साम्योथिम् इङ् 14 - लिम्बुमे़रिङ् थक्मा साक्थिम् 1 खिनिॽग यहवे दाङ्बा खिनिॽ निङ्वाॽफुमाङ्ङिल्ले़ कुमुॽइदाङ्सानिङ्॥ के़सिबाहाॽरे़ खुन्छिॽ लागि खिनिॽ मे़रिङ् मे़धक्ते़म्मिन्ने़ॽ, थे़गेःक्को तगाङ् ले़प्माङ्बान् मे़नःक्खे़म्मिन्ने़ॽ॥ 2 थेआङ्भे़ल्ले़ खिनिॽग यहवे दाङ्बा खिनिॽ निङ्वाॽफुमाङ्ङिल्ले़ के़सेःन्दिबा सुवाङ्निङ्लो॥ यहवे दाङ्बे़ल्ले़ इक्सादिङ् खाम्बेःक्मो के़वाॽवाॽबा के़रे़क् मे़न्छाम् सुवाङ्हाॽलाम् खिनिॽए खुने़ॽ इमे़ल्लुङ्बा कुयाङ्साकुन्धे पोङ्से़ के़सेगिआङ् वाॽरो॥ सुत्थो नु आसुत्थो थक्सापुसाहाॽ ( ले़बि ११:१-४७ ) 3 आत्तिन् याम्गे़सिङ्बा पाःन्हाॽआङ् खिनिॽ मे़जे़म्मिन्ने़ॽ॥ 4 खिनिॽ चामा के़नुॽबा थक्साहाॽ हाबा कन्हाॽएरो—कुम्बाबा पित्, मे़ल्लुक्, मे़ःन्दा, 5 पे़ःङ्वा, स्याःक्पा, कुदाङ् के़युङ्बा स्याःक्पा, ताम्भुङ् मे़ःन्दा, ताम्भुङ् थुःम्बा, ताङ्गेःम्बा स्याःक्पा नु नाङ्जङ्लुङ्ङोबा मे़ल्लुक्॥ 6 थक्साहाॽओबा ने़त्छि कुलक्को कुलाङ् तोॽभेःत् के़से़बा नु कुजा के़अम्बान् खिनिॽ चामा नुॽ॥ 7 कर कुजा के़अम्बा नु नुरिक् कुलाङ् तोॽभेःत् मे़न्छे़मनाबाहाॽओ कन्हाॽ मे़ज्ये़म्मिन्ने़ॽ—उमे, फता, कुमि के़होप्पा सुबा—थेआङ्भे़ल्ले़ कन्हाॽरे़ कुजाग मे़अन्दु कर खुन्छिॽ लाङ्तोॽभेत् के़से़म्बा मे़बत्ने़न्॥ कन्हाॽ खिनिॽ लागि थिम् कुइसिक् आसुत्थो मे़जोक्॥ 8 फाक्किन्नाङ् आसुत्थो चोक्, थेआङ्भे़ल्ले़ खे़ल्ले़ कुलाङ् तोॽभे़ःत्तिन् के़से़म्बाग पत् कर खे़ल्ले़ कुजा मे़अन्दुन्ॽ॥ खे़ङ्हाॽ खिनिॽ लागि आसुत्थो मे़जोक्॥ खे़न् थक्सा साहाॽ खिनिॽ मे़जे़म्मिन्ने़ॽ, खे़न् कुसिवे़त् थक्साहाॽ मे़सुसे़म्मिन्ने़ॽ॥ 9 च्वाःत्तो के़याक्पाहाॽओ कुलाप् नु कुसेःक् के़बप्पाहाॽ खिनिॽ चामा नुॽ॥ 10 कर कुलाप् नु कुसेःक् मे़म्बप्मनाबाहाॽ खिनिॽ मे़जे़म्मिन्ने़ॽ॥ खे़ङ्हाॽ खिनिॽ लागि आसुत्थो मे़जोक्॥ 11 सुत्थो पुसा आत्तिन्छाङ् खिनिॽ चामा नुॽ॥ 12 कर खिनिॽ चामा मे़न्नुॽमनाबाहाॽग कन्हाॽएरो—कक्कफिःक्मा, किथ नु कुमाक्ला किथ, 13 के़रे़क् परिक्पा कुहे़ःत्ला मया, हे़क्क्याङ् कुमाक्ला किथ, 14 के़रे़क् परिक्पा काःक्वा, 15 यम्बा फक्थिःम्बा, कुलुलु के़लॽबा फक्थिःम्बा, नु वरःङ्ङोबा पु, के़रे़क् परिक्पा फिःत्चो, 16 चुक्पा फक्थिःम्बा, यम्बा फक्थिःम्बा, कुभरा फक्थिःम्बा, 17 मुरे़क् खारे़क् थेआङ् के़होप्पा ये़ःङ्घादे़न्नोबा फक्थिःम्बा, ङा के़जाबा मया, च्वाःत्तो के़याक्पा काःक्वा, 18 वरःङ्वा, के़रे़क् परिक्पा लिलिवा, सिङ्धक्थक्वा नु ने़क्वा मे़वाराप्॥ 19 कुलुप् कुलुप्पो के़बे़बा के़रे़क् फेॽबाःत्हाॽ खिनिॽ लागि आसुत्थो मे़जोक्॥ खे़ङ्हाॽ मे़जे़म्सिम्मिन्ने़ॽ॥ 20 कर कुलाप् के़बप्पा के़रे़क् वरि के़लॽबा पाःन्हाॽ खिनिॽ चामा नुॽ॥ 