साम्योथिम् इङ् 15 - लिम्बुनुसिगेक्पा तङ्बे ( ले़बि २५:१-७ ) 1 नुसि तङ्बे के़त् थक्मा कुनुप्मो सिङ्नात् के़देॽबान् ले़प्मादेमा पोङ्ॽ॥ 2 खे़न् कम्भलॽरिक् चोःक्मा पोङ्ॽ—सिङ्नात् के़बिबा के़रे़क्ले़ खुन्छिॽ काॽइ सोॽधोक् फुॽनुसाॽ इस्राइलिहाॽ मे़बिरुसिबा सिङ्नात्तिन् मे़ले़रु मे़देसुर॥ खे़ल्ले़ खुने़ॽ आप्फेक् लाजेॽबा फुॽनुसाॽहाॽ सिङ्नात् नुःक्मारे़ लागि के़साक्पा मे़जाःत्तुसिन्ल, थेआङ्भे़ल्ले़ यहवे दाङ्बे़ल्ले़ कुसिङ्नात् ले़प्मि खोमा ये़म् उवा पोःक्खे़आङ् वाॽ॥ 3 वेॽ लाजेॽबा मनान् नाःक्मा के़सुक्तुम्, कर खिनिॽ फुॽनुसाॽहाॽरे़ मे़देॽरुबा सिङ्नात्तिन् ले़रे़म्देसे़म्मे़ॽ॥ 4 थेआङ्भे़ल्ले़ खिनिॽ युक्को के़बिरिबा लाजेॽओ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ से़क्खाए मुॽइसाम् के़बिरिॽ, खिनिॽओ हाःत्ताङ् याङ्गे़साॽबा मे़बोङ्ने़न्॥ 5 आङ्गाॽ आइन् इङ्जाङ् पिनिङ्बा यहवे दाङ्बा खिनिॽ निङ्वाॽफुमाङ्ङिल्ले़ कुबाःन्जाक्किन् सिङ्सिङ् ये़क्ये़क्काङ् के़इःत्तुम् के़नाःत्तुम्ने़भग्र खुने़ॽ कन् चोगुॽ॥ 6 खुने़ॽ कुमाङ्हुप् कुइसिक् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हाङ्वागे़न् मुॽइसाम् के़बिरिॽ, हे़क्क्याङ् खिनिॽ यरिक् मे़न्छाम् सुवाङ्हाॽ सिङ्नात् के़बिरुम्सिम्ॽ, कर खिनिॽग सिङ्नात् ताःप्मा मे़बोङ्ने़न्॥ खिनिॽ यरिक् मे़न्छाम् सुवाङ्हाॽ सम्धाङ् युक् के़जोगुम्ॽ, कर खे़ङ्हाॽरे़ खिनिॽ सम्धाङ् युक् मे़न्जोगुन्ॽ॥ 7 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पिमा के़इःत्तिबा लाजेॽओबा कुभा ये़क्यक्को कुभा फुॽनुसाॽहाॽ याङ्गे़साॽबा मे़वाॽने़भग्र, खिनिॽ खे़न् नुसाॽइल्ले़ कुलागि निङ्वाॽ चुःक्पा मे़जोगे़म्मिन्ने़ॽ हे़क्क्याङ् खिनिॽ हुक् मे़म्बाःङ्मनाबा मे़बोःक्खे़म्मिन्ने़ॽ॥ 8 परुमाल्ले़ खिनिॽ हुक्किन् फाःक्खे़म्मे़ॽआङ् खुने़ॽ चाहा चोःक्पा यारिक् थे़त्लङ् पिरे़म्मे़ॽ॥ 