साम्योथिम् इङ् 28 - लिम्बुइङ्जाङ् इःप्मे़ल्ले़बा मुॽइसाम्हाॽ ( ले़बि २६:३-१३ ; साम्यो इङ् ७:१२-२४ ) 1 आङ्गाॽ आइन् खिनिॽ इङ्जाङ् पिनिङ्बा कुइसिक् खिनिॽ सिङ्सिङ् ये़क्ये़क्काङ् यहवे दाङ्बा खिनिॽ निङ्वाॽफुमाङ्ङिल्ले़ के़रे़क् कुइङ्जाङ्हाॽ तिम्मा नाःप्मा के़दे़न्दिॽ हे़क्क्याङ् खुने़ॽ कुबाःन्जाक्किन् के़इःत्तुम् के़नाःत्तुम्ने़भग्र, खुने़ॽ इक्सादिङ् खाम्बेःक्मोबा के़रे़क् मे़न्छाम् सुवाङ्हाॽनुःल्ले़ खिनिॽ थोधोक्पा के़जोगिॽ॥ 2 यहवे दाङ्बा खिनिॽ निङ्वाॽफुमाङ्ङिल्ले़ कुबाःन्जाक्किन् के़इःत्तुम् के़नाःत्तुम्ने़भग्र कन् के़रे़क् हाङ्वागे़न् मुॽइसाम्हाॽ खिनिॽओ थाआङ् खिनिॽ मुॽइसाबा के़बोक्खिरो, 3 खिनिॽ ये़क्यक्को हाङ्वागे़न् मुॽइसाम् थारो, हे़क्क्याङ् खिनिॽ पाङ्भेॽ पाङ्जुम्मो मुॽइसाम् थारो॥ 4 खिनिॽ थिन्दाङ् सायोबोराहाॽओ हाङ्वागे़न् मुॽइसाम् थारो, खे़न्नु सोसोरिक् इक्ताप्पोबा पोगुगे़न् कुजाओ मुॽइसाम् थारो, पित्थक्सा, मे़ल्लुक् मे़ःन्दाहाॽओ मुॽइसाम् थारो॥ 5 खिनिॽ नाॽइमाहाॽओ नु फेॽरुम् सॽमा खर्बाहाॽओ हाङ्वागे़न् मुॽइसाम् थारो॥ 6 सिगाङ् नु लाःक्कात् के़लासिॽ के़लःन्दिल्ले़ खिनिॽओ हाङ्वा मुॽइसाम् थारो॥ 7 खिनिॽनु थङ् के़जोःक्पा निङ्मिहाॽ यहवे दाङ्बाल्ले़ खिनिॽ तगिए हारि चाःत्तुसिॽ॥ खे़ङ्हाॽ खिनिॽनु थक्से़ थिक् लाम् लाम्बा मे़दारो, कर खे़ङ्हाॽ खिनिॽलाम् नुसि लाम्हाॽओ मे़घे़त्छिङ्ॽ॥ 8 यहवे दाङ्बे़ल्ले़ खिनिॽ चाधाःङ्ङो नु खिनिॽ के़रे़क् याःम्बक्को मुॽइसाम् के़बिरिॽ॥ यहवे दाङ्बा खिनिॽ निङ्वाॽफुमाङ्ङिल्ले़ के़बिरिआङ् ने़बा लाजेॽओ खुने़ॽ खिनिॽ मुॽइसाम् के़बिरिॽ॥ 9 यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्हाॽ इःप्मा नाःप्मा के़दे़न्दिआङ् खुने़ॽ कुलाम्मो लाङ्गे़घेगिने़भग्र, खुने़ॽ खिनिॽओ माङ्हे़क्सिङ्ङाङ् माङ्हुप् चोगुबा कुइसिक् खुने़ॽ आप्फेक् सेसे कुमना के़जोगिआङ् के़युक्खिॽ॥ 10 खे़ब्याङ् इक्सादिङ् खाम्बेःक्कोबा के़रे़क् मनाहाॽरे़ यहवे दाङ्बे़ल्ले़ कुमिङ्ङोलाम् के़उःत्तिबा फाॽआङ् निङ्वाॽ मे़घोसुॽ हे़क्क्याङ् खे़ङ्हाॽ खिनिॽनु मे़गिरो॥ 