साम्योथिम् इङ् 29 - लिम्बुमोआब लाजेॽओ यहवे दाङ्बे़ल्ले़ इस्राइलिहाॽनु चोगुबा माङ्हुप् 1 होरेब लाजेॽओ यहवे दाङ्बे़ल्ले़ इस्राइलिहाॽनु चोगुबा माङ्हुप्पिन्नुःल्ले़ वेॽ मोआब लाजेॽओ यहवे दाङ्बे़ल्ले़ मोसान् इङ्जाङ् पिरुबा माङ्हुप्पिल्ले़न् पाःन्दाङ्हाॽ आम्भा कन्हाॽएरो॥ 2 मोसाःल्ले़ के़रे़क् इस्राइलिहाॽ उःत्तुसिआङ् मे़त्तुसि— यहवे दाङ्बे़ल्ले़ मिस्र लाजेॽओ फारोन्, खुने़ॽ के़रे़क् कुयुक्साबाहाॽ नु खुने़ॽ के़रे़क् कुलाजेॽओ खिनिॽए तगि खुने़ॽ चोगुबा के़रे़क् याःम्बक्हाॽ खिनिॽ के़निसुम्माङ् के़वयिॽ॥ 3 यम्बयम्बा तुक्खे लाक्खेहाॽ, निङ्वाॽ के़माबा मिक्सेःन्हाॽ नु खे़न् ने़हिरे़ मे़न्धाप्मनाबा पयम् यम्बा याःम्बक्हाॽ आप्फेक् खिनिॽ मिक्किल्ले़ के़निसुम्॥ 4 कर आइन् थारिक् यहवे दाङ्बे़ल्ले़ खिनिॽ कुसिङ् निःप्मा निङ्वाॽ, निमा मिक् नु खे़म्मा ने़भाक् मे़म्बिए के़गत्तिॽ॥ 5 हे़क्केसाङ् यहवे दाङ्बे़ल्ले़ पाःत्तुॽ, “आङ्गाॽ लिबोङ् तङ्बे थारिक् मुरे़क् खारे़क् थेआङ् के़होप्पादे़न्नो खिनिॽ लाम्लोनिङ् फे़त्निङ्ङिल्ले़ खिनिॽ थक्को के़जाक्खुम्बा चाङ्हाॽ कुद्रे़क् मे़बोःक्खे़न्, हे़क्क्याङ् खिनिॽ लाङ्ङो के़जाक्खुम्बा लाङ्सुःप्पिन्नाङ् कुद्रे़क् मे़बोःक्खे़न्॥ 6 खिनिॽ खरे़ःङ् के़न्जाम्मिन् हे़क्क्याङ् चे़ल्ले़क्सेॽ के़दुम्बा थि इग्र वेॽ आममबा थे़माआङ् के़न्धुङुम्मिन्॥ आङ्गाॽ यहवे दाङ्बे़न्ने खिनिॽ निङ्वाॽफुमाङ्आ के़लॽबा खिनिॽ कुसिङ् निःप्मा के़सुक्तुम्ल फाॽआङ् आङ्गाॽ अक्खे चोगुङ्बारो॥” 7 खिनिॽ कन् ते़न्नो के़गे़रि के़भे़रिल्ले़ हेस्बोनबा हाङ् सिहोननु बासानबा हाङ् ओगे़न् आनिॽ तक्ले़ङ्वाओ थक्से़ लःन्दे़ त्ये़सि, हे़क्क्याङ् आनिॽ खे़ङ्हाॽ आनाःन्दुम्सिम्॥ 8 हे़क्क्याङ् आनिॽ खे़ङ्हाॽरे़ खुन्छिॽ लाजेॽहाॽ हुक्काप् चोःक्मनाआङ्, रुबेनि, गादि नु मनस्सेरे़ कुभ्रे़ःङ् कुधाःक्हाॽ खे़न् खुन्छिॽ खोमा लक् कुसिङ् आबिरुम्सिम्॥ 9 कन् माङ्हुप्पोबा पाःन्जाःक्किन् सिङ्सिङ् ये़क्ये़क्काङ् इःत्ते़म् नाःत्ते़म्मे़ॽ, हे़क्केलॽरिक् खिनिॽ के़जोगुम्बा के़रे़क् पाःन्हाॽओ खिनिॽ कुलिङ्दो के़गे़प्पा के़बोःक्खिर॥ 10 आइन् खिनिॽ के़रे़क् यहवे दाङ्बा खिनिॽ निङ्वाॽफुमाङ्ङिल्ले़ कुदगि के़ये़बि के़गरि—खिनिॽ लाम्लोबाङ्हाॽ नु तुम् लाम्लोबाहाॽ, लाम्लोबाहाॽ नु युक्साबाहाॽ नु वेॽ के़रे़क् इस्राइलिहाॽ, 11 खिनिॽ अङे़ःक्वा साहाॽ नु खिनिॽ मेःत्हाॽ हे़क्क्याङ् खिनिॽ लागि साःङ्गाहिम्मो सिङ् के़घे़ःप्पा नु च्वाःत् के़भाःप्पाहाॽ वेॽ लाजेॽबाआङ् के़ये़बिॽ॥ 