साम्योथिम् इङ् 24 - लिम्बुनाजङ् नु याम्मो मेःक्खिम् चोःक्मा 1 कुभा ये़म्बित्छाःल्ले़ ते़न्धाम् मेःक्खिम् लगुमा मे़न्छुमाओ कुभा आप्तिक् खोसुॽ हे़क्क्याङ् कुनिङ्वाॽ मे़दाने़न्नाङ् नाजङ् साप्ला साप्तु पिरुॽ खे़ब्याङ् हिम्मोलाम् खे़न् लःत्तुदेसुॽ, 2 हे़क्क्याङ् हिम्मिन् ले़रुआङ् एगाङ् खे़न् वेॽ मनाःल्ले़ कुमेत् पोङ्ॽ 3 हे़क्क्याङ् निसिगेक्पा कुयेम्बाःन्नाङ् कुनिङ्वाॽ मे़दाने़न्नाङ् नाॽरुबा साप्तु पिरुआङ् हिम्मोलाम् खे़न् लःत्तुदेसुॽ इग्र ये़म्बित्छान् आप्फेक् स्ये़ने़भग्र, 4 खे़न् आसुत्थो पोःक्खे़बाल्ले़ चोगुल्ले़ खे़न् के़नाॽबा तगिबा कुये़म्बाःल्ले़ खुने़ॽ याम्मो मेःत् तेॽमा मे़नाॽने़न्लो॥ यहवे दाङ्बे़ल्ले़ कुनिमो कन् लत्छा याम्गे़सिङ्बा चोक्॥ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लक्खोमाओ के़बिरिबा लाजेॽओ लायोल्ले़न् आप्तिक् मे़दारे़म्मिन्ने़ॽओ॥ परिक् परिक्पा थिम्हाॽ 5 खारक् मेःक्खिम् के़जोःक्पा ये़म्बित्छान् थक्सुबा पोङ्से़ मे़बाङ्घे़म्मिन्ने़ॽ इग्र वेॽ याःम्बक्ले़ लागि लक्पे़न् मे़बिरे़म्मिन्ने़ॽ॥ तङ्बे थिक् थारिक् खे़न् कुहिम्मो नाना थोधो मे़ल्लॽए युङ्ल हे़क्क्याङ् खुने़ॽ तारुमा कुमेःत्तिन् कुनिङ्वाॽ तासु पिरुर॥ 6 सिङ्नात्तिल्ले़ कुले़क्वा तिक् हे़क्के लुङ्सुम्मोबा ने़प्माङ् लुङ्हाॽ इग्र थाहाङ्बा लुङ्ङिन्नाङ् मे़देॽरे़म्मिन्ने़ॽ, थेआङ्भे़ल्ले़ खे़न् मनाःल्ले़ कुसाप्पोक् हिङ्मे़न्ने तिक् के़युक्खुम्बा कुइसिक् पोङ्ॽ॥ 7 कुभारे़ आत्तिन् इस्राइलि नुसाॽइन् ते़म्सु तेॽरुआङ् खे़न् योक् चोगुॽ इग्र सङ्घुदेसुने़भग्र, खे़न् के़दे़म्बा के़देॽबा मनान् से़प्मा पोङ्ॽ॥ खिनिॽ लुम्मोलाम् ताप्फे़ःम्बा पाःन्निन् खे़त्ताम्मे़ॽ॥ 8 लोगे तुक्मे़ल्ले़ कुयाःम्बेओग ले़बिःल्ले़ कुधाःक्कोबा निङ्वाॽफुसाम्बाहाॽरे़ खिनिॽ के़म्हुॽरिबा पाःन्हाॽ कुइसिःक्सिःक् चोःक्मा सिङ्सिङ् ये़क्ये़क् के़लॽरिर पोङ्ॽ॥ आङ्गाॽ खे़ङ्हाॽ पिरुङ्सिङ्बा इङ्जाङ्ङिन् खिनिॽ नुरिक्काङ् इःप्मा नाःप्मा पोङ्ॽ॥ 9 मिस्रलाम् खिनिॽ के़भे़रिल्ले़ लाम्मो यहवे दाङ्बा खिनिॽ निङ्वाॽफुमाङ्ङिल्ले़ मिरियम्मिन् मे़त्तुबा पाःन्निन् खिनिॽ निङ्वाॽ इःत्ते़म्मे़ॽ! 10 खिनिॽ हिम्बेसाङ्बे़न् कुभा परिक्पा सिङ्नात् के़बिरुम्मिल्ले़ खे़ल्ले़ युक्खुबा तिक् लासे़ हिम्मो खिनिॽ फुरुत् मे़लासे़म्मिन्ने़ॽ॥ 11 हिम् लाःक्कात्ते खिनिॽ हाङ्घाम्मे़ॽ, हे़क्क्याङ् सिङ्नात् के़देॽबे़ल्ले़ए लाःक्कात् लःत्तु के़बिरिर॥ 12 खे़न् मनान् याङ्गे़साॽबा चोःक्ने़भग्र खे़ल्ले़ तिक् युक्खुबा कुघाम्देःत्तो मे़इप्से़म्मिन्ने़ॽ॥ 