साम्योथिम् इङ् 32 - लिम्बु1 ताङ्साङ्बे, खे़प्से़ॽओ, हे़क्क्याङ् आङ्गाॽ पाःत्तारो! इक्सादिङ् खाम्बेःक्के, आङ्गाॽ पाःत्तुङ्बा पाःन्जाःक्हाॽ खे़प्से़ॽओ॥ 2 आङ्गाॽ आनिसाम्मिन् वहित् हे़क्के थाररो, आङ्गाॽ आबाःन्जाःक्हाॽ हिःक्वा कुइसिक् चुक्लरो, कुनःक् यान् सम्धाङ् वागेःक् हे़क्के थाररो, सिङ्लिङ् सम्धाङ् ते़त्ते़त् के़लॽबा च्वाःत् हे़क्के लॽररो॥ 3 आङ्गाॽ यहवे दाङ्बे़ल्ले़ कुमिङ्ङिन् उवा चोगुङ्लो, निङ्वाॽफुमाङ्ङिन् साॽरिक् पयम् यम्बा चोक्लो! 4 खुने़ॽग इःम्सिङ्मादे़न् याक्पेॽरो, खुने़ॽ कुयाःम्बक्हाॽ कुलिङ्दो के़गे़प्पा चोक्लो, हे़क्क्याङ् खुने़ॽ के़रे़क् कुलाम्हाॽ कुदोःप्मा चोक्लो॥ खुने़ॽग पान् मे़म्भेःम्मनाबा नसाःन्साबा निङ्वाॽफुमाङ्लो कुदोःप्मा खासे़न् के़लोःम्बा नु से़क्खाबा चोक्लो॥ 5 खे़ङ्हाॽरे़ खुने़ॽनु फे़न्याःम्बक् मे़जोगुरो, कङ्ग सिरिङ्ममा पाःन्लो आल्लआङ्धो खे़ङ्हाॽ खुने़ॽ कुमनासि मेःन्छिरो, खे़ङ्हाॽग इङ्ले़क् के़जोःक्पा नु कुदोःप्मा लाम् मे़न्नाःप्मनाबा थाःक्सिरो॥ 6 थे अक्खेलॽरिक्के यहवे दाङ्बे़न् खिनिॽ के़जे़क्खुम्बि? अदङ् नु सिक्कुम् निङ्वाॽ के़होप्पा मनासे, खिनिॽ चइःत् के़ने़बा नु के़जोःक्पा खुने़ॽए खिनिॽ पानुदिङ् पा, खिनिॽ लत्छा सुवाङ् के़जोःक्पा खुने़ॽए मेःन्नाङ्बि? 7 उन्छोन् उन्छोःन्बा ये़न्हाॽ निङ्वाॽ इःत्ते़म्मे़ॽओ, उनाहुरि तगिबा थाःक्हाॽरे़ खुन्छिॽ याःम्बेओ खिनिॽ निङ्वाॽसुम् लॽरे़म्मे़ॽओ॥ खिनिॽ पाहाॽ सेःन्दोसे़म्सिम्मे़ॽओ, हे़क्क्याङ् खे़ङ्हाॽरे़ के़म्मे़त्तिरो, खिनिॽ काप्पो तुम्साहाॽ से़ःन्लाप्ताम्सिम्मे़ॽओ, खे़ब्याङ् खे़ङ्हाॽरे़ खिनिॽ के़म्जे़क्तिरो॥ 8 आल्ल के़रे़क्नुःल्ले़ यम्बा निङ्वाॽफुमाङ्ङिल्ले़, मे़न्छाम् सुवाङ्हाॽ लाजेॽसिङ्बुङ् पिरुसिरो, हे़क्केलॽरिक् खुने़ॽ के़रे़क् मे़न्छाम् याप्मिहाॽ से़न्दुसिरो, खे़ब्याङ् इस्राइलि मुॽइदाङ्हाॽरे़ खुन्छिॽ खानिःत् कुइसिक् मे़न्छाम् सुवाङ्हाॽरे़ खुनिॽ इःन्दोहाॽ ने़स्सु पिरुसिरो॥ 9 थेआङ्भे़ल्ले़ इस्राइलिहाॽग यहवे दाङ्बे़ल्ले़ कुमनासिरो, याकुबे़न् खुने़ॽ आप्फेक् कुयाङ्सा कुन्धेरो॥ 