साम्योथिम् इङ् 16 - लिम्बुचोःक्युम्भो खोमा तङ्नाम् ( ला १२:१-२० ) 1 अबिब लाःन् निङ्वाॽसोक् चोगे़म्मे़ॽआङ् यहवे दाङ्बा खिनिॽ निङ्वाॽफुमाङ्ङिल्ले़ चोःक्युम्भो खोमा कुदङ्नाम्मिन् तोसे़म्मे़ॽ, थेआङ्भे़ल्ले़ अबिब लाओए खुने़ॽ खिनिॽ से़न्दिक् मिस्रलाम् के़लःत्ति के़भे़त्ति॥ 2 आत्तिन् ते़न्निन् यहवे दाङ्बा आप्फेक् कुमिङ्ले़ लागि युङ्दे़न् सेगुॽ, आम्भा खे़प्मोए यहवे दाङ्बा खिनिॽ निङ्वाॽफुमाङ्ङिल्ले़ कुलागि मे़ल्लुक् मे़ःन्दा नु पित्थक्साहाॽलाम् चोःक्युम्भो तङ्नाम्बा सिदुङ्जभा तोःन्दे़म्मे़ॽ॥ 3 खरे़ःङ् के़भङ्बा सिदाॽ याक्मनाबा खरे़ःङ्ङिन्नु खे़न् मे़जे़म्मिन्ने़ॽ॥ कर नुसि ये़न् थारिक् खरे़ःङ् के़भङ्बा सिदाॽ मे़न्याक्मनाबा खरे़ःङ् चे़म्मे़ॽ॥ कन् खरे़ःङ्ङिल्ले़ खिनिॽ तुक्खे के़ज्ये़ॽइबा ये़न्हाॽ ओसेःन्धाङ् चोगुॽ, थेआङ्भे़ल्ले़ मिस्रलाम् खिनिॽ हाराहारा के़लःन्दि के़भे़रि॥ मिस्रलाम् के़लःन्दि के़भे़रिबान् खिनिॽ हिङ्हिङ् निङ्वाॽ इःप्मा पोःक्खे़बाल्ले़ चोगुल्ले़ खिनिॽ कन् चामा पोःक्खे़बारो॥ 4 नुसि ये़न् थारिक् खिनिॽ लाजेॽओ खिनिॽ के़गत्तुम्बा खरे़ःङ् के़भङ्बा सिदाॽइन् खोमे़दे़त्ने़न्ल॥ थिक्सिगेक्पा ये़न्निल्ले़ याःन्दिक् युःन्छिक् खिनिॽ सिदुङ्जभा के़दोःन्दुम्बा थक्सा सान् हाबा खे़न् से़न्दिक्सा चाम्देसाम्मे़ॽ तानाम् थारिक् खे़न् मे़गत्ते़म्मिन्ने़ॽ॥ 5 यहवे दाङ्बा खिनिॽ निङ्वाॽफुमाङ्ङिल्ले़ के़बिरिआङ् ने़बा च्याज्या ये़क्यक्हाॽओ चोःक्युम्भो तङ्नाम्बा सिदुङ्जभा मे़दोःन्दे़म्मिन्ने़ॽ॥ 6 कर यहवे दाङ्बा खिनिॽ निङ्वाॽफुमाङ्ङिल्ले़ कुमिङ्ङोबा युङ्दे़न्निल्ले़ लागि सेगुबादे़न्नोए नाम्धाबा ये़म्मो मिस्रलाम् खिनिॽ लाम् के़धाआसिबा ये़म्मो चोःक्युम्भो खोमा तङ्नाम्बा सिदुङ्जभान् तोःन्दे़म्मे़ॽ॥ 7 यहवे दाङ्बा खिनिॽ निङ्वाॽफुमाङ्ङिल्ले़ सेगुबादे़न्नो खे़न् थोःक्ते़म्मे़ॽआङ् चे़म्मे़ॽ, हे़क्क्याङ् तानाम् नुःक्खे़म्मे़ॽआङ् आप्फेक् आप्फेक् साःङ्गाहिम्मो पेगे़म्मे़ॽ॥ 