साम्योथिम् इङ् 6 - लिम्बुके़रे़क्नुःल्ले़ यम्बा इङ्जाङ् 1 खिनिॽ यर्दन नाधाःम्बि के़बेगिआङ् युक् चोःक्मा के़इःत्तुम्बा लाजेॽओ खिनिॽ के़इःत्तुम् के़नाःत्तुम्ल फाॽआङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुॽसे़ आङ्गाॽ इङ्जाङ् पिराङ्बा इङ्जाङ्, थिम् नु साम्यो साक्थिम्हाॽ हाबा कन्हाॽरो॥ 2 खिनिॽ हिङ्हिङ् यहवे दाङ्बा खिनिॽ निङ्वाॽफुमाङ्ङिन्नु किसे़म्मे़ॽआङ् खिनिॽ नु खिनिॽ साएहाॽ हे़क्क्याङ् मे़न्छाॽहाॽरे़ आङ्गाॽ पिनिङ्ल पत्ताबा के़रे़क् कुधिम्हाॽ नु कुइङ्जाङ्हाॽ इःत्ते़म् नाःत्ते़म्मे़ॽ, हे़क्केलॽरिक् खिनिॽ थाःक् चाॽर॥ 3 इस्राइलिसे खे़प्से़म्मे़ॽ, कन्हाॽ के़रे़क् इःप्मा नाःप्मारे़ लागि सिङ्सिङ् ये़क्ये़क् लॽरे़म्मे़ॽ, खे़ब्याङ् खिनिॽ के़नुरि के़दासिर, हे़क्क्याङ् यहवे दाङ्बा खिनिॽ पाधे़बाहाॽरे़ खुनिॽ निङ्वाॽफुमाङ्ङिल्ले़ खिनिॽनु माङ्हुप् चोगुबा कुइसिक् पित्नु नु सक्वाघु के़गुङ्बा लाजेॽओ खिनिॽ यरिक् के़बोःन्दि के़धे़ॽरिॽआङ्लो॥ 4 इस्राइलिसे, खे़प्से़म्मे़ॽ, यहवे दाङ्बा आनिॽ निङ्वाॽफुमाङ्, यहवे दाङ्बा लत्छारक् वाॽ॥ 5 यहवे दाङ्बा खिनिॽ निङ्वाॽफुमाङ्ङिन् खिनिॽ के़रे़क् सिक्लुङ्माॽरे़, खिनिॽ के़रे़क् निङ्वाॽरे़ हे़क्क्याङ् खिनिॽ के़रे़क् मुक्साम्मिल्ले़ मिःम्जि मे़त्ताम्मे़ॽ॥ 6 हे़क्क्याङ् आइन् आङ्गाॽ खिनिॽ मे़त्निङ्बा कन् इङ्जाङ्हाॽ खिनिॽ के़रे़क् सिक्लुङ्माॽओ युक्खे़म्मे़ॽ॥ 7 खिनिॽ हिम्मो के़वयिल्ले़, लाम्मो लाङ्गे़घेगिल्ले़, के़नाःम्मासिल्ले़ नु के़बोगिल्ले़ खिनिॽ खे़ङ्हाॽरे़ कुयाःम्बेओ पाःन्छुम् इङ्सुम् तारे़म्मे़ॽ खम्भ्याङ् खिनिॽ साहाॽ हुॽरे़म्सिम्मे़ॽ॥ 8 खे़ङ्हाॽ खिनिॽ हुक्को मिक्सेःन्ले़ लागि इघेःक्खे़म् फत्छे़म्मे़ॽ॥ खे़ङ्हाॽ खिनिॽ त्वाबो खेःक्खाम् फत्छे़म्मे़ॽ॥ 9 खे़ङ्हाॽ खिनिॽ हिम् लाम्धेःत्पुङ् नु मालाम्धेःत्हाॽओ साप्ताम्मे़ॽ॥ 10 आल्ल यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पाधे़बा अब्राहाम, इसहाक हे़क्क्याङ् याकुबे़न्नु खिनिॽ पिनिङ् फाॽआङ् माङ्हे़क् चोगुबा लाजेॽओ खुने़ॽ के़गे़त्तिॽ, खिनिॽ के़न्जोगुम्मिन्बा यम्बयम्बा नु नुःब्नुबा ये़क्यक्हाॽ के़ने़बा लाजेॽओ, 11 खे़प्मो खिनिॽ के़न्छुप्सुम्मिन्बा साॽरिक् नुबा पाःन्हाॽरे़ सधे़क् के़दिम्बा हिम्हाॽ मे़युङ्ॽ, हे़क्क्याङ् के़न्दयुम्मिन्बा वबाक्हाॽ नु के़ल्लेःत्तुम्मिन्बा चे़ल्ले़क्सेॽ नु चैतुन इक्ताप्हाॽ ने़रो, खे़ब्याङ् खिनिॽ खे़ङ्हाॽ के़जाम्माङ् के़घासिॽ, 12 हे़क्केःल्ले़ खिनिॽ सिङ्सिङ् ये़क्यक् लॽरे़म्मे़ॽ, हे़क्क्याङ् योक् के़म्जोगिबा लाजेॽ मिस्रलाम् खिनिॽ के़लःप्पा के़भे़प्पा यहवे दाङ्बे़न् निङ्वाॽ मे़भेःत्छे़म्मिन्ने़ॽ॥ 