साम्योथिम् इङ् 18 - लिम्बुनिङ्वाॽफुसाम्बे़ल्ले़ कुघोमा लक् 1 निङ्वाॽफुसाम्बाहाॽग ले़बिःल्ले़ कुधाःक्कोबासिरो, से़क्खाओ के़रे़क् ले़बि थाःक्हाॽरे़ इस्राइलिहाॽलाम् खुन्छिॽ लाजेॽसिङ्बुङ् लक्खोमा इग्र लक्खोमा थेआङ् होप्॥ यहवे दाङ्बाओ तोःम्मनाबा कुजा सिदुङ्जभाहाॽ मे़जआङ् खे़ङ्हाॽ मे़हिङ्सिङ्ल, थेआङ्भे़ल्ले़ खे़ङ्हाॽरे़ खुन्छिॽ खोमा लक्किन् हाबा खे़न्लो॥ 2 खे़ङ्हाॽरे़ खुन्छिॽ फुॽनुसाॽ लुम्मो खे़ङ्हाॽरे़ खुन्छिॽ खोमा लक् थेआङ् होप्॥ यहवे दाङ्बे़ल्ले़ चोगुबा माङ्हुप् कुइसिक् आम्भा खुने़ॽए खे़ङ्हाॽरे़ खुन्छिॽ लक्खोमा लक्लो॥ 3 पित् इग्र मे़ल्लुक् सिदुङ्जभा के़दोःम्बाहाॽलाम् निङ्वाॽफुसाम्बाहाॽरे़ खोमा के़बोङ्बा लक्किन् हाबा कन्लो—सिदुङ्जभाःल्ले़ कुभक्ताङ्ङिन्, कुहासिङ्बा ने़प्माङ् ले़प्माङ्बा लक्हाॽ नु कुहिदुत् के़धे़ङाःङ्हाॽ॥ 4 पोगुगे़न् कुजा, कुबोक् चे़ल्ले़क्सेॽ थि, चैतुन निःङ्गेॽ तगि के़दुम्बा कुजा हे़क्क्याङ् मे़ल्लुक्किल्ले़ तगिबा कुम्ब्रिक्किन् खिनिॽ खे़ङ्हाॽ के़बिरुम्सिम्ल पोङ्ॽ॥ 5 थेआङ्भे़ल्ले़ खुने़ॽ कुमिङ्ङो ये़प्माआङ् आप्फाल्ले़साङ् खुने़ॽ कुसे़वा याःम्बक् चोःक्मारे़ लागि यहवे दाङ्बा खिनिॽ निङ्वाॽफुमाङ्ङिल्ले़ के़रे़क् थाःक्हाॽओलाम् ले़बि थाःक्हाॽए खुने़ॽ सेगुसिआङ् वाॽ॥ 6 इस्राइलबा कुभा ये़क्यक्को के़युङ्बा ले़बिःल्ले़ कुमुॽइदाङ्साधिक् लःन्नाङ् यहवे दाङ्बे़ल्ले़ सेगुबादे़न्नो कुसिराॽ पधाङ् थाङ्ल ताने़भग्र, 7 खे़प्मो यहवे दाङ्बे़ल्ले़ कुदगि माङ्से़वा के़जोःक्पा के़रे़क् ले़बिःल्ले़ कुधाःक्कोबा फुॽनुसाॽहाॽ कुइसिक् खे़ल्ले़आङ् यहवे दाङ्बा खुने़ॽ कुनिङ्वाॽफुमाङ्ङिल्ले़ कुमिङ्ङो माङ्से़वा याःम्बक् चोगुर॥ 8 खुने़ॽ कुहिम्सयङ्ङोबा याङ्साकुन्धे सङ्घुबा याङ् खोसुसाङ् खुने़ॽ खे़ङ्हाॽनु कुदङ्बा मिक्तोक् खोसुर पोङ्लो॥ इःत्ला से़वा मे़प्माल्ले़ कुदक्ले़ङ्वाओ साम्दिङ् 9 यहवे दाङ्बे़ल्ले़ खिनिॽ पिमा के़इःत्तिबा लाजेॽओ खिनिॽ के़गे़रि के़द्ये़ॽइआङ् खे़प्मो के़युङ्बा सुवाङ्हाॽरे़ खुन्छिॽ सिक्के़ले़ःङ्बा थिम् साक्थिम्हाॽ चोःक्मा मे़हुॽआसिम्मिन्ने़ॽ॥ 10 आप्फेक् ये़म्बित्छा इग्र मे़न्छुमा साहाॽ मिओ सिदुङ्जभा के़जोःक्पा, तॽयान् नुॽमा फे़म्मा ओगे़मे़प्पा, थुम्या के़इबा, कित्चाक् के़जोःक्पा, 11 साम्माङ्च्याःङ् मुरा के़मे़प्पा, खे़मायङ्सङ् सुजा के़नाःक्पा ये़बा इग्र फे़दाङ्मा खिनिॽ लुम्मो हाःत्ताङ् मे़न्वाॽने़न्ल॥ 12 अक्तङ्बा याःम्बक् के़जोःक्पा मनान् यहवे दाङ्बे़ल्ले़ कुदगि याम्गे़सिङ्बा चोक्॥ कन् याम्गे़सिङ्बा थिम् साक्थिम्हाॽरे़ चोगुल्ले़ यहवे दाङ्बा खिनिॽ निङ्वाॽफुमाङ्ङिल्ले़ खे़न् मे़न्छाम् सुवाङ्हाॽ खिनिॽ तगिलाम् लःत्तुदेसुसिॽ॥ 13 यहवे दाङ्बा खिनिॽ निङ्वाॽफुमाङ्ङिल्ले़ कुदगि खिनिॽ आप्तिक् मेःन्नेबा कुदोःप्मा पोङ्मा पोङ्लो॥ माङ्निङ्वाॽपान् के़बाःप्पा पाङ्मा माङ्हुप् 14 खिनिॽ युक् चोःक्मासि के़बोङ्बा सुवाङ्हाॽरे़ थुम्या मे़इसु हे़क्क्याङ् कित्चाक् मे़जोगुॽ॥ कर यहवे दाङ्बा खिनिॽ निङ्वाॽफुमाङ्ङिल्ले़ खिनिॽ अक्खे चोःक्मा के़म्भाःक्तिन्ॽ॥ 15 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ आप्फेक् फुॽनुसाॽहाॽओलाम् आङ्गाॽ हे़क्तङ्बाए माङ्निङ्वाॽपान् के़बाःप्पा थिक् खिनिॽ लागि लःत्तुॽ॥ खिनिॽ खे़ल्ले़ कुबाःन्निन् खे़प्से़म्मे़ॽ॥ 16 थेआङ्भे़ल्ले़ होरेब कोःक्माओबा चुम्भोःल्ले़ याःन्दिक् यहवे दाङ्बा खिनिॽ निङ्वाॽफुमाङ्ङिन् अक्खेलॽरिक् पेलि के़भाक्तुम्माङ् वये़, “आल्ल याम्मो यहवे दाङ्बा आनिगे निङ्वाॽफुमाङ्ङिल्ले़ कुइक्लान् खे़म्मा मे़बोङ्ने़न्ल हे़क्क्याङ् कन् किप्मा के़घुबा मिधुङ्दिङ् मिराःक्किन् ओमे़प्मा मे़बोङ्ने़न्ल, मेःन्ने़भग्र आनिगे स्ये़ॽइगे़रो॥” 17 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, “खे़ङ्हाॽरे़ कुदोःप्माए मे़बाःत्तुआङ् वाॽ॥ 18 खे़ङ्हाॽरे़ खुन्छिॽ लागि खे़ङ्हाॽरे़ खुन्छिॽ इस्राइलि फुॽनुसाॽहाॽ लुम्मोलाम् खे़ने़ॽ हे़क्तङ्बा थिक् आङ्गाॽ माङ्निङ्वाॽपान् के़बाःप्पा थिक् लःत्तुङ्ॽ॥ आङ्गाॽ आबाःन्जाःक्किन् खे़ल्ले़ कुम्ब्राओ केःत्तुङ् पिरुङ्ॽ, हे़क्क्याङ् आङ्गाॽ इङ्जाङ् पिरुङ्बा के़रे़क् पाःन्हाॽ खे़ल्ले़ खे़ङ्हाॽ मे़त्तुसिॽ॥ 19 खे़न् माङ्निङ्वाॽपान् के़बाःप्पे़ल्ले़ आङ्गाॽ आमिङ्ङो पाःत्तुबा आबाःन्जाःक्हाॽ मे़ङ्घे़म्मनाबाहाॽ आङ्गाॽ मे़ले़रुङ्सिङ्ङिन्ॽ॥ 20 कर आङ्गाॽ इङ्जाङ्ङे मे़बिरुङ्सिङ्ङिन्बा पाःन्जाःक्किन् आमिङ्ङो के़बाःप्पा इग्र वेॽ माङ्ङिल्ले़ कुमिङ्ङो माङ्निङ्वाॽपान् के़बाःप्पे़न् से़प्मा पोङ्ॽ॥” 21 खिनिॽ आप्फेक् से़ःन्गे़लाप्पासिबिला, “यहवे दाङ्बे़ल्ले़ कुबाःन्जाक्पि इ मेःम्बि फाॽआङ् आनिॽ आक्खेलॽरिक् कुसिङ् निःप्माबे?” 22 कुभा माङ्निङ्वाॽपान् के़बाःप्पे़ल्ले़ यहवे दाङ्बे़ल्ले़ कुमिङ्ङो पाःत्तुबा पाःन्निन् मे़गे़रे़न् इग्र से़क्खा मे़बोःक्खे़न्ने़भग्र, यहवे दाङ्बे़ल्ले़ खे़न् पाःत्तुबा मेःन्॥ खे़ङ्ग हाबा खे़न् माङ्निङ्वाॽपान् के़बाःप्पे़ल्ले़ आप्फेक् कुनिङ्वाॽ थाप्थाप् पाःत्तुबा पाःन्लो॥ खिनिॽ खे़न्नु मे़गिसे़म्मिन्ने़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.