12 यहवे दाङ्बा खिनिॽ निङ्वाॽफुमाङ्ङिन्नु लत्छा माङ्हुप्पो हुप्सिङ्मारे़ लागि खिनिॽ कप्मो के़ये़बिॽ, खे़न् माङ्हुप्पिन् यहवे दाङ्बे़ल्ले़ आइन् खिनिॽनु हुप्तुर पत् हे़क्क्याङ् माङ्हे़क्किल्ले़ एःप्साप् एःप्तुर पत्॥ 13 आक्खेलॽरिक् खुने़ॽ खिनिॽनु माङ्हुप् चोगु हे़क्क्याङ् खिनिॽ थाःक्थे़बा अब्राहाम, इसहाक खे़ब्याङ् याकुबनु माङ्हे़क् चोगुआङ् वये़, हे़क्केलॽरिक्के खुने़ॽ खिनिॽ निङ्वाॽफुमाङ् पोङ्मारे़ लागि नु खिनिॽग खुने़ॽ आप्फेक् कुमना चाःक्मारे़ लागि से़क्खा चोगुर पत्॥ 14 आङ्गाॽ कन् माङ्हे़क्किन्नु सोरिक्पा माङ्हुप्पिन् खिनिॽ आइन् यहवे दाङ्बा आनिॽ निङ्वाॽफुमाङ्ङिल्ले़ कुदगि आनिॽनु सोरिक् के़ये़प्पाहाॽनुरक् मे़हुप्पाआन्, 15 कर आइन् आल्ल आनिॽनु सोरिक् कप्मो मे़न्वाॽमनाबाहाॽनुआङ् आङ्गाॽ माङ्हुप् चोगुङ्ॽ॥ 16 आनिॽ आक्खेलॽरिक् मिस्र लाजेॽओ आयुङे़, हे़क्क्याङ् कप्मो के़प्मारे़ लागि वेॽ लाजेॽहाॽलाम् आनिॽ आबोःक्खे़र आक्खेलॽरिक् आगाःक्तुम् आभे़त्तुम् खे़न् खिनिॽ के़निसुम्ॽ॥ 17 खे़ङ्हाॽरे़ खुनिॽ लुम्मो के़वाॽबा खे़ङ्हाॽरे़ खुन्छिॽ सिक्के़ले़ःङ्बा सिङ्, लुङ्, युप्पा नु साम्म्याङ् नावाइत्लाहाॽ खिनिॽ के़निसुम्माङ् वाॽ॥ 18 सिङ्सिङ् लॽरे़म्मे़ॽ! खे़न् मे़न्छाम् सुवाङ्हाॽरे़ खुन्छिॽ माङ्हाॽ से़वा मे़त्छे़ आइन् यहवे दाङ्बा आनिॽ निङ्वाॽफुमाङ्लाम् खिनिॽओबा कुभा ये़म्बित्छा इग्र मे़न्छुमा, किग्र थाःक् इग्र पासिङ्हाॽरे़ खुन्छिॽ निङ्वान् मे़हिसिङ्ङिन्ल॥ ये़क्ये़क् लॽरे़म्मे़ॽ, खिनिॽ लुम्मो अक्तङ्बा फे़न्निङ्वाॽ के़दाःप्पा थे़मा पाःन्निल्ले़आङ् कुबुङ् होःप्ल॥ 19 आल्ल हे़क्तङ्बा मनाःल्ले़ कन् माङ्हे़क्कोबा पाःन्जाःक्हाॽ खे़प्सुल्ले़ खे़न् आप्फेक् मुॽइसाम् पिसिङ् हे़क्क्याङ् अक्खेलॽरिक् निङ्वाॽ इःत्छिङ्ॽ, “आङ्गाॽ आप्फेक् आलाम्मो लाङ्घेःक्काआङ् पत्तासाङ् आङ्गाॽ ताप्थेक् याम्धेक् वाॽआ॥” कन् मनाःल्ले़ च्वाःत्तिल्ले़ वारक्खुबा लाजेॽ सम्धाङ्नु सोसोरिक् कुसे़ङ्ग्रा लाजेॽओआङ् तुक्खे लाक्खे तारुॽ॥ 20 खे़न् ले़प्मि पिमारे़ लागि यहवे दाङ्बे़ल्ले़ आप्फाल्ले़आङ् कुनिङ्वाॽ मे़नुःक्तुन्ॽ, कर खुने़ॽ मि के़दिःप्पा कुसाक्के़न्निन् नु कुनाहे़म्मान् खे़न् मनाःल्ले़ कुसम्धाङ् थारो॥ कन् साप्पन्नो साप्ते़आङ् के़बप्पा के़रे़क् माङ्दे साङ्ग्राहाॽ खे़न् मनाःल्ले़ कुसम्धाङ् चुक्, खे़ब्याङ् यहवे दाङ्बे़ल्ले़ खे़ल्ले़ कुमिङ्ङिन् ताङ्साङ्बा सिगाङ्लाम् मासु पिरुॽ॥ 