साम्योथिम् इङ् 9 - लिम्बुइस्राइलिहाॽरे़ इङ्जाङ् मे़इःत्तुन् मे़न्नाःत्तुन् 1 इस्राइलिसे, खे़प्से़म्मे़ॽ! खिनिॽनुःल्ले़ पयम् यम्बा नु मुक्साम्साबा मे़न्छाम् सुवाङ्हाॽरे़ खुन्छिॽ लाजेन् युक् चोःक्मारे़ लागि आइन् खिनिॽ यर्दन नाधाःम्बि के़बेगिर के़बत्छि॥ खे़ङ्हाॽ ताङ्साङ्बा के़दक्पा लुङ्धाक्हाॽरे़ थेःक्तुबा ये़क्यक्हाॽओ मे़युङ्ॽ! 2 खे़प्मोबा मनाहाॽग अनाकिसिरो, खे़ङ्हाॽरे़ खुनिॽ याःम्बेओ खिनिॽ के़घे़प्सुम्माङ् के़वयिॽ॥ खे़ङ्हाॽ के़धुम्बा नु केःम्ब केःम्बा मे़जोक्॥ खिनिॽ अक्तङ्बा पान् के़घे़प्सुम्माङ् वाॽ, “अनाकिहाॽरे़ खुन्छिॽ पेसाङ् हात् ये़प्मा सुक्पे?” 3 कर आइन् कन् पाःन्निन् से़क्खाए कुसिङ् निःत्ते़म् युक्खे़म्मे़ॽ, खाप्पुथ्यःङ् आमे़ङ्मे़ङ्बा मिधुङ् मिराःक् कुइसिक् खिनिॽ तगाङ् तगाङ् के़बेःक्पा यहवे दाङ्बान् खिनिॽ निङ्वाॽफुमाङ्ङिन्नेरो॥ खुने़ॽ खे़ङ्हाॽ युम्रे़क् मे़क्खुसिॽ खे़ब्याङ् खिनिॽ युक्को तारुसिॽ॥ यहवे दाङ्बे़ल्ले़ खिनिॽनु माङ्हुप् चोगुबा हे़क्केए खिनिॽ खे़ङ्हाॽ के़नाःत्तुम् के़देसुम्सिम्माङ् हाराए के़मे़क्खुम्सिम्ॽ॥ 4 यहवे दाङ्बे़ल्ले़ खिनिॽ तगिलाम् खे़ङ्हाॽ लःत्तुदेॽरुसि सुरुसिआङ् खिनिॽ निङ्वाॽओ अक्खे मे़बाःत्ते़म्मिन्ने़ॽ, “आनिॽ साम्योबा याःम्बक्किल्ले़ चोगुल्ले़ए कन् लाजेन् युक् चोःक्मारे़ लागि यहवे दाङ्बे़ल्ले़ आनिॽ आदारे़बारो॥” परुमाल्ले़ कन् मे़न्छाम् सुवाङ्हाॽरे़ खुन्छिॽ फे़न्याःम्बक्किल्ले़ चोगुल्ले़ए यहवे दाङ्बे़ल्ले़ खे़ङ्हाॽ आनिॽ तगिलाम् नाःत्तुदेसुसिॽ॥ 5 खिनिॽ साम्योबा याःम्बक् इग्र कुदोःप्मा के़जोगिबाल्ले़ चोगुल्ले़ खे़ङ्हाॽरे़ खुनिॽ लाजेन् युक् चोःक्मारे़ खिनिॽ लाःप्मा के़इःत्तिबा मेःन्॥ कर कन् मे़न्छाम् सुवाहाॽरे़ खुनिॽ फे़न्याःम्बक्किल्ले़ चोगुल्ले़ खिनिॽ थाःक्थे़बा अब्राहाम, इसहाक हे़क्क्याङ् याकुबे़न्नु चोगुबा माङ्हे़क्किन् के़प्मारे़ लागि यहवे दाङ्बा खिनिॽ निङ्वाॽफुमाङ्ङिल्ले़ कन्हाॽ खिनिॽ तगिलाम् लःत्तुदेसुसिॽ॥ 6 कल्ले़चोगुल्ले़ खिनिॽ निङ्वाॽ हे़त्तासिम्मे़ॽ, खिनिॽ साम्योबा याःम्बक्किल्ले़ चोगुल्ले़ कन् नुबा लाजेन् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को पिमा के़जोगिबा मेःन्॥ थेआङ्भे़ल्ले़ खिनिॽग पान् मे़ङ्घे़म्मनाबा मनानिङ्लो॥ साम्म्याङ् नावाइत्ला 7 मुरे़क् खारे़क् थेआङ् के़होप्पादे़न्नो आक्खेलॽरिक् यहवे दाङ्बा खिनिॽ निङ्वाॽफुमाङ्ङिन् कुसाक्के़न् के़भोःक्खुम्, कन् पाःन्निन् खिनिॽ निङ्वाॽ इःत्ते़म्मे़ॽ, हे़क्क्याङ् आप्फाल्ले़आङ् निङ्वाॽ मे़भेःत्छे़म्मिन्ने़ॽ॥ मिस्रलाम् के़लःन्दिबा ये़न्नाङ्धो कन् ते़न्नो के़गे़रि के़भे़रिबा थारिक्ले़ खिनिॽ यहवे दाङ्बे़न् हाबा के़अत्तुम्माङ्ङे के़बत्छिॽ॥ 8 होरे़बओआङ् यहवे दाङ्बे़न् खिनिॽ कुसाक्के़न् के़भोःक्खुम्, हे़क्क्याङ् खिनिॽ युम्रे़क् मे़ङ्मानिङ् थारिक् यहवे दाङ्बान् साॽरिक् कुसिक् पोगे़आङ् वये़॥ 9 यहवे दाङ्बे़ल्ले़ खिनिॽनु चोगुबा माङ्हुप् के़बप्पा साप्लुङ्हाॽ युःप्मारे़ लागि आङ्गाॽ कोःक्मा फाङ्जङ्ङो आङ्गाॽ थाःङ् थोःक्सिङ् पेगाङ्ङाङ् वयाङ्, खे़ब्याङ् आङ्गाॽ खे़न् कोःक्मा फाङ्जङ्ङो से़न्दिक् ले़न्दिक् लिबोङ् ये़न् थारिक् वयाङ्॥ आङ्गाॽ खरे़ःङ् इग्र च्वाःत् मे़न्जाबा मे़न्धुङ्बा॥ 10 हे़क्क्याङ् यहवे दाङ्बा निङ्वाॽफुमाङ्ङिल्ले़ कुहुक्किल्ले़ साप्तुबा साप्लुङ् ने़त्छि आङ्गाॽ हुक्सुप्ताङ्॥ कोःक्मा फाङ्जङ् सम्धाङ् मिधुङ् मिराःक्लुम्मो चुम्भोःल्ले़ याःन्दिक् यहवे दाङ्बे़ल्ले़ पिराङ्बा के़रे़क् इङ्जाङ्हाॽ खे़प्मो पत्छे़॥ 11 यहवे दाङ्बे़ल्ले़ लिबोङ् ये़न् नु लिबोङ् से़न्दिक् कुनुप्मो माङ्हुप्पोबा खे़न् ने़त्छि साप्लुङ्हाॽ आङ्गाॽ पिराङ्॥ 12 खे़न् एगाङ् यहवे दाङ्बे़ल्ले़ आङ्गाॽ मे़त्ताङ्, “पोगे़ॽ, खिमो कप्मोनु यो थासिङ् पेगे़ॽ, थेआङ्भे़ल्ले़ खे़ने़ॽ मिस्रलाम् के़भे़त्तुसिबा खे़ने़ॽ के़मनाहाॽ फे़त्मे़लाॽरे़आङ् मे़वाॽ॥ आङ्गाॽ खे़ङ्हाॽ वाॽमारे़ लागि पिरुङ्सिङ्बा इङ्जाङ्ङोलाम् खे़ङ्हाॽ आक्खे़न् हारा मे़नुःक्खे़ मे़बे! हे़क्क्याङ् मे़योन्दुआङ् खुन्छिॽ लागि लत्छा नावाइत्ला मे़जोगुआङ् वाॽ!” 13 यहवे दाङ्बे़ल्ले़ आङ्गाॽ अक्खेआङ् मे़त्ताङ्, “आङ्गाॽ कन् मनाहाॽ ओमे़त्तुङ्सिङ्, हे़क्क्याङ् कन्हाॽग साॽरिक् पान् मे़ङ्घे़म्मनाबा मनासिरे़त्छ॥ 