तोलिङ्सोमु 30 - लिम्बु1 राहेलरे़ याकुबलाम् कुस्सा मे़बोःक्खे़म्बा निसुआङ् आबाङे कुन्ने़ॽ नाहे़प्मा हेःक्तु॥ खे़ल्ले़ याकुबे़न् मे़त्तु, “आङ्गाॽआङ् अङे़ःक्वा सा पिराङ्ङे़ॽ मेःन्ने़फग्र सिआरो॥” 2 याकुबे़न् कुसिक् पोगे़आङ् मे़त्तु, “थे खे़ने़ॽ सामे़ङ्गप्मनामा चोःक्मा के़सुक्पा निङ्वाॽफुमाङ्ङिल्ले़ कुदे़न्नो आङ्गाॽ वाआबि?” 3 खे़ब्याङ् राहेलरे़ मे़त्तु, “आसे़वारोमा बिल्हान् ओघा कॽयो वाॽ, खे़न्नु इप्से़ॽ॥ हे़क्क्याङ् खे़ल्ले़ आलागि अङे़ःक्वा कत्तु पिआर, हे़क्क्याङ् आङ्गाॽआङ् आहिम्सयङ् मे़बोङ्ल॥” 4 खे़ल्ले़चोगुल्ले़ राहेलरे़ आबाङे कुसे़वारोमा बिल्हान् याकुबरे़ कुमेत् हे़क्के पिरु, हे़क्क्याङ् याकुबे़न् खे़न्नु इप्से़॥ 5 हे़क्क्याङ् बिल्हान् मे़न्छुक्मा पोःक्खे़आङ् याकुबलाम् लत्छा ये़म्बित्छा साधिक् कत्तु॥ 6 खे़ब्याङ् राहेलरे़ पाःत्तु, “निङ्वाॽफुमाङ्ङिल्ले़ आङ्गाॽ ले़प्माङ् खासे़न् लोःन्दाङ् पिराङ्, हे़क्क्याङ् आबेलिन् खे़प्सुआङ् ये़म्बित्छा साधिक् पिराङ्॥” खे़ल्ले़चोगुल्ले़ खे़न् अङे़ःक्वान् दान मिङ् वाःत्तु॥ 7 राहेलरे़ कुसे़वारोमा बिल्हान् याम्मो मे़न्छुक्मा पोःक्खे़, हे़क्क्याङ् खे़ल्ले़ याकुबलाम् वेॽ ये़म्बित्छा साधिक् कत्तु॥ 8 खे़ब्याङ् राहेलरे़ पाःत्तु, “आन्ने़ॽनु साॽरिक्के थक्ताङ् हे़क्क्याङ् आङ्गाॽ नाःन्दुङ्॥” खे़ल्ले़चोगुल्ले़ खुने़ॽ खे़न् अङे़ःक्वान् नप्तालि मिङ् वाःत्तु॥ 9 हाबा खे़न् ये़म्मो लिआःल्ले़ आङ्गाॽ सागप्मा नाॽराङ् के़लॽबा निसुआङ् कुसे़वारोमा जिल्पान् तेॽरुआङ् याकुबे़न् कुमेत् चोःक्से़ पिरु॥ 10 खे़ब्याङ् जिल्पाःल्ले़ याकुबलाम् ये़म्बित्छा साधिक् कत्तु॥ 11 लिआःल्ले़ “आङ्गाॽ साॽरिक् कुदॽयान् के़नुॽमाआरो” पाःत्तु॥ खे़ल्ले़चोगुल्ले़ अङे़ःक्वान् गाद मिङ् वाःत्तु॥ 12 लिआःल्ले़ कुसे़वारोमा जिल्पारे़ याकुबलाम् याम्मो वेॽ ये़म्बित्छा साधिक् कत्तु॥ 13 हे़क्क्याङ् लिआःल्ले़ पाःत्तु, “आङ्गाॽ कुनिङ्वाॽ ये़ये़ के़लॽमाआरो॥ आल्ल मे़न्छुमाहाॽरे़ आङ्गाॽ के़सःप्मा मे़मे़त्ता॥” खे़ल्ले़चोगुल्ले़ अङे़ःक्वान् आसेर मिङ् वाःत्तु॥ 14 मासि हे़क्मा ये़म्मो रुबे़ने़न् प्याङ्सिओ पेगे़, हे़क्क्याङ् आममबा सिङ्सेॽहाॽ खोसु तारुआङ् खे़न् कुम्मा लिआःन् पिरु॥ राहेलरे़ लिआःन् मे़त्तु, “के़साःल्ले़ तारुबा सिङ्सेहाॽ आङ्गाॽजि आजे़ःत्छिक् पिराङ्ङे़ॽना॥” 15 कर लिआःल्ले़ खे़न् मे़त्तु, “आङ्गाॽ आये़म्बान् के़नाप्ताङ्ङाङ्साङ् के़निङ्वाॽ मे़द्ये़ने़म्बि? आल्ल खे़ने़ॽ आसाःल्ले़ तारुबा मे़न्द्रे़क् मे़प्मनाबा याःन्निन् तेॽमा के़गोःत्तुबि?” राहेलरे़ मे़त्तु, “के़साःल्ले़ तारुबा मे़न्द्रे़क् याःन्निन् के़बिआने़भग्र आइन् से़न्दिक् याकुबे़न्नु इम्मा के़सुक्॥” 16 युःन्छिक् याकुबे़न् प्याङ्सिओलाम् के़रे़द्ये़ हे़क्क्याङ् लिआःन् खुने़ॽ कुदुम्से़ पेआङ् मे़त्तु, “खे़ने़ॽ आइन् से़न्दिक् आङ्गाॽनु के़इम्ल पोङ्, थेआङ्भे़ल्ले़ आसाःल्ले़ तारुबा मे़न्द्रे़क् याःन्निल्ले़ खे़ने़ॽ थे़ॽने़आङ् वाॽ॥” खे़ल्ले़चोगुल्ले़ याकुबे़न् खे़न् से़न्दिक् लिआःन्नु इप्से़॥ 17 निङ्वाॽफुमाङ्ङिल्ले़ लिआःल्ले़ कुबेलिन् खे़प्सु हे़क्क्याङ् खे़न् मे़न्छुक्मा पोःक्खे़आङ् याकुबलाम् खे़ल्ले़ ङासिगेक्पा ये़म्बित्छासा कत्तु॥ 18 खे़ब्याङ् लिआःल्ले़ पाःत्तु, “आङ्गाॽ आसे़वारोमान् आहिम्साबे़न् पिरुङ्बाल्ले़ निङ्वाॽफुमाङ्ङिल्ले़ थुम्घो पिराङ्लो॥” खे़ल्ले़चोगुल्ले़ खुने़ॽ खे़न् इस्साकार मिङ् वाःत्तु॥ 19 लिआःन् याम्मोआङ् मे़न्छुक्मा पोःक्खे़, हे़क्क्याङ् याकुबलाम् तुक्सिगेःक्पा ये़म्बित्छासा कत्तु॥ 20 खे़ल्ले़ पाःत्तु, “निङ्वाॽफुमाङ्ङिल्ले़ आङ्गाॽ नुबा मिक्तोक् पिराङ्लो॥ आल्ल आये़म्बाःल्ले़ आङ्गाॽ इङ्धाङ् पिआबा पोःक्खे़, थेआङ्भे़ल्ले़ आङ्गाॽ तुक्सि ये़म्बित्छासाहाॽ खुने़ॽ कत्तुङ् पिरुङ्ङाङ् वाॽ” खे़ल्ले़चोगुल्ले़ अङे़ःक्वान् जबुलुन मिङ् वाःत्तु॥ 21 खे़न् एगाङ् खे़ल्ले़ लत्छा मे़न्छुमा साधिक् कत्तु, हे़क्क्याङ् खे़ल्ले़ खे़न् अङे़ःक्वान् दिना मिङ् वाःत्तु॥ 22 खे़ब्याङ् निङ्वाॽफुमाङ्ङिल्ले़ राहेल्ले़न् निङ्वाॽ इःत्तु, हे़क्क्याङ् खुने़ॽ कुबेलिन् खे़प्सुआङ् सागप्मा के़सुक्मा चोगु॥ 23 खे़न् मे़न्छुक्मा पोःक्खे़आङ् लत्छा ये़म्बित्छा साधिक् कत्तु, हे़क्क्याङ् खुने़ॽ पाःत्तु, “निङ्वाॽफुमाङ्ङिल्ले़ आङ्गाॽ हिनाःम् मे़जोगाङ्बान् खे़त्तुदेसु पिराङ्लो॥” 24 हे़क्क्याङ् “यहवे दाङ्बाल्ले़ याम्मो वेॽ साआङ् पिआर” फाॽआङ् खे़न् अङे़ःक्वान् खुने़ॽ युसुफ मिङ् वाःत्तु॥ याकुबरे़ लाबाने़न् कुमे़न् नाःक्तुॽ 25 राहेलरे़ युसुफे़न् सावाःन्दुबा कुभा ये़म् एगाङ् याकुबरे़ लाबान्ने़न् मे़त्तु, “आङ्गाॽ पेःक्मा फाःक्ताङ्ङे़ॽ खे़ब्याङ् आङ्गाॽ पेःक्का॥ 