21 साम्योथिम् इङ्जाङ्ङोबा कन् साप्पन्नो साप्ते़आङ् के़बप्पा के़रे़क् माङ्दे साङ्ग्राहाॽ कुइसिक् यहवे दाङ्बे़ल्ले़ खे़न् इस्राइलिहाॽरे़ खुनिॽ के़रे़क् थाःक्कोलाम् मे़क्मा सिमारे़ लागि एःक् से़न्दुदेसुॽ॥ 22 खिनिॽ एगाङ् के़दाबा थाःक्थाःक्हाॽ नु साॽरिक् माःङ्घा लाजेॽहाॽलाम् के़दाबा वेॽ लाजेॽबाहाॽरे़ खिनिॽ लाजेॽओ के़दाबा मे़क्मा सिमाहाॽ नु यहवे दाङ्बे़ल्ले़ खे़प्मो तारुबा तुक्माहाॽ मे़निसुरो॥ 23 यहवे दाङ्बे़ल्ले़ खुने़ॽ किप्मा के़घुबा कुसिक् पोःक्मो सदोम नु गमोरा, अद्मा नु सबोयिमे़न् खाप्पुथ्यःङ् चोगुबा कुइसिक् लाजेॽओ के़रे़क् कान्धाक् नु युम् मिगे़दिक्पा मिघाङ्ग्रोक्लक् पोङ्ॽ॥ खे़न् थे़माआङ् मे़ल्लेःत्तेबा, थे़माआङ् मे़ल्लिङ्मनाबा नु याःन्सुङ्ङाङ् मे़ल्लिङ्मनाबा याक्चाना पोङ्ॽ॥ 24 के़रे़क् मे़न्छाम् सुवाङ्हाॽरे़ पाःन्सेःन्दो मे़जोगुॽ, “यहवे दाङ्बे़ल्ले़ कन् लाजेन् थेआङ् अक्तङ्बा चोगुबाबे? कन् मिधुङ्दिङ् मिराःक् हे़क्तङ्बा साक्के़न्निन् थेआङ्बे?” 25 हे़क्केःल्ले़ अक्तङ्बा नोगप् तारो, “खे़ङ्हाॽ मिस्रलाम् यहवे दाङ्बा खुन्छिॽ निङ्वाॽफुमाङ्ङिल्ले़ फे़त्तुसिल्ले़ खुन्छिॽ पाधे़बाहाॽनु खुने़ॽ चोगुबा माङ्हुप्पिन् खे़ङ्हाॽरे़ मे़ले़रु मे़देसुबाल्ले़ चोगुल्ले़ हे़क्के पोःक्खे़बारो॥ 26 खे़ङ्हाॽ मे़बेआङ् वेॽ माङ्साम्माङ्हाॽ से़वा मे़मे़त्तुसि हे़क्क्याङ् कन्हाॽरे़ खुन्छिॽ तगि साम्बोन् हबत् मे़भन्छिङ्ङाङ् माङ्से़वा मे़मे़त्तुसि, खे़न् माङ्साम्माङ्हाॽ खे़ङ्हाॽरे़ कुसिङ् मे़न्निःत्छे मे़वये़, यहवे दाङ्बे़ल्ले़ खे़न् माङ्साम्माहाॽ खुन्छिॽ पिरुसिबा होःप्ते़॥ 27 कल्ले़चोगुल्ले़ यहवे दाङ्बे़ल्ले़ कुसाक्के़न्निन् कन् लाजेॽओ थ्ये़, हे़क्क्याङ् कन् साप्पन्नो साप्ते़आङ् के़बप्पा के़रे़क् माङ्दे साङ्ग्राहाॽ खुने़ॽ कन् लाजेॽओ थासु॥ 28 यहवे दाङ्बे़ल्ले़ किप्मा के़घुबा कुसिक् पोःक्मो नु साॽरिक् कुयाःक्ले़ॽमो खे़ङ्हाॽ खुन्छिॽ लाजेॽओलाम् हाॽयाक् आःक्खुदेसुसि, हे़क्क्याङ् खे़न् आइन् पोःक्खे़आङ् ने़बा कुइसिक् वेॽ लाजेॽओ खे़ङ्हाॽ लाप्पुङ्देसुसि!” 29 ओसेःन्धाङ् मे़म्बोङ्मनाबा पाःन्हाॽ यहवे दाङ्बा आनिॽ निङ्वाॽफुमाङ्ङिन्ले़न्लो॥ कर कन् साम्योथिम् इङ्जाङ्ङोबा के़रे़क् पाःन्जाःक्हाॽ इःप्मा नाःप्मारे़ लागि ओसेःन्धाङ् के़बोङ्बा पाःन्हाॽग आनिॽ नु आनिॽ थिन्दाङ् सायोबोराहाॽरे़ लागि आभे़ल्ले़साङ् सदादिङ्ले़ लागिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.