साम्योथिम् इङ् 17 - लिम्बु1 यहवे दाङ्बा खिनिॽ निङ्वाॽफुमाङ्ङिल्ले़ कुलागि कुभा याङ्घेःक् इग्र कुयोक् के़बप्पा कुम्बाबा पित् किग्र मे़ल्लुक्किन् सिदुङ्जभा मे़जोगे़म्मिन्ने़ॽ, थेआङ्भे़ल्ले़ खुने़ॽ कुलागि खे़न् सिक्के़ले़ःङ्बा चोक्॥ 2 यहवे दाङ्बा खिनिॽ निङ्वाॽफुमाङ्ङिल्ले़ के़बिरिआङ् ने़बा कुभा ये़क्यक्को खिनिॽ लुम्मो के़युङ्बा कुभा मे़न्छुमा इग्र ये़म्बित्छाःल्ले़ वेॽ माङ्हाॽ किग्र नाम् लाबा, 3 इग्र ताङ्साङ्बोबा खेःम्सिक्पाहाॽ से़वा माङ्से़वालाम् यहवे दाङ्बा खिनिॽ निङ्वाॽफुमाङ्ङिल्ले़ कुमाङ्हुप्पिन् फेःन्दुआङ् खुने़ॽ कुमिक्साओ फे़न्याःम्बक् चोगुबा खिनिॽ निङ्वाॽ के़घोसुम्ने़भग्र, 4 खिनिॽ खे़न् नुरिक्काङ् सेःन्दोमा कुसिङ् निःप्मा नु साॽमा पोङ्ॽ॥ कन् से़क्खा नु अक्तङ्बा सिक्के़ले़ःङ्बा याःम्बक् इस्राइलओ पोःक्खे़बाएने भग्र 5 अक्तङ्बा फे़न्याःम्बक् के़जोःक्पा ये़म्बित्छा इग्र मे़न्छुमान् ये़क्यक्कोबा यम्बा लाम्धेत् लाःक्कात् तारे़म्मे़ॽआङ् लुङ्ङिल्ले़ पःत्ते़म् से़रे़म्मे़ॽ॥ 6 से़प्मनाबा मनान् ने़त्छि इग्र सुम्सि के़निबा तोःन्दिओरक् से़रे़म्मे़ॽ॥ लत्छारक् के़निबा तोःन्दिओ आत्तिन्नाङ् मे़से़रे़म्मिन्ने़ॽ॥ 7 खे़न् से़प्मारे़ लागि के़निबा तोःन्दिहाॽरे़ए के़रे़क्नुःल्ले़ तगि हुक् मे़याक्तुर॥ खे़न् एगाङ् वेॽ मनाहाॽरे़ हुक् मे़गेःत्तुर॥ खिनिॽ लुम्मोलाम् ताप्फे़ःम्बा पाःन्निन् खे़त्ताम्मे़ॽ॥ 8 कुभा मनासे़प्मा नाम्ला, कुभाङ् पाःन्धङ् इग्र हिप्सिङ्मा थक्सिङ्मा नाम्ला पाःन्हाॽ खेमा थक्मा पाःन्हाॽ तङ्मारे़ लागि खिनिॽ के़साक्पा के़दुमुम्ने़भग्र, यहवे दाङ्बा खिनिॽ निङ्वाॽफुमाङ्ङिल्ले़ सेःक्मा इःत्तुबादे़न्नो पेगे़म्मे़ॽ॥ 9 ले़बिःल्ले़ कुधाःक्कोबा निङ्वाॽफुसाम्बाहाॽओ पेगे़म्मे़ॽ, हे़क्क्याङ् खे़ङ्हाॽ सेःन्दोसे़म्सिम्मे़ॽ, खे़ब्याङ् खे़न् ये़म्मोबा खासे़न्लोःम्बाओ पेगे़म्मे़ॽआङ् सुजा नाःक्ताम्मे़ॽ हे़क्क्याङ् खुने़ॽ कुनुप्मा खासे़न् लोःन्दुर॥ 10 यहवे दाङ्बे़ल्ले़ सेःक्मा इःत्तुबादे़न्नो खे़ङ्हाॽरे़ खिनिॽ निःन्धो के़म्बिरिबा पाःन्निन् के़जोगुम्ल पोङ्ॽ॥ खे़ङ्हाॽरे़ के़म्बिरिबा इङ्जाङ् कुइसिक् के़रे़क् पाःन्हाॽ चोःक्मारे़ लागि सिङ्सिङ् ये़क्ये़क्काङ् निङ्वाॽ पिरे़म्मे़ॽ॥ 11 खे़ङ्हाॽरे़ खिनिॽ के़म्हुॽरिबा साम्योथिम् नु के़म्बिरिबा निःन्धो पान् इसिःक् खिनिॽ चोगे़म्मे़ॽ॥ खे़ङ्हाॽरे़ खिनिॽ के़म्मे़त्तिबा पाःन्हाॽलाम् चुक्वा फे़ङ्वा ले़प्माङ् मे़बेगे़म्मिन्ने़ॽ॥ 