साम्योथिम् इङ् 12 - लिम्बुलत्छारक् माङ्से़वा चोःक्मादे़न् 1 खिनिॽ पाधे़हाॽरे़ खुनिॽ यहवे दाङ्बा निङ्वाॽफुमाङ्ङिल्ले़ खिनिॽ युक् चोःक्मारे़ लागि के़बिरिबा लाजेॽओ खिनिॽ हिङ्हिङ् खिनिॽ सिङ्सिङ् ये़क्ये़क्काङ् इःप्मा नाःप्मा के़बोङ्बा थिम्हाॽ नु साम्योथिम्हाॽ हाबा कन्हाॽरो॥ 2 खिनिॽ युक्को ताःप्मा के़जोगुम्सिम्बा सुवाङ्हाॽरे़ खुन्छिॽ केःम्बा कोःक्मा नु थे़गु माङ्वाओ के़ने़बा खुन्छिॽ माङ्हाॽ से़वा मे़मे़त्तुसिबादे़न्हाॽ नु हुम्बे़त् कुबोराक् के़से़बा सिङ्बुङ् सिगाङ्बा के़रे़क् ते़न्हाॽ खिनिॽ वरे़ङ्ले़ङ् खाप्पुथ्यःङ् चोगे़म्मे़ॽ॥ 3 खे़ङ्हाॽरे़ खुन्छिॽ नावाइत्लाहाॽ हे़रे़म् पिरे़म्सिम्मे़ॽ॥ खे़ङ्हाॽरे़ खुन्छिॽ सुत्थोबा लुङ्हाॽ फयःप्फयःप् यःप्से़म् पिरे़म्सिम्मे़ॽ॥ खे़ङ्हाॽरे़ खुन्छिॽ असेरा माङ्ङिल्ले़ कुसित्लाङ्हाॽ मिओ हाःन्दाम्दे़से़म्मे़ॽ॥ खे़ङ्हाॽरे़ खुन्छिॽ माङ् नावाइत्लाहाॽ सोःन्दे़म् पिरे़म्सिम्मे़ॽ हे़क्क्याङ् खे़न् ते़न्हाॽलाम् खुन्छिॽ मिङ् मासे़म् पिरे़म्सिम्मे़ॽ॥ 4 खे़ङ्हाॽरे़ मे़जोगुबा परिक्ले़ यहवे दाङ्बा खिनिॽ निङ्वाॽफुमाङ्ङिन् माङ्से़वा मे़मे़त्ते़म्मिन्ने़ॽ॥ 5 कर यहवे दाङ्बा खिनिॽ निङ्वाॽफुमाङ्ङिल्ले़ खुने़ॽ आप्फेक् कुमिङ् युङ्मा नु खुने़ॽ आप्फेक् याङ्धोःक्मारे़ लागि खिनिॽ के़रे़क् थाःक्हाॽओलाम्बा लत्छा ते़न्धिक् सेगुॽ॥ खिनिॽ आम्भा खे़न् ते़न्नो पेगे़म्मे़ॽ॥ 6 हाबा खे़प्मोए खिनिॽ मिधिङ्मनादेमनाबा सिदुङ्जभा, सिदुङ्जभा, थिबोङ्लक् नु मे़न्दोःन्ने मे़म्बोङ्मनाबा हुक्वा, माङ्हुप् के़जोगुम्बा सिदुङ्जभा, आप्फेक् निङ्वाॽलाम् तोःम्मनाबा सिदुङ्जभा, हे़क्क्याङ् पित्थक्सा नु मे़ल्लुक् मे़ःन्दाहाॽओबा तगि के़धाप्पा थक्साहाॽ तारे़म्से़ॽ॥ 7 आम्भा खे़प्मोए खिनिॽ नु खिनिॽ हिम्सयङ्हाॽरे़ यहवे दाङ्बा खिनिॽ निङ्वाॽफुमाङ्ङिल्ले़ कुदगि के़जाम् के़धुङुम् हे़क्क्याङ् खिनिॽ के़जोगुम्बा के़रे़क् याःम्बक्को खिनिॽ के़सःत्तिॽ, थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ हाङ्वागे़न् मुॽइसाम् के़बिरिआङ् वाॽ॥ 