इजकिएल 48 - लिम्बुथाःक्हाॽरे़ खुन्छिॽ लुम्मो थाङ्गे़प्पा लाजेन् मे़भःक्खु 1 “इस्राइलबा थाःक्हाॽरे़ खुन्छिॽ थामिङ्हाॽ नु खे़ङ्हाॽ के़रे़क्ले़ मे़घोसुबा लाजेॽ लक्हाॽ कप्मो पत्—के़रे़क्नुःल्ले़ थाङ्गे़त् ले़प्माङ् दानरे़ कुलक् याङ्घुॽ॥ कन् हेतलोन लाम् पोङ्ल ले़बो-हमात ले़प्माङ् पेक्॥ हसर-एनान नु हमातरे़ कुयाओ के़ने़बा दमस्कसरे़ थाङ्गे़त् पिसाङ्बा कुइःन्दोन् खे़ल्ले़ कुइःन्दोःल्ले़ नाङ्गे़न्लाम् नाम्धा ले़प्माङ् लत्छा कुलक् पोङ्ॽ॥ 2 “नाङ्गे़न्लाम् नाम्धा पिसाङ् दानरे़ लाङ्गे़त् ले़प्माङ्बा कुइःन्दोओ थारिक् के़दुम्बा आसेररे़ कुलक् पोङ्ॽ॥ 3 “नाङ्गे़न्लाम् नाम्धा पिसाङ् आसेररे़ लाङ्गे़त् पिसाङ्बा कुइःन्दोओ थारिक् के़दुम्बा नाप्तालिरे़ कुलक् पोङ्ॽ॥ 4 “नाङ्गे़न्लाम् नाम्धा ले़प्माङ् नाप्तालिरे़ कुइःन्दोओ थारिक् के़दुम्बा मनस्सेरे़ कुलक् पोङ्ॽ॥ 5 “नाङ्गे़न्लाम् नाम्धा ले़प्माङ् मनस्सेरे़ कुइःन्दोओ थारिक् के़दुम्बा एफ्राइमरे़ कुलक् पोङ्ॽ॥ 6 “नाङ्गे़न्लाम् नाम्धा ले़प्माङ् एफ्राइमरे़ कुइःन्दो थारिक् के़दुम्बा रुबेनरे़ कुलक् पोङ्ॽ॥ 7 “नाङ्गे़न्लाम् नाम्धा ले़प्माङ् रुबेनरे़ कुइःन्दो थारिक् के़दुम्बा यहुदारे़ कुलक् पोङ्लो॥ लाजेॽलुम्मो मे़से़न्दुबा लाजेॽसिङ्बुङ् 8 “नाङ्गे़न्लाम् नाम्धा ले़प्माङ् यहुदारे़ कुइःन्दोओ थारिक् के़दुम्बा के़से़न्दुम्बा के़रे़क्नुःल्ले़ नुबा कुलक् थिक् मिक्तोक् कुइसिक् खिनिॽ के़बिरुम्सिम्ल पोङ्ॽ॥ खे़ल्ले़ कुभे़रे़ २५,००० हुक्सिक् ताम्दाम्बा पोङ्ॽ, हे़क्क्याङ् खे़ल्ले़ कुलाम्तिःन् नाङ्गे़न्लाम् नाम्धा थारिक् वेॽ थाःक्हाॽ के़बिरुम्सिम्बा कुलक् यारिक्के पोङ्ॽ॥ सेसेदे़न्निन् खे़ल्ले़ कुलुम्मो युङ्सिङ्ॽ॥ 9 “यहवे दाङ्बे़न् खिनिॽ के़बिरुम्बा के़रे़क्नुःल्ले़ नुबा लक्किङ्ग २५,००० हुक्सिक् केःम्बा कुलाम्ति नु १०,००० हुक्सिक् कुभे़रे़बा पोङ्ॽ॥ 10 कन् निङ्वाॽफुसाम्बाहाॽरे़ खुन्छिॽ लागि लत्छा सेसेबादे़न् पोङ्ॽ॥ कल्ले़ कुलक्किन् थाङ्गे़त् ले़प्माङ् २५,००० हुक्सिक्, नाम्धा ले़प्माङ् १०,००० हुक्सिक्, नाङ्गे़न् ले़प्माङ् १०,००० हुक्सिक् नु लाङ्गे़त् ले़प्माङ् २५,००० हुक्सिक् के़ने़बा पोङ्ॽ॥ यहवे दाङ्बे़ल्ले़ कुसेसेदे़न्निन् खे़ल्ले़ कुलुम्मो युङ्सिङ्ॽ॥ 11 तोःम्मनासिबा निङ्वाॽफुसाम्बाहाॽरे़ खुन्छिॽ लागि कन् पोङ्ॽ॥ खे़ङ्हाॽग सादोकरे़ कुमुॽइदाङ्सासिरो, खे़ङ्हाॽरे़ कुदोःप्माआङ् आङ्गाॽ आलागि माङ्से़वा याःम्बक् मे़जोगु, इस्राइलिहाॽ ताप्मे़बे़ॽरे़आङ् माःङ्घा मे़बेःल्ले़ ले़बिहाॽआङ् माःङ्घा मे़बेआङ् मे़वये़, कर खे़न् निङ्वाॽफुसाम्बाहाॽग खे़ङ्हाॽनु माःङ्घा मे़म्बेने़न्॥ 12 कल्ले़चोगुल्ले़ खे़ङ्हाॽरे़ ले़बिहाॽरे़ मे़घोसुबा लक्के़ल्ले़ए कुयाओ लत्छा नुबा लक् मे़घोसुॽ हे़क्क्याङ् खे़न् के़रे़क्नुःल्ले़ साॽरिक् सेसेबा लक् पोङ्ॽ॥ 13 “निङ्वाॽफुसाम्बाहाॽरे़ खुन्छिॽ इःन्दोःल्ले़ कुयाओ ले़बिहाॽरे़ खुन्छिॽ लक् पोङ्ॽ॥ खे़न् २५,००० हुक्सिक् केःम्बा कुलाम्ति नु १०,००० हुक्सिक् कुभे़रे़बा पोङ्ॽ॥ खे़ल्ले़ के़रे़क् कुलाम्ति २५,००० हुक्सिक् नु खे़ल्ले़ कुभे़रे़न् १०,००० हुक्सिक् के़ने़बा पोङ्ॽ॥ 14 खे़ङ्हाॽरे़ कन् सङ्मा इग्र ले़क्मा मे़नुॽने़न्॥ कङ्ग लाजेॽबा के़रे़क्नुःल्ले़ नुबा लाजेॽसिङ्बुङ्लो, हे़क्क्याङ् कन् हाःत्ताङ् पिमा मे़नुॽने़न्, थेआङ्भे़ल्ले़ यहवे दाङ्बे़ल्ले़ कुलागि कन् सेसेबा चोक्लो॥ 15 “के़नम्बाआङ् के़ने़बा लाजेःल्ले़ कुलक्किन्, ५,००० हुक्सिक् कुभे़रे़ नु २५,००० हुक्सिक् केःम्बा कुलाम्तिःन्, हिम्धाःङ्हाॽ नु थक्सा चाराम्मादे़न् ये़क्यक्कोबा थे़मा याःम्बक्ले़ लागिसाङ् पोङ्ॽ॥ कल्ले़ कुलुम्मो ये़क्यक्किन् चुक् 16 हे़क्क्याङ् खे़न् लाजेःल्ले़ कुलाम्ति नु कुभे़रे़ अक्तङ्बा पोङ्ॽ—थाङ्गे़त् ले़प्माङ् ४,५०० हुक्सिक्, लाङ्गे़त् ले़प्माङ् ४,५०० हुक्सिक् नाङ्गे़न् ले़प्माङ् ४,५०० हुक्सिक् नु नाम्धा ले़प्माङ् ४,५०० हुक्सिक्॥ 17 ये़क्यक्कोबा थक्सा चाराम्मादे़न्ले़ लागि थाङ्गे़त् ले़प्माङ् २५० हुक्सिक्, लाङ्गे़त् ले़प्माङ् २५० हुक्सिक्, नाङ्गे़न् ले़प्माङ् २५० हुक्सिक् नु नाम्धा ले़प्माङ् २५० हुक्सिक् के़ने़बा पोङ्ॽ॥ 