14 आल्ल आङ्गाॽ ले़राङ्देसाङ्ङे़ॽ, हे़क्क्याङ् आङ्गाॽ कन्हाॽ हदॽ मे़क्खुङ्सिङ्ॽ, खम्भ्याङ् खे़ङ्हाॽरे़ खुन्छिॽ मिङ्ङिन् साङ्ग्राम्पेदाङ् सिगाङ्लाम् मासुङ् पिरुङ्सिङ्ॽ॥ हे़क्क्याङ् खे़ने़ॽ लाम्बाए खे़ङ्हाॽनुःल्ले़ मुक्के़गुबा नु यरिक् के़योबा मे़न्छाम् सुवाङ् चोगुङ्सिङ्ॽ॥” 15 खे़ल्ले़चोगुल्ले़ आङ्गाॽ हिल्लिक् हिसिङ्ङाङ् हे़क्क्याङ् कोःक्मा फाङ्जङ्ङोलाम् यो थ्याङ्॥ खे़न् ये़म्मो कोःक्मा फाङ्जङ्ङिन् मिधुङ्दिङ् मिराःक्के़ल्ले़ तिरे़आङ् युङे़, हे़क्क्याङ् तगाङ् नु एगाङ् ने़प्माङ् ले़प्माङ् साप्मनाबा माङ्हुप्पिल्ले़न् ने़त्छि साप्लुङ्हाॽ आङ्गाॽ आहुक्को वये़॥ 16 हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुदक्ले़ङ्वाओ खिनिॽ लायो के़जोगुम्बा निसुङ् खे़ब्याङ् खिनिॽ आप्फेक् लागि के़योःन्दुम्माङ् लत्छा पित्सात् नावाइत्ला के़जोगुम्॥ यहवे दाङ्बे़ल्ले़ खिनिॽ के़बिरिबा इङ्जाङ्लाम् कम्भ्यारिक् हारा थिक्नाहाङ् के़नुःक्खि के़बेगिआङ् के़वयि॥ 17 कल्ले़चोगुल्ले़ आङ्गाॽ खे़न् ने़प्माङ् साप्लुङ्हाॽ याङ्सिङ्ङाआङ् आहुक्कोलाम् लाप्फेसुङ् हे़क्क्याङ् खिनिॽ मिक् तगिए पक्क्रे़ॽ पक्क्रे़ॽ हे़रुङ्॥ 18 यहवे दाङ्बे़ल्ले़ कुमिक्साओ खिनिॽ फे़न्याःम्बक् के़जोगुम्माङ् खिनिॽ के़रे़क् लायोल्ले़ चोगुल्ले़ खुने़ॽ कुसाक्के़न् के़भोःक्खुम्॥ खे़ल्ले़चोगुल्ले़ तगिबा हे़क्के से़न्दिक् ले़न्दिक् लिबोङ् ये़न् थारिक् यहवे दाङ्बे़ल्ले़ कुदगि ले़म्बे़त् ने़स्साङ्गराङ्॥ आङ्गाॽ खरे़ःङ् इग्र च्वाःत् मे़न्जाबा मे़न्धुङ्बा॥ 19 यहवे दाङ्बे़ल्ले़ कुसिक् पोःक्मा नु कुयाःक्ले़ॽमालाम् आङ्गाॽ किसाङ्, थेआङ्भे़ल्ले़ खिनिॽ युम्रे़क् मे़ङ्मा थारिक् खुने़ॽ कुयाःक्ले़ॽरे़आङ् वये़॥ कर कन्छुमोआङ् यहवे दाङ्बे़ल्ले़ आङ्गाॽ आबेलिन् खे़प्सु॥ 20 हारुने़न्नाङ् मे़ङ्मा यारिक् यहवे दाङ्बे़न् खुने़ॽनु कुयाःक्ले़ॽरे़आङ् वये़, कर आङ्गाॽ खे़न् ये़म्मो हारुनरे़ कुलागिआङ् पेलि फाक्तुङ्॥ 