साम्योथिम् इङ् 31 - लिम्बुयहोसुन् लाम्लोबा पोङ्ॽ 1 मोसाःल्ले़ इस्राइलबा के़रे़क् मनाहाॽ कन् पाःन्हाॽ मे़प्मा सुरुसिल्ले़ 2 खुने़ॽ अक्खे मे़त्तुसि, “आङ्गाॽ आइन् किप् थिक्काङ् निबोङ् तङ्बे के़राङ्॥ आल्ल आङ्गाॽ लाम्लोमा मे़सुक्निङ्ङिन्ॽ॥ यहवे दाङ्बे़ल्ले़ आङ्गाॽ अक्खे मे़त्ताङ्ङाङ् वाॽ, ‘खे़ने़ॽ यर्दन नाधाःम्बि काःक्माआङ् पेःक्मा के़न्छुक्तुन्ॽ॥’ 3 यहवे दाङ्बा खिनिॽ निङ्वाॽफुमाङ्ङिन्ने खिनिॽ तगि नाधाःम्बि पेक्॥ खुने़ॽ खिनिॽ तगिलाम्बा कन् मे़न्छाम् सुवाङ्हाॽ मे़क्खुसिॽ, हे़क्क्याङ् खिनिॽ खे़ङ्हाॽरे़ खुन्छिॽ लाजेन् के़युक्तुम्ॽ॥ यहवे दाङ्बे़ल्ले़ पाःत्तुबा हे़क्के यहोसुन्नाङ् खिनिॽ तगि नाधाःम्बि पेक्॥ 4 “एमोरिहाॽरे़ खुन्छिॽ हाङ्हाॽ सिहोने़न् नु ओगे़न् मे़क्खुसिबा कुइसिक् यहवे दाङ्बे़ल्ले़ खे़ङ्हाॽरे़ खुन्छिॽ लाजेःन्नाङ् मे़क्खुॽ॥ 5 यहवे दाङ्बे़ल्ले़ खे़ङ्हाॽ खिनिॽ हुक्को थासुसिॽ, हे़क्क्याङ् आङ्गाॽ खिनिॽ मे़त्निङ्बा के़रे़क् इङ्जाङ्हाॽ कुइसिक् खिनिॽ कन्हाॽ के़मे़त्तुम्सिम्ल पोङ्ॽ॥ 6 कल्ले़चोगुल्ले़ खे़ने़ॽ के़धुम्बा नु हाङ्हाङ् के़लॽबा पोःक्खे़ॽ! कन्हाॽनु खे़ने़ॽ मे़गिसे़न्ने़ॽ हे़क्क्याङ् यङ्मा मे़स्ये़न्ने़ॽ! थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन्ने खिनिॽनु पेक्॥ खुने़ॽ खिनिॽ आभे़ल्ले़आङ् के़ल्ले़रिन्ॽ, लाप्पाङ् के़न्देसिन्ॽ॥” 7 खे़ब्याङ् मोसाःल्ले़ यहोसुन् उःत्तुआङ् के़रे़क् इस्राइलिहाॽरे़ खुन्छिॽ तगि खुने़ॽ मे़त्तु, “के़धुम्बा नु हाङ्हाङ् के़लॽबा पोःक्खे़ॽ! थेआङ्भे़ल्ले़ यहवे दाङ्बे़ल्ले़ खिनिॽ पाधे़बाहाॽ पिनिङ् मे़त्तुसिआङ् माङ्हे़क् चोगुबा लाजेॽओ कन् मनाहाॽनु खे़ने़ॽए के़बेःक्, हे़क्क्याङ् खे़न् खे़ङ्हाॽरे़ खुन्छिॽ लक्खोमारे़ लागि खे़ने़ॽ खे़ङ्हाॽ के़भःक्खु के़बिरुसिर पोङ्ॽ॥ 8 यहवे दाङ्बे़न् आप्फेक् खे़ने़ॽ के़दगि पेक् हे़क्क्याङ् खे़ने़ॽनु सोरिक् वाॽ॥ खुने़ॽ खे़ने़ॽ आभे़ल्ले़आङ् के़ल्ले़त्ने़न्, लाप्पाङ् के़न्देने़न्लो॥” थिम्हाॽ निःप्मा के़बोङ्बा ये़म्हाॽ 9 कल्ले़चोगुल्ले़ मोसाःल्ले़ साम्योथिम् इङ्जाङ् साप्तुआङ् यहवे दाङ्बे़ल्ले़ कुमाङ्हुप् सन्दोक् के़बङ्बा ले़बिःल्ले़ कुधाःक्कोबा निङ्वाॽफुसाम्बाहाॽ नु इस्राइलबा के़रे़क् लाम्लोबाहाॽ पिरुसि॥ 