18 सेसेदे़न् लक्किल्ले़ कुइःन्दोःल्ले़ सुसुबा के़नम्बा ते़ङ्गप्पिन् नाङ्गे़न् ले़प्माङ् १०,००० हुक्सिक् नु नाम्धा ले़प्माङ् १०,००० हुक्सिक् के़ने़बा पोङ्ॽ॥ कप्मो के़धोःक्पा कुजान् ये़क्यक्को याःम्बक् के़जोःक्पाहाॽरे़ लागि खुन्छिॽ चामा कुजा पोङ्ॽ॥ 19 इस्राइलि थाःक्थक्मा के़दाबा मनाहाॽरे़ खे़प्मो याःम्बक् चोःक्मा चामा मे़घोसुॽ॥ 20 खे़न् के़रे़क् लक्किन् काक् पिसाङ्ङे २५,००० हुक्सिक् कुलाम्ति नु कुभे़रे़ के़ने़बा पोङ्ॽ॥ ये़क्यक्कोबा लाजेःन्नु सोसोरिक् खे़न् सेसे लक्किन् के़रे़क्नुःल्ले़ नुबा मिक्तोक् इःत्ते़म्मे़ॽआङ् एःक् से़न्दाम्मे़ॽ॥ 21 “सेसे लक्किल्ले़ नाहाङ् कत्नाहाङ्बा ते़न्हाॽ नु ये़क्यक्कोबा लाजेॽलाम् के़लःम्बा ते़ङ्गप्पो के़नम्बा लक्किन् हाङ्ङिल्ले़न् पोङ्ॽ॥ खे़न् कुलक्किन् नाङ्गे़न् ले़प्माङ् सेसे लक्कोबा २५,००० हुक्सिक् तॽइ नाङ्गे़न् इःन्दो ले़प्माङ् नु नाम्धा ले़प्माङ् २५,००० हुक्सिक् नाम्धा इःन्दो ले़प्माङ् पोबेक्॥ कन् ने़प्माङ् ते़ङ्गप्हाॽरे़ कुलाम्तिहाॽ थाःक्हाॽरे़ खुन्छिॽ लक् याःप्पा पोङ्ॽ, हे़क्क्याङ् खे़ङ्हाॽ हाङ्ङिल्ले़न् पोङ्ॽ॥ माङ्हिम्मोबा सेसेदे़न्निन्नु सोरिक् चक्खोबा लक्किन् खे़ल्ले़ कुलुम्मो चुक्॥ 22 हे़क्केलॽरिक् हाङ्ङिल्ले़ कुदे़ःङ्गप्पिल्ले़ कुलुम्मो ले़बिहाॽरे़ खुन्छिॽ लाजेॽ नु ये़क्यक्कोबा लाजेॽ पोङ्ॽ॥ हाङ्ङिल्ले़ कुदे़ःङ्गप्पिङ्ग यहुदा नु बेन्यामिनरे़ खुन्छिॽ इःन्दोःल्ले़ कुलुम्मो पोङ्लो॥ वेॽ थाःक्हाॽरे़ लागि लाङ्गे़त्पा लाजेॽसिङ्बुङ् 23 “के़नम्बा वेॽ थाःक्हाॽरे़ लागि नाङ्गे़न्लाम् नाम्धा ले़प्माङ् थारिक् के़बोबाधिक् बेन्यामिनरे़ कुलक् पोङ्ॽ॥ 24 “नाङ्गे़न्लाम् नाम्धा ले़प्माङ् बेन्यामिनरे़ कुइःन्दो थारिक् के़सुबाधिक् सिमियोनरे़ कुलक् पोङ्ॽ॥ 25 “नाङ्गे़न्लाम् नाम्धा ले़प्माङ् सिमियोनरे़ कुइःन्दो थारिक् के़सुबाधिक् इस्साखाररे़ कुलक् पोङ्ॽ॥ 