साम्योथिम् इङ् 13 - लिम्बुनावाइत्ला से़वा मे़प्मा मेःन् के़लॽबा साम्दिङ् 1 खिनिॽ लुम्मो कुभा माङ्निङ्वाॽपान् के़बाःप्पा इग्र ताॽदि से़प्माङ् के़माक्पाल्ले़ निङ्वाॽ के़माबा मिक्सेन् इग्र निङ्वाॽ के़माबा याःम्बक् ओःन्धाक्मा ताम्सिङ् चोक्, 2 हे़क्क्याङ् खे़ल्ले़ पाःत्तुबा मिक्सेःन्निन् इग्र ने़हिनिङ्वाॽरे़ मे़न्धाप्मनाबा पाःन्निन् पोङ्ॽ हे़क्क्याङ् (खिनिॽ तगि कुसिङ् के़न्निःत्तुम्सिम्मिन्बा) “वेॽ माङ्साम्माङ्हाॽ तिम्दुम्सिम् हे़क्क्याङ् खे़ङ्हाॽ माङ्से़वा मे़त्तुम्सिम्” खे़ल्ले़ हे़क्के पाःत्तुने़भग्र, 3 खिनिॽ खे़न् माङ्निङ्वाॽपान् के़बाःप्पा इग्र ताॽदि से़प्माङ् के़माक्पे़ल्ले़ कुबाःन्निन् मे़घे़प्से़म्मिन्ने़ॽ॥ खे़ङ्ग यहवे दाङ्बा खिनिॽ निङ्वाॽफुमाङ्ङिन् खिनिॽ के़रे़क् सिक्लुङ्माॽ नु निङ्वाःल्ले़ मिःम्जि के़मे़त्तुम्बि के़म्मे़त्तुम्मिन्बि फाॽआङ् खिनिॽ निङ्वाॽ साॽरुबारो॥ 4 खिनिॽग यहवे दाङ्बा खिनिॽ निङ्वाॽफुमाङ्ङिल्ले़ कुलाम्मो लाङ्घेगे़म्मे़ॽ, खुने़ॽनु किसे़म्मे़ॽ, खुने़ॽ कुइङ्जाङ्हाॽ इःत्ते़म् नाःत्ते़म्मे़ॽ, खुने़ॽ कुबाःन्जाक्हाॽ खे़प्से़म्मे़ॽ, खुने़ॽ कुसे़वा याःम्बक् चोगे़म्मे़ॽ हे़क्क्याङ् खुने़ॽओए खिम्मासिम्मे़ॽ॥ 5 कर कन् माङ्निङ्वाॽपान् के़बाःप्पा इग्र ताॽदि से़प्माङ् के़माक्पे़न् से़प्माए पोङ्ॽ, थेआङ्भे़ल्ले़ योक् के़म्जोगिबा मिस्र लाजेॽलाम् खिनिॽ चोःक्युम्भो के़बिबाआङ् के़लःप्पा के़भे़प्पा यहवे दाङ्बा खिनिॽ निङ्वाॽफुमाङ्ङिल्ले़ इङ्जाङ् के़बिरिबा लाम्मोलाम् खिनिॽ हुमा पङ्मारे़ लागि खे़ल्ले़ खुने़ॽ कुबिफ्युङ् चोःक्मा के़हुसि॥ कम्भलॽरिक् खिनिॽ लुम्मोलाम् ताप्फे़ःम्बा पाःन्निन् खे़त्ताम्मे़ॽ॥ 6 खिनिॽ आप्फेक् फुॽनुसाॽ, खिनिॽ ये़म्बित्छा मे़न्छुमा साहाॽ, खिनिॽ लुङ्माॽ के़दुक्तुम्सिम्मा मेःत्हाॽ इग्र निःत्ताङ्बा ते़ःङ्जुम्हाॽरे़आङ् खिनिॽ पाधे़बाहाॽलाम् कुसिङ् के़न्निःत्तुम्सिम्मिन्बा वेॽ माङ्हाॽ माङ्से़वा मे़त्तुम्सिम्ॽ फाॽआङ् खिनिॽ स्वाःत् के़म्ले़मिने़भग्र— 7 खिनिॽ कब्रिङ् पिसाङ् के़युङ्बा मनाहाॽरे़ खुन्छिॽ निःत्ताङ्बा माङ्सिसाङ् माःङ्घाबासिसाङ्, लाजेःल्ले़ लत्छा कुयाओबा पोङ्साङ् किग्र वेॽ कुयाओबा पोङ्साङ्— 8 खे़न् इङ्ले़क्स्वाबे़ल्ले़ कुबाःन्निन् मे़घे़प्से़म्मिन्ने़ॽ, खे़न् मे़दिम्दे़म्मिन्ने़ॽ॥ परुमाल्ले़ लुङ्माॽ मे़न्दुक्के, मे़म्माॽए इग्र मे़न्छे़ःप्पे 9 खिनिॽ खे़न् से़क्खासाङ् के़से़रुम्लए पोङ्ॽ॥ खे़ने़ॽए तगि खे़न् मनान् लुङ्ङिल्ले़ ले़प्ते़ॽ हे़क्क्याङ् वेॽहाॽरे़आङ् लुङ्ङिल्ले़ मे़ले़प्तुर॥ 10 खिनिॽ खे़न् हदॽ सिर थारिक् लुङ्ङिल्ले़ ले़प्ते़म्मे़ॽ, थेआङ्भे़ल्ले़ योक् लाजेॽ मिस्रलाम् खिनिॽ के़लःप्पा के़भे़प्पा यहवे दाङ्बा निङ्वाॽफुमाङ्लाम् खे़ल्ले़ खिनिॽ लाम्भोःप्मा के़गोःत्ति॥ 11 कम्भलॽरिक् के़रे़क् इस्राइलिहाॽरे़ कन् मे़घे़प्सुआङ् मे़गिरो, हे़क्क्याङ् खिनिॽ लुम्मो अक्तङ्बा ताप्फे़ःम्बा याम्मो हाःत्ले़आङ् मे़जोगुन्ॽ॥ 12 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ युङ्मारे़ लागि पिमा के़इःत्तिबा कुभा ये़क्यक्को 13 कुभा कुसुम् मे़न्दम्मनाबा मनाहाॽ मे़ये़म्सिङ्ङाङ् खे़प्मो के़युङ्बाहाॽ “आप्फाल्ले़आङ् कुसिङ् मे़न्निःत्तेबा माङ्हाॽ माङ्से़वा मे़त्तुम्सिम्” मे़मे़त्तुसिआङ् मे़हुसुसिबा खिनिॽ के़घे़प्सुम्ने़भग्र, 14 सेःन्दोसे़म्से़ॽ, हक्साम्मे़ॽ कोःत्ते़म्मे़ॽ हे़क्क्याङ् साॽराम्मे़ॽ, खे़म्ब्याङ् हे़क्तङ्बा याम्गे़सिङ्बा याःम्बक् खिनिॽ लुम्मो से़क्खाए पोःक्खे़बाने़भग्र, 15 खिनिॽ खे़न् ये़क्यक्को के़युङ्बाहाॽ नु खे़ङ्हाॽरे़ खुन्छिॽ के़रे़क् पित्थक्साहाॽ ताभेःल्ले़ च्ये़प्ते़म् से़रे़म्सिम्मे़ॽ हे़क्क्याङ् खे़न् ये़क्यक्किन् वरे़ङ्ले़ङ् मे़क्खे़म्मे़ॽ॥ 16 खे़प्मोबा के़रे़क् सामापुमाहाॽआङ् ये़क्यक्किल्ले़ कुलुम्मो फुक्खे़म्मे़ॽआङ् खे़न् ये़क्यक्किन् नु सामापुमाहाॽ सोसोरिक् खाप्पुथ्यःङ् मिधिक्खे़म्देसे़म्मे़ॽ॥ यहवे दाङ्बा खिनिॽ निङ्वाॽफुमाङ्ङिल्ले़ कुलागि खे़न् मिधिङ्मनादेमनाबा सिदुङ्जभा कुइसिक् पोङ्ॽ॥ खे़न् सदादिङ्ले़ लागि खाप्पुथ्यःङ् पोङ्ल हे़क्क्याङ् खे़न् याम्मो मे़न्जोगुन्ल॥ 17 खाप्पुथ्यःङ् चोःक्मारे़ लागि से़म्मनाबा थे़मा पाःन्हाॽआङ् खिनिॽ मे़देॽरे़म्मिन्ने़ॽ, हे़क्क्याङ् यहवे दाङ्बे़ल्ले़ साॽरिक् किप्मा के़घुबा कुस्साक्के़न्निन् चिप्तुॽ॥ खुने़ॽ खिनिॽ लुङ्गुम् ओःन्गे़धाक्तिॽ हे़क्क्याङ् लुङ्माॽ के़दुक्तिआङ् खिनिॽ पाधे़बाहाॽनु चोगुबा कुमाङ्हुप् इसिःक् खुने़ॽ खिनिॽ यरिक् के़भोसिॽ, 18 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ कुबान् के़घे़म्बा के़बोःक्खिआङ् आइन् आङ्गाॽ खिनिॽ पिनिङ्ल पत्ताबा आइङ्जाङ् कुइसिक् खुने़ॽ के़रे़क् कुइङ्जाङ्हाॽ खिनिॽ के़इःत्तुम् के़नाःत्तुम् हे़क्क्याङ् खुने़ॽ कुमिक्साओ कुदोःप्मा याःम्बक् के़जोगुम्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.