साम्योथिम् इङ् 25 - लिम्बु1 मनाहाॽरे़ खुनिॽ लुम्मो खे़माॽ पोङ्ङिल्ले़ खे़ङ्हाॽरे़ खे़न् खासे़न्लोःम्मादे़न् हिम्मो मे़देॽरुर हे़क्क्याङ् खासे़न्लोःम्बाल्ले़ खे़न् खे़माॽइन् खासे़न् लोःन्दुर खे़ब्याङ् कुदोःप्मा मनान् ले़रुर हे़क्क्याङ् फे़न्याःम्बक् के़जोःक्पान् आप्तिक्साबा लेःत्तुर॥ 2 आप्तिक्साबा मनान् हिप्मा पोङ्ने़भग्र, खासे़न्लोःम्बाल्ले़ खे़न् सम्बे़त् ने़मा पाङ्घुर हे़क्क्याङ् फे़न्याःम्बक् चोगुबा कुइसिक् ते़ःम्भुक् याक्पाङ्घुसिर, 3 कर लिबोङ् ले़ङ्नुःल्ले़ यरिक् ते़ःम्भुक् याक्मे़बाङ्घुसिन्ल॥ खे़ल्नुःल्ले़ यरिक् ते़ःम्भुक् चाःल्ले़ खिनिॽ मिक्साओ खिनिॽ नुसाॽइन् कुनामे़न्छाॽ पोङ्ॽ॥ 4 याॽ के़धाप्सुम्मिल्ले़ पित्ते़ल्ले़ कुम्ब्राओ चःप्पिल्ले़ मे़सुःप्ते़म्मिन्ने़ॽओ॥ के़मासिङ्बा फुॽनुसाॽहाॽरे़ लागि चोःक्मा के़बोङ्बा याःम्बक् 5 सोरिक् के़युङिबा फुॽनुसाॽहाॽओ कुभा कुस्सा ये़म्बित्छा मे़न्वाॽए मासिङ्ने़भग्र, खे़ल्ले़ कुमेःत्तिल्ले़ लाकात्पा वेॽ सुवाङ्ङो मेःक्खिम् मे़जोगुन्ल॥ के़मासिङ्बे़ल्ले़ए कुन्साॽइल्ले़ खे़न् आप्फेक् मेःत् चोगुर, हे़क्क्याङ् के़मासिङ्बा कुये़म्बाःल्ले़ कुम्भुॽ इग्र कुन्साॽरे़ चोःक्मा के़बोङ्बा याःम्बक्किन् के़त्तुर॥ 6 खे़ल्ले़ कत्तुबा तुम्बा कुस्सान् के़मासिङ्बा कुम्भुॽ इग्र कुन्साॽरे़ कुमिङ् युक्खु पिरुर, हे़क्केलॽरिक् खे़ल्ले़ कुमिङ्ङिन् इस्राइललाम् मे़माने़न्ल॥ 7 कर कुन्छोमिःप्पे़ल्ले़ कुन्ने़ॽद्रेमे़न् युङ्मा निङ्वाॽ मे़जोगुन्ने़भग्र, कुन्ने़ॽद्रेमे़न् ये़क्यक्कोबा यम्बा लाम्धेःप्पो पेःक्काङ् लाम्लोबाहाॽ अक्खे मे़त्तुसिर, “के़सिबा आये़म्बाःल्ले़ कुमिङ्ङिन् कुन्साॽरे़ इस्राइलओ वाॽर के़लॽबा निङ्वाॽ मे़जोगुन्ॽ॥ खे़ल्ले़ आङ्गाॽनु चोःक्मा के़बोङ्बा याःम्बक्किन् मे़जोगुन्ॽ॥” 8 खे़ब्याङ् खे़ल्ले़ कुये़क्यक्कोबा लाम्लोबाहाॽरे़ सुजा मे़बिरुर॥ हे़क्क्याङ् खे़न् आबाङे कुबाःन्नो हादिङ् थक्काङ् “आङ्गाॽ कन् मेःत् मे़देॽआन्” फाॽआङ् अक्खे पाःत्तुने़भग्र 9 कुन्ने़ॽद्रेन् लाम्लोबाहाॽरे़ खुन्छिॽ तगि खुने़ॽओ पेःक्काङ् खे़ल्ले़ए लत्छा कुलाङ्सुःप्पिन् फे़न्दुर हे़क्क्याङ् कुम्ब्राओ थ्याःत् थोःक्तुआङ् अक्खे मे़त्तुर, “आत्तिन् कुम्भुॽकुन्साॽहाॽरे़ खुन्छिॽ हिम्सयङ् फोमा मे़दे़न्ने़न्, खे़न् अक्खेए मे़प्मा पोङ्ॽ॥” 