तोलिङ्सोमु 17 - लिम्बुहर्दो हे़क्मा माङ्हुप् 1 अब्राम्मिन् फाङ्बोङ्ङाङ् फाङ्सि तङ्बे के़रे़ल्ले़, यहवे दाङ्बान् खुने़ॽओ ओसेःन्धाक्सिङ्ङाङ् मे़त्तु, “आङ्गाॽ मुक्साम्दाङ्बा निङ्वाॽफुमाङ्आ॥ आङ्गाॽ आदगाङ् लाङ्घेगे़ॽ, हे़क्क्याङ् फोत्या मेःन्ने वये़ॽओ॥ 2 खे़ने़ॽ नु आङ्गाॽ लुम्मो माङ्हुप् चोगुङ्, हे़क्क्याङ् यरिक् मुॽइदाङ्साहाॽ पिने़॥” 3 खे़ब्याङ् अब्राम्मे़न् साम्बोन् हबत् फन्छिङ्, हे़क्क्याङ् निङ्वाॽफुमाङ्ङिल्ले़ मे़त्तु, 4 “ओमत्ते़ॽ, खे़ने़ॽनु आङ्गाॽ चोगुङ्बा माङ्हुप्पिन् हाबा कन्लो॥ खे़ने़ॽ यरिक् मे़न्छाम् सुवाङ्हाॽरे़ खुनिॽ पानुदिङ् पा के़बोङ्लो॥ 5 आल्लआङ्धो खे़ने़ॽ के़मिङ् अब्राम मेःन् कर अब्राहाम पोङ्लो, थेआङ्भे़ल्ले़ खे़ने़ॽग यरिक् मे़न्छाम् सुवाङ्हाॽरे़ खुनिॽ पानुदिङ् पा चोःक्ने़रो॥ 6 आङ्गाॽ खे़ने़ॽ आत्ते़त्ति यरिक् के़बोन् के़धे़ॽर याःन्ने़॥ हे़क्क्याङ् खे़ने़ॽलाम्बा यरिक् मे़न्छाम् सुवाङ् चोगुङ्सिङ्, खुने़ॽलाम्मे हाङ्हाॽ मे़बोङ्लो॥ 7 “खे़ने़ॽ नु खे़ने़ॽ के़एगाङ् ताःन्दि के़बोङ्बा के़मुइदाङ्साहाॽरे़ खुन्छिॽ निङ्वाॽफुमाङ् पोङ्से़ आमाङ्हुप्पिन् आङ्गाॽ नु खे़ने़ॽ के़एगाङ्बा के़मुइदाङ्साहाॽ लुम्मो सदादिङ् चोगुङ्लो॥ 8 खे़ने़ॽ के़युङ्बा कन् के़रे़क् कनान लाजेन् खे़ने़ॽ नु ताःन्दि के़दाबा के़मुइदाङ्साहाॽ सदादिङ्ले़न् युक् कुइसिक् पिनिङ्ॽ, हे़क्क्याङ् आङ्गाॽ खे़ङ्हाॽरे़ खुनिॽ निङ्वाॽफुमाङ् पोङ्आरो॥” 9 खे़ब्याङ् निङ्वाॽफुमाङ्ङिल्ले़ अब्राहाम्मे़न् मे़त्तु, “खे़ने़ॽ आमाङ्हुप्पिन् के़इःत्तु के़नाःत्तुर पोङ्, खे़ने़ॽ नु खे़ने़ॽ के़एगाङ्बा के़मुइदाङ्साहाॽरे़ थाःक् थाःक् थारिक् आमाङ्हुप्पिन् के़इःत्तुम् के़नाःत्तुम्ल पोङ्॥ 10 आङ्गाॽ नु खे़ने़ॽ हे़क्क्याङ् खे़ने़ॽ के़एगाङ्बा के़मुइदासाहाॽ लुम्मो खिनिॽ इःप्मा नाःप्मा के़बोङ्बा आमाङ्हुप्पिन् हाबा कन्लो, खिनिॽ लुम्मो के़रे़क् ये़म्बित्छा साहाॽरे़ हर्दो हे़क्मा पोङ्लो॥ 11 खिनिॽ हर्दो के़हे़गुम्ल पोङ्॥ आङ्गाॽ नु खिनिॽ लुम्मो के़बोङ्बा माङ्हुप्पिल्ले़ मिक्सेन् हाबा कन् पोङ्लो॥ 12 ताःन्दि के़दाबा खिनिॽ थाःक्थाःक्को थारिक् ये़म्बित्छासा वाॽबा ये़त्छि ये़न् के़त्तिल्ले़ हर्दो मे़हे़गु मे़बिरुसिर पोङ्॥ हे़क्क्याङ् खिनिॽ हिम्मो सागे़वाःन्छिङ्बा खिनिॽ सासि मे़ःन्छिसाङ्, वेॽ लाजेॽलाम् इङ्मना ताःप्नासिबा से़वारोबाहाॽ नु खे़ङ्हाॽरे़ खुन्छिॽ साहाॽआङ् सामे़वाःन्छिङ्बा एगाङ् हर्दो मे़हे़गु मे़बिरुसिर पोङ्॥ 13 के़हिम्मो सागे़वाःन्छिङ्बासाङ्, कुमे़न् हुङ्मनाआङ् इङ्मना ताःप्मनाबासाङ् हर्दो मे़न्हे़क्के वाॽने़फग्र हर्दो हे़क्मा पिमा पोङ्॥ अक्खेलॽरिक् आमाङ्हुप्पिन् खिनिॽ नासिगे़न् थक्को थाःक्थाःक्को ताःन्दि थारिक् वाॽररो॥ 14 हर्दो मे़न्हे़क्केबा आत्तिन् ये़म्बित्छा साःन्छाङ् खुने़ॽ कुमनाहाॽलाम् मे़लःत्तु मे़देसुर॥ खे़ल्ले़ आमाङ्हुप्पिन् मे़न्इःत्ते मे़न्नाःत्ते वाॽ॥” 15 निङ्वाॽफुमाङ्ङिल्ले़ अब्राहाम्मे़न् मे़त्तु, “मे़ल्लिङ्गे़न् के़मेःत् साराइन् आल्लआङ्धो साराइ मे़मे़त्ते़न्ने़ॽ, कर खे़ल्ले़ कुमिङ् सारा पोङ्लो॥ 16 आङ्गाॽ खे़न् हाङ्वामुॽइ पिरुङ्, हे़क्क्याङ् से़क्खाए खुने़ॽलाम् खे़ने़ॽ ये़म्बित्छा साधिक् पिने़॥ आङ्गाॽ सारान् हाङ्वामुॽइ पिरुङ्, हे़क्क्याङ् खे़न् यरिक् मे़न्छाम् सुवाङ्हाॽरे़ खुन्छिॽ मा पोङ्ॽ॥ यरिक् मे़न्छाम् सुवाङ्हाॽरे़ खुन्छिॽ हाङ्हाॽ खुने़ॽलाम् मे़लःन्लो॥” 17 हे़क्केःल्ले़ अब्राहाम्मे़न् अःक्खुम् फन्छिङ्ङाङ् कुनिङ्वाॽओ एरे़र पाःत्तु, “किप् थिक् तङ्बे के़गे़प्पे़ल्ले़आङ् सा कत्तुबि? फाङ्बोङ् तङ्बे के़गे़प्मा साराःल्ले़ सा कत्तुबि?” 18 हे़क्क्याङ् अब्राहाम्मे़ल्ले़ निङ्वाॽफुमाङ्ङिन् मे़त्तु, “इस्माएल्ले़न्ने़ के़हाङ्वा मुॽइओ हिङ्ङिल्ले़ग नुबा पोङ्लो॥” 19 खे़ब्याङ् निङ्वाॽफुमाङे़ल्ले़ मे़त्तु, “ओबे़, कर खे़ने़ॽ मे़ल्लिङ्गे़न् के़मेःत् साराःल्ले़ए खे़ने़ॽ के़लागि ये़म्बित्छा साधिक् कत्तु के़बि, हे़क्क्याङ् खे़ने़ॽ खे़न् इसहाक मिङ् के़वाःत्तुरो॥ आङ्गाॽ खे़न्नु हे़क्क्याङ् खे़न् याङ्सि के़बोङ्बा खे़ल्ले़ कुमुॽइदाङ्साहाॽनु आमाङ्हुप्पिन् सदादिङ्ले़ लागि युक्सिङ् चोगुङ्ॽ॥ 20 हे़क्क्याङ् इस्माएलरे़ कुयाःम्बेओ आङ्गाॽ के़बेलिन् खे़प्सुङ्॥ आङ्गाॽ से़क्खाए खे़न् हाङ्वामुॽइ पिरुङ्ॽ, हे़क्क्याङ् आङ्गाॽ खे़न् आत्ति आत्ति यरिक् पोःन्थे़ॽर याःन्दुङ्ॽ हे़क्क्याङ् फोसुङ्ॽ॥ खे़न् थिबोङ्ङाङ् ने़त्छि सुहाङ्गे़म्बाहाॽरे़ खुन्छिॽ पानुदिङ् पा पोङ्ॽ, हे़क्क्याङ् आङ्गाॽ खे़न्लाम्बा लत्छा यम्बा सुवाङ् चोगुङ्सिङ्ॽ॥ 21 कर आङ्गाॽ इसहाक्के़न्नुए माङ्हुप् चोगुङ्लो, खे़ङ्ग आत्ने़म्मा हाबा कन् ये़म्मो साराःल्ले़ सा कत्तुरो॥” 22 अब्राहाम्मिन्नु ताॽजे़ङ्मा सुरुआङ् निङ्वाॽफुमाङ्ङिन् थो थोःक्सिङ् पेरो॥ 23 अब्राहाम्मे़ल्ले़ कुस्सा इस्माएल्ले़न् हे़क्क्याङ् कुहिम्मो के़वाॽबा नु कुमे़न् हुङुआङ् इङुसिबा, से़वारोबा के़रे़क् ये़म्बित्छासाहाॽ निङ्वाॽफुमाङ्ङिल्ले़ खुने़ॽ मे़त्तुबा इसिःक् हाबा खे़न् ये़न्नो खे़ङ्हाॽरे़ खुन्छिॽ हर्दो हे़गु पिरुसि॥ 24 अब्राहाम्मिन् हर्दो मे़हे़गु मे़बिरुल्ले़ खुने़ॽ फाङ्बोङ्ङाङ् फाङ्सि तङ्बे के़रे़आङ् वये़, 25 हे़क्क्याङ् कुस्सा इस्माएल्ले़न् हर्दो मे़हे़गु मे़बिरुल्ले़ खे़न् थिबोङ्ङाङ् सुम्सि तङ्बे के़रे़आङ् वये़॥ 26 अब्राहाम्मे़न् नु खुने़ॽ कुस्सा इस्माएल्ले़न् थिक्याःन्ले़ हर्दो मे़हे़गु मे़बिरुसिआङ् वये़॥ 27 खुने़ॽ कुहिम्मो के़वाॽबा हे़क्क्याङ् वेॽ लाजेॽलाम् इङु तारुसिबा के़रे़क् ये़म्बित्छा साहाॽरे़न् खुने़ॽनु सोसोरिक् हर्दो मे़हे़गु मे़बिरुसि॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.