साम्योथिम् इङ् 33 - लिम्बुइस्राइलि थाःक्हाॽ मोसाःल्ले़ मुॽइसाम् पिरुसि 1 निङ्वाॽफुमाङ्ङिल्ले़ कुमना मोसाःल्ले़ खुने़ॽ कुमासिङ्मानुःल्ले़ तगि इस्राइलिहाॽ पिरुसिबा हाङ्वागे़न् मुॽइसाम्मिन् हाबा कन्लो— 2 खुने़ॽ पाःत्तु, “यहवे दाङ्बे़न् सिनै कोःक्मालाम् ये़रो, हे़क्क्याङ् सेइर थे़गुलाम् खे़ङ्हाॽरे़ खुन्छिॽ सम्धाङ् नाम् कुइसिक् के़रे़ थाङे़रो॥ खुने़ॽ पारान कोःक्मा फाङ्जङ्लाम् ओःत्ते़रो थिबोङ् हे़न्छिङ् माङ्लाइङ्बाहाॽनु लाङ्गे़त् पिसाङ्लाम्, कुगोःक्माओबा याक्केःक्केःक्पा ते़न्हाॽलाम् खुने़ॽ थाङे़रो॥ 3 से़क्खासाङ् खुने़ॽग कुमनाहाॽ लुङ्माॽ तुक्तुसिरो, सेसे मनाहाॽ के़रे़क् खुने़ॽ कुहुक्को मे़वाॽरो॥ खे़ङ्हाॽ के़रे़क्ले़ खुने़ॽ माङ्से़वा मे़मे़त्तुरो, हे़क्क्याङ् खुने़ॽ कुघाहुन्हाॽ मे़घे़प्सुरो॥ 4 इस्राइलबा मनाहाॽरे़ खुनिॽ कुत्चिओबा याङ्साकुन्धे कुइसिक् यहवे दाङ्बे़ल्ले़ कुइङ्जाङ्हाॽ मोसाःल्ले़ आनिॽ आबिरे़रो॥ 5 मनाहाॽरे़ खुन्छिॽ लाम्लोबाहाॽ, इस्राइलबा थाःक्हाॽआङ् सोसोरिक् मे़जुप्से़ल्ले़ खुने़ॽ यसुरुनओ हाङ् पोःक्खे़रो॥” 6 “मोसाःल्ले़ रुबेन थाःक्किल्ले़ कुयाःम्बेओ अक्खे पाःत्तुरो— “रुबेन थाःक्हाॽ मे़हिङ्ङाङ् मे़वाॽररो, हे़क्क्याङ् खे़ङ्हाॽ मे़न्छिने़न्लरो, खे़ङ्हाॽरे़ खुन्छिॽ मनाहाॽ सुःल्लिक् मे़म्बोङ्ने़न्लरो!” 7 यहुदारे़ कुयाःम्बेओ खुने़ॽ अक्खे पाःत्तुरो— “यहवे दाङ्बाए, यहुदाःल्ले़ कुइक्लान् खे़प्से़ॽओ, हे़क्क्याङ् खे़न् कुमनाहाॽओ तारे़ॽओ॥ आप्फेक् कुहुक्किल्ले़ खुने़ॽ ताङ्से़ःप्सिङ्लो॥ खुने़ॽ के़अप्पाहाॽरे़ खुन्छिॽ तक्ले़ङ्वाओ खे़ने़ॽ खुने़ॽ कुभाॽबाङ् पोःक्खे़ॽओ॥” 8 ले़बिरे़ कुयाःम्बेओ खुने़ॽ अक्खे पाःत्तुरो— “खे़ने़ॽ के़दुम्मिम्मे़न् नु खे़ने़ॽ के़उरिम्मे़न् खे़ने़ॽ के़सिराॽ के़धाङ्बा से़वारोबे़न्नु वाॽरो, खे़ने़ॽ मस्साओ खे़ल्ले़ कुनिङ्वाॽ के़स्साॽरुरो, मेरिबाबा च्वाःत्तो खे़ने़ॽ खे़न्नु खे़माॽ के़जोगे़रो॥ 