साम्योथिम् इङ् 5 - लिम्बुथिबोङ् इङ्जाङ् ( ला २०:१-१७ ) 1 मोसाःल्ले़ के़रे़क् इस्राइलिहाॽ उःत्तुसिआङ् मे़त्तुसि, “इस्राइलिसे, आइन् आङ्गाॽ खिनिॽ पिनिङ्बा थिम् नु साम्यो साक्थिम्हाॽ खे़प्से़म्मे़ॽ, हे़क्क्याङ् खे़ङ्हाॽ खिनिॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ॥ 2 “यहवे दाङ्बा आनिॽ निङ्वाॽफुमाङ्ङिल्ले़ आनिॽनु होरेब कोःक्माओ माङ्हुप् चोगु॥ 3 यहवे दाङ्बे़ल्ले़ कन् माङ्हुप्पिन् आनिॽ पाधे़बाहाॽनुरक् मेःन्, कर आइन् कॽयो आनिॽ कुहिङ्वे़त् के़वाॽबा आनिॽ के़रे़क्नुआङ् चोगु॥ 4 कोःक्मा फाङ्जङ्ङो यहवे दाङ्बे़न् मिधुङ् मिराःक् लुम्मोलाम् खिनिॽनु नारा तुम्दुम्बा ताॽजे़क्खे़॥ 5 खे़न् ये़म्मो आङ्गाॽए यहवे दाङ्बान् नु खिनिॽ लुम्मो पोःक्खाङ्ङाङ् यहवे दाङ्बे़ल्ले़ कुबाःन्जाक्के़न् खिनिॽ मे़प्मारे़ लागि ये़बाङ्, थेआङ्भे़ल्ले़ मिःल्ले़ चोगुल्ले़ खिनिॽ के़गिसिआङ् कोःक्मा फाङ्जङ्ङो के़न्धोःक्कासिन्॥ हे़क्क्याङ् खुने़ॽ अक्खे पाःत्तुरो, 6 “आङ्गाॽ यहवे दाङ्बा खिनिॽ निङ्वाॽफुमाङ्आ, आङ्गाॽ मिस्र लाजेॽ, इग्र योक् के़म्जोगिबा लाजेॽलाम् खिनिॽ लःत्निङ् फे़त्निङ्॥ 7 “आङ्गाॽनुःल्ले़ वेॽ आत्तिन् माङ् साम्माङ्हाॽआङ् से़वा मे़मे़त्ते़म्सिम्मिन्ने़ॽ॥ 8 “खिनिॽ आप्फेक् लागि मे़घोःन्दे़म् मे़लक्ते़म्मिन्ने़ॽआङ् आत्तिन् परिक्ले़न्नाङ् नावाइत्ला मे़जोगे़म्मिन्ने़ॽ, थाःङ् ताङ्साङ्बा इग्र मु इक्सादिङ् खाम्बेक् किग्र च्वाःत्तो के़याक्पा थे़मा पाःन्निल्ले़ कुइत्तोआङ् चइःत् नावाइत्ला मे़जोगे़म्मिन्ने़ॽ॥ 9 खे़ङ्हाॽ तगि अःक्खुम् मे़भन्नासिम्मिन्ने़ॽ, खे़ङ्हाॽ माङ्से़वा मे़मे़त्ते़म्सिम्मिन्ने़ॽ, थेआङ्भे़ल्ले़ आङ्गाॽ यहवे दाङ्बा वेॽ माङ्हाॽ नासिमे़न्धःप्मनाबा निङ्वाॽफुमाङ्आ॥ आङ्गाॽ के़नाॽबा पाधे़बाहाॽरे़ खुन्छिॽ फे़न्याःम्बक्किल्ले़ खुम्दिङ्ङिन् खे़ङ्हाॽरे़ खुनिॽ थिन्दाङ् सायोबोहाॽरे़ खुन्छिॽ सुम्सिगेक्पा लिसिगेक्पा थाःक् थारिक् पिरुङ्सिङ्ॽ, 10 कर आङ्गाॽ मिःम्जि के़मे़प्पा नु आङ्गाॽ आइङ्जाङ् के़इःप्पा के़नाःप्पाहाॽरे़ खुन्छिॽ हे़न्छिङ् थाःक् थारिक् आङ्गाॽ लुङ्माॽ तुक्तुङ्सिङ्ॽ॥ 11 “आत्तिन् ताप्फे़ःम्बा निङ्सेःक्ले़ लागिआङ् आङ्गाॽ आमिङ्ङिन् हने़ मे़बाताम्मिन्ने़ॽ, थेआङ्भे़ल्ले़ आङ्गाॽ यहवे दाङ्बा खिनिॽ निङ्वाॽफुमाङ्आ हे़क्क्याङ् आङ्गाॽ आमिङ् फे़क्के़लाःम्बाहाॽ आङ्गाॽ खुम्दिङ् पिरुङ्सिङ्ॽ॥ 