21 खे़न् एगाङ् आङ्गाॽ खिनिॽ लायोबा चिगक्वा, खिनिॽ के़जोगुम्बा खे़न् पित्सात्ते़न् याङ्सिङ्ङाआङ् मिओ मिधिक्खुङ् हे़क्क्याङ् खे़न् फयःप्फयःप् यःप्सुङ्ङाङ् कुम्जिक्मा चोगुङ्, खम्भ्याङ् खे़न् कुम्जिक्मान् कोःक्मा फाङ्जङ्ङोनु के़धाबा वहःङ्ङो लाप्फेसुङ् केःत्तुङ्॥ 22 तबेरा, मस्सा नु किब्रोथ-हत्तावाओआङ् यहवे दाङ्बान् खिनिॽ साॽरिक् कुसिक् के़भोःक्खुम्॥ 23 हे़क्क्याङ् यहवे दाङ्बे़ल्ले़ कादेस-बर्नेलाम् खिनिॽ अक्खे के़मे़त्तिआङ् के़बाङ्घि, “खिनिॽ पेगे़म्मे़ॽआङ् आङ्गाॽ खिनिॽ पिनिङ्बा लाजेन् युक् चोगे़म्मे़ॽ॥” कर यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्ङिन् के़अत्तुम्, खे़ब्याङ् खिनिॽ खुने़ॽ कुना के़न्छाॽरुम्मिन्, हे़क्क्याङ् खुने़ॽ कुबाःन्नाङ् के़ङ्घे़प्सुम्मिन्॥ 24 आङ्गाॽ खिनिॽ कुसिङ् निःत्निङ्बा ये़न्नाङ्धोए खिनिॽ यहवे दाङ्बे़ल्ले़ कुदक्ले़ङ्वाओ के़वयि॥ 25 यहवे दाङ्बे़ल्ले़ खिनिॽ मे़ङ्मा पान् पाःत्तुबाल्ले़ चोगुल्ले़ यहवे दाङ्बे़ल्ले़ कुदगि आङ्गाॽ लिबोङ् ये़न् से़न्दिक् ले़न्दिक् ने़स्साङ्गराङ्॥ 26 यहवे दाङ्बान् आङ्गाॽ पेलि फाक्तुङ्ङाङ् मे़त्तुङ्, “यहवे दाङ्बा निङ्वाॽफुमाङ्ङे, खे़ने़ॽ यम्बा के़मुक्साम्मोलाम् के़से़न्दुसिआङ् मुक्साम्साबा के़हुक्लाम् मिस्रलाम् के़लःत्तु के़भे़त्तुसिबा खे़ने़ॽ के़मनाहाॽ नु खे़ने़ॽ आप्फेक् के़लक्खोबाहाॽ मे़मे़क्खे़से़न्ने़ॽ॥ 27 अब्राहाम, इसहाक नु याकुब खे़ने़ॽ के़से़वारोबाहाॽ निङ्वाॽ इःत्ते़से़ॽ॥ कन् मनाहाॽरे़ खुनिॽ पान् मे़ङ्घे़म्मा, फे़न्याःम्बक् नु लायोहाॽ ओमे़मे़त्ते़न्ने़ॽ, 28 मेःन्ने़भग्र, खे़ने़ॽ आनिगे याप्मि के़लःत्ते़ के़भे़त्ते़बा लाजेॽओबा मनाहाॽरे़ अक्खे मे़बाःत्तु, ‘यहवे दाङ्बे़ल्ले़ माङ्हुप् चोगुबा लाजेॽओ खे़ङ्हाॽ तेॽमा मे़सुक्तुसिन्बा नु खे़ङ्हाॽ चिःत्तुसिबाल्ले़ चोगुल्ले़ मुरे़क् खारे़क् थेआङ् के़होप्पादे़न्नो खुने़ॽ खे़ङ्हाॽ से़त्छे़ तेॽरुसि॥’ 29 कर खे़ने़ॽ यम्बा के़मुक्साम् नु आप्फेक् के़हुक्किन् के़सन्छुआङ् के़लःत्तु के़भे़त्तुसिबा खे़ङ्हाॽ खे़ने़ॽ के़मना नु खे़ने़ॽ आप्फेक् के़याङ्सा कुन्धेसिरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.