तोलिङ्सोमु 27 - लिम्बुइसहाक्के़ल्ले़ याकुबे़न् हाङ्वागे़न् मुॽइसाम् पिरु 1 इसहाक्के़न् खदाक्मि तुम्से़ल्ले़ मिक् निमा मे़न्छुक्मनाबा पोःक्खे़, खे़ब्याङ् कुस्सा तुम्बा एसाबे़न् उःत्तुआङ् मे़त्तु, “आस्साए॥” खे़ल्ले़ नुगप् पिरु, “है, आङ्गाॽ कॽयो वाॽआरो॥” 2 इसहाक्के़ल्ले़ मे़त्तु, “आल्ल ओमे़त्ते़, आङ्गाॽ खदाक्मि तुम्साङ्॥ आङ्गाॽ आभे़ल्ले़ सिआ खे़न् पाःप्मा मे़सुक्कान्॥ 3 आल्ल खे़ने़ॽ के़भे़जुम् के़भे़याहाॽ नु के़दोःङ् के़लिहाॽ याङ्सिङ्ङे़ॽआङ् ते़म्बेॽओ पेगे़ॽ, हे़क्क्याङ् आलागि सा से़रे़ तारे़ॽ॥ 4 हे़क्क्याङ् आङ्गाॽ आलागि कुजागे़नुॽबा सा थोःक्ते़ॽआङ् पिराङ्ङे़ॽ, हे़क्क्याङ् आङ्गाॽ चाङ्ॽ॥ खे़ब्याङ् आङ्गाॽ सिमानुःल्ले़ तगि खे़ने़ॽ हाङ्वागे़न् मुॽइसाम् पिने़॥” 5 इसहाक्के़न् एसाबेन्नु ताॽजे़क्खे़र यागे़ल्ले़ रिबेकाःल्ले़ स्वाःत् खे़प्सुर युङे़॥ आल्ल एसाबे़न् सा से़प्मा ताःप्मारे़ लागि ते़म्बेॽओ थासिङ् पे, 6 हे़क्केःल्ले़ रिबेकाःल्ले़ कुस्सा याकुबे़न् मे़त्तु, “ओमे़त्ते़ॽ, के़म्बारे़ के़म्भुॽ एसाबे़न् अक्खे मे़त्तुर ताॽजे़क्तुर यागे़बा आङ्गाॽ खे़प्सुङ्, 7 ‘सा नाःत्ते़ॽआङ् से़रे़ तारे़ॽ, हे़क्क्याङ् आङ्गाॽ आलागि कुजागे़नुॽबा सा थोःक्ते़ॽ, हे़क्क्याङ् खे़न् आङ्गाॽ चाङ्ङाङ् आङ्गाॽ सिमानुःल्ले़ तगि यहवे दाङ्बाल्ले़ कुबेसाङ् खे़ने़ॽ मुॽइसाम् पिने़॥’ 8 खे़ल्ले़चोगुल्ले़ आस्साए, आङ्गाॽ आबाःन्निन् खे़प्से़ॽआङ् मे़त्ने़बा हे़क्के चोगे़ॽ॥ 9 मे़ःन्दा लुप्पो पेगे़ॽआङ् वरुप्लुप्पा मे़ःन्दाज्याःक् ने़त्छि फे़त्ते़से़ॽ, हे़क्क्याङ् के़म्बारे़ कुसिराॽ के़धाङ्बा सा आङ्गाॽ थोःक्तुङ्ॽ॥ 10 हे़क्क्याङ् खे़न् थोःक्मनाबा सान् खे़ने़ॽ के़म्बारे़ओ तेॽरे़ॽ, हे़क्क्याङ् खुने़ॽ कन् चआङ् सिमानुःल्ले़ तगि खे़ने़ॽए मुॽइसाम् के़बिर॥” 11 याकुबे़ल्ले़ कुम्मा रिबेकान् मे़त्तु, “कर आम्भुॽ एसाबे़ङ्ग कुम्ब्रिक् स्योःङ्स्योःङ् के़युङ्बा मना चोक्, हे़क्क्याङ् आङ्गाॽग कुम्ब्रिक् के़होप्पा चोःक्का॥ 