8 आइन् आनिॽ के़रे़क्ले़ आप्फेक् मिक्साओ कुदोःप्मा आलेःत्तुम्बा माङ्से़वा चोःक्मना हे़क्तङ्बा पान् खे़प्मो मे़जोगे़म्मिन्ने़ॽ, 9 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ नाःम्सिङ्मादे़न् नु लक्खोमा पिमा के़जोगिआङ् ने़रो, खे़प्मो आल्लसाङ् खिनिॽ मे़ङ्गे़त्ते के़वयिॽ॥ 10 कर यर्दन वहःङ्ङिन् नाधाःम्बि के़गाःक्तुम्माङ् यहवे दाङ्बा खिनिॽ निङ्वाॽफुमाङ्ङिल्ले़ पिमा के़इःत्तिबा लाजेन् के़युक्तुम्माङ् खे़प्मो के़युङिॽ, हे़क्क्याङ् खुने़ॽ खिनिॽ ताप्थेक् याम्धेक् के़युक्खिआङ् के़रे़क् पिसाङ्बा निङ्मिहाॽलाम् खिनिॽ नाःम्सिङ्मा के़बिरिॽ॥ 11 खे़ब्याङ् यहवे दाङ्बा खिनिॽ निङ्वाॽफुमाङ्ङिल्ले़ आप्फेक् कुमिङ् युङ्मारे़ लागि खुने़ॽ सेगुबा ते़न्नो आङ्गाॽ खिनिॽ पिनिङ्बा इङ्जाङ् खिनिॽ मिधिङ्मनादेमनाबा सिदुङ्जभा, वयागे़न् सिदुङ्जभाहाॽ, खिनिॽ थिबोङ्लक्, तोःम्माए के़बोङ्बा हुक्वाहाॽ नु खिनिॽ यहवे दाङ्बे़ल्ले़ कुलागि माङ्हुप् के़जोगुम्बा नुःब्नुबा पाःन्हाॽ तारे़म्मे़ॽ॥ 12 हे़क्क्याङ् खिनिॽ, खिनिॽ साहाॽ, योग्बा योःग्माहाॽ नु खिनिॽ ये़क्यक्को के़वाॽबा आप्फेक् खुन्छिॽ लक् नु लाजेॽसिङ्बुङ् मे़ङ्गप्मनाबा ले़बिःल्ले़ कुमुॽइदाङ्साहाॽ, यहवे दाङ्बा खिनिॽ निङ्वाॽफुमाङ्ङिल्ले़ कुदगि सोसोत्लराङ् चोगे़म्मे़ॽ॥ 13 सिङ्सिङ् ये़क्ये़क्काङ् वये़म्मे़ॽ॥ खिनिॽ मिधिङ्मनादेमनाबा सिदुङ्जभान् च्याज्या खिनिॽ सिराॽगे़धाङ्बादे़न्नो मे़दोःन्दे़म्मिन्ने़ॽ॥ 14 कर यहवे दाङ्बे़ल्ले़ खिनिॽ थाःक्कोलाम् सेगुबादे़न्नोरक् तोःन्दे़म्मे़ॽ, हे़क्क्याङ् आङ्गाॽ इङ्जाङ् पिनिङ्ल पत्ताबा के़रे़क् याःम्बक्हाॽआङ् खे़प्मो चोगे़म्मे़ॽ॥ 15 कर यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़बिरिबा हाङ्वागे़न् मुॽइसाम् कुइसिक् खिनिॽ आत्तिन् ये़क्यक्कोसाङ् खिनिॽ निङ्वाॽ के़जोगुम्बा यारिक् खिनिॽ सुत्थो थक्साहाॽ से़प्मासिआङ् चामा के़सुक्तुम्ॽ॥ स्याःक्पा नु पे़ःङ्वा सा के़जाम्बा कुइसिक्, थिम् के़त्ल सुत्थो नु आसुत्थो आत्तिन् मनाःल्ले़साङ् खे़न् चामा सुक्तुॽ॥ 16 माक्खिन्लक् मे़जाम्मिन्ने़ॽ॥ खे़न् च्वाःत् कुइसिक् खाम्बाङ्ङो हुक्खे़म्देसे़म्मे़ॽ॥ 17 खिनिॽ आप्फेक् ये़क्यक्को पोगुगे़न् कुजा, कुबोक् चे़ल्ले़क्सेॽ थि नु निःङ्गेःल्ले़ थिबोङ्लक्, इग्र पित्थक्सा किग्र मे़ल्लुक् मे़ःन्दाहाॽलाम् तगि के़धाप्पा थक्सा, इग्र माङ्हुप् के़जोगुम्बा कुभा पान् किग्र आप्फेक् निङ्वाॽओबा सिदुङ्जभा इग्र तोःम्माए के़बोङ्बा सिदुङ्जभान् खिनिॽ आप्फेक् ये़क्यक्को मे़जाम्मिन्ने़ॽ॥ 18 परुमाल्ले़ यहवे दाङ्बा खिनिॽ निङ्वाॽफुमाङ्ङिल्ले़ सेगुबादे़न्नो खुने़ॽ कुदगि खिनिॽ, खिनिॽ साहाॽ, योग्बा योःग्मा नु खिनिॽ ये़क्यक्को के़वाॽबा ले़बिःल्ले़ कुमुॽइदाङ्साहाॽरे़ खे़ङ्हाॽ चे़म्मे़ॽ, खे़ब्याङ् खिनिॽ के़जोगुम्बा के़रे़क् याःम्बक्को यहवे दाङ्बा खिनिॽ निङ्वाॽफुमाङ्ङिल्ले़ कुदगि सोसोत्लराङ् चोगे़म्मे़ॽ॥ 19 सिङ्सिङ् ये़क्ये़क् वये़म्मे़ॽ, हे़क्क्याङ् खिनिॽ आप्फेक् लाजेॽओ के़वयिर थारिक् ले़बिःल्ले़ कुमुॽइदाङ्साहाॽ पे़ल्ले़ङ् मे़मे़त्ते़म्सिम्मे़न्ने़ॽ॥ 20 आल्ल यहवे दाङ्बा खिनिॽ निङ्वाॽफुमाङ्ङिल्ले़ कुमाङ्हुप् कुइसिक् खिनिॽ इःन्दोन् फोसु के़बिरिॽ, हे़क्क्याङ् खिनिॽ सा चाम्बे़गो के़लॽरिआङ् अक्खे के़बाःत्तुम्ॽ, “आनिगे सा चाम्बे़,” हे़क्केःल्ले़ खिनिॽ चामा निङ्वाॽ के़जोगुम्बा यारिक् चे़म्मे़ॽ॥ 21 यहवे दाङ्बा खिनिॽ निङ्वाॽफुमाङ्ङिल्ले़ आप्फेक् कुमिङ् युङ्मारे़ लागि लत्छा ते़न् खुने़ॽ सेगुॽ, खे़न् माःङ्ने़भग्र, यहवे दाङ्बा खिनिॽ निङ्वाॽफुमाङ्ङिल्ले़ के़बिरिबा पित्थक्सा नु मे़ल्लुक् मे़ःन्दाहाॽ से़रे़म्सिम्मे़ॽ, खे़ब्याङ् आङ्गाॽ इङ्जाङ् पिनिङ्बा कुइसिक् आप्फेक् ये़क्यक्को चाहा के़जोगिबा यारिक् चे़म्मे़ॽ॥ 22 स्याःक्पा इग्र पे़ःङ्वा के़जाम्बा इसिःक् खे़ङ्हाॽआङ् चे़म्मे़ॽ—थिम् के़त्ल सुत्थो इग्र आसुत्थो मना हाःत्ले़साङ् खे़न् चामा सुक्तुॽ॥ 