11 खिनिॽ पिनिङ् फाॽआङ् खिनिॽ पाधे़बाहाॽनु माङ्हुप् चोगुबा लाजेॽओ खिनिॽ मुॽइदाङ्साहाॽ, पित्थक्साहाॽ नु लाजेॽओ के़धोःक्पा कुजाहाॽओ यहवे दाङ्बे़ल्ले़ वे़त्ते़सरे़ नुॽमा तामा के़बिरिरो॥ 12 यहवे दाङ्बे़ल्ले़ ताङ्साङ्बो वे़त्ते़सरे़ चिक्खु युक्खुबा कुधाःङ्ङिन् हन्दुआङ् खिनिॽ लाजेॽओ चाहा चोःक्पा याक्वाओ वहित् थासु के़बिरिॽ, हे़क्क्याङ् खिनिॽ हुक्कोबा के़रे़क् याःम्बक्को मुॽइसाम् के़बिरिॽ॥ खिनिॽ यरिक् मे़न्छाम् सुवाङ्हाॽ सिङ्नात् के़बिरुम्सिम्ॽ, कर आत्तिन्हाॽलाम्माङ् याङ्ना सिङ्नात् के़म्भोःक्खुम्मिन्लो॥ 13 आङ्गाॽ आइन् खिनिॽ पिनिङ्बा यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्हाॽओ सिङ्सिङ् ये़क्ये़क्काङ् के़इःत्तुम् के़नाःत्तुम्ने़भग्र, यहवे दाङ्बे़ल्ले़ खिनिॽ एगाङ् मेःन् कर तगाङ् के़जोगिॽ॥ खिनिॽ थोधोक्पा के़बोःक्खिॽ कर योयोक् के़म्बोःक्खिन्लो॥ 14 आङ्गाॽ आइन् खिनिॽ पिनिङ्बा इङ्जाङ्हाॽओबा कुभालाम् फे़ङ्वा नु चुक्वा ले़प्माङ् मे़बेगे़म्मिन्ने़ॽ हे़क्क्याङ् वेॽ माङ्हाॽ मे़दिम्दे़म्सिम्मिन्ने़ॽआङ् से़वा मे़मे़त्ते़म्सिम्मे़ॽओ॥ इङ्जाङ् मे़न्इःप्मे़ल्ले़बा साङ्ग्राहाॽ ( ले़बि २६:१४-४६ ) 15 कर आङ्गाॽ आइन् खिनिॽ पिनिङ्ल पत्ताबा यहवे दाङ्बा खिनिॽ निङ्वाॽफुमाङ्ङिल्ले़ के़रे़क् कुइङ्जाङ्हाॽ नु कुधिम्हाॽ सिङ्सिङ् ये़क्ये़क्काङ् के़ङ्घे़प्सुम्मिन्नाङ् खुने़ॽ कुबाःन्जाक्हाॽ के़न्इःत्तुम्मिन् के़न्नाःत्तुम्मिन्ने़भग्र, कन् के़रे़क् माङ्दे साङ्ग्राहाॽ खिनिॽ सम्धाङ् थाआङ् तुक्खेओ के़ध्ये़ॽइरो, 16 खिनिॽ ये़क्यक्हाॽओ साङ्ग्रा थारो, खिनिॽ पाङ्भेॽ पाङ्जुम्मो माङ्दे थारो॥ 17 खिनिॽ नाॽइमाहाॽओ हे़क्क्याङ् फेॽरुम् सॽमा खर्बाहाॽओ माङ्दे साङ्ग्रा थारो॥ 18 खिनिॽ थिन्दाङ् सायोबोराहाॽओ, खे़न्नु सोसोरिक् इक्ताप्पोबा पोगुगे़न् कुजाओ, पित्थक्सा कुम्बाबा कुम्मामा पित्सात्हाॽओ, मे़क्लुक् मे़ःन्दा मे़ल्लुक्साःत् मे़ःन्दसाःत्हाॽओ माङ्दे साङ्ग्रा थारो॥ 19 सिगाङ् नु लाःक्कात् के़लासिॽ के़लःन्दिल्ले़ खिनिॽओ माङ्दे साङ्ग्रा थारो॥ 