म्बाए ले़क्चाॽ के़जोगुरो॥ सेला 14 खे़ङ्हाॽरे़ आनिगे फुत्छिङ्ज्याङ् से़मादे़मारे़ लागि खे़ङ्हाॽ सुरित् केजङ् कुइसिक् मे़भे़रे़रो, याङ्गे़साॽबाहाॽ मे़नाप्तुसिल्ले़ खे़ङ्हाॽ के़नाङ्बा मे़होःप्ते़बाओ खे़ङ्हाॽ मे़सःत्ते़आङ् मे़अःक्ते़ल्ले़ खे़ङ्हाॽरे़ खुन्छिॽ थक्मोबे़न् खुने़ॽ आप्फेक् कुलाःक्किल्ले़ खे़ने़ॽ खे़ल्ले़ कुधे़गेक्पान् पर्हङ् के़हङ्घु के़बिरुरो॥ 15 वरःङ्ङिन् के़अन्हाॽरे़ मे़दोॽरुर के़याःन्दुसिल्ले़ खे़ने़ॽ पयम् यम्बा च्वाःत्हाॽ के़इःप्सुरो॥ 16 आङ्गाॽ कन् खे़प्सुङ्ङाङ् आसिक्लुङ्मान् यक्खे़रो, खे़न् इक्लान् खे़प्सुङ्ङिल्ले़ आम्ब्रासेन् थे़गक्कक्ना यक्खे़रो, आङ्गाॽ आये़त् आलुङ्सिहाॽ सिगाङ्ङे यरे़बेरो, हे़क्क्याङ् आङ्गाॽ आलाङ्हाॽ चिरिम्लिम्ना यक्खे़रो॥ हे़क्केसाङ् आनिगे याप्मि के़भप्पा मे़न्छाम् सुवाङ्हाॽओ के़दाबा तुक्खेलाक्खेबा ये़न्निल्ले़ लागि आङ्गाॽ नासि थःत्तुङ्ङाङ् हाङ्घुङ्ल वाॽआरो॥ 17 पःत्छेल्ले़ कुबुङ्ङो कुनःक् मे़लःन्ने़न्छाङ् हे़क्क्याङ् चे़ल्ले़क्सेःल्ले़ कुबुङ्ङो कुजाॽ मे़धोःक्ने़न्छाङ्, चैतुने़ल्ले़ कुबुङ्ङो कुजाॽ मे़धोःक्ने़न्छाङ्, हे़क्क्याङ् इक्ताप्हाॽओ पोगुगे़न् कुजा मे़बत्ने़न्छाङ्, खरओ मे़ल्लुक् मे़ःन्दाक् मे़न्याक्ने़न्छाङ् हे़क्क्याङ् पित् ये़प्मनाओ पित्हाॽ मे़होःप्साङ्, 18 आङ्गाॽग यहवे दाङ्बाओ सःत्तारो, आसे़न्लप्दाङ्बा निङ्वाॽफुमाङ्ङो ये़ये़ लॽआरो॥ 19 यहवे दाङ्बा निङ्वाॽफुमाङ्ङिन् आमुक्साम्लो, खुने़ॽ आलाङ्हाॽ पे़ःङ्वाःल्ले़ कुलाङ् हे़क्के मे़ल्ले़ःङ्मनाबा मे़न्दोःक्मनाबा चोगुरो, आङ्गाॽ चन्जम्बादे़न्हाॽओ पेःक्मा के़सुक्पा चोःक्कारो॥ साम्लो के़हुॽबाल्ले़ कुलागि—अन्मे खिङ्मनाबा मुक्लाहाॽओ मुङ्मनाबा इक्लारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.