साम्योथिम् इङ् 27 - लिम्बुएबाल थे़गुओबा ले़त्ति तोःम्मादे़न् 1 मोसाःन्, इस्राइलबा लाम्लोबाहाॽनु ये़म्सिङ्ङाङ् मनाहाॽ अक्तङ्बा इङ्जाङ् पिरुसि, “आङ्गाॽ आइन् खिनिॽ पिनिङ्बा के़रे़क् इङ्जाङ्हाॽ इःत्ते़म् नाःत्ते़म्मे़ॽ॥ 2 आल्ल यर्दन वहःङ्ङिन् के़गाःक्तुम्माङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिआङ् ने़बा लाजेॽओ के़गे़रिॽ, खे़बे़ल्ले़ यम्बयम्बा लुङ्हाॽ तक्पे़त् ये़प्साम्मे़ॽआङ् सिबुत्ते़ल्ले़ हिप्ते़म्मे़ॽ॥ 3 खिनिॽ थाःक्थे़बाहाॽरे़ खुन्छिॽ यहवे दाङ्बा निङ्वाॽफुमाङ्ङिल्ले़ माङ्हुप् चोगुबा कुइसिक् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिआङ् ने़बा, पित्नु नु सक्वाघु के़गुङ्बा लाजेॽओ के़लासिबा ये़न्नो कन् साम्योथिम् इङ्जाङ्ङोबा पाःन्जाःक्हाॽ कप्मो साप्ते़म्मे़ॽ॥ 4 यर्दन नाधाःम्बि के़गे़रिबा ये़न्नो आङ्गाॽ आइन् इङ्जाङ् पिनिङ्बा कुइसिक् कन् लुङ्हाॽ एबाल थे़गुओ ये़प्साम्मे़ॽआङ् सिबुत्ते़ल्ले़ हिप्ते़म्मे़ॽ॥ 5 “खे़ब्याङ् आम्भा खे़प्मो यहवे दाङ्बा खिनिॽ निङ्वाॽफुमाङ्ङिल्ले़ कुलागि लुङ्ङिल्ले़न् ले़त्ति तोःम्मादे़न् चोगे़म्मे़ॽ॥ खे़प्मो फे़न्जेॽ सार्दाम् मे़याङाम्मिन्ने़ॽ॥ 6 यहवे दाङ्बा खिनिॽ निङ्वाॽफुमाङ्ङो ले़त्ति तोःम्मादे़न्निन् इक्ताप्पोबा लुङ्हाॽलाम् चोगे़म्मे़ॽ, हे़क्क्याङ् खे़प्मो यहवे दाङ्बा खिनिॽ निङ्वाॽफुमाङ्ङिल्ले़ कुलागि मिधिङ्मनादेमनाबा सिदुङ्जभा तोःन्दे़म्मे़ॽ॥ 7 खिनिॽ तङ्जुम् वयागे़न् सिदुङ्जभा तोःन्दे़म्मे़ॽआङ् हाबा खे़प्मो चे़म्मे़ॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुदगि सोसोःत् लराङ् चोगे़म्मे़ॽ॥ 8 खिनिॽ के़ये़प्सुम्बा खे़न् लुङ्हाॽओ कन् साम्योथिम् इङ्जाङ्ङोबा के़रे़क् इङ्जाङ्हाॽ नुरिक्काङ् साप्ते़म्मे़ॽ॥” 9 खे़ब्याङ् मोसान् नु ले़बिःल्ले़ कुधाःक्कोबा निङ्वाॽफुसाम्बाहाॽरे़ के़रे़क् इस्राइलिहाॽ अक्खे मे़मे़त्तुसि, “इस्राइलिसे, स्वाःत् युङे़म्मे़ॽआङ् खे़प्से़म्मे़ॽ! आइन् यहवे दाङ्बा खिनिॽ निङ्वाॽफुमाङ्ङिल्ले़ आप्फेक् कुमना के़बोःक्खिआङ् वाॽ॥ 10 आङ्गाॽ आइन् इङ्जाङ् पिनिङ्बा कुइसिक् यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ् नु कुधिम्हाॽ इःप्मा नाःप्मा ते़न्दे़म्मे़ॽआङ् खुने़ॽ कुबाःन्जाक्किन् इःत्ते़म् नाःत्ते़म्मे़ॽओ॥” एबाल थे़गुओबा माङ्दे साङ्ग्राहाॽ 11 हाबा खे़न् ये़न्नो मोसाःल्ले़ मनाहाॽ अक्तङ्बा इङ्जाङ् पिरुसि, 12 “यर्दन नाधाःम्बि के़गाःक्तुम्माङ् एगाङ् सिमियोन, ले़बि, यहुदा, इस्साखार, युसुफ नु बेन्यामिने़न् मनाहाॽ हाङ्वागे़न् मुॽइसाम् पिमासिरे़ लागि गिरिज्जिम कोःक्माओ ये़बे़म्मे़ॽ॥ 