12 आम्बारे़ आङ्गाॽ ससप् सोःम्आबिला, हे़क्क्याङ् खुने़ॽ कुदगि इङ्ले़क्पा पोङ्ङाआङ् मुॽइसाम्ग मेःन् कर आङ्गाॽ साङ्ग्रा माङ्देरे़नि ते़त्ताबि॥” 13 कुम्मारे़ खुने़ॽ मे़त्तु, “आस्साए, खे़ने़ॽ साङ्ग्रा माङ्दे के़मे़प्पान् आङ्गाॽओए थार॥ आबाःन्निल्लक् स्वाःत् खे़प्से़ॽ, हे़क्क्याङ् पेगे़ॽआङ् आङ्गाॽ मे़त्ने़बान् ताराङ् पिराङ्ङे़ॽ॥” 14 खे़ल्ले़चोगुल्ले़ खुने़ॽ पेगे़आङ् खे़न् मे़ःन्दाज्याःक्हाॽ तारुसि हे़क्क्याङ् कुम्मा पिरु, खे़ब्याङ् खुने़ॽ याकुबे़ल्ले़ कुम्बारे़ कुसिराॽ के़धाङ्बा सा थोःक्तु॥ 15 खे़ब्याङ् रिबेकाःल्ले़ हिम्मोलाम् कुस्सा तुम्बे़ल्ले़ नुःब्नुबा कुजाङ्हाॽ लःत्तुआङ् फे़त्तु, हे़क्क्याङ् कुस्सा फोःक्वाबा याकुबे़न् चाक्तु॥ 16 खुने़ॽ याकुबे़ल्ले़ कुहुक्को नु कुसित्लाओ मुरिक् के़होप्पा ते़न्नो मे़ःन्दा होरिक्हाॽ फत्छु पिरु॥ 17 खे़ब्याङ् खुने़ॽ थोःक्तुबा कुजागे़नुॽबा सा सुम्बाक्किन् नु खरे़ःङिन् कुस्सा याकुबे़न् पिरु॥ 18 याकुबे़न् कुम्बारो पेआङ् मे़त्तु, “आम्बौ॥” इसहाक्के़ल्ले़ मे़त्तु, “हे़, आस्साए, खे़ने़ॽ हाःत्ने़बे?” 19 याकुबे़ल्ले़ कुम्बा मे़त्तु, “आङ्गाॽ के़स्सा तुम्बा एसाबआरो॥ खे़ने़ॽ मुरा के़मे़त्ताङ्बा हे़क्केए आङ्गाॽ चोगुङ्ङाङ् वाॽ॥ आल्ल पोगे़ॽआङ् युङे़ॽ, हे़क्क्याङ् आङ्गाॽ सा नाःत्तुङ्ङाङ् तारुङ्बा सान् च्ये़ॽआङ् मुॽइसाम् पिराङ्ङे़ॽ॥” 20 इसहाक्के़ल्ले़ मे़त्तु, “आस्साए, खे़ने़ॽ आक्खेआङ् खे़न् खे़म्याक् हारा खोमा के़सुक्तुबे?” खे़ल्ले़ नुगप् पिरु, “यहवे दाङ्बा, के़निङ्वाॽफुमाङ्ङिल्ले़ आङ्गाॽ खोमा के़सुक्पा चोगाङ्॥” 21 खे़ब्याङ् इसहाक्के़ल्ले़ याकुबे़न् मे़त्तु, “आस्साए, कत्ना आबेसाङ् फे़रे़ॽ सुने़साॽने़, खे़ने़ॽ आस्सा एसाबे़न्ने़बि मे़ःन्ने़बि अक्खे ओमे़त्ने़साॽने़॥” 22 याकुबे़न् कुम्बारे़ कुबेसाङ् पे, हे़क्क्याङ् इसहाक्के़ल्ले़ सोःप्सुआङ् मे़त्तु, “इक्लाःङ्ग याकुबे़ल्ले़ कुइक्ला, कर हुक्हाॽग एसाबे़ल्ले़ कुहुक्॥” 