20 खुने़ॽ के़नाॽरुम्माङ् खिनिॽ के़जोगुम्बा फे़न्याःम्बक्किल्ले़ चोगुल्ले़ खिनिॽ खिमो के़म्मे़गिन्ल थारिक् यहवे दाङ्बे़ल्ले़ खिनिॽ सम्धाङ् नु खिनिॽ हुक्किल्ले़ के़जोगुम्बा के़रे़क् याःम्बक्हाॽओ माङ्दे साङ्ग्रा, हयङ् किल्लिङ् नु तुक्खे लाक्खे पोङ्ल चोगुॽ॥ 21 खिनिॽ युक् चोःक्मारे़ लागि के़बेगिर के़बत्छिबा लाजेॽलाम् खिनिॽ मिङ् वरे़ङ्ले़ङ् मार थारिक् यहवे दाङ्बे़ल्ले़ खिनिॽ लुम्मो साॽरिक् यम्बा माङ्दुक्मा पोःक्ल चोगुॽ॥ 22 थक् के़हेबा के़जप्पा, तुङ्दामा, आहम्हम्बा तुक्मा, मिआदिक्तिक्पा आओॽओॽबा, साङ्याक्मा, सिङ्जःक् इगे़सुॽबा खुक्वामेःत् नु सुक्नाःम्बा के़धॽबा तुक्माहाॽ तारुआङ् खिनिॽ के़म्मे़गिन्ल थारिक् यहवे दाङ्बे़ल्ले़ खिनिॽ तुक्खे के़जाःत्तिॽ॥ 23 हे़क्क्याङ् खिनिॽ सम्धाङ् के़बप्पा ताङ्साङ्बान् कासा हे़क्के वहित् मे़न्धामनाबा नु खिनिॽ सिगाङ्बा खाम्बाङ्ङिन् फे़न्जेॽ हे़क्के कुजा मे़न्धोःक्मनाबा पोङ्ॽ॥ 24 खिनिॽ लाजेॽओ के़धाबा पाङ्गे़न्दिङ् वहित्तिन् यहवे दाङ्बे़ल्ले़ खाम्हिःक् लुङ्हिःक् पोङ्ल चोगुॽ॥ खिनिॽ खाप्पुथ्यःङ् मे़म्मे़क्के थारिक् ताङ्साङ्बोलाम् खे़न् खिनिॽ सम्धाङ् थारो॥ 25 यहवे दाङ्बे़ल्ले़ खिनिॽ निङ्मिहाॽरे़ खुनिॽ तगि हारि के़द्ये़ॽइर के़याःन्दिॽ॥ खे़ङ्हाॽनु थङ् चोःक्से़ खिनिॽ लत्छा लाम् लाम्बा के़बेगिॽ कर खे़ङ्हाॽलाम् खिनिॽ नुसिलाम् लाम्बा के़घे़त्तासिॽ॥ खिनिॽ के़दुमुम्बान् मे़निसुआङ् इक्सादिङ् खाम्बेःक्कोबा के़रे़क् हाङ्जुम्हाॽ पगि मे़गि॥ 26 खिनिॽ के़सिबा थक्हाॽ ताङ्साङ्बोबा पुहाॽ नु खाम्बेःक्कोबा थक्साहाॽरे़ खुन्छिॽ चामा चा पोङ्ॽ, हे़क्क्याङ् खे़ङ्हाॽ के़नाःप्पा के़देबा हाःत्ताङ् मे़होप्॥ 27 खिनिॽ वेःप्मा मे़न्छुक्के थारिक् यहवे दाङ्बे़ल्ले़ मिस्रबा होॽ, ने़क्सा के़बोबा, होरिक् के़ओॽबा फक्वाले़ःङ्वा नु ने़क्सा के़सोबा तुक्माल्ले़ के़दरिर के़याःन्दिॽ॥ 28 यहवे दाङ्बे़ल्ले़ खिनिॽ नाङ्नाङ् थाप्थाप् लॽमा, मिक्फःम्बा पोङ्मा नु निङ्वाॽ मुदङ् चामा तुक्मे़ल्ले़ के़दरिर के़याःन्दिॽ॥ 29 मिक्फःम्बे़ल्ले़ खामाक्मो ससप् ससप् सप्सुबा कुइसिक् ले़न्दिक् मसेरा खिनिॽ लाङ्गे़घेगिॽ॥ खिनिॽ के़जोगुम्बा के़रे़क् याःम्बक्को खिनिॽ कुलिङ्दो मे़ङ्गे़प्मनाबा के़बोःक्खिॽ॥ खिनिॽ ताङ्गे़से़ःप्पा हाःत्ताङ् होप्पाल्ले़ चोगुल्ले़ खिनिॽ चक्मे़ल्लॽए के़म्युक्ति के़म्नाप्तिॽ॥ 30 खिनिॽनु पान् के़बुॽमाआङ् के़ये़प्मा सिसागे़न् मे़न्छ्यान् वेॽ मनाःल्ले़ तेॽरुॽ हे़क्क्याङ् फे़त्लाःन्दुॽ॥ खिनिॽ के़जोगुम्बा हिम्मो खिनिॽ आप्फेक् युङ्मा के़ङ्घोसुम्मिन्ॽ॥ खिनिॽ चे़ल्ले़क्सेॽ इक्ताप् के़लेःत्तुम्ॽ, खे़ल्ले़ कुजाॽइन् आप्फेक् साॽमा के़ङ्घोसुम्मिन्ॽ॥ 31 खिनिॽ मिक् तगि मे़सोःन्दुबा आप्फेक् पित्छान् खिनिॽ चामा के़ङ्घोसुम्मिन्ॽ॥ खिनिॽलाम् साक्के़ल्ले़क् के़म्नाप्ति के़म्देॽरिबा अदङ्ङिन् मे़न्नुःक्तुन् के़मे़म्बिरिन्ॽ॥ खिनिॽ मे़ल्लुक्किन् खिनिॽ निङ्मिहाॽ मे़बिरुसिॽ, कर खे़न् नुःक्मारे़ लागि हाःत्ले़आङ् के़म्भाॽरिन्ॽ॥ 32 खिनिॽ ये़म्बित्छा मे़न्छुमा साहाॽ वेॽसमा सुवाङ्हाॽ मे़बिरुसिॽ, हे़क्क्याङ् थिक्याःन्धक्मा खे़ङ्हाॽरे़ खुन्छिॽ लाम् ओगे़मे़त्तुम्मिल्ले़ खिनिॽ मिक्किन् हे़ःत्ताङ्बा पोङ्ॽ॥ कर खे़ङ्हाॽ वेॽ लाजेॽलाम् नुःक्मा ताःप्मासि खिनिॽ के़न्छुक्तुम्सिम्मिन्ॽ॥ 33 खिनिॽ लाजेॽओ स्याङ्मे़न्दाङ् के़जोगुम्बा कुजान् कुसेःन् निमे़न्दे़प्मनाबा सुवाङ्हाॽरे़ मे़जमे़देसुॽ, हे़क्क्याङ् खिनिॽग खिनिॽ हिङ्हिङ् साॽरिक् ताप्फे़ःल्लिक् के़म्मे़त्तिआङ् के़म्युक्तिॽ॥ 34 खिनिॽ मिक्किल्ले़ निसुबा नियारा पाःन्हाॽ ओगे़मे़त्तुम्मिल्ले़ खिनिॽ के़नाक्खि के़बेगिॽ॥ 35 यहवे दाङ्बे़ल्ले़ खिनिॽ थुङ्बोॽ नु लाङ् हे़क्क्याङ् थे़गेःक्काङ् यो लाङ्दाप्पेॽओ थारिक् के़वाम्बा, मे़न्वेःप्मनाबा के़दुक्पा होॽइल्ले़ के़दुगिर के़याःन्दिॽ॥ 36 खिनिॽ नु खिनिॽ युक्तिङ् के़जोगुम्बा हाङ्ङिन्, खिनिॽ नु खिनिॽ पाधे़बाहाॽरे़ कुसेःन् मे़न्निःत्तुन्छिम्बा सुवाङ्हाॽरे़ खुनिॽ लुम्मो यहवे दाङ्बे़ल्ले़ के़नाःत्ति के़देसिॽ, खम्भ्याङ् खे़प्मो सिङ् नु लुङ् माङ्हाॽ खिनिॽ से़वा के़मे़त्तुम्सिम्ॽ॥ 