साम्योथिम् इङ् 34 - लिम्बुमोसान् मासिङ् 1 खे़न् एगाङ् मोसान् मोआबबा ने़ने़बादे़न्नोलाम् यरिहो तगाङ् ले़प्माङ्बा नेबो कोःक्माओबा पिसगाःल्ले़ कुजङ्ङो थोःक्सिङ्॥ यहवे दाङ्बे़ल्ले़ खुने़ॽ के़रे़क् लाजेन् ओःन्धाक्तु—गिलादलाम् दान थारिक्, 2 नप्तालिबा के़रे़क् ते़न्हाॽ, एफ्राइम नु मनस्सेबा थुम्हाॽ, नाम्धा लुम्बा वरःङ्ङो थारिक्पा यहुदाबा के़रे़क् लाजेॽहाॽ, 3 नेगेब मे़प्मनाबा योहाङ्बा लाजेन् नु खे़बक्सिङ् के़युङ्बा यरिहो ये़क्यक्कोबा ने़ने़बादे़न्लाम् सोअर थारिक्॥ 4 खे़ब्याङ् यहवे दाङ्बे़ल्ले़ मोसान् मे़त्तु, “कन् लाजेन् आङ्गाॽ अब्राहाम, इसहाक हे़क्क्याङ् याकुबे़न्नु अक्खेलॽरिक् माङ्हुप् चोगुङ्ङाङ् वये़, ‘आङ्गाॽ खिनिॽ मुॽइदाङ्साहाॽ कन् पिरुङ्सिङ्ॽ॥’ आङ्गाॽ कन् लाजेन् हाबा के़मिक्किल्ले़ ओगे़मे़त्तुर याःन्ने़, कर खे़ने़ॽ खे़प्मो पेःक्मा के़ङ्घोने़न्॥” 5 खे़ब्याङ् यहवे दाङ्बे़ल्ले़ पाःत्तुबा कुइसिक् मोसान् मोआब लाजेॽओ मासिङ्॥ 6 मोआब लाजेॽओबा बेथ-पोर तगाङ् ले़प्माङ्बा लत्छा ने़ने़बादे़न्नो खुने़ॽ मोसान् लुप्तु॥ कर आइन् थारिक् हाःत्ले़आङ् खे़ल्ले़ कुइपुङ्ङिन् मे़न्निए वाॽ॥ 7 मोसान् मासिङ्ङिल्ले़ खुने़ॽ किप् थिक्काङ् निबोङ् तङ्बे योरे़॥ हे़क्केसाङ् खुने़ॽ कुमिक्सा नुरे़आङ् वये़, पधुम् थुम्दे़आङ् वये़॥ 8 मोआबबा ने़ने़बादे़न्नो मोसाःल्ले़ कुलागि इस्राइलिहाॽ सुम्बोङ् ये़न् थारिक् मे़रिङ् मे़धक्ते़॥ कभ्मलॽरिक् मोसाःल्ले़ कुलागि ने़त्युक्मा नु मे़रिङ् थक्मा ये़न्निन् चुरे़॥ 9 आल्ल मोसाःल्ले़ कुहुक्किन् नुनरे़ कुस्सा यहोसुओ ने़स्सुआङ् इस्राइलबा लाम्लोबा पोङ्मारे़ लागि सेःन्दुबाल्ले़ चोगुल्ले़ यहवे दाङ्बे़ल्ले़ खुने़ॽ सिक्कुम्दिङ् निङ्वाॽ पिरु॥ खे़ल्ले़चोगुल्ले़ खुने़ॽ कुबाःन्निन् इस्राइलिहाॽरे़ मे़घे़प्सु, हे़क्क्याङ् यहवे दाङ्बे़ल्ले़ मोसान् पिरुबा इङ्जाङ्हाॽ मे़इःत्तु मे़नाःत्तु॥ 10 खे़न् ये़म्माङ् कत्थो इस्राइलिहाॽओ मोसान् हे़क्तङ्बा माङ्निङ्वाॽपान् के़बाःप्पा वेॽ हाःत्ताङ् मे़ल्लःन्ने वाॽ, यहवे दाङ्बे़ल्ले़ खुने़ॽ नादुम्दुम्बा कुसिङ् निःत्तुआङ् वये़॥ 11 मिस्र लाजेॽओ फारोन् नु खुने़ॽ के़रे़क् कुयुक्साबाहाॽओ के़रे़क् कुलाजेॽओ ने़हिरे़ मे़न्धाप्मनाबा मिक्सेःन्हाॽ नु निङ्वाॽ के़माबा याःम्बक्हाॽ ओसेःन्धाङ् चोःक्से़ यहवे दाङ्बे़ल्ले़ हाबा खुने़ॽए पाङ्घुआङ् वये़॥ 12 के़रे़क् इस्राइलिहाॽरे़ खुन्छिॽ निमो मोसाःल्ले़ चोगुबा किप्मागे़घुबा याःम्बक्हाॽ इग्र खे़ल्ले़ चोगुबा मुक्साम्बा कुमुक्किन् वेॽ आत्तिल्ले़आङ् आप्फाल्ले़आङ् ओसेःन्धाङ् मे़न्जोःक्के वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.