23 खे़ल्ले़ कुहुक्हाॽ एसाबे़ल्ले़ कुहुक् हे़क्के कुम्ब्रिक् स्योःङ्स्योःङ् के़लॽबा चोगे़बाल्ले़ खुने़ॽ कुसिङ् मे़निःत्तुन्॥ खे़ब्याङ् इसहाक्के़ल्ले़ याकुबे़न् मुॽइसाम् पिसे़ तगि पोरे़॥ 24 खुने़ॽ याम्मो सेःन्लाप्तु, “से़क्खाए खे़ने़ॽ आस्सा एसाबने़बि?” याकुबे़ल्ले़ नुगप् पिरु, “आङ्गाॽ एसाबआरो॥” 25 खे़ब्याङ् इसहाक्के़ल्ले़ मे़त्तु, “खे़ने़ॽ सागे़नाःत्तुआङ् के़दारुबा सान् कत्ना फे़त्ते़ॽ, हे़क्क्याङ् आङ्गाॽ चाङ्ङाङ् खे़ने़ॽ मुॽइसाम् पिने़॥” खम्भ्याङ् याकुबे़ल्ले़ खे़न् कुम्बा युक्खु पिरु, हे़क्क्याङ् कुम्बारे़ खे़न् च॥ हम्भ्याङ् खे़ल्ले़ चे़ल्ले़क्सेॽ थिःन्नाङ् पिरु, हे़क्क्याङ् खुने़ॽ थुङु॥ 26 खे़ब्याङ् कुम्बा इसहाक्के़ल्ले़ खे़न् मे़त्तु, “आस्साए, आङ्गाॽ आबेसाङ् फे़रे़ॽआङ् चुप् मे़त्ताङ्ङे़ॽ॥” 27 याकुबे़न् कुम्बारे़ कुबेसाङ् पेआङ् कुम्बान् चुप् मे़त्तु॥ हे़क्क्याङ् इसहाक्के़ल्ले़ खे़ल्ले़ कुजाङ्हाॽरे़ कुनाम्मिन् नाम्सुर अक्खेलॽरिक् मुॽइसाम् पिरु, “आम्बि, आस्साःल्ले़ कुनाम्मिङ्ग, यहवे दाङ्बाल्ले़ हाङ्वा माङ्वा थासुबा प्याङ्सिःल्ले़ कुनाम् हे़क्के कुनाम् पनुॽनुॽरो॥ 28 निङ्वाॽफुमाङ्ङिल्ले़ खे़ने़ॽ ताङ्साङ्बोबा सेःक्वालाम् नु इक्सादिङ् खाम्बेःक्मोबा आत्तातान्ने यरिक् कुवाॽमा कुबेःक्मालाम् यरिक् पुरुप्लुप्सेॽ थि नु पोगुगे़न् कुजा के़बिररो॥ 29 मे़न्छाम् सुवाङ्हाॽ खे़ने़ॽ के़सेरोवा मे़बोङ्लरो, हे़क्क्याङ् मनाहाॽरे़ खे़ने़ॽ से़वा के़म्मे़त्लरो॥ के़म्भुॽ के़न्साॽसि के़युक्को मे़वाॽररो, खे़ने़ॽ के़म्मारे़ कुस्साहाॽरे़ खे़ने़ॽ से़वा के़म्मे़त्लरो॥ खे़ने़ॽ साङ्ग्रा माङ्दे के़मे़प्पाहाॽ के़रे़क् साङ्ग्राःल्ले़ ते़त्तुसिररो, हे़क्क्याङ् खे़ने़ॽ मुॽइसाम् के़बिबा के़रे़क्ले़ मुॽइसाम् मे़घोसुररो॥” एसाबे़ल्ले़ इसहाकलाम् मुॽइसाम् नाःक्तु 30 इसहाक्के़ल्ले़ याकुबे़न् मुॽइसाम् पिरुसुरुआङ् कुम्बारोलाम् खुने़ॽ लःन्दे़ पेनुमे़ःन्ने एसाबे़न् सा नाःत्छे़ पेआङ् यागे़बालाम् खा के़रे़द्ये़॥ 