12 यम्बा के़हे़न्छिङ्बाआङ् खे़प्मो यहवे दाङ्बा खिनिॽ निङ्वाॽफुमाङ्ङिल्ले़ कुयाःम्बक्को के़दाबा के़जुम्बा निङ्वाॽफुसाम्बाहाॽ इग्र खासे़न्लोःम्बे़न् कुनामे़न्छाॽ के़मे़प्पा मनान् खिनिॽ से़रे़म्मे़ॽ॥ खिनिॽ कम्भलॽरिक् इस्राइललाम् ताप्फे़ःम्बा पाःन्निन् मे़ङ्मा पोङ्ॽ॥ 13 के़रे़क् मनाहाॽरे़ मे़घे़प्सुॽ हे़क्क्याङ् किमा यङ्मा मे़धारो, खे़ब्याङ् याम्मो कुनामे़न्छाॽ मे़बोङ्ने़न्लो॥ हाङ्ङिल्ले़ कुयाःम्बेओ इङ्जाङ्हाॽ 14 यहवे दाङ्बा खिनिॽ निङ्वाॽफुमाङ्ङिल्ले़ पिमा के़जोगिबा लाजेॽओ खिनिॽ के़गे़रिॽ हे़क्क्याङ् खे़न् के़युक्तुम्माङ् खे़प्मो युङ्मा के़हेःक्तिॽ खे़न् एगाङ्, “आनिॽ कब्रिङ् पिसाङ्बा के़रे़क् सुवाङ्हाॽरे़ मे़जोगुबा कुइसिक् आनिॽआङ् आनिॽओ लत्छा हाङ् युक्तिङ् चोगुम्ॽ” के़लॽरिने़भग्र 15 यहवे दाङ्बा खिनिॽ निङ्वाॽफुमाङ्ङिल्ले़ सेगुबा मनाःन्ने खिनिॽ निःन्धो चोगे़म्मे़ॽआङ् खिनिॽ हाङ् लेःत्ते़म्मे़ॽ॥ खे़न् खिनिॽ फुॽनुसाॽहाॽलाम् थिक्पा पोङ्मा पोङ्ॽ॥ इस्राइलि नुसाॽ मेःन्बा, लत्छा वेॽ लाजेॽबा मनान् खिनिॽ सम्धाङ् युक्तिङ् मे़जोगे़म्मिन्ने़ॽ॥ 16 खे़न् हाङ्ङिल्ले़ आत्तातान्ने यरिक् अन्हाॽ मे़भुक्खुसिन्ल, इग्र आल्ल यरिक् अन्हाॽ फे़प्मासिरे़ लागि मनाहाॽ मिस्र लाजेॽओ मे़न्नुःङ्ने़न् मे़म्बेःक्ने़न्ल, थेआङ्भे़ल्ले़ “खे़न् लाम्मो याम्मो मे़नुःक्खे़म् मे़बेगे़म्मिन्ने़ॽ” फाॽआङ् यहवे दाङ्बे़ल्ले़ खिनिॽ के़मे़त्तिआङ् वाॽ॥ 17 खे़ल्ले़ खुने़ॽ कुलागि यरिक् मेःत्हाॽ मे़दारुसिन्ल, मेःन्ने़भग्र खे़ल्ले़ कुनिङ्वाॽ चाराम्॥ खे़ल्ले़ खुने़ॽ कुलागि यरिक् साम्म्याङ् युप्पाआङ् मे़भुक्खुन् मे़युक्खुन्ल॥ 18 आल्ल खे़न् खुने़ॽ कुहाङ्युक्नाओ युङ्ॽ, खे़ब्याङ् ले़बिःल्ले़ कुधाःक्कोबा निङ्वाॽफुसाम्बाहाॽरे़ मे़गत्तुबा साम्योथिम्मिन् खे़ल्ले़ लत्छा साप्पन्नो लिङ्घुर॥ 19 खे़न् साम्योथिम्मोबा के़रे़क् पाःन्हाॽ नु कन् थिम्हाॽ सिङ्सिङ् ये़क्ये़क्काङ् इःप्मा नाःप्मारे़ लागि खे़न् साप्लाथःङ्मे़न् खुने़ॽ कत्तुर खम्भ्याङ् खुने़ॽ कुहिङ्हिङ् थारिक् आप्फाल्ले़साङ् निरुर, हे़क्केलॽरिक् खुने़ॽ यहवे दाङ्बा कुनिङ्वाॽफुमाङ्ङिन् किप्मा हुॽसिङ्ल॥ 20 खे़न् खुने़ॽ आप्फेक् कुम्भुॽ कुन्साॽहाॽनुःल्ले़ थोधोक्पा मे़लेःत्छिङ्ङिन्ल, हे़क्क्याङ् साम्योथिम्मोलाम् थिक्नाहाङ् हिसिङ्ङाङ् फे़ङ्वा इग्र चुक्वा मे़लॽने़न्ल॥ कम्भलॽरिक् खुने़ॽ नु खुने़ॽ कुमुॽइदाङ्साहाॽरे़ यरिक् ये़म् थारिक् इस्राइलओ खुने़ॽ कुहाङ्जुम्मो युक् मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.