12 “यहवे दाङ्बा खिनिॽ निङ्वाॽफुमाङ्ङिल्ले़ इङ्जाङ् के़बिरिबा हे़क्के सबाथ ये़न्निन् सेसे लॽरिक् ने़प्मारे़ लागि निङ्वाॽओ युक्खे़म्मे़ॽ॥ 13 खिनिॽ याःम्बक्किन् तुक्सि ये़न् थारिक् चोगे़म्मे़ॽ, 14 कर नुसिगेक्पा ये़न्निङ्ग यहवे दाङ्बा खिनिॽ निङ्वाॽफुमाङ्ङिल्ले़ कुलागि सबाथरो॥ खे़ल्ले़ याःन्दिक् खिनिॽ थे़माआङ् याःम्बक् मे़जोगे़म्मिन्ने़ॽ—खिनिॽ साहाॽरे़, योग्बा योःग्माहाॽरे़, पित्हाॽरे़, अदङ् कुभा थक्सा ये़क्यक्को के़वाॽबा वेॽ लाजेॽबाल्ले़आङ् थे़मा याःम्बक्काङ् मे़जोगुन्ल॥ खिनिॽ योग्बा योःग्माहाॽ खिनिॽनु मे़नाःम्सिङ्ल॥ 15 मिस्र लाजेॽओ खिनिॽ योक् के़बोःक्खिआङ् के़वयिल्ले़ आक्खेलॽरिक् यहवे दाङ्बा खिनिॽ निङ्वाॽफुमाङ्ङिल्ले़ खुने़ॽ कुमुक्साम् नु कुहुक्किन् सन्छुआङ् खिनिॽ के़लःत्ति के़भे़त्ति, खे़न् खिनिॽ निङ्वाॽ इःत्ते़म्मे़ॽ॥ कल्ले़चोगुल्ले़ यहवे दाङ्बा खिनिॽ निङ्वाॽफुमाङ्ङिल्ले़ सबाथ ये़न्निन् ने़प्मारे़ लागि खिनिॽ इङ्जाङ् के़बिरिबारो॥ 16 “यहवे दाङ्बा खिनिॽ निङ्वाॽफुमाङ्ङिल्ले़ इङ्जाङ् के़बिरिबा हे़क्केए खिनिॽ पानुदिङ् पा नु मानुदिङ् माःन् मिङ्सो इङ्धाङ् पिरे़म्सिम्मे़ॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा लाजेॽओ खिनिॽ थाःक् चाॽर, खे़ब्याङ् खे़प्मो खिनिॽ के़नुरि के़दासिर॥ 17 “मना मे़से़रे़म्मे़न्ने़ॽ॥ 18 “याम्बोःप्मा याःम्बक् मे़जोगे़म्मिन्ने़ॽ॥ 19 “खिनिॽ मे़घुःत्ते़म्मिन्ने़ॽ॥ 20 “खिनिॽ हिम्बेसाङ्बे़न् मे़न्वाॽमनाबा आप्तिक् मे़गुते़म्मिन्ने़ॽ॥ 21 “खिनिॽ हिम्बेसाङ्बे़ल्ले़ कुमेत्, कुहिम्, कुइक्ताप्, कुयोःग्बा, कुयोःग्मा, कुबित्, कुअदङ् इग्र खे़ल्ले़ कुधे़मा पाःन्निन्नाङ् मिक् मे़गेःत्ते़म्मिन्ने़ॽ॥” 22 कन् इङ्जाङ्हाॽ यहवे दाङ्बे़ल्ले़ कोःक्मा फाङ्जङ्ङो मिधुङ्दिङ् मिराःक् नु खाॽमित् हे़क्क्याङ् खामाक्मा लुम्मोलाम् यम्बा इक्लाओ खिनिॽ के़रे़क् चुम्भोःन् के़मे़त्ति॥ खुने़ॽ कुयोॽबा वेॽ थे़माआङ् मे़बाःत्तुन्॥ हे़क्क्याङ् खे़न् इङ्जाङ्हाॽ ने़त्छि साप्लुङ्हाॽओ साप्तुआङ् आङ्गाॽ पिराङ्लो॥ इस्राइलिहाॽ किमा यङ्माओ मे़ध्ये़ ( ला २०:१८-२१ ) 23 खिनिॽ खामाक्मा लुम्मोलाम् इक्लान् के़घे़प्सुम्, हे़क्क्याङ् कोःक्मा फाङ्जङ्ङिन् मिधुङ् मिराःक् तिरे़आङ् युङे़, खे़ब्याङ् खिनिॽ थाःक्कोबा के़रे़क् लाम्लोबाहाॽ नु तुम्म्याङ्हाङ्हाॽ आङ्गाॽ आबेसाङ् मे़द्ये़॥ 24 खे़ङ्हाॽरे़ मे़बाःत्तु, “यहवे दाङ्बा आनिगे निङ्वाॽफुमाङ्ङिल्ले़ कुमिमिदिङ् नु कुहाङ्वान् आनिगे ओःन्धाक्तिगे़॥ आनिगे खुने़ॽ कुइक्लान् मिधुङ् मिराःक्लाम् खे़प्सुम्बे़॥ निङ्वाॽफुमाङ्ङिन् मनाहाॽनु पारे़साङ् मनाहाॽ कुहिङ्वे़त् मे़वाॽबा आनिगे आइन्ने निसुम्बे़॥ 25 कर आल्ल, कम्भ्यारिक् यम्बा मिधुङ् मिराःक्को थेआङ् मिदिक्माआङ् सिमाबे? यहवे दाङ्बा आनिॽ निङ्वाॽफुमाङ्ङिल्ले़ कुइक्लान् आल्लसाङ् आनिॽ आघे़प्सुम्ने़भग्र आनिॽ आसिरो! 26 मिधुङ् मिराःक्कोलाम् कुहिङ्वे़त् निङ्वाॽफुमाङ्ङिन् पारे़बान् के़घे़म्बाआङ् आनिॽ हे़क्के के़हिङ्बा नासिगे़न् थक्ला के़गप्पा आत्तिन् मनान् वाॽबे? 27 खे़ने़ॽ आप्फेक्के निःत्ताङ् पेगे़ॽ, हे़क्क्याङ् यहवे दाङ्बा आनिगे निङ्वाॽफुमाङ्ङिल्ले़ पाःत्तुबा के़रे़क् पाःन्हाॽ खे़प्से़ॽआङ् आनिगे ओमे़त्ते़ॽ, खे़ब्याङ् आनिगे खे़प्सुम्बे़आङ् इःत्तुम् नाःत्तुम्बे़॥” 28 खिनिॽ आङ्गाॽनु के़बारिबान् यहवे दाङ्बे़ल्ले़ खे़प्सु, हे़क्क्याङ् खुने़ॽ आङ्गाॽ मे़त्ताङ्, “कन् मनाहाॽरे़ खे़ने़ॽ के़म्मे़त्ताबान् आङ्गाॽ खे़प्सुङ्, खे़ब्याङ् खे़ङ्हाॽरे़ कुदोःप्माए मे़बाःत्तु॥ 29 आङ्गाॽनु किमा हे़क्क्याङ् आभे़ल्ले़साङ् के़रे़क् आबाःन्हाॽ खे़म्मा खे़ङ्हाॽरे़ निङ्वाॽ मे़गत्तुम्मिल्ले़ग नुबा पोःक्खे़बा वये़, हे़क्केलॽरिक् खे़ङ्हाॽ नु खुन्छिॽ मुॽइदाङ्साहाॽ सदादिङ् मे़नुरे़ मे़दासे़बामे़न्॥ 30 पेगे़ॽआङ् खे़ने़ॽ खे़ङ्हाॽ मे़त्ते़से़ॽ, ‘खिनिॽ आप्फेक् आप्फेक् साःङ्गाहिम्मो नुःक्खे़म्मे़ॽ॥’ 31 कर खे़ने़ॽ कॽयो आङ्गाॽ आबेसाङ् ये़बे़ॽ॥ हे़क्क्याङ् खे़ने़ॽ खे़ङ्हाॽ हुॽमासि के़बोङ्बा के़रे़क् इङ्जाङ्हाॽ, थिम् नु साम्योथिम्हाॽ आङ्गाॽ खे़ने़ॽ मे़त्ने़, खे़ब्याङ् आङ्गाॽ खे़ङ्हाॽरे़ खुनिॽ युक्को पिरुङ्सिङ्ङाङ् ने़बा लाजेॽओ खे़ङ्हाॽरे़ खे़न् थिम्हाॽ मे़इःत्तु मे़नाःत्तुर॥” 32 यहवे दाङ्बा खिनिॽ निङ्वाॽफुमाङ्ङिल्ले़ के़रे़क् कुइङ्जाङ्हाॽ नुरिक्काङ् इःप्मा नाःप्मारे़ लागि सिङ्सिङ् ये़क्ये़क् लॽरे़म्मे़ॽ, चुक्वा फे़ङ्वा ले़प्माङ् आत्तिआङ् मे़बेगे़म्मिन्ने़ॽ॥ 33 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लाङ्घेःक्मारे़ लागि के़बिरिबा इङ्जाङ् कुइसिक् के़रे़क् लाम्हाॽओ लाङ्घेगे़म्मे़ॽ, हे़क्केलॽरिक् खिनिॽ युक् के़जोगुम्बा लाजेॽओ खिनिॽ कुहिङ्वे़त् वये़म्मे़ॽ, हे़क्क्याङ् खिनिॽ के़नुरि के़दासिर, खे़ब्याङ् खिनिॽ थाःक् चाॽररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.