साम्योथिम् इङ् 8 - लिम्बुनिङ्वाॽफुमाङ्ङिल्ले़ माङ्हुप् चोगुबा लाजेॽ 1 आङ्गाॽ खिनिॽ पिनिङ्ल पत्ताबा के़रे़क् इङ्जाङ्हाॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ, हे़क्केलॽरिक् खिनिॽ कुहिङ्वे़त् वाॽमा के़सुक्तिर हे़क्क्याङ् यरिक् पोःम्मा थे़ॽमा के़सुक्तिर, हे़क्क्याङ् यहवे दाङ्बे़ल्ले़ खिनिॽ पाधे़बाहाॽ माङ्हे़क्तुसिआङ् माङ्हुप् चोगुबा लाजेन् खिनिॽ पेःक्माआङ् युक् चोःक्मा के़सुक्तुम्ल॥ 2 खिनिॽ नःम्नःम्बा चोःक्मारे़ लागि, निङ्वाॽ साॽमारे़ लागि नु खुने़ॽ कुइङ्जाःङ्ङिन् खिनिॽ इःप्मा नाःप्मा निङ्वाॽ के़गत्तुम्बि मेःम्बि फाॽआङ् कुसिङ् निःप्मारे़ लागि कन् लिबोङ् तङ्बे थारिक्पा मुरे़क् खारे़क् थेआङ् के़होःप्पादे़न् लाम्दिःक्को यहवे दाङ्बा खिनिॽ निङ्वाॽफुमाङ्ङिल्ले़ खिनिॽ आक्खेलॽरिक् लाम्गे़लोसि, खे़न् खिनिॽ निङ्वाॽ इःत्ते़म्मे़ॽ॥ 3 खुने़ॽ खिनिॽ नःम्नःम्बा चोःक्मारे़ लागि साक्किल्ले़ के़दरिर के़याःन्दि, हे़क्क्याङ् खुने़ॽ खिनिॽ मन्न के़जाःत्ति, खे़ल्ले़ कुयाःम्बेओ खिनिॽ नु खिनिॽ पाधे़बाहाॽरे़ थे़माआङ् कुसिङ् मे़न्निःत्ते के़वयि॥ मे़न्छाम् याप्मिन् कुजाःल्ले़रक् मे़हिङ्ने़न्, कर यहवे दाङ्बे़ल्ले़ पाःत्तुबा पाःन्जाःक्किल्ले़ हिङ्ॽ के़लॽबा पाःन्निन् कुसिङ् के़निःत्तुम्ल फाॽआङ् खुने़ॽ अक्खे चोगुबारो॥ 4 खे़न् लिबोङ् तङ्बे थारिक् खिनिॽ थक्कोबा चाङ्हाॽ मे़दे़ःक्खे़न्, हे़क्क्याङ् खिनिॽ लाङ्हाॽ मे़धङ्दुन्॥ 5 खिनिॽ कन् पाःन्निन् कुसिङ् निःप्मा पोङ्ॽ, मनाःल्ले़ आप्फेक् कुस्सान् हे़न्थिम् याक्तुबा कुइसिक् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हे़न्थिम् के़याक्तिॽ॥ 6 यहवे दाङ्बा खिनिॽ निङ्वाॽफुमाङ्ङिल्ले़ कुलाम्मो लाङ्घेगे़म्मे़ॽ हे़क्क्याङ् खुने़ॽनु किसे़म्मे़ॽआङ् खुने़ॽ कुइङ्जाङ्हाॽ इःत्ते़म् नाःत्ते़म्मे़ॽ॥ 7 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लत्छा नुबा लाजेॽओ के़देॽरिर के़बत्छिॽ॥ खे़प्मो वहःङ् यहःङ् नु वाबुन्दाक्वा के़लाक्पा के़लःम्बा च्वाःत्तिन् कोःक्मा फाङ्जङ् नु ने़ने़बादे़न् पोङ्ङाङ् कुङ्लो॥ 8 खे़न् लाजेन् मासि, हःक्सि, चे़ल्ले़क्सेॽ, पःत्छेॽ, फुत्ले़ॽसेॽ, पे़ःङ्वालिःत्छेॽ निःङ्गेॽ नु सक्वाघुःल्ले़ के़दिम्बा चोक्॥ 9 खे़न् लाजेॽओ खिनिॽ लागि कुजा साक्किल्ले़ के़न्दरिन्॥ खे़प्मो खिनिॽ लागि थे़मा पाःन्नोआङ् कुहोःप्मा कुसाक्मो के़न्ध्ये़ॽइन्॥ खे़न् लाजेॽओबा लुङ्हाॽओ फे़न्जेॽ याक्, हे़क्क्याङ् खे़प्मोबा कोःक्माहाॽओलाम् फे़मि के़लःत्तुम्ॽ॥ 