साम्योथिम् इङ् 20 - लिम्बुते़न्धङ्ले़ कुयाःम्बेओ इङ्जाङ् 1 खिनिॽ ते़न्धङ्ङो के़बेगिल्ले़ निङ्मिहाॽरे़ अन्हाॽ, अन्लाधाहाॽ हे़क्क्याङ् खिनिॽनुःल्ले़ आत्तातान्ने यरिक् थक्सुबाहाॽ मे़गत्तुसिबा के़निसुम्मिल्ले़ मे़गिसे़म्मिन्ने़ॽ, थेआङ्भे़ल्ले़ मिस्रलाम् खिनिॽ के़लःप्पा के़भे़प्पा यहवे दाङ्बा खिनिॽ निङ्वाॽफुमाङ्ङिन् खिनिॽनु वाॽ॥ 2 थङ्ङो पेःक्मानुःल्ले़ तगि निङ्वाॽफुसाम्बे़ल्ले़ थक्सुबाहाॽरे़ खुन्छिॽ पेसाङ् अक्खे पाःप्मा पोङ्ॽ॥ 3 खुने़ॽ खे़ङ्हाॽ अक्खे मे़त्तुसिर पोङ्ॽ, “इस्राइलबा के़रे़क् नालिगे़न् थाङ्बे़न् मनासे, आङ्गाॽ आबाःन्निन् खे़प्से़म्मे़ॽ! आइन् खिनिॽ निङ्मिहाॽरे़ खुन्छिॽ तक्ले़ङ्वाओ थङ् चोःक्से़ के़बेगिर के़बत्छि॥ खिनिॽ निङ्वान् के़धुम्बा चोगे़म्मे़ॽ, मे़गिसे़म्मिन्ने़ॽ, मे़नाक्ते़म्मिन्ने़ॽ॥ खे़ङ्हाॽरे़ खुनिॽ तगि यङ्मा मे़स्ये़ॽइन्ने़ॽ॥ 4 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन्ने खिनिॽ निङ्मिहाॽरे़ खुन्छिॽ तक्ले़ङ्वाओ ते़न्धङ् चोःक्काङ् खिनिॽ थङ् के़नाःम्बा चोःक्मारे़ लागि सोसोरिक् पेक्!” 5 खे़ब्याङ् सुहाङ्गे़म्बाहाॽरे़ मनाहाॽ अक्खे मे़मे़त्तुसिर, “हिम् के़जोःक्पाआङ् तोःम्मा मे़ङ्घोम्नाबा कुभा कॽयो वाॽने़भग्र, खे़न् कुहिम्मो नुःङ्ङाङ् पेःक्ल॥ थङ्ङो खे़न् मे़से़रुने़भग्र, वेॽ मनाःल्ले़ खुने़ॽ कुहिम्मिन् तोःन्दुॽ॥ 6 चे़ल्ले़क्सेॽ इक्ताप् के़लेःप्पाआङ् खे़ल्ले़ कुजाॽइन् तुप्मा चामा मे़ङ्घोम्नाबा कुभा कॽयो वाॽने़भग्र, खे़न् हिम्मो नुःङ्ङाङ् पेःक्ल॥ थङ्ङो खे़न् मे़से़रुने़भग्र, वेॽ मनाःल्ले़ खे़न् तुबु चरो॥ 7 कुभारे़ खारक् पाःन्फुॽरुआङ् के़ये़प्मा मे़न्छ्यान् हिम् मे़ल्लिःङ्ङे कत्तुने़भग्र, खुने़ॽ कुहिम्मो नुःङ्ङाङ् पेःक्ल॥ खुने़ॽ थङ्ङो मे़स्ये़रुने़भग्र वेॽ ये़म्बित्छाःल्ले़ खे़न् मे़न्छ्यान् तेॽरुॽ॥” 8 हे़क्क्याङ् सुहाङ्गे़म्बाहाॽरे़ मनाहाॽ अक्खेआङ् मे़मे़त्तुसिर, “कॽयो कुभा साॽरिक् के़गिबा के़सिबा नु कुने़रे़त् चुःक्पा वाॽने़भग्र, खे़न् कुहिम्मो नुःङ्ङाङ् पेःक्ल॥ थेआङ्भे़ल्ले़ खे़ल्ले़चोगुल्ले़ खुने़ॽ कुम्भुॽ कुन्साॽहाॽरे़ खुन्छिॽ साॽइ यङ्ॽ॥” 9 सुहाङ्गे़म्बाहाॽरे़ मनाहाॽ मे़मे़त्तु मे़से़रुसिआङ् खे़ङ्हाॽरे़ मनाहाॽरे़ खुन्छिॽ थक्सुबा लाम्लोबाहाॽ युक्तिङ् मे़जोगुसिर॥ 10 थङ् चोःक्से़ कुभा ये़क्यक्किल्ले़ कुबेसाङ् के़गे़रिआङ् के़रे़क्नुःल्ले़ तगि खे़प्मोबा मनाहाॽरे़ खुनिॽ तगि तङ्मा सनारुङ् पान् युक्खे़म्मे़ॽ॥ 