8 तुक्सि ये़न् थारिक् के़भङ्बा सिदाॽ मे़न्याक्मनाबा खरे़ःङ् चे़म्मे़ॽ, खे़ब्याङ् नुसिगेक्पा ये़न्नो यहवे दाङ्बा खिनिॽ निङ्वाॽफुमाङ्ङिल्ले़ कुलागि लत्छा चुम्लुङ् चोगे़म्मे़ॽ॥ खे़ल्ले़ याःन्दिक् थे़मा याःम्बक्काङ् मे़जोगे़म्मिन्ने़ॽओ॥ ये़त्नाम्बा तङ्नाम्हाॽ ( ला ३४:२२ ; ले़बि २३:१५-२१ ) 9 के़दुम्बा कुजान् हे़क्मा के़हेःक्तुम्बा ये़म्माङ्धो नुसि ये़त्नाम् निरे़म्मे़ॽ॥ 10 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिबा हाङ्वागे़न् मुॽइसाम् कुइसिक् आप्फेक् निङ्वाॽलाम् के़दोःन्दुम्बा सिदुङ्जभान् तोःन्दे़म्मे़ॽआङ् यहवे दाङ्बा खिनिॽ निङ्वाॽफुमाङ्ङिल्ले़ कुलागि ये़त्नाम्बा तङ्नाम्हाॽ तोसे़म्मे़ॽ॥ 11 यहवे दाङ्बा खिनिॽ निङ्वाॽफुमाङ्ङिल्ले़ खुने़ॽ आप्फेक् कुमिङ् युङ्दे़न् चोःक्मारे़ लागि सेगुबादे़न्नो खिनिॽ, खिनिॽ साहाॽ, योग्बा योःग्मा, ये़क्यक्को के़युङ्बा ले़बिःल्ले़ कुमुॽइदाङ्साहाॽ, वेॽ लाजेॽबा मनाहाॽ, ये़त्छा होॽदोःक्हाॽ नु खिनिॽ लुम्मो के़युङ्बा मेमेदुमा के़रे़क् आप्फेक् निङ्वाॽफुमाङ्ङिल्ले़ कुदगि सःत्ते़म्मे़ॽ॥ 12 निङ्वाॽ हे़त्तासिम्मे़ॽ, मिस्रओ खिनिॽ योग्बा योःग्मा के़वयि, हे़क्क्याङ् कन् थिम्हाॽ सिङ्सिङ् ये़क्ये़क्काङ् इःत्ते़म् नाःत्ते़म्मे़ॽओ॥ तक्तक्वा हिम् तङ्नाम् ( ले़बि २३:३३-४३ ) 13 खिनिॽ चाधाम्मादे़न्नो नु चे़क्ले़क्सेॽ एःम्मादे़न्नोलाम् के़रे़क् कुजाहाॽ सुम्मा के़सुरुम्माङ् खिनिॽ नुसि ये़न् थारिक् तक्तक्वा हिम् तङ्नाम् तोसे़म्मे़ॽ॥ 14 खिनिॽ, खिनिॽ साहाॽ, योग्बा योःग्माहाॽ हे़क्क्याङ् खिनिॽ ये़क्यक्को के़युङ्बा ले़बिःल्ले़ कुमुॽइदाङ्साहाॽ, वेॽ लाजेॽबा मनाहाॽ, ये़त्छाबा ये़त्छामाहाॽ नु मेमेदुमाहाॽ के़रे़क्ले़ तङ्नाम् तोसे़म्मे़ॽआङ् सःत्ते़म्मे़ॽ॥ 15 यहवे दाङ्बा खिनिॽ निङ्वाॽफुमाङ्ङिल्ले़ सेगुबादे़न्नो नुसि ये़न् थारिक् खुने़ॽ मिङ्सो इङ्धाङ् पिमारे़ लागि तङ्नाम् तोसे़म्मे़ॽ, थेआङ्भे़ल्ले़ खुने़ॽए खिनिॽ कुजा थोःक्मा नु याःम्बक्हाॽ हे़न्याहाॽओ खिनिॽ मुॽइसाम् के़बिरिॽ खे़ब्याङ् खिनिॽ सःप्मे़न् कुलिङ्दो के़त्॥ 