10 आल्ल खिनिॽ के़घासिर थारिक् चामा के़घोसुम्मिल्ले़, खुने़ॽ खिनिॽ के़बिरिबा लाजेःल्ले़ लागि खिनिॽ निङ्वाॽफुमाङ्ङिन् कुनारा फोसे़म्मे़ॽओ॥ यहवे दाङ्बे़न् निङ्वाॽफेःम्मा मे़नुॽने़न् 11 सिङ्सिङ् ये़क्ये़क्काङ् वये़म्मे़ॽ! आङ्गाॽ आइन् खिनिॽ पिनिङ्बा खुने़ॽ कुइङ्जाङ्हाॽ नु खुने़ॽ कुधिम्हाॽ मे़भेःन्दे़म्मिन्ने़ॽ हे़क्क्याङ् यहवे दाङ्बा खिनिॽ निङ्वाॽफुमाङ्ङिन् निङ्वाॽ मे़भेःत्छे़म्मिन्ने़ॽ॥ 12 मेःन्ने़भग्र आल्ल खिनिॽ के़जाम्माङ् खिनिॽ के़घासिॽ, खम्भ्याङ् नुःब्नुबा हिम्हाॽ के़जोगुम्माङ् के़युङिॽ, 13 खे़ब्याङ् खिनिॽ थक्सालुप्हाॽ नु थक्सा सुम्हाॽ यरिक् मे़बोङ्ल मे़बेःक्, हे़क्क्याङ् खिनिॽ साम्म्याङ् युप्पा नु खिनिॽ के़गत्तुम्बा के़रे़क् पाःन्हाॽ वे़त्ते़सरे़ पोङ्ॽ, 14 खे़ब्याङ् खिनिॽ आङ्दिङ् के़लॽरिआङ् योक् के़म्जोगिबा लाजे मिस्रलाम् के़लःप्पा के़भे़प्पा यहवे दाङ्बा खिनिॽ निङ्वाॽफुमाङ्ङिन् निङ्वाॽ के़भेःत्छुम्ॽ॥ 15 कुनिङ् के़आःप्पा असेःक् नु ताङ्साङ् खे़बक्हाॽ के़याक्पा, चिजि खक्खक्पा नु चा मे़न्नुॽमनाबा लाजेॽ के़ने़बा पयम् यम्बा हे़क्क्याङ् किप्मा के़घुबा मुरे़क् खारे़क् थेआङ् के़होःप्पादे़न्निल्ले़ कुलुम्मो खुने़ॽ खिनिॽ लाम्गे़लोसि के़भे़त्ति॥ खुने़ॽ खिनिॽ लागि सियाक्पेॽ थे़याक्पेॽलाम् च्वाःत् लःत्तु॥ 16 मुरे़क् खारे़क् थेआङ् के़होप्पादे़न्नो खिनिॽ सुधे़बा ताक्थे़बाहाॽरे़ कुसिङ् मे़न्निःत्तुन्बा मन्नःन् के़जाःत्तिआङ् कुनुप्मो खिनिॽ के़नुरि के़दासिर फाॽआङ् खुने़ॽ खिनिॽ नःम्नःम्बा के़जोगि हे़क्क्याङ् खिनिॽ निङ्वाॽ साॽरु॥ 17 कन् के़रे़क् पाःन्हाॽ खुने़ॽए चोगु खे़ल्ले़चोगुल्ले़ खिनिॽ अक्खे मे़लॽरे़म्मिन्ने़ॽ, “कन् याङ्साकुन्धेहाॽ आनिगे थुम्मा साक्मा नु मुक्किल्ले़ खोसुम्बे़॥” 18 यहवे दाङ्बा खिनिॽ निङ्वाॽफुमाङ्ङिन् निङ्वाॽ इःत्ते़म्मे़ॽ, थेआङ्भे़ल्ले़ खुने़ॽए खिनिॽ याङ्साकुन्धे खोमा मुक्साम् के़बिरिॽ॥ कम्भलॽरिक्के खुने़ॽ खिनिॽ पाधे़बा ताक्थे़बाहाॽनु चोगुबा माङ्हुप्पिन् आप्फाल्ले़साङ् वाॽर चोगुॽ, खे़न् आइन् थारिक्के हाबा वाॽ॥ 19 आङ्गाॽ आइन् खिनिॽ कन् के़साक्पा साम्दिङ् पिनिङ्ल पत्ता, यहवे दाङ्बा खिनिॽ निङ्वाॽफुमाङ्ङिन् निङ्वाॽ के़मुःत्छुम्ॽ हे़क्क्याङ् वेॽ माङ्हाॽ के़दिम्दुम्सिम्माङ् खे़ङ्हाॽ माङ्से़वा नु से़वा के़मे़त्तुम्सिम्ने़भग्र, खिनिॽ से़क्खासाङ् के़मे़गिॽ॥ 20 यहवे दाङ्बा खिनिॽ निङ्वाॽफुमाङ्ङिल्ले़ कुबाःन्जाक्किन् के़न्इःत्तुम्मिन् के़न्नाःत्तुम्मिन्ने़भग्र, खिनिॽ तगिए यहवे दाङ्बे़ल्ले़ मे़क्खुसिबा मे़न्छाम् सुवाङ्हाॽ हे़क्के खिनिॽआङ् के़मे़क्खिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.