साम्योथिम् इङ् 30 - लिम्बुसे़न्लप् नु मुॽइसाम् खोमा पाःन्दङ्हाॽ 1 यहवे दाङ्बे़ल्ले़ मे़न्छाम् सुवाङ्हाॽरे़ खुनिॽ लुम्मो खिनिॽ के़नाःत्ति के़देसिॽआङ् एगाङ् आल्ल कन् मुॽइसाम्हाॽ नु माङ्दे साङ्ग्राहाॽ खिनिॽ सम्धाङ् थारो हे़क्केःल्ले़ खे़न् निङ्वाॽ इःत्ते़म्मे़ॽआङ् 2 खिनिॽ नु खिनिॽ मुॽइदाङ्साहाॽ यहवे दाङ्बा खिनिॽ निङ्वाॽफुमाङ्ङो के़नुःक्खिॽ, हे़क्क्याङ् आङ्गाॽ आइन् इङ्जाङ् चोगुङ्बा खुने़ॽ कुबाःन्जाक्किन् खिनिॽ सिक्लुङ्माॽ नु खिनिॽ के़रे़क् नु साःङ्गो सक्माःल्ले़ के़इःत्तुम् के़नाःत्तुम्ॽ, 3 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ नुॽमा तामा ये़न्निन् के़नुःक्ति के़बिरिॽ हे़क्क्याङ् खिनिॽ लुङ्माॽ के़दुक्तिॽ, खम्भ्याङ् आत्तिन् सुवाङ्हाॽरे़ खुन्छिॽ लुम्मो खिनिॽ फुत्छिङ्ज्याङ् के़जोगिआङ् वये़, खे़ङ्हाॽलाम् खिनिॽ के़भुक्खि के़दारिॽ॥ 4 खिनिॽ लाजेॽलाम् लाःक्कात् के़म्लःत्ति के़म्देसिआङ् ताङ्साङ्बाल्ले़ कुसिङ्गाङ्बा के़रे़क्नुःल्ले़ माःङ्घाबा लाजेॽओ के़वयिसाङ् खे़प्मोलाम् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़भुक्खिॽ, हे़क्क्याङ् खे़प्मोलाम् खिनिॽ के़नुःक्ति के़दारिॽ॥ 5 खिनिॽ पाधे़बाहाॽरे़ मे़युक्तुबा लाजेॽओ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़दारिॽ, हे़क्क्याङ् खिनिॽ खे़न् के़युक्तुम्ॽ, खे़ब्याङ् खिनिॽ पाधे़बाहाॽनुःल्ले़आङ् के़नुॽबा के़दाबा नु निःप्मे़न्दे़त्ते यरिक् के़जोगिॽ॥ 6 यहवे दाङ्बा खिनिॽ निङ्वाॽफुमाङ्ङिन् खिनिॽ के़रे़क् सिक्लुङ्माॽ नु के़रे़क् साःङ्गो सक्माःल्ले़ मिःम्जि के़मे़त्तुम्ल फाॽआङ् खुने़ॽ खिनिॽ नु खिनिॽ मुॽइदाङ्साहाॽरे़ खुन्छिॽ निङ्वाॽओ हर्दो हे़गु के़बिरिॽ, हे़क्क्याङ् खिनिॽ हिङ्मा के़सुक्तिर॥ 7 यहवे दाङ्बा खिनिॽ निङ्वाॽफुमाङ्ङिल्ले़ कन् के़रे़क् माङ्दे साङ्ग्राहाॽ खिनिॽ कुनामे़न्छाॽ के़मे़प्पा नु खिनिॽ तुक्खे के़जाःप्पाहाॽओ थार याःन्दुॽ॥ 8 खिनिॽ याम्मो यहवे दाङ्बे़ल्ले़ कुबाःन्जाक्किन् इःप्मा नाःप्मा के़दे़न्दिॽ, हे़क्क्याङ् आङ्गाॽ आइन् खिनिॽ पिनिङ्बा खुने़ॽ के़रे़क् कुइङ्जाङ्हाॽ के़इःत्तुम् के़नाःत्तुम्ॽ॥ 9 कल्ले़चोगुल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़जोगुम्बा के़रे़क् पाःन्नो के़नुरि के़दासिर चोगुॽ॥ खुने़ॽ यरिक् हिन्जाॽबित्छाॽ आत्तातान्ने यरिक् थक्साहाॽ के़बिरिॽ, खिनिॽ इक्ताप्हाॽओ यरिक् कुजा के़धोःक्पा पोङ्ल याःन्दु के़बिरिॽ, थेआङ्भे़ल्ले़ खिनिॽ सुधे़बा ताक्थे़बाहाॽनु कुनिङ्वाॽ त्ये़आङ् वये़बा कुइसिक् याम्मो खिनिॽनु कुनिङ्वाॽ तारो॥ 10 साम्योथिम् साप्पन्नो साप्ते़आङ् के़बप्पा इङ्जाङ्हाॽ, थिम्हाॽ नु खुने़ॽ कुइक्लान् के़घे़प्सुम्माङ् के़इःत्तुम् के़नाःत्तुम्ॽ, हे़क्क्याङ् खिनिॽ सिक्लुङ्माॽ नु सक्मा साम्मिल्ले़ यहवे दाङ्बा खिनिॽ निङ्वाॽफुमाङ् ले़प्माङ् के़नुःक्खिने़भग्र, खिनिॽनु कुनिङ्वाॽ तारो॥ हिङ्मे़न् नु सिमे़न् सेःक्मा 11 आङ्गाॽ आइन् खिनिॽ पिनिङ्बा इङ्जाङ्ङिन् खिनिॽ लागि साॽरिक् पसाक्के़साक्पा इग्र इःप्मा नाःप्मा के़न्छुक्तुम्मिन्बा मे़जोक्ने़न्॥ 12 थेआङ्भे़ल्ले़ खे़ङ्ग साङ्ग्राम्पेदाङ्ङो होप्, खिनिॽ अक्खे लॽमा मे़बोङ्ने़न्, “आनिॽ लागि हात् साङ्ग्राम्पेदाङ्ङो थो थोःक्सिङ् पेःक्काङ् खे़न् युरु आबिबे हे़क्क्याङ् आनिॽ आमे़त्ताङ् खे़न् इःप्मा नाःप्माबे?” 13 खे़न् वरःङ्ङिल्ले़ नासमा कुयाओआङ् होप्, खिनिॽ अक्खे लॽमा मे़बोङ्ने़न्, “हात् वरःङ् नाधाःम्बि पेःक्पाबे हे़क्क्याङ् खे़न् फे़त्तुआङ् आनिॽ आमे़त्ताङ् आइःत्तुम् आनाःत्तुम्बाबे?” 14 कर खिनिॽ इःप्मा नाःप्मारे़ लागि पाःन्जाःक्किन् खिनिॽ निःत्ताङ्ङे वाॽ, खिनिॽ आप्फेक् मुराओ नु खिनिॽ सिक्लुङ्मोए वाॽ॥ 15 ओमे़त्ते़म्मे़ॽ, आङ्गाॽ आइन् हिङ्मे़न् नु नुॽमा तामे़न् हे़क्क्याङ् मे़क्मा नु सिमे़न् सेःक्मा खिनिॽ पिनिङ्ॽ॥ 16 यहवे दाङ्बा खिनिॽ निङ्वाॽफुमाङ्ङिन् मिःम्जि मे़प्मा, खुने़ॽ कुलाम्मो लाङ्घेःक्मा, खुने़ॽ कुइङ्जाङ्, कुधिम् नु साम्योथिम्हाॽ इःप्मा नाःप्मारे़ लागि आङ्गाॽ आइन् खिनिॽ इङ्जाङ् पिनिङ्ल पत्ता॥ हे़क्क्याङ्लक् खिनिॽ के़हिङिॽ, खिनिॽ के़बोःन्दि के़धे़ॽरिॽ, हे़क्क्याङ् खिनिॽ युक् चोःक्मा के़इःत्तुम्बा लाजेॽओ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हाङ्वागे़न् मुॽइसाम् के़बिरिॽ॥ 17 कर खिनिॽ निङ्वाॽ ताक्कन्नाङ् खिनिॽ आधिङ्गानि के़बोःक्खिॽ हे़क्क्याङ् वेॽ साम्माङ्हाॽ ले़प्माङ् खिनिॽ निङ्वाॽ इगेःक् लॽआङ् खे़ङ्हाॽ से़वा मे़प्मासि नु साबन् हक्पे़त्ताङ् माङ्से़वा मे़प्मा के़हेःक्तुम्सिम्ने़भग्र, 18 खिनिॽ से़क्खाए युम्रे़क् के़मे़गिॽ फाॽआङ् आइन् उवा चोगुङ्ॽ, हे़क्क्याङ् यर्दन नाधाःम्बि खिनिॽ युक्मारे़ लागि पेःक्मा के़जोगिबा लाजेॽओ खिनिॽ यरिक् ये़न् के़न्हिङिन्ॽ॥ 19 आङ्गाॽ आइन् खिनिॽ तगि हिङ्मे़न् नु सिमे़न्, मुॽइसाम्मिन् नु माङ्दे साङ्ग्राःन् खिनिॽ तगि ने़स्सुङ्ङाङ् ने़रो फाॽआङ् आङ्गाॽ साङ्ग्राम्पेदाङ् नु इक्सादिङ् खाम्बेःक्मान् खिनिॽ तक्ले़ङ्वाओ के़निबा तोःन्दि ये़प्सुङ्सिङ्ॽ॥ आल्ल हिङ्मे़न्ने खिनिॽ सेगे़म्मे़ॽ, हे़क्केलॽरिक् खिनिॽ नु खिनिॽ मुॽइदाङ्साहाॽ हिङ्मा सुक्ते़म्मे़ॽ, 20 हे़क्क्याङ् यहवे दाङ्बा खिनिॽ निङ्वाॽफुमाङ्ङिन् मिःम्जि मे़त्ते़म्मे़ॽर, खुने़ॽ कुइङ्जाङ्हाॽ इःत्ते़म् नाःत्ते़म्मे़ॽ खे़ब्याङ् खुने़ॽओ खिम्मासिम्मिन्ने़ॽआङ् हिङे़म्मे़ॽआङ् वये़म्मे़ॽ॥ थेआङ्भे़ल्ले़ यहवे दाङ्बे़न्ने खिनिॽ हिङ्मारो, हे़क्क्याङ् खिनिॽ थाःक्थे़बा अब्राहाम, इसहाक खम्भ्याङ् याकुबे़न्नु खुने़ॽ पिनिङ् मे़त्तुसिआङ् माङ्हे़क्सिङ्बा लाजेॽओ खुने़ॽ खिनिॽ थाःक् के़जाॽबा के़जोगिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.