साम्योथिम् इङ् 19 - लिम्बुइःम्सिङ्मादे़न् ये़क्यक्हाॽ ( खानिःत् ३५:९-३४ ; यहो २०:१-९ ) 1 यहवे दाङ्बा खिनिॽ निङ्वाॽफुमाङ्ङिल्ले़ खे़न् मे़न्छाम् सुवाङ्हाॽ मे़क्खुसिॽ हे़क्क्याङ् खे़ङ्हाॽरे़ खुनिॽ लाजेन् खिनिॽ युक्को के़बिरिॽ खे़ब्याङ् खिनिॽ खे़ङ्हाॽ लाःक्कात् के़नाःत्तुम् के़देसुम्मसिम्ॽ हे़क्क्याङ् खे़ङ्हाॽरे़ खुन्छिॽ हिम्हाॽओ के़लासिआङ् के़युङिॽ, 2 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को पिमा के़इःत्तिबा लाजेॽओ सुम्सि ये़क्यक्हाॽ एःक् से़न्दे़म्मे़ॽ॥ 3 यहवे दाङ्बा निङ्वाॽफुमाङ्ङिल्ले़ खिनिॽ युक्को पिमा के़इःत्तिबा लाजेन् पेगे़म्मे़ॽआङ् ओमे़त्ते़म्मे़ॽ हे़क्क्याङ् कुलक् सुम्सि चोगे़म्मे़ॽ खे़ब्याङ् मना के़से़प्पा कुभा मनान् से़ःप्सिङ्मारे़ लागि इःम्सिङ्मा ये़क्यक्हाॽओबा लत्छाओ खे़त्छिङ्मा पेःक्मा सुक्ल॥ 4 निङ्मि मे़न्वाॽए आत्तिल्ले़ कुहिम्बेसाङ्बे़न् आन्जानिःल्ले़ स्ये़रुआङ् आप्फेक् से़ःप्सिङ्मारे़ लागि खे़प्मो के़घे़त्छिङ्बा के़बेःक्पा मनाःल्ले़ कुयाःम्बेओ थिम् हाबा कन्लो— 5 लत्छा कुबिरे़ लागि, लत्छा मनान् आप्फेक् कुहिम्बेसाङ्बे़न्नु ताम्भुङ्ङो सोरिक् सिङ् कोःत्छे़ पेक् हे़क्क्याङ् सिङ्बुङ्ङिन् सोःम्मारे़ लागि याङुबा कुदःन्देन् कुलाओलाम् तरप् पिःङ्ङाङ् खे़न् हिम्बेसाङ्बान् याङ्घुआङ् सिःॽ॥ खे़न् मनान् कन् ये़क्यक्हाॽओबा कुभा लत्छाओ खे़त्छिङ्मा पेःक्मा सुक् हे़क्क्याङ् खे़न् ताङ्से़ःप्सिङ्मा सुक्॥ 6 मेःन्ने़भग्र लत्छारक् ये़क्यक् ने़आङ् लाम्मिन् साॽरिक् माःङ्ङाङ् माक्खिल्ले़ कुले़क्वा के़नुःक्पाल्ले़ कुसाक्के़न्निल्ले़ खे़न् नाःत्तुॽ हे़क्क्याङ् खुने़ॽ खे़न् लाम्मो सिॽरुआङ् से़प्मा सुक्तुॽ॥ से़क्खाःल्ले़ खे़न् से़प्माग यारुबा होःप्ते़, थेआङ्भे़ल्ले़ सिक् मे़ङ्गुए खे़ल्ले़ कुहिम्बेसाङ्बे़न् से़रुआङ् वये़॥ 7 कल्ले़चोगुल्ले़ खिनिॽ लागि सुम्सि ये़क्यक् एःक् से़न्दे़म्मे़ॽ फाॽआङ् आङ्गाॽ खिनिॽ इङ्जाङ् पिनिङ्ल पत्ता॥ 8 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पाधे़बाहाॽनु माङ्हे़क् चोगुबा कुइसिक् खिनिॽ लाजेॽ युक्फुङ्ङिन् थोबो पोङ्ल चोगुॽआङ् माङ्हुप् चोगुबा के़रे़क् के़बिरिल्ले़, 9 यहवे दाङ्बा खिनिॽ निङ्वाॽफुमाङ्ङिन् मिःम्जि के़मे़त्तुम्ॽ हे़क्क्याङ् आभे़ल्ले़साङ् खुने़ॽ कुलाम्मो लाङ्गे़घेगिने़भग्र, आङ्गाॽ आइन् पिनिङ्बा थिम्हाॽ सिङ्सिङ् ये़क्ये़क्काङ् के़इःत्तुम् के़नाःत्तुम्ने़भग्र खिनिॽ वेॽ सुम्सि ये़क्यक्हाॽआङ् योॽमा पोङ्ॽ॥ 