साम्योथिम् इङ् 7 - लिम्बुकनानिहाॽनु फुत्छिङ्मा मे़नुॽने़न् ( ला ३४:११-१६ ) 1 आल्ल खिनिॽ युक् चोःक्मा फाॽआङ् पेःक्मा के़जोगिबा लाजेॽओ यहवे दाङ्बा खिनिॽ निङ्वाॽफुमाङ्ङिल्ले़ के़भे़त्तिॽ, हे़क्क्याङ् खिनिॽनुःल्ले़ आत्तातान्ने यरिक् नु पधुम् के़धुम्बा कन् नुसि मे़न्छाम् सुवाङ्, हित्ति, गिर्गासि, एमोरि, कनानि, परिज्जि, हिब्बि नु यबुसिहाॽ खिनिॽ तगिलाम् खुने़ॽ नाःत्तुदेसुसिॽ, 2 हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ खे़ङ्हाॽ खिनिॽ युक्को तारुसि के़बिरिॽ, खे़ब्याङ् खिनिॽ खे़ङ्हाॽ के़नाःन्दुम्सिम्बा मे़बोङ्ॽ, हे़क्केःल्ले़ खिनिॽ खे़ङ्हाॽ खक्पे़त् मे़क्खे़म्सिम्मे़ॽ॥ खिनिॽ खे़ङ्हाॽनु थे़मा पाःन्नोआङ् मे़दङ्ङासिम्मिन्ने़ॽ॥ खे़ङ्हाॽ लुङ्माॽ मे़दुक्ते़म्सिम्मिन्ने़ॽ॥ 3 खे़ङ्हाॽनु ते़न्धाम् मेःक्खिम् मे़जोगे़म्मिन्ने़ॽ॥ खिनिॽ मे़न्छुमा साहाॽ खे़ङ्हाॽरे़ खुन्छिॽ ये़म्बित्छासाहाॽ मे़बिरे़म्सिम्मिन्ने़ॽ इग्र खे़ङ्हाॽरे़ खुन्छिॽ मे़न्छुमा साहाॽ खिनिॽ ये़म्बित्छा साहाॽरे़ लागि मे़दारे़म्सिम्मिन्ने़ॽ, 4 थेआङ्भे़ल्ले़ खे़ङ्हाॽरे़ खिनिॽ ये़म्बित्छासाहाॽ यहवे दाङ्बालाम् मे़हुसुसिआङ् वेॽ माङ्हाॽ से़वा मे़प्मा मे़बाङ्घुसिॽ॥ अक्खे पोङ्बाल्ले़ यहवे दाङ्बे़ल्ले़ कुसाक्के़न्निन् खिनिॽ सम्धाङ् थारो, हे़क्क्याङ् खुने़ॽ खिनिॽ खिमो के़मे़क्खिॽ॥ 5 खिनिॽ खे़ङ्हाॽनु अक्तङ्बा याःम्बक् चोगे़म्मे़ॽ॥ खे़ङ्हाॽरे़ खुन्छिॽ ले़त्ति तोःम्मादे़न्हाॽ यन्छे़म् पिरे़म्सिम्मे़ॽ, खे़ङ्हाॽरे़ खुन्छिॽ चखोबा लुङ्हाॽ फयःप्फयःप् यःप्से़म् पिरे़म्सिम्मे़ॽ, खे़ङ्हाॽरे़ खुन्छिॽ असेरा माङ्ङिल्ले़ कुसित्लाङ्हाॽ खक्ते़म्मे़ॽआङ् सोःन्दे़म् पिरे़म्सिम्मे़ॽ, हे़क्क्याङ् खे़हाॽरे़ खुन्छिॽ नावाइत्लाहाॽ मिओ मिधिक्खे़म् पिरे़म्सिम्मे़ॽ॥ 6 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ कुलागि खिनिॽ लत्छा सेसेबा सुवाङ्निङ्लो॥ यहवे दाङ्बा खिनिॽ निङ्वाॽफुमाङ्ङिल्ले़ इक्सादिङ् खाम्बेःक्को के़वाॽबा के़रे़क् मे़न्छाम् याप्मिहाॽलाम् खुने़ॽ कुलागि लत्छा के़ये़क्पा सुवाङ्, लत्छा इमे़ल्लुङ्बा याङ्साकुन्धे चोःक्मारे़ लागि खिनिॽ के़सेगिआङ् वाॽ॥ 7 खिनिॽ खानिःत्तो वेॽ मे़न्छाम् सुवाङ्हाॽनुःल्ले़ यरिक् के़योरिबाल्ले़ चोगुल्ले़ यहवे दाङ्बे़ल्ले़ खिनिॽ लुङ्माॽ के़दुक्तिबा इग्र के़सेगिबा मेःन्, थेआङ्भे़ल्ले़ खिनिॽग खानिःत्तो के़रे़क् मे़न्छाम् सुवाङ्हाॽनुःल्ले़ चबे़त्छिक् के़वयि॥ 8 कर यहवे दाङ्बे़ल्ले़ खिनिॽ लुङ्माॽ के़दुक्तिबाल्ले़ चोगुल्ले़, हे़क्क्याङ् खुने़ॽ खिनिॽ पाधे़बाहाॽनु चोगुबा माङ्हुप्पिन् के़प्मारे़ लागिए यहवे दाङ्बाल्ले़ खुने़ॽ आप्फेक् कुमुक्साम्मिल्ले़ खिनिॽ के़लःत्ति के़भे़त्ति, खे़ब्याङ् मिस्रबा हाङ् फारोल्ले़ कुहुक्कोलाम्, योक् के़म्जोगिबा लाजेॽलाम् चोःक्युम्भो के़बिरि॥ 9 कल्ले़चोगुल्ले़ निङ्वाॽओ युक्खे़म्मे़ॽ, यहवे दाङ्बा खिनिॽ निङ्वाॽफुमाङ्ङिन्लक् लत्छा नसाःन्साबा निङ्वाॽफुमाङ् वाॽ॥ खुने़ॽ मिःम्जि के़मे़प्पा नु खुने़ॽ कुइङ्जाङ् के़इःप्पा के़नाःप्पा हे़न्छिङ् थाःक्हाॽओ नसाःन्साबा कुमाङ्हुप्पिन् के़त्तुॽ॥ 10 कर खुने़ॽ के़नाॽबाहाॽ से़क्खासाङ् मे़क्खुसिॽ, खम्भ्याङ् खुने़ॽ के़जिःप्पाहाॽरे़ खुन्छिॽ तक्ले़ङ्वाओ कुले़क्वा नुःक्मारे़ लागि खुने़ॽ मे़सुने़न्॥ 11 कल्ले़चोगुल्ले़ आङ्गाॽ आइन् खिनिॽ पिनिङ्बा इङ्जाङ्, थिम् नु साम्योथिम्हाॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ॥ इङ्जाङ् के़इःप्पा के़नाःप्पाहाॽरे़ लागि मुॽइसाम् ( साम्यो इङ् २८:१-१४ ) 12 खिनिॽ कन् थिम्हाॽ के़घे़प्सुम्माङ् के़इःत्तुम् के़नाःत्तुम्ने़भग्र यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पाधे़बाहाॽनु माङ्हुप् चोगुआङ् वये़बा कुइसिक् खिनिॽ लुङ्माॽ के़दुक्तिबा कुमाङ्हुप्पिन् के़त्तुॽ॥ 13 खुने़ॽ खिनिॽ लुङ्माॽ के़दुक्तिॽ, हे़क्क्याङ् खुने़ॽ खिनिॽ हाङ्वागे़न् मुॽइसाम् के़बिरिआङ् खिनिॽ के़भोसिॽ॥ खुने़ॽ पिनिङ् फाॽआङ् खिनिॽ पाधे़बाहाॽनु माङ्हुप् चोगुबा लाजेॽओ खिनिॽ थक्लारे़ लागि यरिक् सामे़न्छाॽहाॽ के़बिरिॽ, इक्ताप्पो के़धोःक्पा कुजारे़ लागि, कुबोक् चे़ल्ले़क्सेॽ थि नु निःङ्गेॽ, पित्थक्सा, कुम्बाबा कुम्मामा पित्सात्हाॽ नु मे़ल्लुक् मे़न्दाक् साःत्हाॽओआङ् खुने़ॽ हाङ्वागे़न् मुॽइसाम् थासुॽ॥ 14 खिनिॽ वेॽ मनाहाॽनुःल्ले़ साॽरिक् मुॽइसाबा के़बोःक्खिॽ॥ खिनिॽ ये़म्बित्छा इग्र मे़न्छुमा मनाहाॽओ आत्तिन्हाॽआङ् लुक्पा खक्पा मे़म्बोङ्ने़न् हे़क्क्याङ् थक्साहाॽओआङ् आत्तिन्हाॽआङ् मे़न्धाप्मना मे़म्बोङ्ने़न्॥ 15 हे़क्क्याङ् यहवे दाङ्बे़ल्ले़ खिनिॽ के़रे़क् तुक्मा लाःक्मालाम् के़वेःन्दिॽ॥ मिस्रओ खिनिॽ के़निसुम्बा किप्मा के़घुबा मिङ्देॽहाॽ खिनिॽ सम्धाङ् मे़दारुन्ॽ, कर खिनिॽनु निङ्मि के़जोःक्पाहाॽओ खे़न् मिङ्देॽहाॽ तारुॽ॥ 16 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को के़बिरिबा के़रे़क् मे़न्छाम् सुवाङ्हाॽ खिनिॽ मे़क्खे़म्सिम्मे़ॽ, खे़ङ्हाॽ लुङ्माॽ मे़दुक्ते़म्सिम्मे़न्ने़ॽ॥ खे़ङ्हाॽरे़ खुन्छिॽ माङ्हाॽ से़वा मे़मे़त्ते़म्सिम्मिन्ने़ॽ, थेआङ्भे़ल्ले़ आम्भा खे़न्ने खिनिॽ इओ थामा इजो पोङ्ॽ॥ 17 खिनिॽ आबाङे अक्खे के़इःत्तुम्बिला, “कन् सुवाङ्हाॽ आनिॽनुःल्ले़ के़धुम्बा मे़जोक्॥ आनिॽ आक्खेआङ् कन्हाॽ नाःप्मा आसुक्तुम्सिम्बे?” 18 कर खिनिॽ मे़गिसे़म्मिन्ने़ॽ॥ यहवे दाङ्बा खिनिॽ निङ्वाॽफुमाङ्ङिल्ले़ फारोन् नु के़रे़क् मिस्र लाजेन् आक्खे मे़त्तु खे़न् निङ्वाॽ इःत्ते़म्मे़ॽ॥ 19 यम्बयम्बा तुक्खे लाक्खेहाॽ, निङ्वाॽ के़माबा मिक्सेःन्हाॽ नु खे़न् ने़हिरे़ मे़न्धाप्मनाबा पयम् यम्बा याःम्बक्हाॽ आप्फेक् खिनिॽ मिक्किल्ले़ के़निसुम्॥ हे़क्क्याङ् खुने़ॽ कुमुक्साम् नु कुहुक्किन् सन्छुआङ् खुने़ॽ खिनिॽ के़लःत्ति के़भे़त्तिबान् खे़प्मो खिनिॽ आप्फेक् के़निसुम्माङ् के़वयि—हे़क्केलॽरिक्के यहवे दाङ्बा खिनिॽ निङ्वाॽफुमाङ्ङिल्ले़ खिनिॽ आल्लो के़गिरुम्सिम्बा खे़न् सुवाङ्हाॽआङ् हे़क्केए मे़त्तुसिॽ॥ 