10 खे़ब्याङ् मोसाःल्ले़ खे़ङ्हाॽ अक्तङ्बा इङ्जाङ् पिरुसि, “तङ्बे नुसि थक्माबा कुनुप्मो सिङ्नात्हाॽ ले़प्मा पिमासि तङ्बेओ, तक्तक्वा हिम् याःक्मा तङ्नाम्मो, 11 खुने़ॽ सेगुबादे़न्नो यहवे दाङ्बा खिनिॽ निङ्वाॽफुमाङ्ङिल्ले़ कुदगि के़रे़क् इस्राइलिहाॽ ओसेःन्धाक्सिङ्से़ मे़दाःल्ले़ के़रे़क् इस्राइलिहाॽरे़ खुनिॽ तगि खुन्छिॽ मे़घे़प्सुर खिनिॽ कन् साम्योथिम् इङ्जाङ्ङिन् निरे़म्मे़ॽ॥ 12 ये़म्बित्छा नु मे़न्छुमा, हिन्जाॽबित्छाॽ नु खिनिॽ ये़क्यक्को के़वाॽबा वेॽ लाजेॽबाहाॽ के़रे़क् सुप्से़म्सिम्मे़ॽ, हे़क्क्याङ् खे़ङ्हाॽरे़ मे़घे़प्सुआङ् यहवे दाङ्बा खिनिॽ निङ्वाॽफुमाङ्ङिन् किप्मा नु कन् साम्योथिम् इङ्जाङ्ङोबा के़रे़क् पाःन्जाःक्हाॽ सिङ्सिङ् ये़क्ये़क्काङ् इःप्मा नाःप्मा मे़हुॽसिङ्ल॥ 13 यर्दन नाधाःम्बि खिनिॽ युक् चोःक्से़ पेःक्मा के़इःत्तुम्बा लाजेॽओ के़युङिर थारिक् कन् साम्योथिम् इङ्जाङ्ङिन् कुसिङ् मे़न्निःप्मनाबा खे़ङ्हाॽरे़ खुन्छिॽ ये़म्बित्छा मे़न्छुमा साहाॽरे़आङ् मे़घे़प्सुआङ् यहवे दाङ्बा खिनिॽ निङ्वाॽफुमाङ्ङिन् किप्मा हुॽसिङ्मा के़बोङ्बा वाॽरो॥” यहवे दाङ्बे़ल्ले़ मोसान् पिरुबा कुनुप्मा इङ्जाङ् 14 खे़ब्याङ् यहवे दाङ्बे़ल्ले़ मोसान् मे़त्तु, “ओमे़त्ते़ॽ, खे़ने़ॽ के़सिमा ये़न्निन् निःत्ताङ् त्ये़घे़रे़॥ कल्ले़चोगुल्ले़ यहोसुन् उःत्ते़ॽ, हे़क्क्याङ् तुम्मादे़न् साःङ्गाहिम्मो खिनिॽ त्ये़म्मे़ॽ॥ खे़प्मो खुने़ॽ चोःक्मा के़बोङ्बा याःम्बक्हाॽ आङ्गाॽ हुक्सुप्तुङ्ॽ॥” खे़ब्याङ् मोसान् नु यहोसुन् तुम्मादे़न् साःङ्गाहिम्मो त्ये़सि॥ 15 हे़क्क्याङ् यहवे दाङ्बे़न् साःङ्गाहिम्मो लत्छा खाॽमित् सित्लाङ्ङो ओसेःन्धाङ् पोःक्खे़, खम्भ्याङ् खे़न् साःङ्गाहिम्मो लाःप्मादे़न्निल्ले़ कुसम्धाङ् फन्छिङ्॥ 16 हे़क्क्याङ् यहवे दाङ्बे़ल्ले़ मोसान् मे़त्तु, “खे़ने़ॽ के़म्बा के़धाःक्थे़बाहाॽ कुइसिक् खे़ने़ॽ सिमा के़जोक्॥ खे़ने़ॽ के़सिआङ् एगाङ् खे़ङ्हाॽ मे़लाःप्पा लाजेॽओ मे़गे़त्ताङ् कन् मनाहाॽरे़ हाराए वेॽ लाजेॽबा माङ्हाॽ ले़प्माङ् मे़लात् हे़क्क्याङ् याम्साम्मो याम्बोःप्मा याःम्बक् मे़जोगुॽ॥ आङ्गाॽ मे़ले़त्ताआङ् खे़ङ्हाॽनु चोगुङ्बा माङ्हुप्पिन् खे़ङ्हाॽरे़ मे़भेःन्दुॽ॥ 17 खे़ल्ले़ याःन्दिक् आङ्गाॽ आसाक्के़न्निन् खे़ङ्हाॽरे़ खुन्छिॽ सम्धाङ् चुक् हे़क्क्याङ् आङ्गाॽ खे़ङ्हाॽ लाप्फेसुङ्सिङ्ॽ, खम्भ्याङ् आङ्गाॽ आनारान् खे़ङ्हाॽलाम् चिक्खुङ्ङाङ् खे़ङ्हाॽ खाप्पुथ्यःङ् मे़मे़क्॥ यरिक् तुक्खे लाक्खेहाॽ नु के़साक्पा पाःन्हाॽ खे़ङ्हाॽरे़ खुन्छिॽ सम्धाङ् इदारो॥ खे़ब्याङ् खे़ल्ले़ याःन्दिक् खे़ङ्हाॽरे़ अक्खे मे़बाःत्तुॽ, ‘आनिॽ निङ्वाॽफुमाङ्ङिन् आनिॽ लुम्मो होप्पाल्ले़ चोगुल्ले़ए आनिॽ सम्धाङ् अक्तङ्बा के़साक्पा तुक्खे लाक्खेहाॽ त्ये़बाग मेःम्बि?’ 18 वेॽ माङ्हाॽ ले़प्माङ् मे़लाःत्ताङ् खे़ङ्हाॽरे़ मे़जोगुबा के़रे़क् फे़न्याःम्बक्किल्ले़ चोगुल्ले़ खे़ल्ले़ याःन्दिक् आङ्गाॽ से़क्खासाङ् आनारान् चिक्खुङ्ॽ॥ 19 “कल्ले़चोगुल्ले़ आल्ल खिनिॽ आप्फेक् लागि कन् से़वासाम्लोन् साप्ते़म्मे़ॽआङ् इस्राइलिहाॽ हुॽरे़म्सिम्मे़ॽ हे़क्क्याङ् खे़ङ्हाॽ साम्लोमा पाङ्घे़म्सिम्मे़ॽ॥ खे़ङ्हाॽरे़ खुन्छिॽ तक्ले़ङ्वाओ कन् साम्लोन् आङ्गाॽ आलागि लत्छा तोःन्दि पोङ्ल॥ 20 कन्हाॽरे़ खुन्छिॽ पाधे़बाहाॽ आङ्गाॽ माङ्हे़क् चोगुङ्सिङ्ङाङ् पिमासि माङ्हुप् चोगुङ्बा पित्नु नु सक्वाघु के़गुङ्बा लाजेॽओ आङ्गाॽ खे़ङ्हाॽ के़त्तुङ्सिङ्ङाङ् एगाङ्, खे़ङ्हाॽरे़ मे़ज मे़धुङुॽ हे़क्क्याङ् वेॽ माङ्हाॽ ले़प्माङ् मे़लाःत्ताङ् कन्हाॽ से़वा मे़मे़त्तुसिॽ, हे़क्क्याङ् आङ्गाॽ मे़नाॽआयाङ् आङ्गाॽ चोगुङ्बा माङ्हुप्पिन् मे़भेःन्दुॽ॥ 21 यरिक् तुक्खे लाक्खे नु के़साक्पा पाःन्हाॽ खे़ङ्हाॽरे़ खुन्छिॽ सम्धाङ् ताआङ् एगाङ् कन् से़वासाम्लोन् खे़ङ्हाॽरे़ खुन्छिॽ तक्ले़ङ्वाओ तोःन्दि कुसिङ् पोङ्ॽ, थेआङ्भे़ल्ले़ खे़न् खे़ङ्हाॽरे़ खुन्छिॽ मुॽइदाङ्साहाॽरे़ आभे़ल्ले़आङ् निङ्वाॽ मे़म्भेःत्छुन्ॽ॥ आङ्गाॽ खे़ङ्हाॽ पिनिङ् मे़त्तुङ्सिङ्बा लाजेॽओ के़प्मासिनुःल्ले़ तगिए आङ्गाॽ खे़ङ्हाॽरे़ खुन्छिॽ निङ्वाॽओ मे़इःत्तुबाःन् कुसिङ् निःत्तुङ् सुरुङ्ङाङ् वाॽ॥” 22 खे़ब्याङ् मोसाःल्ले़ हाबा खे़न् ये़न्नो कन् से़वासाम्लोन् साप्तुआङ् इस्राइलिहाॽ हुॽरुसि॥ 