13 रुबेन, गाद, आसेर, जबलुन, दान नु नप्तालिन् एबाल कोःक्माओ ये़बे़म्मे़ॽआङ् माङ्दे साङ्ग्रा मे़त्ताम्सिम्मे़ॽ॥ 14 “हे़क्क्याङ् ले़बिःल्ले़ कुमुॽइदाङ्साहाॽरे़ इस्राइलबा के़रे़क् मनाहाॽ यम्बा इक्लाःल्ले़ अक्खे मे़मे़त्तुसिआङ् उवा मे़जोगुसिररो, 15 “‘चोबेगुःल्ले़ चोगुबा हे़क्के लक्मनाबा इग्र योःम्मनाबा यहवे दाङ्बे़ल्ले़ कुसिक्के़ले़ःङ्बा नावाइत्लान् स्वाःत्ताङ् के़युङ्बा मनान् साङ्ग्रारे़ ते़त्तुररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 16 ‘आप्फेक् कुम्बा कुम्मा कुनामे़न्छाॽ के़मे़प्पा मनान् माङ्दे थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 17 ‘आप्फेक् कुहिम्बेसाङ्बे़ल्ले़ कुइःन्दोओबा लुङ् के़जप्पा मनान् साङ्ग्रा थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 18 ‘कुमिक् के़होःप्पान् थिक्नाहाङ् लाम् ओःन्गे़धाक्पा मनान् माङ्दे थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 19 ‘वेॽ लाजेॽबा, ये़त्छाबा ये़त्छामा नु मेमेदुमाहाॽरे़ कुदोःप्मा खासे़न् मे़न्लोःम्मनाबा मनान् साङ्ग्रा थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 20 ‘आप्फेक् कुम्बारे़ कुमेःत्हाॽनु के़इम्बा मनान् माङ्दे थाररो॥ थेआङ्भे़ल्ले़ खे़ल्ले़ आप्फेक् कुम्बारे़ कुइप्नान् कुनामे़न्छाॽ मे़त्तुरो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 21 ‘थक्सा मेःत् के़मे़प्पा मनान् माङ्दे थाररो!’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 22 ‘आप्फेक् कुम्बा इग्र कुम्मारे़ कुस्सा मे़न्छुमा, किग्र आप्फेक् कुन्साॽ मे़न्छुमान् मेःत् के़देॽबा मनान् साङ्ग्रारे़ ते़त्तुररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 23 ‘आप्फेक् कुन्नुःप्मे़न् मेःत् के़देॽबा मनान् माङ्दे थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 24 ‘स्वाःत्ताङ् कुहिम्बेसाङ्बा मना के़से़प्पे़न् साङ्ग्रा थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 25 ‘कुदोःप्मा मनान् से़प्मारे़ लागि स्वाःत् सुरुत्याङ् के़जाबा मनान् साङ्ग्रा थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥ 26 ‘कन् साम्योथिम् इङ्जाङ्ङोबा पाःन्जाःक्हाॽ कुलिङ्दो के़त्ल मे़न्इःप्मना मे़न्नाःप्मनाबा मनान् माङ्दे थाररो॥’ खे़ब्याङ् के़रे़क्ले़ ‘आमिन्!’ मे़बाःत्तुररो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.