21 खिनिॽ थे़माःन् कुसिवे़त् के़घोसुम्ॽ, खिनिॽ खे़न् मे़जे़म्मिन्ने़ॽ॥ खिनिॽ ये़क्यक्को के़युङ्बा वेॽ लाजेॽबा मनान् खे़न् पिमा के़सुक्तुम्ॽ, हे़क्क्याङ् खुने़ॽ खे़न् चःल्ले़ नुॽ, इग्र खिनिॽ खे़न् के़घोसुम्बा कुसिवे़त्ते़न् कुभा वेॽ लाजेॽबा मनाओ सङ्मा के़सुक्तुम्॥ कर खिनिॽग यहवे दाङ्बा खिनिॽ निङ्वाॽफुमाङ्ङिल्ले़ कुलागि के़सेःन्दिबा सुवाङ्निङ्लो॥ मे़ःन्दसाःत् सान् कुम्मारे़ कुनुओ मे़धोःक्ते़म्मिन्ने़ॽओ॥ थिबोङ्लक् तोःम्मा थिम् 22 तङ्बे थक्मा इक्ताप्हाॽओ के़धोःक्पा के़रे़क् पोगुगे़न् कुजाहाॽलाम् खिनिॽ थिबोङ्लक् से़म्मा खिनिॽ निङ्वाॽ मे़भेःत्छे़म्मिन्ने़ॽ॥ 23 आत्तिन् ते़न्नो यहवे दाङ्बा खिनिॽ निङ्वाॽफुमाङ्ङिल्ले़ खुने़ॽ कुमिङ्ङो कुयुङ्मादे़न्निल्ले़ लागि सेगु, आम्भा खे़प्मो खिनिॽ कुजा, चे़ल्ले़क्सेॽ थि नु निःङ्गेल्ले़ थिबोङ्लक् हे़क्क्याङ् खिनिॽ पित्थक्साहाॽ नु मे़ल्लुक् मे़ःन्दाहाॽरे़ तगि मे़धाप्तुसिबा साहाॽ खुने़ॽ कुदगि चे़म्मे़ॽ॥ कम्भलॽरिक्के आप्फाल्ले़साङ् यहवे दाङ्बा खिनिॽ निङ्वाॽफुमाङ्ङिन् मिङ्सो इङ्धाङ् पिमा के़हुॽआसिॽ॥ 24 कर यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हाङ्वागे़न् मुॽइसाम् के़बिरिआङ् वाॽ, हे़क्क्याङ् खिनिॽ थिबोङ्लक्किन् पङ्मा तेॽमा के़न्छुक्तुम्मिन्ॽ, थेआङ्भे़ल्ले़ खिनिॽ थिबोङ्लक्किन् तेॽमारे़ लागि खुने़ॽ सेगुबा खुने़ॽ कुमिङ्ङोबा युङ्दे़न्निन् साॽरिक् माःङ्ने़भग्र, 25 खिनिॽ थिबोङ्लक्किन् सङ्घे़म्मे़ॽआङ् याङ्ङिन् खिनिॽ हुक्को याङ्ङासिम्मे़ॽ हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ सेगुबादे़न्नो पेगे़म्मे़ॽ॥ 26 आप्फेक् खिनिॽ निङ्वाॽ इसिःक् पित्थक्सा, मे़ल्लुक्, चे़ल्ले़क्सेॽ के़दुम्बा थि इग्र वेॽ थि, च्यासाङ् आम्भा खे़न् याङ्ङिल्ले़ इङे़म्मे़ॽ खम्भ्याङ् खिनिॽ हिम्सयङ्हाॽनु यहवे दाङ्बा खिनिॽ निङ्वाॽफुमाङ्ङिल्ले़ कुदगि चाम्मे़ॽआङ् सोसोत्लराङ् चोगे़म्मे़ॽ॥ 27 खिनिॽ ये़क्यक्को के़युङ्बा ले़बिःल्ले़ कुमुॽइदाङ्साहाॽ निङ्वाॽ मे़भेःत्छे़म्सिम्मिन्ने़ॽ, थेआङ्भे़ल्ले़ खे़ङ्हाॽरे़ खुन्छिॽ आप्फेक् थे़माआङ् लक् इग्र खोमा लक् मे़ङ्गत्तुन्ॽ॥ 28 तङ्बे सुम्सि के़त् थक्मा कुनुप्मो तङ्बे तङ्बेबा खिनिॽ के़रे़क् पोगुगे़न् कुजाहाॽरे़न् थिबोङ्लक्किन् ये़क्यक्कोबा चाधाःङ्ङो युक्खे़म्मे़ॽ, 29 खिनिॽ ये़क्यक्को के़युङ्बा थे़माआङ् लक् इग्र खोमा लक् मे़ङ्गप्मनाबा ले़बिःल्ले़ कुमुॽइदाङ्साहाॽ, हे़क्क्याङ् वेॽ लाजेॽबा, ये़त्छा होॽदोःक् नु मेमेदुमाहाॽ पिरे़म्सिम्मे़ॽ, खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़रे़क् याःम्बक्को खिनिॽ हाङ्वागे़न् मुॽइसाम् के़बिरिररो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.