26 आङ्गाॽ आमेःत्हाॽ नु आस्साहाॽ तेॽमासिआङ् पेःक्मा फाःक्ताङ्ङे़ॽ, खे़ङ्हाॽरे़ लागि आङ्गाॽ के़याःम्बक् के़से़वा चोगुङ्ङाङ् वाॽ॥ आङ्गाॽ के़से़वा चोगुङ्बान् खे़ने़ॽ के़निसुआङ् वाॽरो॥” 27 लाबाने़ल्ले़ नोगप् पिरु, “आङ्गाॽ के़सिराॽ थाङ्ङाने फाग्र पक्मे़ध्याङ्ङे़न्ने़ॽ॥ खे़ने़ॽ कप्मो के़वाॽबाल्ले़ चोगुल्ले़ यहवे दाङ्बाल्ले़ आङ्गाॽ मुॽइसाम् पिराङ्ङाङ् वाॽ के़लॽबा पाःन्निन् सुफोलाम् आङ्गाॽ निसुङ्ङाङ् वाॽरो॥ 28 आभ्यारिक् नाम्याक् के़नाःक्तुॽ? आङ्गाॽ मे़त्ताङ्ङे़ॽ, खे़म्भ्यारिक् आङ्गाॽ पिने़॥” 29 याकुबरे़ लाबाने़न् नोगप् पिरु, “आक्खेलॽरिक् के़याःम्बक् चोगुङ्, हे़क्क्याङ् के़धक्साहाॽ आगम्ब्राङ्ङो आक्खेलॽरिक् मे़बोःन्दे़ खे़ङ्ग खे़ने़ॽए के़निसुआङ् वाॽरो॥ 30 थेआङ्भे़ल्ले़ आङ्गाॽ तामानुःल्ले़ तगि खे़ने़ॽ मिसाक्लक् के़गत्तुसि हे़क्क्याङ् आल्लो आत्तातान्ने यरिक् मे़बोन्दे़आङ् मे़वाॽ॥ आङ्गाॽ चोगुङ्बा के़रे़क् पाःन्नो यहवे दाङ्बाल्ले़ मुॽइसाम् के़बिरे़आङ् के़वाॽ॥ कर आङ्गाॽ आहिम्सयङ्हाॽरे़ लागि आभे़ल्ले़ याःम्बक् चोगुङ्बाबे?” 31 लाबाने़ल्ले़ याम्मो सेःन्दोसु, “नाम्याक् आक्खे़न् चाहा के़जोक्?” याकुबरे़ मे़त्तु, “आङ्गाॽ थेआङ् मे़बिराङ्ङे़न्ने़ॽ॥ खे़ने़ॽ आङ्गाॽ आलागि लत्छा पाःन्धिक् के़जोगुने़फाॽग्र के़धक्साहाॽ हाबा चाराम्सुङ्सिङ् ओमे़त्तुङ्सिङ् पिने़॥ 32 आइन् के़रे़क् के़धक्सा लुप्हाॽओलाम् माक्ताङ्बा थुःम्बाहाॽ, ते़क्क्राबा नु फदाङ्बा माक्ताङ्बा कुम्ब्रिक् के़युङ्बा मे़ःन्दा नु मे़ल्लुक्हाॽ से़म्मा लःप्मासि फाःक्ताङ्ङे़ॽ॥ हे़क्क्याङ् आनाम्याक् हाबा खे़ङ्हाॽ मे़बोङ्ल॥ 33 आङ्गाॽ आनाम्याक् के़बिआल्ले़ आङ्गाॽ कुदोःप्मा चोःक्काबि मेःम्बि के़लॽबा पाःन्निन् खे़ने़ॽ ओमे़प्मा उसुरु पोङ्॥ आधक्साहाॽओ ते़क्क्राबा फजिखे़ःङ् माक्चिखे़ःङ् मेःन्नेबा कुभरा नु कुमाक्ला मे़ःन्दा नु मे़ल्लुक्हाॽ के़घोसुसिने फाग्र आङ्गाॽ खे़ङ्हाॽ खे़ने़ॽओलाम् खुःत्तुङ्सिङ्बा फाॽआङ् निङ्वाॽ के़घोसुॽ॥” 34 लाबाने़ल्ले़ मे़त्तु, “ओःक्, खे़ने़ॽ के़बाःत्तुबा हे़क्केए पोङ्लरो॥” 