37 यहवे दाङ्बे़ल्ले़ खिनिॽ के़नाःत्ति के़देसिबा के़रे़क् मे़न्छाम् सुवाङ्हाॽरे़ खिनिॽ के़म्निसिआङ् चिजिङ् यङ्मा मे़सिःॽ, हे़क्क्याङ् लत्छा येःप्मा नु कुनामे़न्छाॽ मे़प्मा चाहाक् के़बोःक्खिॽ॥ 38 इक्ताप्पो खिनिॽ यरिक् याॽरिःम्बा के़हेॽरुम्ॽ, कर चबे़ःत्छिक्लक् कुजा के़सुप्सुम्ॽ, थेआङ्भे़ल्ले़ निःङ्घुक्वाहाॽरे़ खे़न् मुरे़क् खारे़क् मे़जोगुॽ॥ 39 खिनिॽ चे़ल्ले़क्सेॽ इक्ताप् के़गेःत्तुम्ॽ हे़क्क्याङ् कुजाॽ थोःक्ल के़याःन्दुम्ॽ, कर खिनिॽ चे़ल्ले़क्सेॽ सेजःङ्वा थुङ्मा नु चे़ल्ले़क्सेॽ सुम्मा के़ङ्घोसुम्मिन्ॽ, थेआङ्भे़ल्ले़ फेॽबाःत्हाॽरे़ खे़न् मे़जमे़देसुॽ॥ 40 लाजेॽ के़रे़क् खिनिॽ चैतुनहाॽ के़लेःत्तुम्ॽ, कर खिनिॽ निःङ्गेॽ युमा के़ङ्घोसुम्मिन्ॽ, थेआङ्भे़ल्ले़ चैतुने़ल्ले़ कुजाॽहाॽ खाम्बाङ्ङो मक्थाबेःक्॥ 41 खिनिॽ ये़म्बित्छा मे़न्छुमा साहाॽ मे़वाॽ, कर खिनिॽ खे़ङ्हाॽ कप्मा के़ङ्घोसुम्सिमिन्ॽ, थेआङ्भे़ल्ले़ खे़ङ्हाॽ मे़दे़म्सु मे़देॽरुसिॽ॥ 42 खिनिॽ सिङ्बुङ्हाॽ नु लाजेॽओबा कुजाहाॽ के़रे़क् निःङ्घुक्वाहाॽरे़ मुरे़क् खारे़क् मे़जोगुॽ॥ 43 खिनिॽ लुम्मो याङ्गे़धोःक्पा वेॽ लाजेॽबान् खिनिॽनुःल्ले़ थोधोक्पा पोङ्ल पेक्, कर खिनिॽ योयोक् के़बोःक्खिर के़बेगिॽ॥ 44 खे़ल्ले़ खिनिॽ सिङ्नात् के़बिरिॽ, कर खिनिॽ खे़न् सिङ्नात् के़म्बिरुम्मिन्ॽ॥ खे़न्ग तगाङ् पोङ्ॽ, कर खिनिॽग एगाङ् के़बोःक्खिॽ॥ 45 यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा इङ्जाङ्हाॽ नु थिम्हाॽ तिम्मा नाःप्मा के़न्दे़न्दिन्नाङ् खुने़ॽ कुबाःन्जाक्किन् के़न्इःत्तुम्मिन् के़न्नाःत्तुम्मिन्बाल्ले़ चोगुल्ले़ खिनिॽ मे़म्मे़क्के थारिक् कन् के़रे़क् माङ्दे साङ्ग्राहाॽ खिनिॽ सम्धाङ् थाआङ् तुक्खेओ के़ध्ये़ॽइरो॥ 46 खिनिॽ नु खिनिॽ थिन्दाङ् सायोबोराहाॽरे़ खुन्छिॽ सम्धाङ् सदादिङ्ले़ लागि खे़न् मिक्सेःन्हाॽ नु ने़हिरे़ मे़न्धाप्मनाबा पाःन्हाॽ पोङ्ॽ॥ 47 खिनिॽ के़रे़क् पाःन्हाॽ वे़त्ते़सरे़ के़गत्तुम्मिल्ले़ खिनिॽ निङ्वाॽ त्ये़र यहवे दाङ्बा खिनिॽ निङ्वाॽफुमाङ्ङिन् माङ्से़वा के़म्मे़त्तुम्मिन्ॽ॥ 