16 आत्तिन् ते़न्निन् यहवे दाङ्बा खिनिॽ निङ्वाॽफुमाङ्ङिल्ले़ सेगुॽ, खे़प्मो तङ्बेरे़ सुम्ले़ङ् के़भङ्बा सिदाॽ मे़न्याक्मनाबा खरे़ःङ् चामा तङ्नाम्मो, ये़त्नाम्बा तङ्नाम्मो नु तक्तक्वा हिम् तङ्नाम्मो खिनिॽ के़रे़क् ये़म्बित्छा मनाहाॽ खुने़ॽ कुदगि ओःन्मे़धाक्सिङ्ल॥ यहवे दाङ्बे़ल्ले़ कुदगि आत्तिन्हाॽआङ् कुघाले़म् हुक् थेआङ् मेःन्ने ओःन्मे़न्धाक्सिङ्ङिल्ल॥ 17 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ मुॽइसाम् के़बिरिबा कुइसिक् के़रे़क्ले़ खिनिॽ हुक्वान् तोःन्दे़म्मे़ॽओ॥ मनाहाॽरे़ लागि कुदोःप्मा खासे़न्लोम्मा 18 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिबा खिनिॽ के़रे़क् ये़क्यक्हाॽओ खिनिॽ आप्फेक् आप्फेक् थाःक् कुइसिक् खासे़न्लोःम्बाहाॽ नु युक्साबाहाॽ युक्तिङ् चोगे़म्सिम्मे़ॽ॥ मनाहाॽरे़ खुनिॽ लागि खे़ङ्हाॽरे़ के़वाॽबा कुदोःप्मा खासे़न् मे़लोःन्दुॽ॥ 19 मे़न्वाॽमनाबा खासे़न् मे़लोःन्दे़म्मिन्ने़ॽ, एःक् पएःक् मे़जोगे़म्मिन्ने़ॽ॥ स्वाःत्ताङ् सुरुत्याङ् मे़जे़म्मिन्ने़ॽ, थेआङ्भे़ल्ले़ स्वाःत्ताङ् सुरुत्याङ् के़जाबे़ल्ले़ खासिङ् के़निःप्पे़न् मिक्मे़न्निमनाबा चोगुॽ खम्भ्याङ् साम्योबा मनाःल्ले़ कुबाःन्निन् पिर्बेःम्बा चाःत्तुॽ॥ 20 खासे़न्निन् तिम्दे़म् नाःत्ते़म्मे़ॽ, कुदोःप्मा खासे़न्लक् चोगे़म्मे़ॽ, हे़क्केलॽरिक् यहवे दाङ्बा खिनिॽ निङ्वाॽफुमाङ्ङिल्ले़ पिमा के़इःत्तिबा लाजेन् युक्ते़म्मे़ॽआङ् खिनिॽ कुहिङ्वे़त् वाॽमा के़सुक्तिर॥ वेॽ माङ्हाॽ से़वा मे़प्मासि मेःन् 21 यहवे दाङ्बा खिनिॽ निङ्वाॽफुमाङ्ङिल्ले़ कुलागि के़जोगुम्बा ले़त्ति तोःम्मादे़न्निल्ले़ कुयाओ असेरा माङ्ङिल्ले़न् सिङ् सित्लाङ्ङिन् तक्पे़त् मे़हाक्ते़म्मिन्ने़ॽ॥ 22 खिनिॽ कुभा सेसेबा लुङ् मे़हाक्ते़म्मिन्ने़ॽ, थेआङ्भे़ल्ले़ खे़ङ्हाॽ के़रे़क् यहवे दाङ्बा खिनिॽ निङ्वाॽफुमाङ्ङिल्ले़ चिःत्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.