साम्योथिम् इङ् 23 - लिम्बुइस्राइलि सङ्जुम्भोलाम् लःप्मादेमा के़बोङ्बा मना 1 कुल्धिःम्बा मे़भे़ःत्छुबा इग्र कुजुत्चुॽबा मे़घक्तुबा ये़म्बित्छान् यहवे दाङ्बे़ल्ले़ कुसङ्जुम्भोओ लाःप्मा मे़नुॽने़न्॥ 2 ते़न्धाम् मेःक्खिम् मे़न्जोःक्मनालाम् इग्र काॽइ सोॽधोःक्लाम् सागे़वाःन्छिङ्बा मनान् यहवे दाङ्बे़ल्ले़ कुसङ्जुम्भोओ लाःप्मा मे़नुॽने़न्॥ थिबोङ् थाःक् थारिक् खे़ल्ले़ आत्तिन् कुमुॽइदाङ्साःन्नाङ् यहवे दाङ्बे़ल्ले़ कुसङ्जुम्भोओ लाःप्मा मे़नुॽने़न्॥ 3 अम्मोनि इग्र मोआबिहाॽ यहवे दाङ्बे़ल्ले़ कुसङ्जुम्भोओ लाःप्मा मे़ङ्घोने़न्॥ थिबोङ् थाःक् थारिक् खे़ङ्हाॽरे़ खुन्छिॽ आत्तिन् मुॽइदाङ्साहाॽआङ् यहवे दाङ्बे़ल्ले़ कुसङ्जुम्भोओ लाःप्मा मे़ङ्घोने़न्॥ 4 थेआङ्भे़ल्ले़ मिस्रलाम् खिनिॽ के़भे़रिल्ले़ कुजा नु च्वाःत् के़मे़म्बिरिन् हे़क्क्याङ् लाङ्दाःक् के़मे़म्मे़त्तिन्॥ खे़ङ्हाॽरे़ अराम-नाहारैमबा पतोरओ के़युङ्बा बओररे़ कुस्सा बालाम्मिन् खिनिॽ माङ्दे साङ्ग्रा मे़प्मारे़ लागि याङ् मे़बिरुआङ् मे़उःत्तु॥ 5 हे़क्केसाङ् यहवे दाङ्बा खिनिॽ निङ्वाॽफुमाङ्ङिल्ले़ बालामरे़ कुबाःन्निन् मे़घे़प्सुन्, कर खुने़ॽ खे़न् माङ्देन् हाङ्वागे़न् मुॽइसाम् पोःक्खे़र चोगु, थेआङ्भे़ल्ले़ खुने़ॽ खिनिॽ लुङ्माॽ के़दुक्तिॽ॥ 6 खिनिॽ हिङ्हिङ् अम्मोनि हे़क्क्याङ् मोआबिहाॽनु चुम्देङ् पोङ्मारे़ लागि नादङ् मे़जोगे़म्मिन्ने़ॽ॥ 7 आत्तिन् एदोमिहाॽआङ् खिनिॽ मे़नाॽरे़म्सिम्मिन्ने़ॽ, थेआङ्भे़ल्ले़ खे़ङ्हाॽग खिनिॽ फुॽनुसासिरो॥ आत्तिन् मिस्रिहाॽआङ् खिनिॽ मे़नाॽरे़म्सिम्मिन्ने़ॽ, थेआङ्भे़ल्ले़ खे़ङ्हाॽरे़ खुनिॽ लाजेॽओ खिनिॽ वे़प्मिबा के़वयिरो॥ 8 खे़ङ्हाॽलाम् सागे़वाःन्छिङ्बा सुम्सिगेक्पा थाःक्कोबा थिन्दाङ् सायोबोराहाॽ यहवे दाङ्बे़ल्ले़ कुजुम्भोओ लाःप्मा मे़घोरो॥ साःङ्गाहिम्हाॽ सुत्थो चोःक्मा याःम्बक् 9 खिनिॽ निङ्मिहाॽरे़ खुन्छिॽ तक्ले़ङ्वाओ ते़न्धङ् चोःक्से़ के़बेगिल्ले़ के़रे़क् आसुत्थो पाःन्हाॽलाम् से़ःप्पासिम्मे़ॽआङ् वये़म्मे़ॽ॥ 10 कुभा ये़म्बित्छा मनान् से़प्माङ्मो मे़न्छुमानु ने़बा से़प्माङ् माक्तुआङ् आसुत्थो पोङ्ने़भग्र, खुने़ॽ साःङ्गाहिम्हाॽलाम् लाःक्कात् लःन्बेःक्ल हे़क्क्याङ् हाबा खे़प्मोए युङ्ल॥ 11 युःन्धो पोङ्ल पेःक्किल्ले़ वरुःम्सिङ्ल हे़क्क्याङ् नाम्धाआङ् एगाङ् खुने़ॽ थक्सुबा साःङ्गाहिम्मो तामा सुक्॥ 12 पाहारा पेःक्मादे़न्निन् साःङ्गाहिम्हाॽ लाःक्कात् चोगे़म्मे़ॽ॥ 13 खिनिॽ फेजुम्भे़याःन्नु कुदमा लक्चु थिक्काङ् कत्ते़म्मे़ॽ, हे़क्क्याङ् पाहारा के़युङ्ङि के़सुःत्तासिआङ् आम्भा खे़ल्ले़ पाक्पे़प्पा तये़म्मे़ॽआङ् पाहाराःन् लुप्ते़म्मे़ॽ॥ 