साम्योथिम् इङ् 21 - लिम्बुमनागे़से़प्पे़न् निमे़दे़त्ने़न्निल्ले़बा थिम् 1 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को के़बिरिआङ् ने़बा लाजेॽओबा कुभा इक्ताप्पो कुभा मे़से़रुबा मना के़घोसुम् हे़क्क्याङ् के़से़प्पा मनान् के़न्याङ्घुम्मिन्ने़भग्र, 2 लाम्लोबाहाॽ नु खासे़न्लोःम्बाहाॽ मे़बेःक्काङ् मे़से़रुबा मना के़ने़बादे़न्लाम् आत्तिन् ये़क्यक्किन् निःत्ताङ् ने़ खे़न् निङ्वाॽ निःन्धो मे़जोगुर॥ 3 खे़न् निःत्ताङ्बा ये़क्यक्कोबा लाम्लोबाहाॽरे़ याःम्बक्को मे़म्भत्छुम्मा नु खे़ःप्सिङ् मे़न्याक्तुम्मा करःङ् पित्माधिक् मे़याङ्सिङ्ङाङ् 4 मे़न्धोःक्खुम्बा नु याॽरिःम्बा मे़न्हेॽरुम्बा ने़वालाओबा कुभा वहःङ्ङिल्ले़ कुयाओ मे़गे़त्तुआङ् खे़ल्ले़ कुसित्लाःन् मे़ए़क्खु मे़बिरुर पोङ्ॽ॥ 5 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ लागि कुसे़वा याःम्बक् चोःक्मा नु खुने़ॽ हाङ्वागे़न् मुॽइसाम् पिमासिरे़ लागि हे़क्क्याङ् के़रे़क् खेमा थक्माहाॽ हिप्सिङ्मा थक्सिङ्माहाॽ तङ्मा पिमासि याःम्बक्ले़ लागि खुने़ॽ सेगुसिबाल्ले़ चोगुल्ले़ ले़बिःल्ले़ कुधाःक्कोबा निङ्वाॽफुसाम्बाहाॽ खे़प्मो मे़वाॽर॥ 6 खे़न् मे़से़रुबा चेःल्ले़ साॽरिक् कुबेसाङ्बा ये़क्यक्कोबा के़रे़क् लाम्लोबाहाॽरे़ वहःङ्ङो कुनिगिःङ्मा मे़ए़क्खुबा करःङ् पिप्माःल्ले़ कुसम्धाङ् खुन्छिॽ हुक्हाॽ वामे़हप्तुर॥ 7 खे़ब्याङ् खे़ङ्हाॽरे़ अक्खे मे़बाःत्तुर, “कन् मनासे़प्मा याःम्बक्किन् आनिगे चोगुम्बे़बा मेःन्, आनिगे मिक्किल्ले़आङ् खे़न् हे़क्के पोःक्खे़र पत्छे़बा निसुबा मेःन्॥ 8 यहवे दाङ्बाए, खे़ने़ॽ चोःक्युम्भो के़बिरुसिबा खे़ने़ॽ के़मनाहाॽरे़ खुनिॽ आप्तिक् खे़प्मा कन् सिदुङ्जभान् ताःक्ते़ॽओ, हे़क्क्याङ् कुआप्तिक् मेःन्नेबा कन् मे़से़रुबा मनाःल्ले़ कुआप्तिक्के़ल्ले़ के़मना इस्राइलिहाॽ मे़दे़त्तुसिन्ल॥” हे़क्क्याङ् कन् मे़से़रुबा मनालाम् के़बोङ्बा आप्तिक्के़न् ले़प्मि नाःक्मा पोङ्ॽ॥ 9 कम्भलॽरिक् यहवे दाङ्बे़ल्ले़ कुमिक्साओ खिनिॽ के़लाॽबा याःम्बक् के़जोगुम्बाल्ले़ चोगुल्ले़ खिनिॽ लुम्मोलाम् खे़न् कुआप्तिक् मेःन्नेबा मना मे़से़रुबाल्ले़ कुआप्तिक्किन् खिनिॽलाम् लाःत्लाःत् पोङ्लो॥ मे़दे़म्सु के़दारुमा मे़न्छुमा 10 खिनिॽ निङ्मिहाॽरे़ खुनिॽ तक्ले़ङ्वोओ के़बेगिल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हुक्को थासुसिआङ् खे़ङ्हाॽ के़दे़म्सुम् के़दारुम्सिम्मिल्ले़, 11 के़दे़म्सुम् के़दारुम्सिम्माहाॽओबा कुभा लत्छा नुमा मे़न्छुमान् खिनिॽ सिराॽथाङ्ने़भग्र, खिनिॽ खे़न् मेःत् चोःक्मा के़सुक्तुम्ॽ॥ 12 खे़न् खिनिॽ हिम्मो तेॽरे़म्मे़ॽ हे़क्क्याङ् खे़न् कुधे़गेक् इःन् नःङ्मा नु कुसेःन्दुॽबान् खक्मा पाङ्घे़म्मे़ॽ, 13 खे़ब्याङ् खे़न् के़दे़म्सुम्मिल्ले़ खे़ल्ले़ चाक्खुबा चाङ्ङिन् ले़क्सिङ्मा पाङ्घे़म्मे़ॽ॥ खिनिॽ हिम्मो युङ् हे़क्क्याङ् खे़ल्ले़ लत्छा ला खाराक् कुम्बा कुम्मारे़सिरे़ लागि मे़रिङ् थक्मा सुरुआङ् एगाङ् खिनिॽ खे़प्मो पेःक्मा नु खुने़ॽ कुये़म्बा पोङ्मा के़सुक्तिॽ, खे़ब्याङ् खे़न् खिनिॽ मेःत् पोङ्ॽ॥ 14 ताःन्दि खे़न् खिनिॽ सिराॽमे़धाङ्ने़न्ने़भग्र, खे़ल्ले़ आत्ति पेःक्मा निङ्वाॽ चोगुॽ पेःक्मा फाःक्ते़म्मे़ॽओ॥ खे़ने़ॽ खे़न् सङ्मा मे़नुॽने़न् इग्र योःग्मा हे़क्के ताप्फे़ःल्लिक् मे़प्मा मे़नुॽने़न्, थेआङ्भे़ल्ले़ खे़ने़ॽ खे़न् कुनामे़न्छाॽ के़मे़त्तुआङ् वाॽरो॥ तुम्बा साःल्ले़ कुघोमा लक् 15 कुभा मनाःल्ले़ कुमेत् ने़त्छि वाॽसि, लत्छा लुङ्माॽ हिःप्तुमा नु वेॽइन् लुङ्माॽ मे़हिःप्तुम्मा हे़क्क्याङ् खे़न् ने़प्माङ्ले़ ये़म्बित्छासा कत्छुल्ले़ लुङ्माॽ मे़हिःप्तुम्माल्ले़ तुम्बा सा ये़म्बित्छा कत्तुने़भग्र, 16 लाजेॽसिङ्बुङ् मे़भःक्खुल्ले़ लुङ्माॽ हिःप्तुमाल्ले़ कुस्सा ये़म्बित्छा फाॽआङ् लुङ्माॽ मे़हिःप्तुम्माल्ले़ से़क्खाबा कुस्सा तुम्बान् काःक्तुआङ् कुम्बारे़ फोॽबान् युक् पिमा मे़घोसुन्ॽ॥ 17 कर खे़न् लुङ्माॽ मे़हिःप्तुम्माल्ले़ कुस्सान्ने खुने़ॽ के़रे़क् कुयाङ्साकुन्धेःल्ले़ निले़ङ् कुलक्किन् पिरुर थेआङ्भे़ल्ले़ खुने़ॽग कुम्बारे़ कुमुक्किल्ले़ थिक्सिगेक्पा लक्लो॥ हे़क्क्याङ् तुम्बा फाॽआङ् ताःक्तुर पोङ्ॽ॥ तुम्बा लक्खोमा युक्किन् खे़ल्ले़न्ने पोङ्लो॥ पाःन्मे़ङ्घे़म्मनाबा ये़म्बित्छासा 18 कुम्बा कुम्मारे़ खुन्छिॽ इङ्जाङ् मे़ङ्घे़म्मनाबा कुभा पाःन्मे़ङ्घे़म्मनाबा कुॽइगे़भे़म्बा ये़म्बित्छा सान् हे़न्थिम् मे़याक्तुसाङ् खे़ङ्हाॽरे़ खुन्छिॽ पाःन्निन् मे़घे़प्सुन्ने़भग्र, 19 खे़ल्ले़ कुम्बा कुम्मासिरे़ खे़न् मे़दे़म्सुआङ् ये़क्यक्कोबा लाम्लोबाहाॽरे़ओ ये़क्यक्कोबा यम्बा लाम्धेःप्पो मे़देॽरुर॥ 20 ये़क्यक्कोबा लाम्लोबाहाॽरे़ खुन्छि अक्खे मे़त्छुर, “कन् आन्छिगे ये़म्बित्छा सान् पाःन्मे़ङ्घे़म्मनाबा नु खार्मे़न्दक् के़जोःक्पा चोक्॥ खे़ल्ले़ आन्छिगे पान् मे़घे़प्सुन्॥ कन् तःक्थे़ःक्के नु थिमसाङ् चोक्॥” 21 खे़ब्याङ् खे़न् ये़क्यक्कोबा के़रे़क् ये़म्बित्छाहाॽरे़ खे़न् सिर थारिक् लुङ्ङिल्ले़ मे़ले़प्तुर॥ खिनिॽ लुम्मोलाम् ताप्फे़ःम्बा पाःन्निन् खे़त्ताम्मे़ॽ, खे़ब्याङ् हे़क्केलॽरिक् खिनिॽ खे़न् कुॽइगे़भे़म्बे़न् के़घे़त्तुम्ॽ॥ इस्राइलबा के़रे़क्ले़ कन् पाःन्निन् मे़घे़प्सुॽ हे़क्क्याङ् मे़गिरो॥ वेॽ थिम्हाॽ 22 कुभा मनाःल्ले़ सिमे़ल्ले़ खुम्दिङ् खोमा यारिक्पा लायो चोगुल्ले़ खिनिॽ खे़न् के़से़रुम्माङ् खे़ल्ले़ कुधक्किन् सिङ्बुङ्ङो के़भोःन्दुम्मिल्ले़, 23 खे़ल्ले़ कुधक् चेःन् से़न्दिक् नाम्दाःत्तात् सिङ्बुङ्ङो मे़भोःन्दे़म् मे़भत्छे़म्मिन्ने़ॽ, कर हाबा खे़ल्ले़ याःन्दिक् खे़न् लुप्ते़म्मे़ॽ, थेआङ्भे़ल्ले़ फोःम्मनाबा मनान् निङ्वाॽफुमाङ्लाम् माङ्दे साङ्ग्राःल्ले़ ते़त्तुबा पोङ्ॽ॥ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लक्खोमा के़बिरिआङ् ने़बा लाजेन् आसुत्थो मे़जोगे़म्मिन्ने़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.