खाहुन्साबा 6 - लिम्बु1 आङ्गाॽ इक्सादिङ् खाम्बेःक्मो साॽरिक् ताप्फे़ःम्बा पाःन्धिक् निसुङ्ङाङ् वाॽ, खे़ल्ले़ मनाहाॽ चाॽरिक् युक्तुसिआङ् मे़वाॽ॥ 2 निङ्वाॽफुमाङ्ङिल्ले़ कुभा मनाधिक् याङ्साकुन्धे, मिङ्सो इङ्धाङ् पिरुॽ, आ, खुने़ॽ चाहाब् के़जोःक्पा के़रे़क् पाःन्हाॽ पिरुॽ कर खे़न् पाःन्हाॽ खुने़ॽ ओगाप् चोःक्मारे़ लागि मे़बिरुन्लो॥ खुने़ॽ कुले़क्वाओ कुभा लत्छा लाम्दिःप्पाङ्धिक्ले़ खे़न् ओगाप् चोगुॽ॥ खे़न् हने़ थेनाधेरक्लो, हे़क्क्याङ् खे़ङ्ग निङ्वाॽ के़दुक्पा पाःन्लो॥ 3 कुभा मनाधिक्ले़ किप्थिक् कुस्साहाॽ मे़वाॽबिला, खुने़ॽ कुधाःक् केःम्बा चोःक्पिला कर आक्ख्यारिक् कुधाःक् केःम्बा पोङ्साङ् कुनिङ्वाॽ मे़दे़ने़न् हे़क्क्याङ् सिःल्ले़ खुने़ॽ नुरिक्काङ् चेलुप् खःङ्लुप् मे़प्मा याःम्बक् मे़बोःक्खे़न्ने फग्र कुसिवे़त् सागे़वाःन्छिङ्बा अङे़ःक्वान् खुने़ॽनुःल्ले़ नुबारो॥ 4 खे़न् कुसिवे़त् सागे़वाःन्छिङ्बा अङे़ःक्वान् थेआङ् इन्धा मे़बोःक्खे़न्, खे़न् खामाक्मो माबेःक् हे़क्क्याङ् खे़प्मो खे़न् निङ्वाॽ फेःन्लो॥ 5 खे़ल्ले़ ले़न्दिक्पा खाओःप्मान् आप्फाल्ले़आङ् मे़निसुन् इग्र हिङ्मन् थे़माबे फाॽआङ् आभे़ल्ले़आङ् कुसिङ् मे़निःत्तुन् कर थे मेःन्छाङ् खे़ल्ले़ नाःम्सिङ्माग खोसुआङ् वाॽ॥ 6 हे़न्छिङ् ने़त्छि तङ्बे थारिक् कुधाःक् के़जाॽबाआङ् हिङ्मन्बा सुक्खेवाओ वाॽमा मे़ङ्घोम्नाबा मनाःन्नुःल्ले़ खे़न् अङे़ःक्वाःल्ले़ग नाःम्सिङ्मा खोसुआङ् वाॽ॥ कुनुप्मो, खे़ङ्हाॽ ने़प्माङ् लत्छादे़न्नो के़त्छि॥ 7 मनाःल्ले़ के़रे़क् याःम्बुदिक्किन् साप्पोक् खाःप्मारे़ लागिरक् चोगुॽरो कर खुने़ॽ कुसाप्पोःक्किन् आप्फाल्ले़आङ् मे़घाने़न्लो॥ 8 कन् इःप्मे़ल्ले़ आक्खेलॽरिक् लत्छा सिक्कुम्निबा मनान् लत्छा अदङ् मनाःन्नुःल्ले़ नुबा पोःक्खे़ग? याङ्गे़साॽबा मनाःल्ले़ आक्खेआङ्साङ् हिङ्मा ले़सु हे़क्केसाङ् खे़न् कुलागि थे़मा इन्धा पोङ्ङाङ्ग? 9 खे़ङ्ग हने़ थेनाधेरक्, साम्मिःत् केजङ्ङिन् नाःप्मनाबा हे़क्केरक्लो॥ आबाङेनु थे वाॽ, खे़प्मोए निङ्वाॽ तामा पोङ्लो कुभा वेॽ पाःन्निन् खोमा निङ्वाॽ चोःक्मानुःल्ले़ खे़न् नुबारो॥ 10 हे़न् पाःन्हाॽ पोङ्ॽ, खे़न् तगिलाम्बाए निःन्धो पोङ् चुःत्ताङ् वारो हे़क्क्याङ् आनिॽ कन् कुसिङ् आनिःत्तुम्माङ् आवाॽरो मनान् आप्फेक्नुःल्ले़ के़धुम्बे़न्नु थेआङ् पाःन्धक्मा मे़सुक्ने़न्लो॥ 11 खे़ल्ले़ आक्ख्यारिक् केःल्लिक् पाःन्धङ् चोगुॽ, खे़म्म्याक्के यरिक् खे़न् कुसुम् मे़न्दम्मनाबा पोङ्लो खुने़ॽ कुलागि खे़ल्ले़ थे़माआङ् मे़जक्तुन्लो॥ 12 हे़क्केःल्ले़ साम्मिःक्खुङ्बा हे़क्के के़माबाआङ् के़बेःक्पा हिङ्मन्नो, मनाःल्ले़ ताङ्सा नु थेनाधेबा कुहिङ्मन्नो खुने़ॽ कुलागि नुबा पान् हे़न् वाॽ, खे़न् हाःत्ले़ निसुबे? खे़न् सिआङ् इक्सादिङ् खाम्बेःक्मो थे पोङ्ॽ, खे़न् हाःत्ले़ तगिसा निमा सुक्तुबे? |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.