14 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन् खिनिॽ ताङ्से़ःप्मारे़ लागि नु निङ्मिहाॽ हुक्को थामासिरे़ लागि खिनिॽ साःङ्गाहिम्हाॽओ नाना कत्ना लाङ्घेःक्काङ् वाॽ॥ खिनिॽ लुम्मो आत्तिन् परिक्ले़न्नाङ् चिःन्जिःन् के़घुबा पाःन्हाॽ यहवे दाङ्बे़ल्ले़ कुदगि निमे़धाःप्ने़न्ल फाॽआङ् खिनिॽ थक्सुबा साःङ्गाहिम्मिन् सेसे पोङ्मा पोङ्ॽ, मेःन्ने़भग्र खुने़ॽ खिनिॽलाम् नुःङ्बेःक्लो॥ यरिक् परिक्पा थिम्हाॽ 15 कुभा योःग्बान् खे़त्छिङ्ङाङ् इःम्सिङ्मारे़ लागि खिनिॽओ ताने़भग्र खुने़ॽ कुन्दाङ्बे़न् हुक्मे़सुप्ते़म्मिन्ने़ॽ॥ 16 खे़ल्ले़ कुसिराॽ के़धाङ्बा ये़क्यक्किल्ले़ कुभा ते़न्नो खे़न् खिनिॽ युङ्मा फाःक्ते़म्मे़ॽ॥ खिनिॽ खे़न् ताप्फे़ःल्लिक् मे़मे़त्ते़म्मिन्ने़ॽ॥ 17 आत्तिन् इस्राइलि ये़म्बित्छा इग्र मे़न्छुमाःल्ले़आङ् माङ्धाःन्नोबा याम्बोःप्मा याःम्बक् मे़जोगुन्ल॥ 18 कुभा माङ्हे़क्किन् के़प्मारे़ लागि मे़न्छुमाःल्ले़ इग्र ये़म्बित्छाःल्ले़ याम्बोःप्मा याःम्बक्लाम् थगु तारुबा आत्तिन् याङ्ङिन्नाङ् निङ्वाॽफुमाङ्ङिल्ले़ कुहिम्मो मे़दारे़म्मिन्ने़ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ ने़प्माङ् चिःत्तुसिॽ॥ 19 कुस्सा याङ् थक्मा सुक्के़दे़प्पा याङ्, कुजा इग्र वेॽ कुभा पाःन्हाॽ सिङ्नात् के़बिरुम्सिम्मिल्ले़ फुॽनुसाॽलाम् कुस्सा मे़ज्ये़म्मिन्ने़ॽ॥ 20 वेॽ लाजेॽबा मनान् लाम्बा कुस्सा ताःक्मा के़सुक्तुम्ॽ, कर आप्फेक् फुॽनुसाॽ इस्राइलिहाॽलाम्बा मेःन्, हे़क्केलॽरिक् खिनिॽ युक् चोःक्मा के़इःत्तुम्बा लाजेॽओ खिनिॽ चोःक्मा के़जोगुम्बा याःम्बक्को यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हाङ्वागे़न् मुॽइसाम् के़बिरिर॥ 21 यहवे दाङ्बा खिनिॽ निङ्वाॽफुमाङ्ङिल्ले़ कुलागि खिनिॽ कुभा माङ्हुप् के़जोगुम्माङ् खे़न् के़प्मारे़ लागि खिनिॽ मे़सुसे़म्मिन्ने़ॽ, थेआङ्भे़ल्ले़ खुने़ॽ खे़न् खिनिॽ के़गे़त्तुम्बा ओमे़प्मा निङ्वाॽ चोगुॽ॥ मेःन्ने़भग्र लायोओ खिनिॽ के़ध्ये़ॽइरो॥ 22 कर माङ्हुप्पे मे़न्जोःक्के के़वयिने़भग्र लायोओ खिनिॽ के़न्ध्ये़ॽइन्ॽ॥ 23 थे़मा पाःन्निन् खिनिॽ मुराओलाम् लःन् खे़न् खिनिॽ के़प्माए पोङ्ॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङो खिनिॽ आप्फेक् निङ्वाॽलाम् खिनिॽ आप्फेक् मुराःल्ले़ माङ्हुप् के़जोगुम्बारो॥ 24 खिनिॽ हिम्बेसाङ्बे़ल्ले़ कुजे़ल्ले़क्सेॽ इक्ताप्पो के़लासिने़भग्र चामा खिनिॽ सिराॽथाङ्बा यारिक् चे़ल्ले़क्सेःन् चामा के़सुक्तुम्ॽ, कर खिनिॽ नॽइमाओ थे़माआङ् मे़याक्ते़म्मिन्ने़ॽ॥ 25 खिनिॽ हिम्बेसाङ्बे़ल्ले़ कुइक्ताप्पो के़लासिने़भग्र चाःल्ले़ कुदाप्मान् हुक्किल्ले़ खिःम्मा के़सुक्तुम्, कर के़दुम्बा इक्ताप्पो कात्च्या याङ्मा मे़नुॽने़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.