20 कन्नुःल्ले़ वेॽ यहवे दाङ्बा खिनिॽ निङ्वाॽफुमाङ्ङिल्ले़ खे़ङ्हाॽरे़ खुन्छिॽ के़दाङ्बा के़याःक्पा नु खिनिॽलाम् के़जिङ्सिङ्बाहाॽ मे़म्मे़क्ने़न्ल थारिक् खे़ङ्हाॽरे़ खुन्छिॽ लुम्मो सावाहाॽ पाङ्घु तासुसिॽ॥ 21 खे़ङ्हाॽनु खिनिॽ मे़गिसे़म्मिन्ने़ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन् खिनिॽनु वाॽ॥ खुने़ॽ पयम् यम्बा नु किप्मा के़घुबा निङ्वाॽफुमाङ् चोक्॥ 22 हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ खे़न् सुवाङ्हाॽ यङेःक् यङेःक् खिनिॽ तगिलाम् लःत्तुदेसुसिॽ॥ खिनिॽ खे़ङ्हाॽ थिक्ले़ङ्ले़ मे़ङ्मा के़ङ्घोसुम्सिम्मिन्ॽ, मेःन्ने़भग्र खिनिॽ कब्रिङ् पिसाङ्बा ताम्भुङ् थक्साहाॽ यरिक् मे़बोःन्ल मे़बेःक्॥ 23 कर यहवे दाङ्बा खिनिॽ निङ्वाॽफुमाङ्ङिल्ले़ खे़ङ्हाॽ खिनिॽ युक्को तारुसि के़बिरिॽ, हे़क्क्याङ् खे़ङ्हाॽ मे़म्मे़क्ने़न्ल थारिक् खे़ङ्हाॽ साॽरिक् मे़नाक्ल याःन्दुसिॽ॥ 24 हे़क्क्याङ् खुने़ॽ खे़ङ्हाॽरे़ खुन्छिॽ हाङ्हाॽ खिनिॽ हुक्को थासुसि के़बिरिॽ, खम्भ्याङ् खिनिॽ ताङ्साङ्बाल्ले़ कुसिगाङ्लाम् खे़ङ्हाॽरे़ खुन्छिॽ मिङ्ङे के़मासुम् के़बिरुम्सिम्ॽ॥ आत्तिन् मनाहाॽआङ् खिनिॽ तगि ये़प्मा मे़न्छुक्ने़न्॥ खिनिॽ खे़ङ्हाॽ के़मे़क्खुम्सिम्ॽ॥ 25 खे़ङ्हाॽरे़ खुन्छिॽ माङ्हाॽरे़न् नावाइत्लाहाॽ मिओ खिनिॽ मिधिक्खे़म्देसे़म्सिम्मे़ॽ॥ नावाइत्लाओ के़याक्पा साम्म्याङ् युप्पाहाॽ मिक् मे़गेःत्ते़म्मिन्ने़ॽ हे़क्क्याङ् आप्फेक् लागि मे़मे़त्तासिम्मिन्ने़ॽ, थेआङ्भे़ल्ले़ आम्भा खे़न्ने खिनिॽ इओ थामा इजो पोङ्ॽ॥ थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ कुलागि कन् कुसिक्के़ले़ःङ्बा चोक्॥ 26 आत्तिन् सिक्के़ले़ःङ्बा पाःन्निन्नाङ् खिनिॽ हिम्मो मे़दाराम्मिन्ने़ॽ, मेःन्ने़भग्र खिनिॽआङ् खे़न् हे़क्के मे़क्मारे़ लागि लाःत्लाःत् के़बोःक्खिॽ॥ खिनिॽ खे़न् चाॽरिक्के चिःत्ते़म्मे़ॽ खे़ब्याङ् नाॽरे़म्मे़ॽ, थेआङ्भे़ल्ले़ खे़न् मे़ङ्मारे़ लागि लाःत्लाःत् से़म्मनाबा पाःन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.