9 खे़ल्ले़ पानुदिङ् कुम्बा मानुदिङ् कुम्मानुःल्ले़ यरिक्, खुने़ॽ कुम्भुॽ नु कुन्साॽहाॽनुःल्ले़ यरिक्, हे़क्क्याङ् खुने़ॽ कुस्सा कुएहाॽनुःल्ले़ यरिक् आदाङ्बा माङ्से़वा के़मे़त्ते़रो॥ खे़ल्ले़ आदाङ्बारे़ के़इङ्जाङ्हाॽ इःत्तु नाःत्तुरो, खे़ब्याङ् आदाङ्बारे़ के़माङ्हुप्पो नसाःन्साबा पोःक्खे़रो॥ 10 खे़ल्ले़ खे़ने़ॽ के़इङ्जाङ्हाॽ याकुबे़न् हुॽरुरो, हे़क्क्याङ् इस्राइले़न् खे़ने़ॽ के़साम्यो थिम्हाॽ हुॽरुरो॥ खे़ल्ले़ खे़ने़ॽ के़दगि सुक्पा हाःन्दुरो खे़ब्याङ् के़रे़क् मिधिङ्मनादेमनाबा सिदुङ्जभान् खे़ने़ॽओ ले़त्ति मे़दोन्दुबा ले़त्ति तोःम्मादे़न्नो तोःन्दुरो॥ 11 यहवे दाङ्बाए, खे़ल्ले़ के़रे़क् कुसुम्बोधाओ, आदाङ्बारे़ खे़न् हाङ्वागे़न् मुॽइसाम् पिरे़ॽओ, हे़क्क्याङ् खे़ल्ले़ कुहुक्किल्ले़ चोगुबा याःम्बक्किन् ताःक्ते़ॽओ॥ खे़ल्ले़ कुदक्ले़ङ्वाओ के़बोक्पाहाॽ के़रे़क् खुन्छिॽ तक्क्रुम्बे़न् हिप्ते़ पिरे़से़ॽओ, याम्मो पोःक्मा मे़न्छुक्के थारिक् खे़ल्ले़ कुनिङ्मिहाॽ थगे़से़ॽओ॥” 12 बेन्यामिनरे़ कुयाःम्बेओ खुने़ॽ अक्खे पाःत्तुरो— “यहवे दाङ्बे़ल्ले़ लुङ्माॽ तुक्तुबे़न् खुने़ॽओ ताप्थेक् याम्धेक् वाॽररो, थेआङ्भे़ल्ले़ खुने़ॽ खे़न् नाम्धाधा थेःक्तु कत्तुरो, हे़क्क्याङ् यहवे दाङ्बे़ल्ले़ खे़न् लुङ्माॽ तुक्तुबे़न् खुने़ॽ कुभक्ताङ्हाॽरे़ कुलुम्मो नाःम्सिङ्लो॥” 13 योसेफरे़ कुयाःम्बेओ खुने़ॽ अक्खे पाःत्तुरो, “थाःङ् ताङ्साङ्बोलाम् के़धाबा इमे़ल्लुङ्बा सेःक्वाःल्ले़ हे़क्क्याङ् मु पाक्लुम् के़लॽबा च्वाःत्तिल्ले़ वारक्खुआङ्, यहवे दाङ्बे़ल्ले़ खे़ल्ले़ कुलाजेन् मुॽइसाम् पिरुरो— 14 नाम्मिल्ले़ कुजाॽ थोःक्ल याःन्दुबा के़रे़क्नुःल्ले़ नुबा पाःन्, हे़क्क्याङ् लाबे़ल्ले़ पिमा सुक्तुबा काक्नुःल्ले़ नुबा पाःन्, 15 उनाहुरिबा कोःक्माहाॽओबा के़रे़क्नुःल्ले़ नुबा कुजाहाॽ, खम्भ्याङ् नुप्मे़न्दिङ्बा थे़गुहाॽओबा वे़त्ते़सरे़ सिङ्सेॽहाॽ, 16 इक्सादिङ् खाम्बेःक्मान् नु खे़ल्ले़ कुलिङ्दो के़गे़प्पा हाङ्से़म्हाॽ, मिगे़दिक्पार के़युङ्बा फात्ताप्पो के़युङ्बाल्ले़ कुलुङ्गुम्मिन्— कन्हाॽ के़रे़क् योसेफरे़ कुधे़गेक् सम्धाङ् वाॽररो, कुम्भुॽ कुन्साॽहाॽओबा तुम्म्याङ्हाङ्ङिल्ले़ कुमिक्खुङ्बा सम्धाङ् पत्लरो॥ 17 हाङ्वा माङ्वाओ खे़न् तगि के़धाप्पा पित्सात् हे़क्के लॽरो, खे़ल्ले़ कुदाङ्ङिन् ताम्भुङ् साःङ्वे़त्तिल्ले़ कुदाङ्लो॥ कन् कुदाङ्हाॽरे़ इक्सादिङ् खाम्बेःक्मे़ल्ले़ नासमा कुयाओबा मे़न्छाम् सुवाङ्हाॽआङ् थोःक्खुसिरो॥ इफ्राइमबाहाॽ कम्भलॽरिक्के थिबोङ् हे़न्छिङ् हे़न्छिङ् मे़बोङ्लो, मनस्सेबाहाॽ अक्खेलॽरिक्के हे़न्छिङ् मे़बोङ्लो॥” 18 जबलुन नु इस्साकाररे़ खुन्छिॽ याःम्बेओ खुने़ॽ अक्खे पाःत्तुरो, “जबलुने, खे़ने़ॽ लाःक्कात् नाना कत्ना के़बेःक्किल्ले़, हे़क्क्याङ् इस्साखारे, खिनिॽ साःङ्गाहिम्मो, खिनिॽ निङ्वाॽ ये़ये़ लॽरे़म्मे़ॽओ॥ 19 खे़ङ्हाॽरे़ मनाहाॽ कोःक्माओ मे़उःत्तुसिरो, हे़क्क्याङ् खे़प्मो साम्योगे़न् सिदुङ्जभा मे़दोन्दुरो॥ खे़ङ्हाॽरे़ वरःङ्ङोबा वे़त्ते़सरे़ याङ्साकुन्धे नु ये़ःङ्घाओ के़याक्पा याङ्भुःन् मे़याङ्घुरो॥” 20 गादरे़ कुयाःम्बेओ खुने़ॽ अक्खे पाःत्तुरो, “गादरे़ कुलाजेॽ के़भोबे़न् मुॽइसाबारो, थे़गेक्पा नु हुक्हाॽ के़साःङ्बार के़युङ्बा खिरिङ्बान् हे़क्के गादे़न् खे़प्मो युङ्लो॥ 21 “खे़ल्ले़ खुने़ॽ कुलागि के़रे़क्नुःल्ले़ नुबा लाजेन् सेगुरो, लाम्लोबाल्ले़ कुलक्किन् खुने़ॽ कुलागि मे़से़न्दुआङ् ने़स्से़रो॥ मनाहाॽरे़ खुनिॽ लाम्लोबाहाॽ मे़जुप्से़आङ् मे़वये़ल्ले़, खे़ल्ले़ यहवे दाङ्बे़ल्ले़ कुसाम्यो निङ्वाॽ हे़क्क्याङ् इस्राइलिहाॽरे़ खुन्छिॽ याःम्बेओ खुने़ॽ कुघासे़न्हाॽ खे़ल्ले़ के़त्तुरो॥” 