9 सिङ्सिङ् ये़क्ये़क् लॽरे़म्मे़ॽ! सिङ्नात् ले़प्मा तङ्बेन् तामा इःत्ते़आङ् वाॽ फाॽआङ् निङ्वाॽ चुक्पा के़जोगुम्माङ् याङ्गे़साॽबा आप्फेक् फुॽनुसाॽहाॽ फाॽमासि के़न्दे़न्दिन्ने़भग्र, खे़न् याङ्गे़साॽबे़ल्ले़ खिनिॽ तक्ले़ङ्वाओ यहवे दाङ्बाओ पेलिगे़न् तुवा चोगुॽ, हे़क्क्याङ् लायोबा आप्तिक्को के़ध्ये़ॽइ॥ 10 खिनिॽ खे़न् निङ्वाॽ मे़न्दुक्के पिरे़म्मे़ॽ, खे़न् खिनिॽ के़बिरुम्मिल्ले़ खिनिॽ निङ्वाॽ मे़दुक्ने़न्ल, थेआङ्भे़ल्ले़ आम्भा कल्ले़ चोगुल्ले़ए यहवे दाङ्बा खिनिॽ निङ्वाॽफुमाङ्ङिल्ले़ के़रे़क् याःम्बक्को नु खिनिॽ हुक् के़याक्तुम्बा के़रे़क् पाःन्नो खिनिॽ मुॽइसाम् के़बिरिॽ॥ 11 लाजेॽओ आभे़ल्ले़साङ् याङ्गे़साॽबा मनाहाॽ मे़वाॽ॥ कल्ले़चोगुल्ले़ आङ्गाॽ खिनिॽ इङ्जाङ् पिनिङ्ल पत्ता, खिनिॽ फुॽनुसाॽहाॽ नु खिनिॽ लाजेॽओ के़वाॽबा याङ्गे़साॽबाहाॽ नु थेआङ् मे़ङ्गप्मनाबाहाॽ खिनिॽ निङ्वाॽ यम्बा चोगे़म्मे़ॽआङ् पिरे़सिम्मे़ॽओ॥ योःग्बा योःग्माहाॽ चोःक्युम्भो पिमासि ( ला २१:१-११ ) 12 खिनिॽ आत्तिन् यहुदि नुसाॽ नुसाॽमाहाॽ खिनिॽ हुक्को आप्फेक् मे़सङ्सिङ्ॽ, हे़क्क्याङ् खे़ङ्हाॽरे़ तङ्बे तुक्सि थारिक् खिनिॽ याःम्बक् मे़जोगु के़म्बिरिने़भग्र, नुसिगेक्पा तङ्बेओ चोःक्युम्भो पोङ्माआङ् पेःक्मा फाःक्ते़म्मे़ॽ॥ 13 खे़न् चोःक्युम्भो पोङ्ङाङ् पेःक्किल्ले़ थे़माआङ् मेःन्ने मे़बाङ्घाम् मे़देसे़म्मिन्ने़ॽ, 14 कर यहवे दाङ्बा खिनिॽ निङ्वाॽफुमाङ्ङिल्ले़ हाङ्वागे़न् मुॽइसाम् के़बिरिबा कुइसिक् खिनिॽ मे़ल्लुक् मे़ःन्दा, चाधाम्मादे़न्नो नु चे़ल्ले़क्सेॽ एःम्मादे़न्नोलाम् कुयोयो पिरे़म्मे़ॽआङ् खे़न् पाङ्घे़म्देसे़म्मे़ॽ॥ 15 मिस्रओ खिनिॽ योक् के़वयिल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ चोःक्युम्भो के़बिरिबा पाःन्निन् निङ्वाॽ इःत्ते़म्मे़ॽ॥ हाबा खे़ल्ले़चोगुल्ले़ आङ्गाॽ आइन् खिनिॽ कन् इङ्जाङ्ङिन् पिनिङ्ल पत्ता॥ 