48 कल्ले़चोगुल्ले़ साक्मे़न्जा, वमे़न्धुङ्, ले़क्चाॽ नु के़रे़क् पाःन्हाॽरे़ कुहोःप्मा कुसाक्मो के़ध्ये़ॽइआङ् यहवे दाङ्बे़ल्ले़ खिनिॽ तक्ले़ङ्वाओ पाङ्घु तासुसिबा निङ्मिहाॽ याःम्बक् के़जोगुम् के़बिरुम्सिम्ॽ॥ खुने़ॽ खिनिॽ खाप्पुथ्यःङ् के़म्मे़क्खिन्ल थारिक् खिनिॽ फक्ताङ्ङो फे़न्जेॽ खे़ःप्सिङ्ङिन् फत्छु के़बिरिॽ॥ 49 यहवे दाङ्बे़ल्ले़ माःङ्घालाम्, इक्सादिङ् खाम्बेःक्माल्ले़ नासमा कुयाओनु सुबुबुना कक्कफिःक्माल्ले़ मु फत्तुबा कुइसिक् खिनिॽ कुसिङ् के़न्निःत्तुम्मिन्बा पाःन्दाङ् के़बाःप्पा लत्छा सुवाङ्समा मनाहाॽ खिनिॽ तक्ले़ङ्वाओ तारुसिॽ, 50 कुलुङ्माॽओ कुम्ब्रिक् के़युङ्बा सुवाङ्समा मनाहाॽरे़ काप्पो तुम्साहाॽ नामे़न्छाॽरुसिन्ॽ हे़क्क्याङ् हिन्जाॽबित्छाॽहाॽ खुन्छिॽ लुङ्माॽ स्याःत् मे़ल्लॽने़न्ॽ॥ 51 हे़क्क्याङ् खे़ङ्हाॽरे़ खिनिॽ पित्थक्साहाॽओबा कुम्बाबा कुम्मामा पित्सात्हाॽ नु मे़ल्लुक् मे़ःन्दाहाॽओबा मे़ल्लुक् मे़ःन्दसाःत्हाॽ हे़क्क्याङ् खिनिॽ लाजेॽओबा कुजाहाॽ खिनिॽ के़मे़गिर यारिक् मे़जमे़देसुॽ॥ खिनिॽ खाप्पुथ्यःङ् के़बोःक्खिर यारिक् कुजा, कुबोक् चे़ल्ले़क्सेॽ सेजःङ्वा, चैतुन निःङ्गेॽ, पित्थक्साहाॽओबा कुम्बाबा कुम्मामा पित्सात्हाॽ इग्र मे़ल्लुक् मे़ःन्दाहाॽओबा कुम्बाबा कुम्मामा मे़ल्लुक् मे़ःन्दसाःत्हाॽओ कुभा थेआङ् मे़ल्ले़रुन्ॽ॥ 52 खिनिॽ के़रे़क् ये़क्यक्हाॽ किर्गप् मे़गबु मे़ने़स्सुॽ, हे़क्क्याङ् खिनिॽ ताःक्पो के़युक्खुम्बा लाजेॽ के़रे़क्पा केःम्बा लुङ्धाक्हाॽ खे़ङ्हाॽरे़ मे़लुःन्दुॽ॥ यहवे दाङ्बा खिनिॽ निङ्वाॽफुमाङ्ङिल्ले़ पिमा के़इःत्तिबा के़रे़क् लाजेॽ कुले़ःम् खे़ङ्हाॽरे़ ये़क्यक्हाॽ थक्मा खिनिॽ किर्गप् के़म्गबिॽ॥ 53 किर्गप् के़म्गबिबा ये़म्मो खिनिॽ निङ्मिहाॽरे़ तुक्खे के़म्जाःत्तिबाल्ले़ चोगुल्ले़ यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा मुॽइदाङ्सा, आप्फेक् साहाॽआङ् खिनिॽ के़जाम्सिम्ॽ॥ 54 खिनिॽओबा के़रे़क्नुःल्ले़ कुसुत्ना के़नुॽबा नु साॽरिक् सिम्सिम्बा मनाःल्ले़आङ् आप्फेक् कुन्साॽ, खुने़ॽ लुङ्माॽ तुक्तुमा कुमेःत्तिन् हे़क्क्याङ् के़दाङ्बा अङे़ःक्वा कुस्सा कुएहाॽ लुङ्माॽ मे़दुक्तुसिन्ॽ॥ 