तोलिङ्सोमु 33 - लिम्बुयाकुबरे़ एसाबे़न् तुमुॽ 1 याकुबे़ल्ले़ अक्खे ओमे़त्तुल्ले़ एसाबे़न् हे़क्क्याङ् खुने़ॽनु सोरिक् किप् लिसि मनाहाॽ मे़भे़रे़र मे़बत्छे़बा निसुसि॥ हे़क्केःल्ले़ खुने़ॽ लिआ नु राहेल हे़क्क्याङ् ने़त्छि खुन्छिॽ से़वारोमाहाॽरे़ खुनिॽ कम्ब्राङ्ङो कुस्साहाॽ से़न्दुसि॥ 2 खुने़ॽ कुसे़वारोमाहाॽ नु खुन्छिॽ साहाॽ के़रे़क्नुःल्ले़ तगि लाम्लोसुसि, खे़ङ्हाॽरे़ खुन्छिॽ एगाङ् लिआःन् नु कुस्साहाॽ हे़क्क्याङ् के़रे़क्नुःल्ले़ एगाङ् राहेल नु युसुफे़न् फत्छुसि॥ 3 खुने़ॽ आबाङेग कुम्भुॽरे़ कुबेसाङ् के़रे़ल्ले़ खे़ङ्हाॽ के़रे़क्नुःल्ले़ तगि लाम्लोसिङ्ङाङ् नुसिले़ङ् साम्बोन् हबत्ताङ् से़वा मये़र पे॥ 4 कर एसाबे़न् याकुबे़ल्ले़ कुदुम्से़ लोःक्ते़र फे़रे़ हे़क्क्याङ् खे़न् हे़प्प्रे़क् हे़प्तु, खे़ब्याङ् कुसाःङ्भेॽओ खिम्सिङ्ङाङ् खुने़ॽ चुप् मे़त्तु हे़क्क्याङ् खे़ङ्हाॽ ने़प्मजाङ् साॽरिक् हाबे़छि॥ 5 खे़ब्याङ् एसाबे़न् अक्खे ओमये़ल्ले़ मे़न्छुमाहाॽ नु हिन्जाॽ पित्छाॽहाॽ निसुसिआङ् मे़त्तु, “खे़ने़ॽनु के़वाॽबा के़वाॽमा कन् याप्मिहाॽ हाःत्छिनिबे?” याकुबरे़ नुगप् पिरु, “निवाॽफुमाङ्ङिल्ले़ खे़ने़ॽ के़से़वारोबान् लुङ्माॽ तुक्तुआङ् पिरुबा हिन्जाॽसिरो॥” 6 खे़ब्याङ् से़वारोमाहाॽ नु खुन्छिॽ साहाॽ निःत्ताङ् मे़भे़रे़ हे़क्क्याङ् अःक्खुम् मे़भन्छिङ्ङाङ् एसाबे़न् से़वा मे़मे़त्तु॥ 7 खे़न् एगाङ् लिआःन् नु कुस्साहाॽ मे़भे़रे़आङ् से़वा मे़मे़त्तु॥ के़रे़क्नुःल्ले़ याङ्सि युसुफे़न् नु राहे़ले़न् फे़रे़छि हे़क्क्याङ् खे़ङ्हाॽरे़आङ् से़वा मे़त्ते़छु॥ 8 एसाबे़ल्ले़ याकुबे़न् सेःन्लाप्तु, “आङ्गाॽ फे़राङ्ङिल्ले़ लाम्मो तुमुङ्सिङ्बा कन् थक्सालुप्हाॽ थेआङ् के़बाङ्घु के़भे़न्छुसिबाबे?” याकुबरे़ नुगप् पिरु, “आदाङ्बे खे़ङ्हाॽग खे़ने़ॽ लुङ्माॽ के़दुक्कार फाॽआङ् मिक्तोक् सुङ् फे़त्तुङ्सिङ्बारो॥” 9 कर एसाबे़ल्ले़ नोगप् पिरु, “आन्साॽए, आङ्गाॽ आलागि के़योबा कत्तुङ्सिङ्॥ खे़ने़ॽ के़गत्तुसिबाहाॽ खे़ने़ॽए कत्ते़से़ॽ॥” 10 याकुबे़ल्ले़ मे़त्तु, “मेःन्लो, खे़ने़ॽ के़सिराॽ थाङ्ङाने फाग्र आहुक्कोलाम् कन् मिक्तोक् सुङ्हाॽ ताःक्ते़ॽओ॥ खे़ने़ॽ नुरिक्काङ् लाङ् के़दाःक्ताङ्॥ से़क्खाए खे़ने़ॽ तुम्ने़ल्ले़ आङ्गाॽ निङ्वाॽफुमाङ्ङिन् तुमुङ्बा हे़क्के पोःक्खे़रो॥ 11 खे़ने़ॽए के़लागि फाॽआङ् हुॽने़बा मिक्तोःक्किन् ताःक्ते़ॽ फाॽआङ् पेलि फाक्ने़रो॥ आङ्गाॽ आलागि के़योबा कत्तुङ् थेआङ्भे़ल्ले़ निङ्वाॽफुमाङ्ङिल्ले़ आङ्गाॽ नुरिक् मे़त्ताङ्ङाङ् वाॽ॥” कम्भलॽरिक् याकुबरे़ ये़ःक्काङ् ये़ःक् मे़त्तुबाल्ले़ चोगुल्ले़ एसाबरे़ खे़न् मिक्तोक् सुङ्ङिन् ताःक्तु॥ 12 खे़ब्याङ् एसाबे़ल्ले़ मे़त्तु, “आल्ल आनिॽ थाआसि॥ आङ्गाॽ खिनिॽ लाम्लोनिङ्॥” 13 कर याकुबे़ल्ले़ मे़त्तु, “आदाङ्बारे़ के़निसुआङ्ङे के़वाॽरो, कन् हिन्जाॽ पित्छाॽहाॽ मे़जुःक् हे़क्क्याङ् सावामा थक्साहाॽ नुरिक् ओमे़प्मासि पोङ्॥ खे़ङ्हाॽ थिक् ये़न्धिक् च्यरिक् लाङ्घेःङ्मासिल्ले़ के़रे़क् मे़सिबिला॥ 14 खे़ल्ले़चोगुल्ले़ आदाङ्बान् पेलि फाक्ने़, खे़ने़ॽए आनिगे़नुःल्ले़ तगि पेगे़ॽओ॥ आङ्गाॽ आदगि के़बेःक्पा थक्साहाॽ हे़क्क्याङ् कन् हिन्जाॽपित्छाॽ लाङ्मे़घेःक्पा कुइसिक् सेइरओ खे़ने़ॽ मे़न्दुम्मे थारिक् आङ्गाॽ मस्सुआङ् फे़न्नारो॥” 15 एसाबे़ल्ले़ मे़त्तु, “हे़क्केग्र खे़ने़ॽ के़भाॽसे़ कुभा आमनाहाॽ ले़रुङ्धाङ्सिङ्॥” कर याकुबरे़ मे़त्तु, “कन् चाहाब् मे़जोःक्कान्ना॥ खे़ने़ॽ लुङ्माॽरक् के़दुक्काआङ्ग पोङ्॥” 16 खे़ल्ले़चोगुल्ले़ हाबा खे़न् ये़न्नो एसाबे़न् सेइर ले़प्मा थासिङ् पे॥ 17 कर याकुबे़ङ्ग सुक्कोत ले़प्माङ् थासिङ्, हे़क्क्याङ् आबाङे खुने़ॽ कुलागि हिम्धिक् नु कुधक्साहाॽरे़ लागि याक्माहिम्हाॽ चोगु॥ खे़ल्ले़चोगुल्ले़ खे़न् ते़न्निल्ले़ कुमिङ् सुक्कोत पोःक्खे़रो॥ 18 याकुबे़न् पद्दन आरामलाम् लाङ्घेगे़ पेआङ् कनान लाजेॽओबा सकेम ये़क्यक्को नुरिक्काङ् के़रे़, हे़क्क्याङ् खे़न् ये़क्यक्किल्ले़ कुबेसाङ् साःङ्गाहिम् लेःत्तुआङ् युङ्सिङ्॥ 19 याकुबरे़ खुने़ॽ साःङ्गाहिम् लेःत्तुबा ते़न्निन् सकेमे़ल्ले़ कुम्बा हामोरे़ल्ले़ कुस्साहाॽलाम् किप् थिक् युप्पा याङ्इत्छि कुमे़ल्लुङ् केःत्तुआङ् इङु॥ 20 खे़प्मो खुने़ॽ लत्छा ले़त्ति तोःम्मादे़न् थिक् चोगु हे़क्क्याङ् “ए़ल ए़लोह इस्राइल” (निङ्वाॽफुमाङ्ङिङ्ग इस्राइलबा निङ्वाॽफुमाङ्) मिङ् युक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.