13 यहवे दाङ्बा खिनिॽ निङ्वाॽफुमाङ्ङिन् किरे़म्मे़ॽ, खुने़ॽइन्लक् माङ्से़वा याःम्बक् चोगे़म्मे़ॽ हे़क्क्याङ् खुने़ॽए कुमिङ्ङो माङ्हे़क्कासिम्मे़ॽ॥ 14 खिनिॽ कब्रिङ् पिसाङ्बा मे़न्छाम् सुवाङ्हाॽरे़ खुन्छिॽ वेॽ माङ्हाॽ मे़दिम्दे़म् मे़नाःत्ते़म्सिम्मे़न्ने़ॽ, 15 थेआङ्भे़ल्ले़ खिनिॽ लुम्मो के़वाॽबा यहवे दाङ्बा खिनिॽ निङ्वाॽफुमाङ्ङिन् वेॽ माङ्हाॽ नासिमे़न्धःप्मनाबा निङ्वाॽफुमाङ्लो॥ मेःन्ने़भग्र यहवे दाङ्बा खिनिॽ निङ्वाॽफुमाङ्ङिल्ले़ कुसाक्के़न्निन् खिनिॽ सम्धाङ् चुक्, खे़ब्याङ् खुने़ॽ इक्सादिङ् खाम्बेःक्मोलाम् खिनिॽ के़मे़क्खिॽ॥ 16 मस्साओ हे़क्के यहवे दाङ्बा खिनिॽ निङ्वाॽफुमाङ्ङिन् कुनिङ्वाॽ मे़साॽरे़म्मिन्ने़ॽ॥ 17 यहवे दाङ्बा खिनिॽ निङ्वाॽफुमाङ्ङिल्ले़ साम्योथिम् कुइङ्जाङ्हाॽ नु खुने़ॽ खिनिॽ के़बिरिबा थिम्हाॽ हे़क्क्याङ् साम्योथिम्हाॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ॥ 18 यहवे दाङ्बे़ल्ले़ कुमिक्साओ आत्तिन् आत्तिन् पाःन्हाॽ कुदोःप्मा नु नुबा चोक् खे़न् चोगे़म्मे़ॽ, हे़क्केलॽरिक् खिनिॽ के़नुरि के़दासिर, खे़ब्याङ् खिनिॽ पाधे़बाहाॽनु यहवे दाङ्बे़ल्ले़ माङ्हे़क्सिङ्ङाङ् माङ्हे़क् चोगुबा खे़न् नुबा लाजेन् खिनिॽ हुक्काप् चोगे़म्मे़ॽ, 19 हे़क्क्याङ् यहवे दाङ्बे़ल्ले़ पाःत्तुबा कुइसिक् खिनिॽ के़रे़क् निङ्मिहाॽ खिनिॽ तगिलाम् नाःत्ते़म्देसे़म्सिम्मे़ॽ॥ 20 के़दाबा ये़म्मो खिनिॽ ये़म्बित्छा साहाॽरे़ अक्खेलॽरिक् सेःन्के़म्दोसिॽ, “यहवे दाङ्बा आनिॽ निङ्वाॽफुमाङ्ङिल्ले़ आबिरे़बा कन् थिम्हाॽ नु साम्योथिम्हाॽरे़ कुबेन् थे़माबे?” 21 हे़क्केःल्ले़ खिनिॽ खे़ङ्हाॽ अक्खे मे़त्ते़म्सिम्मे़ॽ, “मिस्र लाजेॽओ फारोल्ले़ कुयोःग्बा आवये़, हे़क्क्याङ् यहवे दाङ्बे़ल्ले़ मिस्रलाम् खुने़ॽ कुमुक्साम्मिल्ले़ आलःत्ते़ आभे़त्ते़॥ 22 यहवे दाङ्बे़ल्ले़ आनिॽ मिक्किल्ले़ निसुरए मिस्रिहाॽ, फारोन् नु खुने़ॽ के़रे़क् कुहिम्सयङ्हाॽओ साॽरिक् किप्मागे़घुबा निङ्वाॽ के़माबा मिक्सेन् नु ने़हिनिङ्वाॽरे़ मे़न्धाप्मनाबा याःम्बक्हाॽ ओसेःन्धाङ् चोगु॥ 23 आनिॽ पाधे़बाहाॽनु माङ्हे़क्सिङ्ङाङ् पिनिङ् लॽरिक् माङ्हुप् चोगुबा लाजेॽओ आनिॽ फे़प्मारे़ लागि खुने़ॽ खे़प्मोलाम् आलःत्ते़॥ 24 यहवे दाङ्बे़ल्ले़ए आनिॽ कन् के़रे़क् थिम्हाॽ इःप्मा नाःप्मा नु यहवे दाङ्बा आनिॽ निङ्वाॽफुमाङ्ङिन् किप्मारे़ लागि इङ्जाङ् आबिरे़बारो, हे़क्केलॽरिक् आनिॽ चक्मे़ल्लॽए आनुॽ आदार, हे़क्क्याङ् आइन् हे़क्केए आनिॽआङ् ताप्थेक् याम्धेक्को आवाॽर॥ 25 खुने़ॽ कुइङ्जाङ् कुइसिक् खुने़ॽ कुमिक्सा तगि यहवे दाङ्बा आनिॽ निङ्वाॽफुमाङ्ङिल्ले़ कन् के़रे़क् कुइङ्जाङ्हाॽ इःप्मा नाःप्मारे़ आनिॽ सिङ्सिङ् ये़क्ये़क् आलॽने़भग्र, हाबा खे़न्ने आनिॽ लागि साम्योबा पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.