55 कम्भ्यारिक् साॽरिक्काङ् पोङ्ॽ, खुने़ॽ चर युङ्बा अङे़ःक्वा कुस्साहाॽलाम्बाबा सान् वेॽ हाःत्ताङ् मे़बिरुन्ॽ॥ निङ्मिहाॽरे़ खिनिॽ ये़क्यक्हाॽ किर्गप् मे़गबु मे़ने़स्सुबा साॽरिक् यम्बा तुक्खेओ खे़न् मनाओ वेॽ थे़माःन्नाङ् मे़दाङ्ने़न् मे़याःक्ने़न्ॽ॥ 56 खिनिॽओबा कुसुत्ना के़नुॽबा नु साॽरिक् सिम्सिम्मा, खाम्बाङ्ङोआङ् कुलाङ्योक् मे़न्धामनामा कुसुत्ना के़नुॽमा नु सिम्सिम् के़लॽमा मे़न्छुमाःल्ले़ खुने़ॽ कुये़म्बाःन् नु आप्फेक् कुस्साहाॽ 57 खुने़ॽ कुस्सा याङ्दाङ्ङोलाम् के़लःम्बा पे़ॽहिःन् नु खुने़ॽ थाप्तुसिबा आम्ब्रे़ःङ्वा कुस्साहाॽलाम्बाबा साःन्नाङ् चामारे़ लागि पिमासि मे़दे़न्ने़न्ॽ॥ खुने़ॽ कुसक्मा हिःक्हिःक् के़लॽमा पोङ्ॽ, थेआङ्भे़ल्ले़ खे़न् किर्गप् कप्मा ये़म्मो निङ्मिहाॽरे़ खिनिॽ के़रे़क् ये़क्यक्हाॽओ खिनिॽ तुक्खे के़म्जाःत्तिबा साॽरिक् यम्बा तुक्खेओ खे़ल्ले़ स्वाःत्ताङ् खे़न् सान् आप्फेक् चामा निङ्वाॽ चोगुॽ॥ 58 यहवे दाङ्बा खिनिॽ निङ्वाॽफुमाङ्ङिल्ले़ मिमिदिङ्गे़न् किप्मागे़घुबा कुमिङ्ङो के़ङ्गिसिन् हे़क्क्याङ् खिनिॽ कन् साप्पन्नो साप्ते़बा साम्योथिम् इङ्जाङ्ङोबा के़रे़क् कुबाःन्जाक्हाॽ सिङ्सिङ् ये़क्ये़क्काङ् के़न्इःत्तुम्मिन् के़न्नाःत्तुम्मिन्ने़भग्र, 59 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ नु खिनिॽ अङे़ःक्वा साहाॽओ किप्मागे़घुबा, थःप्मे़न्दे़प्मनाबा नु चक्मे़ल्लॽमनाबा तुक्खेहाॽ हे़क्क्याङ् हारावराॽ मे़न्वेःप्मनाबा साॽरिक् यम्बा तुक्माहाॽ तारुरो॥ 60 मिस्रबा तुक्माहाॽलाम् खिनिॽ के़गिसिआङ् वये़, खे़न् के़रे़क् तुक्माहाॽ खुने़ॽ खिनिॽओ तारुरो, हे़क्क्याङ् खे़न् तुक्माहाॽ खिनिॽओ खिम्सिङ्ॽ॥ 61 कन् साम्योथिम् इङ्जाङ् साप्पन्नो साप्ते़आङ् के़बप्पा के़रे़क् परिक्पा तुक्मा नु के़साक्पा तुक्खेहाॽआङ् खिनिॽ मे़म्मे़क्के थारिक् यहवे दाङ्बे़ल्ले़ खिनिॽओ तारुॽ॥ 62 तगि खिनिॽ ताङ्साङ्बोबा खेसेबाहाॽ यारिक् के़वाॽबाहाॽ सुःल्लिक् थिक्लक् के़दाङि के़याःक्तिॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ कुबाःन्जाक्किन् खिनिॽ इःप्मा नाःप्मा के़न्दे़न्दिन्॥ 