23 यहवे दाङ्बे़ल्ले़ नुनरे़ कुस्सा यहोसुन् कन् इङ्जाङ्ङिन् पिरु, “के़धुम्बा नु हाङ्हाङ् के़लॽबा पोःक्खे़ॽ! थेआङ्भे़ल्ले़ आङ्गाॽ पिनिङ् मे़त्तुङ्सिङ्ङाङ् माङ्हे़क् चोगुङ्ङाङ् माङ्हुप् चोगुङ्बा लाजेॽओ खे़ने़ॽए इस्राइलिहाॽ के़गे़त्तुसिॽ, हे़क्क्याङ् आङ्गाॽ आप्फेक् खे़ने़ॽनु वाॽआ॥” 24 मोसाःल्ले़ कन् साम्योथिम् इङ्जाङ्ङोबा पाःन्जाःक्हाॽ कुहेःक्सिङ्माआङ्धो कुनुप्मा थारिक् साप्तु सुरुआङ् एगाङ् 25 यहवे दाङ्बे़ल्ले़ कुमाङ्हुप् सन्दोक् के़बङ्बा ले़बिःल्ले़ कुमुॽइदाङ्साहाॽ कन् इङ्जाङ्ङिन् पिरुसि, 26 “साम्योथिम् इङ्जाङ्ङोबा कन् साप्पन्निन् यहवे दाङ्बा खिनिॽ निङ्वाॽफुमाङ्ङिल्ले़ कुमाङ्हुप् सन्दोक्किल्ले़ कुबेसाङ् ने़स्से़म्मे़ॽ, हे़क्क्याङ् खिनिॽ तक्ले़ङ्वाओ के़निबा तोःन्दि कुसिङ् खे़प्मो ने़र॥ 27 थेआङ्भे़ल्ले़ आङ्गाॽ खिनिॽ पिफ्युङ् के़जोगिबान् नु खिनिॽ पान् मे़ङ्घे़म्मान् कुसिङ् निःत्तुङ्ॽ॥ आइन् आङ्गाॽ हिङ्ङाआङ् वाॽआरए आङ्गाॽ खिनिॽनु वाॽआरए यहवे दाङ्बे़ल्ले़ कुदक्ले़ङ्वाओ खिनिॽ के़बोगिआङ् के़वयिने़भग्र, आङ्गाॽ सिआ खे़त्ताआङ् एगाङ्ग छे़न्ना साॽरिक् पिफ्युङ् के़जोगिॽ! 28 खिनिॽ थाःक्को के़रे़क् लाम्लोबाहाॽ नु खिनिॽ के़रे़क् युक्साबाहाॽ आङ्गाॽओ फुक्खे़म्सिम्मे़ॽ, हे़क्क्याङ् आङ्गाॽ कन् पाःन्जाःक्हाॽ खिनिॽ मे़त्निङ्ॽ, खम्भ्याङ् खे़ङ्हाॽरे़ खुन्छिॽ तक्ले़ङ्वाओ ताङ्साङ्बान् नु खाम्बेःक्मान् के़निबा तोःन्दि ये़प्सुङ्सिङ्ॽ॥ 29 आङ्गाॽ सिआआङ् एगाङ् खिनिॽ से़क्खासाङ् साॽरिक् फे़त्के़लारिॽ हे़क्क्याङ् आङ्गाॽ पिनिङ्बा इङ्जाङ्हाॽलाम् लाःत्लाःत् के़बोःक्खिॽ फाॽआङ् आङ्गाॽ कुसिङ् निःत्तुङ्ॽ॥ यहवे दाङ्बे़ल्ले़ कुनिमो खिनिॽ फे़न्याःम्बक् के़जोगुम्बा नु खिनिॽ हुक्किल्ले़ के़जोगुम्बा पाःन्निल्ले़ खुने़ॽ कुसिक् के़भोःक्खुम्बाल्ले़ चोगुल्ले़ के़दाबा ये़न्हाॽओ खिनिॽ ये़त्तुक्खे के़दुमुम्लो॥” मोसाःल्ले़ कुसाम्लो 30 हे़क्क्याङ् मोसाःल्ले़ कन् से़वासाम्लोओबा पाःन्छेःक्वाहाॽ कुहेःक्सिङ्माआङ्धो कुनुप्मा थारिक् इस्राइलबा के़रे़क् सङ्जुम्भोःल्ले़ मे़घे़प्सुर याःन्दुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.