10 हे़क्क्याङ् इस्राइलओ खे़न् ये़म्बित्छाःल्ले़ कुहिम्सयङ्हाॽ अक्खे मे़मे़त्तुसिॽ, “लाङ्सुःप् फे़म्मनाबा हिम्सयङ्सिरो॥ वेॽ थिम्हाॽ 11 “ये़म्बित्छा ने़न्छि चुङ्सिल्ले़ थिक्पारे़ कुमेःत्तिन् ताआङ् आप्फेक् कुये़म्बाःन् नाङ्मारे़ लागि वेॽसमाल्ले़ कुल्धिःम्बे़न् यॽरु पिरुने़भग्र, 12 खिनिॽ खे़ल्ले़ कुहुक्किन् खक्ते़म् पिरे़म्मे़ॽ, खे़न् चबे़ःत्छिक्काङ् लुङ्माॽ मे़दुक्ते़म्मिन्ने़ॽ॥ 13 “लत्छा कुधाङ्मारे़ लागि के़लिःप्पा नु याङ्याङ्बा परिक् परिक्पा कुधाङ्मा खिनिॽ सुक्वाओ मे़गत्ते़म्मिन्ने़ॽ॥ 14 खिनिॽ हिम्मोआङ् लत्छा कुसिःक्मारे़ लागि ने़त्छि परिक्पा यम्बा नु चुक्पा कुसिःक्मा मे़गत्ते़म्मिन्ने़ॽ॥ 15 कर खिनिॽ कुदोःप्मा पासाङ्गा हे़क्क्याङ् के़गे़प्पा कुधाङ्मा नु कुसिःक्मा के़गत्तुम्ल पोङ्ॽ, हे़क्केलॽरिक् यहवे दाङ्बा खिनिॽ निङ्वाॽफुमाङ्ङिल्ले़ के़बिरिआङ् ने़बा लाजेॽओ खिनिॽ थाःक् चाॽर॥ 16 थेआङ्भे़ल्ले़ अक्तङ्बा याःम्बक् के़जोःक्पा इङ्ले़क् के़जोःक्पान् यहवे दाङ्बा खिनिॽ निङ्वाॽफुमाङ्ङिल्ले़ चिःत्तुरो॥ अमाले़किहाॽ से़प्मासि इङ्जाङ् 17 “मिस्रलाम् खिनिॽ के़भे़रिल्ले़ अमाले़किहाॽरे़ लाम्मो खिनिॽ ताप्फे़ःल्लिक् के़म्मे़तिबा पाःन्निन् आप्फाल्ले़आङ् निङ्वाॽ मे़भेःत्छे़म्मिन्ने़ॽ॥ 18 लाम्मो खिनिॽ पना के़नासिबा ये़म्मो खे़ङ्हाॽरे़ खिनिॽ के़म्दुमि हे़क्क्याङ् के़नाबाआङ् एगाङ् के़बप्पाहाॽ के़रे़क् मे़से़रुसि॥ खे़ङ्हाॽरे़ निङ्वाॽफुमाङ्ङिन् मे़ङ्गिरुन्॥ 19 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को पिमा के़इःत्तिबा लाजेॽओ निङ्मिहाॽरे़ थङ्ङो के़म्भत्तिबालाम् नाःम्सिङ्मा के़घोसुम्माङ् इक्सादिङ् खाम्बेःक्मोलाम् अमाले़किहाॽरे़ खुन्छिॽ मिङ् मिक्सेःन्ने मासे़म् पिरे़म्सिम्मे़ॽ॥ कन् पाःन्निन् खिनिॽ आप्फाल्ले़आङ् निङ्वाॽ मे़भेःत्छे़म्मिन्ने़ॽओ!” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.