31 खुने़ॽआङ् कुजा के़नुॽबा सादार्कारि थोःक्तु हे़क्क्याङ् कुम्बारो तारु, “आम्बौ, पोगे़ॽओ आङ्गाॽ सा नाःत्तुङ्ङाङ् तारुङ्बा सान् चे़ॽओ, हे़क्क्याङ् आङ्गाॽ मुॽइसाम् पिराङ्ङे़ॽओ॥” 32 कुम्बा इसहाक्के़ल्ले़ खुने़ॽ से़न्लाप्तु, “खे़ने़ॽ हाःत्ने़निग?” खुने़ॽ नुगप् पिरु, “आङ्गाॽ खे़ने़ॽ के़स्सा तुम्बा एसाबआरो॥” 33 इसहाक्के़न् साॽरिक् चिरिम्लिम्ना यक्खे़, हे़क्क्याङ् मे़त्तु, “हे़क्केने़ फाग्र खे़न् आत्तिन् वये़ग, खे़ल्ले़ सा से़रुआङ् कप्मो आङ्गाॽओ तारु, हे़क्क्याङ् खे़ने़ॽ तामानुःल्ले़ तगिसा खे़न् के़रे़क् आङ्गाॽ चाङ्ङाङ् खे़न् के़रे़क् मुॽइसाम् पिरुङ्सुरुङ्ग? ओरो, आल्ल से़क्खासाङ् खे़न्ने मुॽइसाबा पोङ्लो॥” 34 कुम्बा इसहाक्के़ल्ले़ पाःत्तुबा कन् पाःन्हाॽ एसाबे़ल्ले़ खे़प्सु, खे़ब्याङ् खुने़ॽ यम्बा इक्लाओ उःक्काङ् उःक् हाबे़र साॽरिक् कुनिङ्वाॽ तुगे़, हे़क्क्याङ् कुम्बा मे़त्तु, “आम्बौ, आङ्गाॽआङ् मुॽइसाम् पिराङ्ङे़ॽ॥” 35 कर इसहाक्के़ल्ले़ मे़त्तु, “के़न्साॽरे़ इङ्ले़क् चोगुआङ् त्ये़, हे़क्क्याङ् खे़ने़ॽ खोमा के़बोङ्बा मुॽइसाम्मिन् तेॽरुआङ् पे॥” 36 एसाबे़ल्ले़ मे़त्तु, “खे़ल्ले़ कुमिङ् याकुब वाःप्मनाबे़न् मे़लाॽरुम्बि? थेआङ्भे़ल्ले़ खे़ल्ले़ आङ्गाॽ निले़ङ् इङ्ले़क्ताङ् सुराङ्॥ खे़ल्ले़ आङ्गाॽ तुम्बा आलक्किन् नाप्ताङ्, हे़क्क्याङ् आल्लो आङ्गाॽ खोमा के़बोङ्बा मुॽइसाम्मिन्नाङ् तेॽरु॥” खुने़ॽ याम्मोआङ् मे़त्तु, “खे़ने़ॽ आङ्गाॽ आलागि लत्थिक्काङ् मुॽइसाम् के़नन्छुबा होःप्पि?” 37 इसहाक्के़ल्ले़ एसाबे़न् नोगप् पिरु, “ओमे़त्ते़ॽ, खे़न् खे़ने़ॽ के़न्दाङ्बा चोगुङ् सुरुङ्ङाङ् वाॽ॥ हे़क्क्याङ् खे़ल्ले़ कुम्भुॽ कुन्साॽसि के़रे़क् खुने़ॽ कुसे़वारोबा चोगुङ् तेसुङ्सिङ्॥ पोगुगे़न् कुजा नु चे़ल्ले़क्सेॽ थिःल्ले़ खे़न् खाःत्तुङ्ङाङ् वाॽ॥ आल्ल खे़ने़ॽ के़लागि थे चोःक्मा सुक्तुङ्बे, आस्साए?” 38 एसाबे़ल्ले़ कुम्बा मे़त्तु, “आम्बौ, खे़ने़ॽ लत्थिक्थिक् मुॽइसाम् के़गत्तुबि? आङ्गाॽआङ्सा मुॽइसाम् पिराङ्ङे़ॽना॥” हे़क्क्याङ् एसाबे़न् यम्बा इक्लाओ उःक्काङ् उःक् हाबे़॥ 