10 मेःन्ने़भग्र यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को पिमा के़जोगिबा लाजेॽओ कुदोःप्मा मनाःल्ले़ कुमाक्खिॽ से़रो, हे़क्क्याङ् खे़ल्ले़ कुआप्तिक्किन् खिनिॽओए थारो॥ 11 कर कुभा मनाःल्ले़ सिक् कुयुआङ्ङे कुहिम्बेसाङ्बे़न् सुगुआङ् हिप्तुसे़रु हे़क्क्याङ् खे़न् ये़क्यक्हाॽओबा कुभा लत्छाओ खे़त्छिङ् पेःक्ने़भग्र, 12 खुने़ॽ आप्फेक् कुये़क्यक्कोबा लाम्लोबाहाॽरे़ मना मे़बाङ्घु मे़देसुसिर हे़क्क्याङ् खे़न् मे़दारुआङ् माक्खिल्ले़ कुले़क्वा माक्खिॽ नुःक्मा के़गोःप्पान् हुक्मे़सुप्तुर॥ 13 खे़न् लुङ्माॽ मे़दुक्ते़म्मिन्ने़ॽ, खिनिॽ नुॽमा तामारे़ लागि इस्राइललाम् कुदोःप्मा मनासे़प्मा आप्तिक्किन् खे़त्ते़म्देसे़म्मे़ॽओ॥ तगि के़ने़बा इःन्दोहाॽ 14 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युक्को पिमा के़इःत्तिबा लाजेॽओ खिनिॽ आप्फेक् लक्को पाधे़बाहाॽरे़ मे़ने़स्सुबा इःन्दोन् मे़गाःक्ते़म्मिन्ने़ॽआङ् हिम्बेसाङ्बे़ल्ले़ कुइःन्दोओबा लुङ्ङिन् मे़घे़त्ते़म् मे़देसे़म्मिन्ने़ॽओ॥ तोःन्दिरे़ कुयाःम्बेओ इङ्जाङ् 15 कुभारे़ कुआप्तिक् इग्र कुभे़न् याःम्बक्को लत्छारक् तोःन्दिल्ले़ पाःत्तुबा पाःन्नो हाःत्ताङ् साम्बान् मे़गुःत्ते़म्मिन्ने़ॽ॥ ने़त्छि इग्र सुम्सि तोःन्दिहाॽरे़ मे़बाःत्तुबा पाःन्नोलाम्बारक् आप्तिक्किन् निःन्धो चोःक्मा सुक्ते़त्॥ 16 कुभा मनान् आप्तिक् कुःप्मारे़ लागि कुभा कुॽइगे़भे़म्बा मनान् ये़म्सिङ्ने़भग्र, 17 आप्तिक्साबान् हे़क्क्याङ् आप्तिक् के़गुःप्पान् ने़प्माङ् खे़न् ये़म्मोबा निङ्वाॽफुसाम्बान् नु खासे़न्लोःम्बाहाॽरे़ खुन्छिॽ पेसाङ् यहवे दाङ्बे़ल्ले़ कुदगि तासिर पोङ्ॽ॥ 18 खे़ब्याङ् खासे़न्लोःम्बाहाॽरे़ खे़न् ने़त्छि मनाहाॽ नुरिक् तारिक्काङ् पान् सेःन्मे़दोसुसिर पोङ्ॽ॥ तोःन्दि पाःन्निन् इङ्ले़क्पा चोक् हे़क्क्याङ् आप्फेक् नुसाॽइल्ले़ कुदक्ले़ङ्वाओ मे़न्वाॽमना पाःत्तुबाने़भग्र, 19 खुने़ॽ आप्फेक् कुन्साॽइन् थे़मा मे़प्मा निङ्वाॽ इःत्तुआङ् वये़ खे़न्नाङ् हाबाहे़क्के मे़त्ते़म्मे़ॽ॥ खिनिॽ लुम्मोलाम् ताप्फे़ःम्बा पाःन्निन् खे़त्ताम्मे़ॽ॥ 20 कन् मे़घे़प्सुआङ् वेॽहाॽ मे़गिरो॥ खे़न् एगाङ् खिनिॽ लुम्मो अक्तङ्बा ताप्फे़ःम्बा याम्मो आप्फाल्ले़आङ् मे़बोङ्ने़न्॥ 21 आप्तिक्को के़धाबे़न् खिनिॽ लुङ्माॽ मे़दुक्ते़म्मिन्ने़ॽ॥ खे़न् खुम्दिङ् के़बिरुम्मिल्ले़ थक्किल्ले़ कुले़क्वा थक्, मिक्किल्ले़ कुले़क्वा मिक्, हाबोॽबाल्ले़ कुले़क्वा हाबोॽबा, हुक्किल्ले़ कुले़क्वा हुक् नु लाङ्ङिल्ले़ कुले़क्वा लाङ् पोङ्मा पोङ्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.