63 यहवे दाङ्बाल्ले़ कुनिङ्वाॽ त्ये़र खिनिॽ नुॽमा तामा नु के़बोःन्दि के़धे़ॽरिर चोगु, आल्ल हे़क्केलॽरिक्के खुने़ॽ कुनिङ्वाॽ तार खिनिॽ खाप्पुथ्यःङ् के़जोगिआङ् के़मे़क्खिॽ॥ हे़क्क्याङ् खिनिॽ युक् चोःक्मारे़ लागि लाःप्मा के़जोगिबा लाजेॽलाम् खिनिॽ हाॽयाक् के़आगिॽ॥ 64 खे़ब्याङ् इक्सादिङ् खाम्बेःक्माल्ले़ लत्छा कुयाओनु वेॽसमा कुयाओ थारिक् वेॽ वेॽ मे़न्छाम् सुवाङ्हाॽरे़ खुन्छिॽ लुम्मो यहवे दाङ्बे़ल्ले़ खिनिॽ फुत्छिङ्ज्याङ् के़से़सिॽ॥ खे़प्मो खिनिॽआङ् कुसिङ् के़न्निःत्तुम्सिम्मिन्बा हे़क्क्याङ् खिनिॽ पाधे़बाहाॽरे़आङ् कुसिङ् मे़न्निःत्तुसिन्बा सिङ् नु लुङ्लाम् मे़जोगुसिबा वेॽ माङ्हाॽ खिनिॽ से़वा के़मे़त्तुम्सिम्ॽ॥ 65 खे़न् मे़न्छाम् सुवाङ्हाॽरे़ खुन्छिॽ लुम्मो नुरिक् तारिक्काङ् युङ्मा के़ङ्घोसुम्मिन्, हे़क्क्याङ् खिनिॽ लाङ्तोॽभेत् नाःम्मादे़न्नाङ् के़ङ्घोसुम्मिन्॥ खे़प्मो यहवे दाङ्बे़ल्ले़ खिनिॽ निङ्वाॽ तुक्खे चामा, हाङ्मारे़ हाङ्मारे़ मिक्को सुरित् लाःप्मा नु निङ्वाॽ स्रोःन् के़लॽबा चोगु के़बिरिॽ॥ 66 खिनिॽ चक्मे़ल्लॽए योनाधोबा के़बोःक्खिआङ् के़हिङिॽ॥ से़न्दिक् ले़न्दिक् किमारे़ चिरिम्लिम्ना के़यक्खिॽ हे़क्क्याङ् आसिसिबा किमे़ल्ले़ खिनिॽ चक्मे़ल्लॽए के़गिसिॽ॥ 67 खिनिॽ निङ्वाॽओ पगि के़गिसिबाल्ले़ चोगुल्ले़ हे़क्क्याङ् खिनिॽ मिक्किल्ले़ निसुबा नियाराःल्ले़ चोगुल्ले़ तानाम् खिनिॽ अक्खे के़बाःत्तुम्ॽ, “युःन्छिक् पोङ्ङिल्ले़गमे़न् नुॽबामे़न्!” हे़क्क्याङ् युःन्छिक् के़बाःत्तुम्ॽ, “तानाम् खाओःत्तिल्ले़गमे़न् नुॽबामे़न्!” 68 यहवे दाङ्बे़ल्ले़ खिनिॽ मिस्र लाजेॽओ याङ्ना मे़नुःक्निङ्ङिन् पाःत्तुआङ् वये़साङ् वालाधाहाॽलाम् खुने़ॽ खे़प्मो याम्मो याङ्ना के़बाङ्घिॽ॥ खे़प्मो निङ्मिहाॽरे़ खुन्छिॽ हुक्को योग्बा योःग्मा पोङ्मारे़ लागि खिनिॽ आप्फेक् सङ्मासिङ् तम्सिङ् के़जोगुम्ॽ, कर हाःत्ले़आङ् खिनिॽ के़न्इङिन्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.