11 खिनिॽ के़युक्खुम्बा तङ्मा सनारुङ् पाःन्निन् खे़ङ्हाॽरे़ मे़घे़प्सुआङ् खुन्छिॽ यम्बा लाम्धेःप्पाहाॽ मे़हन्दु के़म्बिरिने़भग्र, खे़प्मो के़वाॽबा के़रे़क् मनाहाॽ स्याङ्मे़न्दाङ् याःम्बक्को फत्छे़म्सिम्मे़ॽ हे़क्क्याङ् खे़ङ्हाॽरे़ खिनिॽ याःम्बक् मे़जोगु के़म्बिरिर पोङ्ॽ॥ 12 कर खे़ङ्हाॽरे़ खिनिॽनु मे़न्दङ्ने़न्नाङ् ते़न्धङ्ङे चोःक्मा निङ्वाॽ चोःक्मा मे़गोःत्ने़भग्र, खे़न् ये़क्यक्किन् किर्गप् कबे़म्मे़ॽ॥ 13 यहवे दाङ्बा खिनिॽ निङ्वाॽफुमाङ्ङिल्ले़ खे़न् ये़क्यक्किन् खिनिॽ हुक्के़सुप्तिआङ् एगाङ् खे़प्मोबा के़रे़क् ये़म्बित्छाहाॽ ताभेःल्ले़ च्ये़प्ते़म् से़रे़म्सिम्मे़ॽ॥ 14 कर मे़न्छुमा, हिन्जाॽबित्छाॽहाॽ, पित्थक्साहाॽ नु खे़न् ये़क्यक्को के़वाॽबा वेॽ के़रे़क् पाःन्हाॽ खिनिॽ थङ् के़नाःन्दुम्बा चिगक्वा कुइसिक् मे़प्मासिङ् के़सुक्कासिॽ॥ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ निङ्मिहाॽलाम् के़बिरिबा के़नाप्तुम्सिम्बा चिगक्वान् खिनिॽ याङ्मा के़सुक्तुम्ॽ॥ 15 खिनिॽलाम् माःङ्घा के़ने़बा के़रे़क् ये़क्यक्हाॽरक् हे़क्के चोगे़म्मे़ॽ, कुयाकुयाबा सुवाङ्हाॽरे़ खुनिॽ ये़क्यक्हाॽ मेःन्॥ 16 कर यहवे दाङ्बा खिनिॽ निङ्वाॽफुमाङ्ङिल्ले़ खिनिॽ लक्खोमा कुइसिक् खिनिॽ पिमा के़इःत्तिबा कन् सुवाङ्हाॽरे़ खुन्छिॽ ये़क्यक्हाॽओ चाए कुसक्मा के़याक्पा थे़माःन्नाङ् कुहिङ्वे़त् मे़ले़रे़म्मिन्ने़ॽ॥ 17 कर यहवे दाङ्बा खिनिॽ निङ्वाॽफुमाङ्ङिल्ले़ इङ्जाङ् के़बिरिबा कुइसिक् हित्ति, एमोरि, कनानि, परिज्जि, हिब्बि नु यबुसिहाॽ खिनिॽ वरे़ङ्ले़ङ् मे़क्खे़म्सिम्मे़ॽ॥ 18 मेःन्ने़भग्र खे़ङ्हाॽरे़ खुन्छिॽ माङ्हाॽ से़वा मे़मे़त्तुसिबा के़रे़क् सिक्के़ले़ःङ्बा याःम्बक्हाॽ खिनिॽ के़म्हुॽरिॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुदक्ले़ङ्वाओ खिनिॽ लायो के़जोगुम्ॽ॥ 19 कुभा ये़क्यक्किन् हुक्काप् चोःक्मा फाॽआङ् खे़ल्ले़ कुदक्ले़ङ्वाओ थङ् के़जोगिआङ् यरिक् ये़म् थारिक् किर्गप् के़गबुम् के़ने़स्सुम्मिल्ले़, खे़प्मोबा सिङ्बुङ्हाॽ मे़आःत्ते़म्मिन्ने़ॽ, थेआङ्भे़ल्ले़ खे़ल्ले़ कुजाॽहाॽ खिनिॽ चामा के़सुक्तुम्ॽ॥ कल्ले़चोगुल्ले़ कन्हाॽ मे़आःत्ताम् मे़देसे़म्मिन्ने़ॽ॥ थे ताम्भुङ्ङोबा सिङ्बुङ्हाॽ मनासिआङ् खिनिॽ खे़ङ्हाॽ के़गबुम्माङ् के़मे़क्खुम्बि? 20 कर कुजाॽ मे़न्धोःक्मनाबा सिङ्बुङ्रे़छ के़लॽबा निङ्वाॽ के़घोसुम्माङ्लक् खिनिॽ खे़न् सिङ्बुङ्हाॽ ताङ्मादेमा के़सुक्तुम्ॽ॥ खिनिॽनु थङ् के़जोःक्पा ये़क्यक्किन् मे़न्नाःन्ने थारिक् किर्गप् कप्मा ने़मा याःम्बक्को खे़न् सिङ्हाॽ याङ्मा के़सुक्तुम्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.