39 खे़ब्याङ् कुम्बा इसहाक्के़ल्ले़ मे़त्तुरो, “ओमे़त्ते़ॽ, खे़ने़ॽ के़युङ्मा के़वाॽमान् खाम्बेःक्मोबा आत्तातान्ने नुॽमा तामालाम् लाःक्कात् माःङ्घा पोङ्लो, हे़क्क्याङ् ताङ्साङ्बोबा सेःक्वालाम् लाःक्कात् माःङ्घा पोङ्लो॥ 40 खे़ने़ॽ आबाङे के़दाभेःल्ले़ कुमुक्साम्मिल्ले़ के़हिङ्लो, कर खे़ने़ॽ के़न्साॽरे़ कुसे़वारोबा के़बोङ्लो॥ कर खे़ने़ॽ के़नाके़सिआङ् खे़ने़ॽ खे़ल्ले़ कुजिघे़ःप्पिन् के़निःङ्मोलाम् के़यक्खुआङ् लाप्के़भुसुरो॥” 41 कुम्बारे़ याकुबे़न् मुॽइसाम् पिरुबा मुॽइसाम्मिल्ले़ चोगुल्ले़ एसाबरे़ याकुबे़न् चिःप्मा हेःक्तु, हे़क्क्याङ् एसाबरे़ कुनिङ्वाॽओ मे़त्छिङ्, “आम्बा मासिङ्मा चोक्॥ खे़न् एगाङ् आङ्गाॽ आन्साॽ याकुबे़न् से़रुङ्ॽ॥” 42 कर खुने़ॽ कुस्सा तुम्बा एसाबे़ल्ले़ चोःक्मा इःत्तुबान् रिबेकाःल्ले़ खे़प्सु॥ खे़ल्ले़चोगुल्ले़ खुने़ॽ कुस्सा फोॽबा याकुबे़न् उःत्तुआङ् मे़त्तु, “ओमे़त्ते़ॽ, के़म्भुॽ एसाबे़ल्ले़ खे़ने़ॽ से़प्मा निङ्वाॽ चोगुआङ् कुनिङ्वाॽ तासुआङ् वाॽ॥ 43 खे़ल्ले़चोगुल्ले़ आस्साए, आङ्गाॽ मे़त्ने़बान् खे़प्से़ॽ॥ खे़ने़ॽ हारान लाजेॽओबा आङ्गाॽ आम्भुॽ लाबाने़ल्ले़ कुहिम्मो खे़त्छिङ्ङे़ॽआङ् पेगे़ॽ, 44 हे़क्क्याङ् खे़ने़ॽ के़म्भुॽरे़ कुसाक्के़न् मे़न्जिःक्के थारिक् आङ्गाॽ आम्भुॽ लाबाने़न्नु वये़ॽ॥ 45 खे़ने़ॽ के़म्भुॽरे़ कुनिङ्वाॽ के़दुक्पा याःम्बक् के़जोगुबान् खे़ल्ले़ ताःन्दि निङ्वाॽ मुःत्छुॽ हे़क्क्याङ् खे़ने़ॽनु पोगे़बा कुसिक्के़न् चिःक्तुआङ् हिम्मो नुःङ्मारे़ लागि आङ्गाॽ इङ्घङ् हाक्ने़॥ थिक्याःल्ले़ खिन्छिॽ ने़प्माङ् मामा मे़बोङ्ने़ल्ल॥” इसहाकरे़ याकुबे़न् लाबानरो पाङ्घुॽ 46 खे़ब्याङ् रिबेकाःल्ले़ इसहाक्के़न् मे़त्तु, “कॽयोबा हित्ति मे़न्छुमाहाॽरे़ मे़जोगुल्ले़ आङ्गाॽ आनिङ्साङ् पुगे़॥ याकुबे़ल्ले़आङ् कन् लाजेॽबा मे़न्छुमाहाॽ हे़क्तङ्मा लत्छा मे़न्छुमा थिक्नु मेःक्खिम् चोगुने़ फाग्र आङ्गाॽ हिङ्आबान् थेनाधे पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.