35 बाखे़न् ये़न्नो लाबाने़ल्ले़ फजिघे़ःङ् नु माक्चिघे़ःङ् मिक्सेःन् के़बप्पा मे़ःन्दमा नु कुम्बाबा मे़ःन्दाहाॽ हे़क्क्याङ् कुमाक्ला थुःम्बाहाॽ के़रे़क् से़न्दुसिआङ् खुने़ॽ कुस्साहाॽरे़ खुनिॽ हुक्को ओमे़त्छे़ पिरुसि॥ 36 हे़क्क्याङ् याकुबे़न् नु खुन्छिॽलुम्मो लाबाने़ल्ले़ सुम्ये़न् थारिक्पा लाम् लाःत्लाःत् चोगुआङ् खे़ङ्हाॽ मे़युङे़॥ हे़क्क्याङ् याकुबरे़ लाबाने़ल्ले़ के़वाॽबा कुमे़ःन्दा कुमे़ल्लुक् लुप्हाॽ कम्मा ओमे़प्मा हेःक्तुसि॥ 37 खे़ब्याङ् याकुबरे़ पिपोर इवाःत्, खे़ङ्जा हे़क्क्याङ् ते़म्बेॽओ के़युङ्बा कुलेःत्लाॽ सिङ्बोराःक्हाॽ तक्कात् याङ्सिङ्ङाङ् खे़ङ्हाॽओ कुभरा कुसाप् चोःक्मारे़ लागि कुहोरिक्पान् थिःक्तु॥ 38 हे़क्क्याङ् खुने़ॽ थिःक्तुबा सिङ्बोराःक्हाॽ मे़ःन्दा नु मे़ल्लुक्हाॽरे़ खुन्छिॽ च्वाःत् थुङ्मादे़न् वघोःङ्ओ ये़प्सु॥ खे़न् मे़ःन्दा मे़ल्लुक्हाॽ च्वाःत् थुङ्से़ मे़द्ये़ःल्ले़ खे़ङ्हाॽ हाबा खे़प्मो मे़लिङ्सिङ् मे़लाम्सिङ्॥ 39 खे़न् मे़ःन्दा मे़ल्लुक् लुप्हाॽ खे़न् तक्काःत्हाॽ तगि मे़लाम्सिङ्बाल्ले़ चोगुल्ले़ खे़ङ्हाॽरे़ बाहे़क्तङ्बा ते़क्क्राबा, फजिखे़ःङ् माक्चिखे़ःङ् के़लॽबा मे़ःन्दज्याःक् मे़ल्लुक्साःत्हाॽ मे़धाप्तुसि॥ 40 हे़क्क्याङ् याकुबे़ल्ले़ हे़क्तङ्बा मे़ःन्दा मे़ल्लुक् साःत्हाॽ से़न्दुसि हे़क्क्याङ् वेॽहाॽ लाबाने़ल्ले़ फजिघे़ःङ् माक्चिखे़ःङ् के़लॽबा कुमे़ःन्दा कुमे़ल्लुक्हाॽ ले़प्माङ् हिसुसि॥ हे़क्केलॽरिक् खुने़ॽ कुधक्सा लुप्हाॽ लाबाने़ल्ले़ कुमे़ःन्दा कुमे़ल्लुक्हाॽनु मे़म्भुत्छिङ्ङे आबाङे कुलागि एःक् कत्तुसि॥ 41 खे़न् तक्काःत्हाॽ तगिए मे़लाम्सिङ्ल फाॽआङ् के़मे़ॽबा मे़ःन्दा मे़ल्लुक् लुप्हाॽ मे़लाम्सिङ्ङे़ल्ले़ याकुबरे़ वघोःङ्ङो खे़न् मे़ःन्दा मे़ल्लुक् लुप्हाॽ तगि खे़न् तक्काःत्हाॽ खुन्छि मिक्किल्ले़ निसुर ये़प्सु॥ 42 कर ये़ःङ्घिःक्खिःक्पा मे़ःन्दा मे़ल्लुक्हाॽरे़ लागिग खे़न् तक्काःत्हाॽ मे़ये़प्सुन् मे़बिरुन्छिन्॥ खे़ल्ले़चोगुल्ले़ ये़ःङ्घिःक्घिःक्पाहाॽ लाबाने़ल्ले़न् मे़बोःक्से़ हे़क्क्याङ् के़मे़ॽबाहाॽ याकुबरे़न् मे़बोःक्से़॥ 43 अक्खेलॽरिक् याकुबे़न् आत्तातान्ने याङ्साकुन्धेसाबा पोःक्खे़॥ खुने़ॽ यरिक् मे़ःन्दाक्, मे़ल्लुक् लुप्हाॽ, से़वारोबा, से़वारोमाहाॽ हे़क्क्याङ् उमेहाॽ नु अदङ्हाॽ कत्तुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.