10 मुरे़क् खारे़क्पा थेआङ् के़होप्पा ये़ःङ्घादे़न्नो, सुरित् केजङ् के़हुःक्पा थेआङ् के़होप्पादे़न्नो इक्लाःल्ले़ लोःक्खुबादे़न्नो खुने़ॽ खे़ङ्हाॽ खोसुसिरो॥ खुने़ॽ खे़ङ्हाॽ ताङ्से़ःप्तुसिरो हे़क्क्याङ् खुने़ॽ खे़ङ्हाॽ ओमे़त्तुसिरो, खुने़ॽ खे़ङ्हाॽ कुमिक्हाङ्मा हे़क्के कम्ब्राङ् मे़त्तुसिरो॥ 11 कुहाप्पिन् के़मुम्बाआङ् कुस्साहाॽ सम्धाङ् सुरित् केजङ्ङो के़बे़बाआङ् के़वाॽबा, कुलाप्पिन् हप्फे़ के़मे़प्पाआङ् कुस्साहाॽ के़धेःक्पा हे़क्क्याङ् कुलाप्हाॽ सम्धाङ् कुस्सा के़बङ्बा कक्कफिःक्मा हे़क्के, 12 यहवे दाङ्बे़ल्ले़ एःक् खे़ङ्हाॽ लाम्लोसुसिरो, खुने़ॽनु वेॽ लाजेॽबा आत्तिन् माङ्ङिन्नाङ् होःप्ते़रो॥ 13 खुने़ॽ खे़ङ्हाॽ चन्जम्बादे़न्हाॽ लिङ्बाङ्घुसिरो हे़क्क्याङ् इक्ताप्हाॽओबा कुजाहाॽ चाःत्तुसिरो, खुने़ॽ खे़ङ्हाॽ याक्पेॽओबा माङ्वा सक्वाघु नु याक्ख्रे़ःक्कोबा चैतुन निःङ्गेॽ चाःत्तुसिरो॥ 14 खुने़ॽ खे़ङ्हाॽ पित्थक्साहाॽलाम् नुदाक्वा हे़क्क्याङ् के़मे़ॽबा मे़ल्लुक्साःत्हाॽनु सोसोरिक् थक्सा लुप्हाॽलाम् पित्नु थुङ्घुसिरो॥ खुने़ॽ खे़ङ्हाॽ साॽरिक् नुबा मासिहाॽनु सोसोरिक् मे़ःन्दाहाॽ नु बासानबा नुबा थुःम्बाहाॽ पिरुसिरो॥ चे़ल्ले़क्सेल्ले़ कुवालाम् चोःक्मनाबा चाॽरिक् कुजागे़नुॽबा चे़ल्ले़क्सेॽ सेजङ्वान् के़धुङुम्लो॥ 15 कर यसुरुन मे़ॽरुआङ् लाङ्गे़धिक्पा पोःक्खे़रो, नुरिक् चामा मे़घोसुआङ् मनाहाॽ चाप्मे़ॽ मे़ॽरुसिरो हे़क्क्याङ् वरे़ङ्ले़ङ्बा मे़बोःक्खे़बारो॥ खे़ब्याङ् खे़ङ्हाॽरे़ खुनिॽ नावागे़न् चइःत् के़जोःक्पा आबाङे खुन्छिॽ निङ्वाॽफुमाङ्ङिन् मे़ले़रु मे़देसुरो, हे़क्क्याङ् खे़ङ्हाॽरे़ खुन्छिॽ से़न्लप्दाङ्बा याक्पेॽइन् हने़ मे़न्जोबा मे़मे़त्तुरो॥ 16 खे़ङ्हाॽरे़ खुन्छिॽ वेॽ माङ्हाॽरे़ मे़जोगुल्ले़ खुने़ॽ कुना के़हे़म्बा पोःक्खे़र मे़याःन्दुरो, हे़क्क्याङ् सिक्के़ले़ःङ्बा खुन्छिॽ नावाइत्लाहाॽरे़ चोगुल्ले़ खुने़ॽ साॽरिक् कुसाक्के़न् पोगे़र मे़जोगुरो॥ 