13 नाम्धा थारिक्ले़ खिनिॽ खे़न् युक्खुबा तिःक्के़न् नुःक्ते़म् पिरे़म्मे़ॽ, हे़क्क्याङ् खुने़ॽ खे़न् कुघाम्देःत्तो इम्माङ् खिनिॽ मुॽइसाम् के़बिरिर॥ हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुमिक्साओ कन् खिनिॽ लागि साम्योबा पोङ्ल॥ 14 खिनिॽ इस्राइलि नुसाॽसाङ् इग्र खिनिॽ ये़क्यक्को के़दाबाआङ् के़युङ्बा वेॽ लाजेॽबासाङ्, कुभा याङ्गे़साॽबा थेआङ् मे़ङ्गप्मनाबा याःल्लेःक् के़ने़ॽबा के़जाबे़न् मे़न्वाॽमनाबा पाःन्नो मे़घुम्से़म्मिन्ने़ॽ॥ 15 नाम्धामानुःल्ले़ तगिए थिक्याःन्धक् खे़ल्ले़ कुनिम्म्याक्किन् पिरे़म्देसे़म्मे़ॽ, थेआङ्भे़ल्ले़ खे़न् याङ्गे़साॽबा चोक् हे़क्क्याङ् खुने़ॽ कुनिम्म्याक्कोए कुनिङ्वाॽ इगेःक् पत्॥ मेःन्ने़भग्र खे़ल्ले़ खिनिॽ तक्ले़ङ्वाओ यहवे दाङ्बे़न् पेलि फाक्तुने़भग्र, लायोल्ले़ खिनिॽ के़दे़त्तिॽ॥ 16 साहाॽरे़ मे़जोगुबा लायोल्ले़ लागि पामाहाॽ से़प्मासि मे़नुॽने़न् हे़क्क्याङ् पामाहाॽरे़ मे़जोगुबा लायोल्ले़ लागि साहाॽ से़प्मासि मे़नुॽने़न्॥ के़रे़क् मनाहाॽ खुन्छिॽ आप्फेक् फे़न्याःम्बक्किल्ले़ लागि मे़सिरो॥ 17 वेॽ लाजेॽबाहाॽ नु ये़त्छा होॽदोक्हाॽरे़ लागि मे़न्वाॽमनाबा खासे़न् मे़लोःन्दे़म्मिन्ने़ॽ॥ आत्तिन् मेमेदुमाल्ले़ कुघाम्देःत्तिन्नाङ् याङ्ङो मे़युक्खे़म्मिन्ने़ॽ॥ 18 मिस्रओ खिनिॽ योक् के़वयिल्ले़ यहवे दाङ्बा निङ्वाॽफुमाङ्ङिल्ले़ खिनिॽ चोःक्युम्भो के़बिरिबा पाःन्निन् खिनिॽ निङ्वाॽ इःत्ते़म्मे़ॽ॥ कल्ले़चोगुल्ले़ आङ्गाॽ खिनिॽ अक्खे चोःक्मा इङ्जाङ् पिनिङ्बारो॥ 19 इक्ताप्पो कुजा के़हे़गुम्मिल्ले़ कुधःङ्मा थिक् निङ्वाॽ के़भेःत्छुम्ने़भग्र, खे़ल्ले़ कुलासे़ मे़बेगे़म्मिन्ने़ॽ॥ वेॽ लाजेॽबा, ये़त्छाबा होॽदोःक्हाॽ नु मेमेदुमाहाॽरे़ लागि खे़न् ले़रे़म्मे़ॽ, हे़क्केलॽरिक् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को के़रे़क् याःम्बक्को खिनिॽ हाङ्वागे़न् मुॽइसाम् के़बिरिर॥ 20 चैतुन सिङ्बुङ्ङिन् वद्राःल्ले़ के़हिप्तुम्ॽ हे़क्क्याङ् खे़ल्ले़ कुजाॽइन् के़धासुम्माङ् एगाङ् याम्मो निले़ङ् कुबोराक्कोलाम् कुजाॽइन् मे़धासे़म्मिन्ने़ॽ॥ वेॽ लाजेॽबा, ये़त्छा होॽदोःक्हाॽ नु मेमेदुमाहाॽरे़ लागि खे़न् के़नम्बाहाॽ ले़रे़म् पिरे़म्सिम्मे़ॽ॥ 21 खिनिॽ चे़ल्ले़क्सेॽ इक्ताप्पोबा चे़ल्ले़क्सेॽ के़दुबुम्मिल्ले़ याम्मो निले़ङ् सुरुक् वरुक् मे़सुःन्दे़म्मिन्ने़ॽ॥ वेॽ लाजेॽबा, ये़त्छा होॽदोःक्हाॽ नु मेमेदुमाहाॽरे़ लागि खे़न् के़नम्बाहाॽ ले़रे़म् पिरे़म्सिम्मे़ॽ॥ 22 मिस्र लाजेॽओ खिनिॽ योक् के़वयिबा पाःन्निन् निङ्वाॽ इःत्ते़म्मे़ॽ॥ आम्भा कल्ले़चोगुल्ले़ आङ्गाॽ खिनिॽ अक्खे चोःक्मा इङ्जाङ् पिनिङ्बारो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.