साम्योथिम् इङ् 26 - लिम्बुके़रे़क्नुःल्ले़ तगि के़दुम्बा कुजान् थिबोङ्लक् तोःम्मा 1 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ आप्फेक् युक्को पिमा के़इःत्तिबा लाजेॽओ के़गे़रिआङ् खे़न् के़युक्तुम्ॽ हे़क्क्याङ् खिनिॽ खे़प्मो के़युङिआङ् एगाङ् 2 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिआङ् ने़बा लाजेॽओलाम् के़बोःक्पा के़रे़क् परिक्पा तगि के़दुम्बा कुजान् लत्छा नाॽइमाओ याक्ते़म्मे़ॽ हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ आप्फेक् कुमिङ् युङ्मारे़ लागि सेगुबादे़न्नो तेॽरे़म्मे़ॽ, 3 हे़क्क्याङ् खे़न् ये़म्मोबा निङ्वाॽफुसाम्बाओ पेगे़म्मे़ॽआङ् मे़त्ते़म्मे़ॽ, “खुने़ॽ आनिगे पिनिङ् मे़त्तिगे़आङ् आनिगे पाधे़हाॽनु चोगुबा माङ्हे़क् लाजेॽओ आङ्गाॽ के़राङ् फाॽआङ् यहवे दाङ्बा के़निङ्वाॽफुमाङ्ङिल्ले़ कुदगि आङ्गाॽ उवा चोगुङ्ॽ॥” 4 खे़ब्याङ् निङ्वाॽफुसाम्बे़ल्ले़ खिनिॽ हुक्कोलाम् खे़न् नाॽइमान् याङ्सिङाङ् यहवे दाङ्बा खिनिॽ निङ्वाॽफुमाङ्ङिल्ले़ कुलागि ले़त्ति तोःम्मादे़न्निल्ले़ कुदगि युक्खुॽ॥ 5 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ कुदगि खिनिॽ अक्खे पाःत्ते़म्मे़ॽ, “आङ्गाॽ आदाक्थे़बान् ताक्के़बे़ॽबाआङ् के़वाॽबा अरामि वये़॥ खुने़ॽ सुःल्लिक् कुहिम्सयङ्हाॽनु मिस्रओ पेआङ् वेॽ लाजेॽबा पोःक्खे़॥ हे़क्क्याङ् खे़प्मो खुने़ॽलाम् लत्छा पयम् यम्बा, मुक्साम्बा नु आत्तातान्ने निःप्मे़न्दे़प्मनाबा सुवाङ् पोःक्खे़॥ 6 कर मिस्रिहाॽरे़ ताप्फे़ःल्लिक् मे़मे़त्तिगे़आङ् आनिगे तुक्खे मे़जाःत्तिगे़, हे़क्क्याङ् साॽरिक् के़साक्पा योःक्को मे़भत्छिगे़॥ 7 खे़ब्याङ् आनिगे यहवे दाङ्बा आनिगे थाःक्थे़बाःल्ले़ कुनिङ्वाॽफुमाङ्ङिन् पेलि फाक्तुम्बे़, हे़क्क्याङ् खुने़ॽ आनिगे इक्लान् खे़प्सु खम्भ्याङ् आनिगे तुक्खे लाक्खे, स्याङ्मे़न्दाङ् चोगुम्बे़बा याःम्बक्किन् नु आनिगे सम्धाङ् पोःक्खे़बा पाःन्निन् निसु॥ 8 कल्ले़चोगुल्ले़ यहवे दाङ्बे़ल्ले़ के़धुम्बा नु मुक्साम्साबा कुहुक्किन् सन्छुआङ् यम्बा किप्मा के़घुबा मे़क्मासिमा, निङ्वाॽ के़माबा मिक्सेन् नु ने़हिरे़ मे़न्धाप्मनाबा याःम्बक्हाॽ ओसेःन्धाङ् चोगु हे़क्क्याङ् मिस्रलाम् आनिगे लःत्तिगे़ फे़त्तिगे़॥ 9 खुने़ॽ आनिगे कन् ते़न्नो फे़त्तिगे़आङ् कन् पित्नु नु सक्वाघु के़गुङ्बा लाजेन् पिरिगे़॥ 10 आल्ल यहवे दाङ्बाए, आङ्गाॽ के़बिराङ्बा लाजेॽओबा तगि के़दुम्बा कुजान् खे़ने़ॽओ तारुङ्ङाङ् वाॽरो॥” यहवे दाङ्बा खिनिॽ निङ्वाॽफुमाङ्ङिल्ले़ कुदगि खे़न् नाॽइमे़न् युक्खे़म्मे़ॽ हे़क्क्याङ् साबन् हबत् फन्नासिम्मे़म्मे़ॽआङ् खुने़ॽ से़वा मे़त्ते़म्मे़ॽ॥ 11 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ नुःब्नुबा पाःन्हाॽ खिनिॽ नु खिनिॽ हिम्सयङ्हाॽ के़बिरिआङ् वाॽ, खे़न् के़रे़क् पाःन्हाॽरे़ लागि खिनिॽ, ले़बिःल्ले़ कुमुॽइदाङ्साहाॽरे़, हे़क्क्याङ् खिनिॽनु के़युङ्बा वेॽ लाजेॽबाहाॽआङ् सोसोःत् लराङ् मे़लॽर॥ 