26 “नाङ्गे़न्लाम् नाम्धा ले़प्माङ् इस्साखाररे़ कुइःन्दो थारिक् के़सुबाधिक् जबुलुनरे़ कुलक् पोङ्ॽ॥ 27 “नाङ्गे़न्लाम् नाम्धा ले़प्माङ् जबुलुनरे़ कुइःन्दो थारिक् के़सुबाधिक् गादरे़ कुलक् पोङ्ॽ॥ 28 “गादरे़ लाङ्गे़त् ले़प्माङ्बा कुइःन्दोन् तामारलाम् मेरिबा-कादेसबा च्वाःत्हाॽ थारिक् नु मिस्रबा वहःङ्ङिल्ले़ कुया कुया पोङ्ल पयम् यम्बा वरःङ् थारिक् के़त्॥ 29 “इस्राइलबा थाःक्हाॽ हाबा कन् लाजेन् खिनिॽ खे़ङ्हाॽरे़ खुन्छिॽ लक्खोमा कुइसिक् के़भःक्खुम् के़बिरुम्सिम्ल पोङ्ॽ, हे़क्क्याङ् कन्हाॽए खे़ङ्हाॽरे़ खुन्छिॽ लक् पोङ्ॽ,” मुक्साम्दाङ्बा यहवे दाङ्बे़ल्ले़ पाःत्तुरो॥ यरुसले़म ये़क्यक्कोबा यम्बा लाम्धेःप्पाहाॽ 30 “ये़क्यक्कोलाम् लाःक्कात् लःम्मादे़न्हाॽ आम्भा कन्हाॽए पोङ्लो—थाङ्गे़त् ले़प्माङ्लाम् के़हेःक्सिङ्बा, खे़न् कुलक्किन् ४,५०० हुक्सिक् केःम्बा कुलाम्ति चोक्॥ 31 ये़क्यक्कोबा यम्बा लाम्धेःत्हाॽरे़ कुमिङ् इस्राइलबा थाःक्हाॽरे़ खुन्छिॽ मिङ्हाॽ कुइसिक् पोङ्ॽ॥ थाङ्गे़त् ले़प्माङ्बा सुम्सि यम्बा लाम्धेःत्हाॽ कुबे़रे़ कुलाम्धेत्, यहुदारे़ कुलाम्धेत् नु ले़बिरे़ कुलाम्धेत् पोङ्ॽ॥ 32 “नाङ्गे़न् ले़प्माङ्, ४,५०० हुक्सिक् केःम्बा कुलाम्ति के़बप्पे़न्, सुम्सि यम्बा लाम्धेःत्हाॽ पोङ्ॽ—योसेफरे़ कुलाम्धेत्, बेन्यामिनरे़ कुलाम्धेत् नु दानरे़ कुलाम्धेत्॥ 33 “लाङ्गे़त् ले़प्माङ्, खे़न् ४,५०० हुक्सिक् कुसिःक्मा पत्, सुम्सि यम्बा लाम्धेःप्पाहाॽ पोङ्ॽ॥ सिमियोनरे़ कुलाम्धेत्, इस्साखाररे़ कुलाम्धेत् नु जबुलुनरे़ कुलाम्धेत्॥ 34 “नाम्धा ले़प्माङ्, खे़न् ४,५०० हुक्सिक् केःम्बा कुलाम्ति पत्, सुम्सि यम्बा लाम्धेःत्हाॽ पोङ्ॽ—गादरे़ कुलाम्धेत्, आसेररे़ कुलाम्धेत् नु नप्तालिरे़ कुलाम्धेत्॥ 35 “के़रे़क् पिसाङ्बा माःङ्लिक्किन् १८,००० हुक्सिक् पोङ्ॽ॥ “हे़क्क्याङ् खे़न् ये़म्माङ्धो खे़न् ये़क्यक्किल्ले़ कुमिङ् यहवे दाङ्बान् खे़प्मोए वाॽ” पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.