17 खे़ङ्हाॽरे़ खुन्छिॽ पाधे़बाहाॽरे़ से़वा मे़म्मे़त्ते के़वाॽबा माङ्हाॽ, आल्लो खारक् के़गे़प्पा के़दाबा माङ्हाॽ, खे़ङ्हाॽरे़ खुन्छिॽ कुसिङ् मे़न्निःत्तुन्छिन्बा माङ्हाॽ, निङ्वाॽफुमाङ् मेःन्बा फे़न्साम्हाॽरे़ लागि खे़ङ्हाॽरे़ सिदुङ्जभा मे़दोन्दुरो॥ 18 खिनिॽ सागे़वाःम्बा याक्पेॽइन् के़ले़रुम्लो, खिनिॽ के़गप्पा निङ्वाॽफुमाङ्ङिन् निङ्वाॽ के़भेःत्छुम्लो॥ 19 खे़न् निसुआङ् यहवे दाङ्बे़ल्ले़ खिनिॽ के़नाॽरिरो, थेआङ्भे़ल्ले़ खुने़ॽ कुस्साहाॽरे़ मे़जोगुल्ले़ खुने़ॽ कुसाक्के़न्निल्ले़ हाङ्गे़न् सिक्चा लोरे़रो॥ 20 खे़ब्याङ् खुने़ॽ अक्खे पाःत्तुरो, “आङ्गाॽ खे़ङ्हाॽ लाप्फुसुङ्सिङ्लो, हे़क्क्याङ् खे़ङ्हाॽ थे़मा मे़बोङ्बि, ओमे़त्तुङ् साॽरुङ्लो॥ थेआङ्भे़ल्ले़ खे़ङ्हाॽग फे़त्के़लाॽबा थाःक्सिरो, इङ्आले़क्ले़क्पा थिन्दाङ् सायोबोरासिरो॥ 21 खे़न् माङ् मे़ःन्बाल्ले़ चोगुल्ले़ खे़ङ्हाॽरे़ कुनागे़हे़म्बा मे़जोगाङ्लो, खे़ङ्हाॽरे़ खुन्छिॽ हने़बा नावाइत्लाहाॽरे़ चोगुल्ले़ खे़ङ्हाॽरे़ आङ्गाॽ आसिक् मे़भोःक्खुरो॥ लत्छा सुवाङ्ङे के़होप्पा मनाहाॽलाम् आङ्गाॽ खे़ङ्हाॽ कुना के़हे़म्बा चोगुङ्सिङ्लो, खासिङ् मे़न्निःप्मनाबा लत्छा सुवाङ्लाम् आङ्गाॽ खे़ङ्हाॽरे़ खुन्छिॽ साक्के़न् फोःक्खुङ्लो॥ 22 थेआङ्भे़ल्ले़ आसाक्के़न्निल्ले़ मिधुङ् मिराःक् पोगे़रो, खे़ल्ले़ सिगाङ् मु सिमे़ल्ले़ हाङ्जुम्मिन् मिधिक्खुरो॥ खे़ल्ले़ इक्सादिङ् खाम्बेःक्मान् नु खे़प्मोबा कुजान् खाप्पुथ्यःङ् चोगुरो, खम्भ्याङ् कोःक्मा युक्नाहाॽओ के़रे़क् मिधुङ्दिङ् मिराःक् केःत्तुरो॥ 23 खे़ङ्हाॽरे़ खुन्छिॽ सम्धाङ् तुक्खे लाक्खे तारुङ्लो, आङ्गाॽ आदोःङ्हाॽरे़ खे़ङ्हाॽ आबुङ्सिङ्लो॥ 24 आङ्गाॽ खे़ङ्हाॽरे़ खुन्छिॽ तक्ले़ङ्वाओ आमे़ङ्मे़ङ्बा साक्वाःन्, मिआदिक्तिक्पा यङ्दुङ्बा हे़क्क्याङ् आसिसिबा तुक्माहाॽ पाङ्घुङ् तासुङ्लो॥ खे़ङ्हाॽरे़ खुन्छिॽ तक्ले़ङ्वाओ ताम्भुङ् थक्साहाॽरे़ खुन्छिॽ केःङ्हाॽ नु खाम्बाङ्ङो के़उःङ्सिङ्बा के़आःप्पा कुनिङ् के़याक्पा असेःक्हाॽ पाङ्घुङ् तासुङ्सिङ्लो॥ 25 माराम्हाॽओ ताभेःल्ले़ खे़ङ्हाॽ लिगुक् मे़क्खुङ्सिङ्लो, खे़ङ्हाॽरे़ खुन्छिॽ हिम्हाॽ किमा यङ्मा इसेःङ् पोङ्लो॥ नालिगे़न् थाङ्बे़न् सिसागे़न् मे़न्छ्या सोसोरिक्, नुगे़धुङ्बा आम्ब्रे़ःङ्वा अङे़ःक्वा नु कुधे़गेक् के़भुप्पा काप्पो तुम्साहाॽआङ् मे़मे़क्लो॥ 26 खे़ङ्हाॽ निङ्वाॽसुम्मोआङ् मे़न्दाने़न्ल हाम्ब्रे़क्, खे़ङ्हाॽ खाप्पुथ्यःङ् वरे़ङ्ले़ङ् मे़क्खुङ्सिङ्बा वये़रो॥ 27 कर निङ्मिहाॽरे़ कुनामे़न्छाॽ मे़बाःत्तुबा आसिराॽ मे़धाङे़ल्लो, निङ्मिहाॽरे़ कुसिङ् मे़न्निःत्तुन्नाङ् अक्खे मे़बाःत्तुबिलारो, ‘आनिॽ हुक्किल्ले़ आनाःन्दुम्सिम्लो, यहवे दाङ्बे़ल्ले़ कन्हाॽ के़रे़क् चोगुबा मेःन्लो॥’” 28 इस्राइले़न् खासिङ् मे़न्निःप्मनाबा सुवाङ्लो, हे़क्क्याङ् खे़ङ्हाॽरे़ थेआङ् से़म्मा मे़न्छक्तुन्लो॥ 29 खे़ङ्हाॽ सिक्कुम्साबा मे़बोःक्खे़आङ् कन् पाःन्निन् कुसिङ् मे़निःत्तुबा हे़क्केःल्ले़ग, हे़क्क्याङ् खे़ङ्हाॽरे़ खुन्छिॽ मे़क्मे़न् आक्खे पोङ् फाॽआङ् मे़निसुबा हे़क्केःल्ले़ग! 30 खे़ङ्हाॽरे़ खुन्छिॽ याक्पेःल्ले़ मे़सङ्घुसिन्बा वये़ल्ले़ग, यहवे दाङ्बे़ल्ले़ खे़ङ्हाॽ लाप्फुमा मे़सुरुसिन्बा वये़ल्ले़ग, आक्खेलॽरिक् थिक्पारे़ हे़न्छिङ्धिक् नाःप्मा सुक्तुसिबा वये़बे? इग्र ने़त्छिरे़ थिबोङ् हे़न्छिङ् नाःप्मा सुक्ते़सुबे? 31 कर इस्राइलबा याक्पेन् आनिॽ निङ्मिहाॽरे़ खुन्छिॽ याक्पेॽ हे़क्तङ्बा मेःन्लो, आनिॽ निङ्मिहाॽ आप्फेक्के कन् पाःन्नो मे़दे़न्लो॥ 32 खे़ङ्हाॽरे़ खुन्छिॽ चे़ल्ले़क्सेॽ इवाःत्तिन् सदोमबा चे़ल्ले़क्सेॽ इवाःत्तोलाम् हे़क्क्याङ् गमोराबा इक्ताप्हाॽओलाम् त्ये़बारो॥ खे़ङ्हाॽरे़ खुन्छिॽ चे़ल्ले़क्सेॽइन् निङ् के़याक्पा चोक्लो खे़ब्याङ् खे़ङ्हाॽरे़ खुन्छिॽ चे़ल्ले़क्सेॽइल्ले़ कुबजाहाॽ साक्खिःक् के़घिःक्पा चोक्लो॥ 33 खे़ङ्हाॽरे़ खुन्छिॽ चे़ल्ले़क्सेॽ थिःन्, असेःक्हाॽरे़ खुन्छिॽ निङ्लो याङ्हःक्किल्ले़ के़आःप्पा कुनिङ्लो॥ 34 यहवे दाङ्बे़ल्ले़ अक्खे पाःत्तुरो, “थे कन् आङ्गाॽ याङ्घोःत्तुङ् युक्खुङ्बा होःप्पि, हे़क्क्याङ् चाधाःङ्ङो एःप्साप् एःप्तुङ्बा होःप्पि? 35 कुले़क्वा नुःक्माग आङ्गाॽ आयाःम्बक्लो, आङ्गाॽए कुले़क्वा हुङुङ्लो॥ के़लाॽबा ये़म्मो खे़ङ्हाॽरे़ खुन्छिॽ लाङ्ङिन् ले़ःङ्लो, खे़ङ्हाॽरे़ खुन्छिॽ मे़क्मा ये़न्निन् निःत्ताङ् के़रे़आङ् वाॽरो॥ खे़ङ्हाॽ खाप्पुथ्यःङ् मे़बोङ्ल मे़बत्लो॥” 36 आल्ल यहवे दाङ्बे़ल्ले़ खे़ङ्हाॽ मे़न्धुम्मनाबा मे़बोङ्बा नु खुन्छिॽ इघेःङ्ङोलाम् मे़ल्ले़रुसिन्बा खुने़ॽ निसुरो॥ खे़ब्याङ् खुन्छिॽ ले़प्माङ् खासे़न् लोःन्दु पिरुसिरो, खम्भ्याङ् खुने़ॽ कुसे़वारोबाहाॽ लुङ्माॽ तुक्तुसिरो॥ 37 खे़ब्याङ् खुने़ॽ अक्खेलॽरिक् सेःन्दोसुसिरो, “खे़ङ्हाॽरे़ खुन्छिॽ इःम्सिङ्मादे़न् याक्पेॽ, खुन्छिॽ माङ्हाॽ आत्ति मे़वाॽबे? 38 कन् माङ्हाॽरे़ग खे़ङ्हाॽरे़ खुन्छिॽ सिदुङ्जभाःल्ले़ कुसोःत्तिन् मे़जआङ् वये़रो, हे़क्क्याङ् खे़ङ्हाॽरे़ खुन्छिॽ चे़ल्ले़क्सेॽ थि सिदुङ्जभान् मे़धुङुआङ् वये़रो॥ कन्हाॽ मे़बोःक्काङ् खिनिॽ के़म्भाॽरिररो! कन्हाॽरे़ खिनिॽ युङ्मादे़न् के़म्बिरिररो! 39 आल्ल ओमे़त्ते़म्मे़ॽ, आङ्गाॽग खुने़ॽएआरो, आङ्गाॽनुःल्ले़ वेॽ हाःत्ताङ् माङ् होप्लो॥ आङ्गाॽए से़रुङ्सिङ्लो, हे़क्क्याङ् आङ्गाॽए कुहिङ्वे़त् चोगुङ्सिङ्लो॥ आङ्गाॽए खाःन्दुङ्सिङ्लो, खम्भ्याङ् आङ्गाॽए वेःन्दुङ्सिङ्लो, हे़क्क्याङ् आङ्गाॽ आहुक्कोलाम् हाःत्ले़आङ् से़म्मा मे़सुक्तुसिन्लो॥ 40 आल्ल आङ्गाॽ आहुक्किन् साङ्ग्राम्पेदाङ् ले़प्माङ् फोःक्खुङ्लो अक्खेलॽरिक् उवा चोगुङ्लो— आङ्गाॽ कुहिङ्वे़त् वाॽआबा कुइसिक् 41 आल्ल से़ल्ले़ङ् से़ल्ले़ङ् के़लॽबा आङ्गाॽ आदाभेन् याराप्तुङ्लो, हे़क्क्याङ् खासे़न् लोःम्मो आङ्गाॽ आहुक्किल्ले़ खे़न् ते़म्सुरो, खे़ब्याङ् आङ्गाॽ के़अप्पाहाॽओ कुले़क्वा नुःक्तुङ्लो, हे़क्क्याङ् आङ्गाॽ के़नाॽबाहाॽओ कुले़क्वा हुङुङ्लो॥ 42 आङ्गाॽ आदोःङ्हाॽ माक्खिॽ से़मा पाङ्घुङ्सिङ्लो, हे़क्क्याङ् आङ्गाॽ के़अप्पाहाॽ आदाभेल्ले़ से़रुसिरो॥ आङ्गाॽनु थङ् के़जोःक्पाहाॽ लत्छाआङ् मे़ले़रुङ्सिङ्ङिल्लो, मे़दे़म्सु मे़देॽरुसिबा नु के़गाःम्बाहाॽआङ् मे़सिरो॥” 43 मे़न्छाम् सुवाङ्से, खुने़ॽ कुमनाहाॽनु सःत्ते़म्मे़ॽओ! थेआङ्भे़ल्ले़ खुने़ॽ कुसे़वारोबाहाॽरे़ खुन्छिॽ माक्खिल्ले़ कुले़क्वा हुङुरो॥ खुने़ॽ कुनिङ्मिहाॽओ कुले़क्वा नुःक्तुरो, हे़क्क्याङ् खुने़ॽ कुलाजेॽ नु कुमनाहाॽरे़ लागि आप्तिक्लाम् ले़प्मि नाःक्तु पिरुसिरो॥ 