22 दानरे़ कुयाःम्बेओ खुने़ॽ अक्खे पाःत्तुरो— “दाने़ङ्ग थे़रिङ्बे़ल्ले़ कुस्सारो, खे़न् बासानलाम् पिन्ल युरो॥” 23 नप्तालिरे़ कुयाःम्बेओ खुने़ॽ अक्खे पाःत्तुरो, “यहवे दाङ्बे़ल्ले़ कुलुङ्गुम्मिल्ले़ नप्तालिःल्ले़ यरिक् मुॽइसाम् खोसुरो, खे़ल्ले़ वरक्किल्ले़ योहाङ् नाम्धा ले़प्माङ् युक् चोगुरो॥” 24 आसेररे़ कुयाःम्बेओ खुने़ॽ अक्खे पाःत्तुरो, “ये़म्बित्छा साहाॽओ आसेरे़न् के़रे़क्नुःल्ले़ यरिक् मुॽइसाम् के़घोबा पोङ्लरो॥ कुम्भुॽ कुन्साॽहाॽरे़ खे़न् साॽरिक् खुन्छिॽ सिराॽगे़धाङ्बा पोङ्लरो, हे़क्क्याङ् कुलाजेॽबा चैतुन सिङ्बुङ्हाॽ यरिक् कुजाॽ थोःक्लरो॥ 25 के़लाम्धेःत्तिल्ले़ कुए़प्माहाॽ फे़न्जेॽ नु कासाःल्ले़न् पोङ्लरो, खे़ने़ॽ के़ये़न्हाॽ ताप्थेक् याम्धेक्पा पोङ्लरो॥” 26 “यसुरुनरे़ कुनिङ्वाॽफुमाङ् हे़क्तङ्बा वेॽ हाःत्ताङ् होप्लो, खिनिॽ फाॽमारे़ लागि खुने़ॽ ताङ्साङ्बो थाःङ् कुहाङ्वा कुमाङ्वाओ खुने़ॽ खाॽमिःत्ते़न् युक्तुरो॥ 27 नुप्मे़न्दिङ् निङ्वाॽफुमाङ्ङिन् खिनिॽ इःम्सिङ्मादे़न्लो, खे़ब्याङ् कुसिगाङ्ग आभे़ल्ले़आङ् मे़न्नुप्मनाबा के़धुम्बा मुक्साम्बा कुहुक्हाॽ वाॽरो॥ ‘खे़ङ्हाॽ खिनिॽ खाप्पुथ्यःङ् मे़क्खे़म्सिम्मे़ॽओ’ लॽरिक् खिनिॽ निङ्मिहाॽ खिनिॽ तगिलाम् नाःत्तुसिरो॥ 28 हे़क्केलॽरिक् इस्राइले़न् एःक् कम्ब्राङ्ङो ने़रो कुजा नु कुबोक् चे़ल्ले़क्सेॽ सेजःङ्वा के़वाॽबा लाजेॽओ, याकुबरे़ कुज्वाःत् पुन्दाक्वान् कम्ब्राङ्ङो ने़रो खे़प्मो ताङ्साङ्बे़ल्ले़ सेःक्वा थासुरो॥ 29 इस्राइलए, खे़ने़ॽ मुॽइसाबाने़रो! यहवे दाङ्बालाम् से़न्लप् के़घोबा सुवाङ्, खे़ने़ॽ हे़क्तङ्बा हात् वाॽआङ्बे? खुने़ॽग खे़ने़ॽ के़घो नु के़भाॽबाङ्लो हे़क्क्याङ् खे़ने़ॽ के़हाङ्वा के़माङ्वा ताभेरो॥ खे़ने़ॽ के़निङ्मिहाॽ के़दगि मे़नःम्सिङ्ङाङ् मे़दारो खम्भ्याङ् खे़ङ्हाॽरे़ खुन्छिॽ चन्जम्बादे़न्हाॽ के़लाःक्तुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.