12 सुम्सिगेक्पा तङ्बेओ खिनिॽ पोगुगे़न् कुजाहाॽरे़न् कुत्चिबा थिबोङ्लक् के़दोःन्दुम्ल पोङ्ॽ॥ कन् तङ्बेओबा खिनिॽ के़रे़क् थिबोङ् लक्हाॽ ले़बिःल्ले़ कुमुॽइदाङ्साहाॽ, वेॽ लाजेॽबा, ये़त्छाबा ये़त्छामा नु मेमेदुमाहाॽ पिरे़म्सिम्मे़ॽ, हे़क्केलॽरिक् खिनिॽ ये़क्यक्हाॽओ खे़ङ्हाॽरे़ खे़न् मे़जआङ् खुन्छिॽ सिक्एःप्तुर॥ 13 खे़न् एगाङ् यहवे दाङ्बा खिनिॽ निङ्वाॽफुमाङ्ङिन् अक्खे मे़त्ते़म्मे़ॽ, “आङ्गाॽ आहिम्मोलाम् सेसे कुलक् लःत्तुङ्ङाङ् खे़ने़ॽ के़इङ्जाङ् कुइसिक् ले़बिःल्ले़ कुमुॽइदाङ्साहाॽ, वेॽ लाजेॽबा, ये़त्छा होॽदोःक् नु मेमेदुमाहाॽ पिरुङ्सिङ्ङाङ् वाॽआ॥ आङ्गाॽ खे़ने़ॽ आत्तिन् के़इङ्जाङ्हाॽआङ् मे़न्भेःन्ने वाॽआ, हे़क्क्याङ् खे़ङ्हाॽओ आत्तिन्नाङ् निङ्वाॽमे़म्मुःन्ने वाॽआ॥ 14 मे़रिङ्धक्मा ये़म्मो खे़न् सेसे लक्कोलाम् आङ्गाॽ थे़माआङ् मे़न्जाए कत्तुङ्ॽ, आसुत्थो पोःक्खाङ्बा ये़म्मोआङ् खे़प्मोलाम् थे़माआङ् मे़ल्लःत्ते कत्तुङ्ॽ, खे़प्मोलाम् के़सिबाहाॽओ थे़माआङ् मे़न्दोःन्ने वाॽआ॥ यहवे दाङ्बा आङ्गाॽ आनिङ्वाॽफुमाङ्ङिल्ले़ के़बाःन्जाःक्किन् इःत्तुङ् नाःत्तुङ्ङाङ् वाॽ, हे़क्क्याङ् खे़ने़ॽ के़रे़क् के़इङ्जाङ्हाॽ के़त्तुङ्ङाङ् वाॽ॥ 15 खे़ने़ॽ के़सेसे युङ्दे़न् साङ्ग्राम्पेदाङ्लाम् ओमे़त्ते़ॽआङ् खे़ने़ॽ के़मना इस्राइलिहाॽ हाङ्वागे़न् मुॽइसाम् पिरे़से़ॽ॥ हे़क्क्याङ् आदाङ्बारे़ आनिगे सुधे़बा ताक्थे़बाहाॽनु माङ्हे़क् के़जोगुआङ् माङ्हुप् के़जोगुबा आनिगे याप्मि के़बिरे़बा पित्नु नु सक्वाघु के़गुङ्बा लाजेःन्नाङ् हाङ्वागे़न् मुॽइसाम् पिरे़ॽओ॥” यहवे दाङ्बे़ल्ले़ आप्फेक् कुमना 16 आम्भा कन् थिम्हाॽए इःत्ते़म् नाःत्ते़म्मे़ॽ फाॽआङ् यहवे दाङ्बा खिनिॽ निङ्वाॽफुमाङ्ङिल्ले़ आइन् खिनिॽ इङ्जाङ् के़बिरिॽ॥ खे़न् इङ्जाङ्हाॽ खिनिॽ के़रे़क् सिक्लुङ्माॽ नु निङ्वाॽओ ये़क्ये़क्काङ् इःत्ते़म् नाःत्ते़म्मे़ॽ॥ 17 यहवे दाङ्बे़न् आनिगे निङ्वाॽफुमाङ्लो, आनिगे खुने़ॽ कुलाम्मो लाङ्घेगिगे़ हे़क्क्याङ् खुने़ॽ कुसाक्थिम्, कुइङ्जाङ् नु कुधिम्हाॽ तिम्दुम्बे़, खे़ब्याङ् खुने़ॽ कुबाःन्जाक्किन् इःत्तुम्बे़ नाःत्तुम्बे़ फाॽआङ् आइन् निःन्धो के़जोगुम्माङ् के़वयिॽ॥ 18 हे़क्क्याङ् आइन् यहवे दाङ्बे़ल्ले़ कुमाङ्हुप् कुइसिक् खिनिॽ खुने़ॽ आप्फेक् कुमना नु इमे़ल्लुङ्बा कुयाङ्साकुन्धे के़बोःक्खिआङ् के़वयि हे़क्क्याङ् खिनिॽ खुने़ॽ कुइङ्जाङ्हाॽ के़इःत्तुम् के़नाःत्तुम्लए पोङ्ॽ फाॽआङ् खुने़ॽ उवा चोगुआङ् वाॽ॥ 19 खुने़ॽ चोगुसिबा के़रे़क् मे़न्छाम् सुवाङ्हाॽनुःल्ले़ यरिक् खिनिॽ ने़बो फोमा, मिङ्सो इङ्धाङ् नु मिङ् तिःत्ल याःन्दु के़बिरिॽ, हे़क्क्याङ् खुने़ॽ कुमाङ्हुप् कुइसिक् यहवे दाङ्बा खिनिॽ निङ्वाॽफुमाङ्ङिल्ले़ कुलागि लत्छा सेसेबा सुवाङ् के़बोःक्खिॽ फाॽआङ् खुने़ॽ उवा चोगुआङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.