44 मोसान् नु नुनरे़ कुस्सा यहोसुन् त्ये़सिआङ् कन् से़वासाम्लोओबा के़रे़क् पाःन्हाॽ मनाहाॽ चे़क्ते़छुसिरो॥ मोसाःल्ले़ कुनुप्मा कुइङ्जाङ्हाॽ 45 हे़क्केलॽरिक् मोसाःल्ले़ के़रे़क् इस्राइलिहाॽ कन् काक् पाःन्जाःक्हाॽ मे़त्तु सुरुसिल्ले़, 46 खुने़ॽ योॽरुर पाःत्तु, “आङ्गाॽ आइन् साॽरिक् निङ्वाॽ इःत्छिङ्ङाआङ् खिनिॽ मे़त्निङ्बा के़रे़क् पाःन्जाःक्हाॽ खिनिॽ निङ्वाॽओ युक्खे़म्मे़ॽ, हे़क्केलॽरिक् खिनिॽ साहाॽआङ् कन् साम्योथिम्मोबा के़रे़क् पाःन्जाःक्हाॽ सिङ्सिङ् ये़क्ये़क्काङ् इःप्मा नाःप्मारे़ लागि हुॽमा के़सुक्तुम्सिम्ल॥ 47 कन् इङ्जाङ्हाॽ खिनिॽ लागि हने़बा मेःन्॥ कन्हाॽ खिनिॽ लागि हिङ्मा लाम्लो॥ कन्हाॽलाम्बाए यर्दन नाधाःम्बि युक् चोःक्मारे़ लागि पेःक्मा के़जोगिबा लाजेॽओ खिनिॽ कुधाःक् के़जाॽबा के़बोःक्खिॽ॥” मोसारे़ कुसिमा पान् 48 यहवे दाङ्बे़ल्ले़ हाबा खे़ल्ले़ याःन्दिक् मोसान् अक्खे मे़त्तु, 49 “यरिहो कुबेसाङ्बा मोआब लाजेॽओ के़ने़बा अबारिम थे़गु माङ्वाहाॽओबा नेबो कोःक्माओ थाःङ् थोःक्सिङ् पेगे़ॽ, हे़क्क्याङ् आङ्गाॽ इस्राइलिहाॽरे़ खुन्छिॽ युक्को पिरुङ्सिङ्ङाङ् ने़बा कनान लाजेन् ओमे़त्ते़ॽ॥ 50 हे़क्क्याङ् खे़ने़ॽ के़म्भुॽ हारुने़न् होर कोःक्माओ मासिङ् खे़ब्याङ् के़सिबा के़घे़प्पा कुगाॽइहाॽओ पे, हे़क्केलॽरिक् खे़ने़ॽ के़धोःक्सिङ् के़बेःक्पा खे़न् कोःक्मा फाङ्जङ्ङो खे़ने़ॽ के़सिरो हे़क्क्याङ् के़मासिङ्बा के़घे़प्पा खे़ने़ॽ के़सुधे़बा के़दाक्थे़बाहाॽओ तङ्सिङ्से़ के़बेःक्॥ 51 थेआङ्भे़ल्ले़ खे़न्छिॽ ने़प्माङ्ले़ जिनबा मुरे़क् खारे़क् थेआङ् के़होःप्पादे़न्नोबा मेरिबा-कादेसबा च्वाःत्तो इस्राइलिहाॽरे़ खुन्छिॽ लुम्मो आङ्गाॽनु नसान् के़ले़क्खुसि, थेआङ्भे़ल्ले़ इस्राइलिहाॽरे़ खुन्छिॽ लुम्मो खे़न्छिॽ आङ्गाॽ सेसेबा चोःक्काबा पाःन्निन् ओसेःन्धाङ् चोःक्मा के़न्छुक्तुसिन्॥ 52 खे़ल्ले़चोगुल्ले़ आङ्गाॽ इस्राइलिहाॽ पिरुङ्सिङ्ङाङ् ने़बा खे़न् लाजेन् माःङ्घा लाम्बारक् के़निसुॽ, कर खे़ने़ॽ खे़प्मो पेःक्मा के़ङ्घोने़न्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.