16 कर खिनिॽ योःग्बे़ल्ले़ खे़ने़ॽ नु खे़ने़ॽ के़हिम्सयङ्ङिन् लुङ्माॽ के़हिःप्तिॽ हे़क्क्याङ् खिनिॽनु खुने़ॽ कुनिङ्वाॽ ताआङ् अक्खे पाःत्तुॽने़भग्र, “आङ्गाॽ खे़ने़ॽओलाम् पेःक्मा आनिङ्वाॽ होप्” 17 हे़क्केने़भग्र ताक्क्वा थिक् याङ्ङासिम्मे़ॽ हे़क्क्याङ् खे़ल्ले़ लाम्धेःप्पो तेॽरे़म्मे़ॽआङ् कुने़खोॽइन् ताक्क्वाल्ले़ यत्ते़म्मे़ॽ, खे़ब्याङ् खे़न् कुहिङ्हिङ् थारिक् खिनिॽ योग्बा पोङ्ॽ॥ खिनिॽ योःग्मान्नाङ् हे़क्केए चोगे़म्मे़ॽ॥ 18 खे़न् चोःक्युम्भो पोङ्ङाङ् पेःक्मा के़भाःक्तुम्मिल्ले़ खिनिॽ निङ्वान् चुःक्पा मे़जोगे़म्मिन्ने़ॽ, थेआङ्भे़ल्ले़ निम्याक्को याःम्बक् के़जोःक्पा से़वारोबाल्ले़ ताःक्तुबा निले़ङ् कुनिम्याक्के़न्नुःल्ले़आङ् यरिक् याःम्बक् खे़न् हिब्रुःल्ले़ तुक्सि तङ्बेओ चोगु॥ हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़रे़क् याःम्बक्को हाङ्वागे़न् मुॽइसाम् के़बिरिरो॥ तगि के़धाप्पा थक्सा 19 खिनिॽ पित्थक्साहाॽ नु मे़ल्लुक् मे़ःन्दाहाॽलाम् तगि के़धाप्पा के़रे़क् पित्सात् इग्र मे़ःन्दसाःत्तिन् यहवे दाङ्बा खिनिॽ निङ्वाॽफुमाङ्ङिल्ले़ कुलागि से़न्दे़म् ये़प्से़म्मे़ॽ॥ खिनिॽ पित्थक्साहाॽओबा तगि के़धाप्पाहाॽलाम् आत्तिन्नाङ् याःम्बक्को मे़याक्ताम्सिम्मे़न्ने़ॽ, हे़क्क्याङ् तगि के़धाप्पा खिनिॽ मे़ल्लुक्किल्ले़ कुम्ब्रिक्के़न् मे़घक्ते़म्मिन्ने़ॽ॥ 20 आत्तिन् ते़न्निन् यहवे दाङ्बे़ल्ले़ सेगुॽ खे़प्मो खिनिॽ हिम्सयङ्हाॽनु तङ्बे थक्मा यहवे दाङ्बा खिनिॽ निङ्वाॽफुमाङ्ङिल्ले़ कुदगि खे़न् चे़म्मे़ॽ॥ 21 कुभा कुलाङ् के़सक्पा इग्र कुमिक् के़भे़क्पा थक्सा मे़वाॽने़भग्र, किग्र वेॽ परिक्पा याङ्घेःक् के़बप्पा के़गाःम्बा पत्ने़भग्र यहवे दाङ्बा खिनिॽ निङ्वाॽफुमाङ्ङिल्ले़ कुलागि खे़न् सिदुङ्जभा मे़दोःन्दे़म्मिन्ने़ॽ॥ 22 आप्फेक् खिनिॽ ये़क्यक्कोए खे़न् चे़म्मे़ॽ॥ पे़ःङ्वा इग्र स्याःक्पा सा के़जाम्बा कुइसिक् थिम् के़प्माआङ् सुत्थो इग्र आसुत्थो मनाःल्ले़ खे़न् चामा सुक्तुॽ॥ 23 कर खे़ल्ले़ कुमाक्खिन्लक् मे़जे़म्मिन्ने़ॽ॥ च्वाःत् कुइसिक् खाम्बाङ्ङो खे़न् हुक्खे़म्दे़से़म्मे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.