23 माक्खिॽइन् आप्फाल्ले़आङ् मे़जे़म्मिन्ने़ॽ, थेआङ्भे़ल्ले़ माक्खिङ्ग हिङ्मन्लो, हे़क्क्याङ् साःन्नु सोरिक् हिङ्मन् चामा मे़नुॽने़न्॥ 24 खिनिॽ खे़न् माक्खिन् चामा मे़नुॽने़न्॥ च्वाःत् हे़क्के खे़न् खाम्बाङ्ङो हुक्खे़म्देसे़म्मे़ॽ॥ 25 खिनिॽ खे़न् मे़जाम्मे़न्ने़ॽ, हे़क्क्याङ् यहवे दाङ्बाल्ले़ कुमिक्साओ थेःन् कुदोःप्मा वाॽ खे़न् खिनिॽ के़जोगुम्बाल्ले़ चोगुल्ले़ खिनिॽ नु खिनिॽ याङ्सिबा मुॽइदाङ्साहाॽ मे़नुॽमे़दार॥ 26 खिनिॽ के़दोःन्दुम्बा हुक्वाहाॽ नु माङ्हुप् के़जोगुम्बा सिदुङ्जभाहाॽ याङ्ङासिम्मे़ॽआङ् यहवे दाङ्बे़ल्ले़ सेगुबादे़न्नो पेगे़म्मे़ॽ॥ 27 खिनिॽ मिधिङ्मनादेमनाबा सिदुङ्जभा साहाॽ नु माक्खिन् ने़प्माङ् यहवे दाङ्बा खिनिॽ निङ्वाॽफुमाङ्ङो तोःम्मा ले़त्ति तोःम्मादे़न्नो तोःन्दे़म्मे़ॽ॥ सिदुङ्जभा माक्खिन् यहवे दाङ्बा खिनिॽ निङ्वाॽफुमाङ्ङो तोःम्मा ले़त्ति तोःम्मादे़न्निल्ले़ कुबेसाङ् के़हुक्खुम् के़देसुम्ल पोङ्ॽ॥ सान् चाए खिनिॽ चामा के़सुक्तुम्ॽ॥ 28 आङ्गाॽ खिनिॽ इङ्जाङ् पिनिङ्ल पत्ताबा थिम्हाॽ इःप्मा नाःप्मारे़ लागि निङ्वाॽ पिरे़म्मे़ॽ, हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुमिक्साओ थेःन् नुबा नु कुदोःप्मा चोक् खे़न् खिनिॽ के़जोगुम्बाल्ले़ चोगुल्ले़ खिनिॽ नु याङ्सिबा खिनिॽ मुॽइदाङ्साहाॽ मे़नुॽमे़दाररो॥ नावाइत्लाहाॽ से़वा मे़प्मासि मे़नुॽने़न् 29 खिनिॽ ते़न्धङ् के़जोगिआङ् नाःप्मादेमा के़जोगुम्सिम्बा मे़न्छाम् सुवाङ्हाॽ, यहवे दाङ्बा खिनिॽ निङ्वाॽफुमाङ्ङिल्ले़ खे़ङ्हाॽ खिनिॽ तगाङ्ङे मे़क्खुसिॽ॥ कर खे़ङ्हाॽ के़नाःत्तुम् के़देसुम्सिम्माङ् आल्ल खुन्छिॽ लाजेॽओ के़युङिॽ, 30 हे़क्केःल्ले़ खिनिॽ सिङ्सिङ् ये़क्ये़क् युङे़म्मे़ॽ, हे़क्क्याङ् खे़ङ्हाॽ मे़मे़क् मे़जुःत्ताङ् खे़ङ्हाॽरे़ खुनिॽ साक्थिम्मो खिनिॽ मे़ध्ये़म्मिन्ने़ॽ, हे़क्क्याङ् अक्खे मे़लॽरे़म्मिन्ने़ॽ, “कन् सुवाङ्हाॽरे़ खुन्छिॽ माङ्साम्माङ्हाॽ आक्खेलॽरिक्ने माङ्से़वा मे़मे़त्तुसिबे?” खे़ङ्हाॽरे़ खुन्छिॽ माङ्साम्माङ्हाॽरे़ पाःन्नो कुसिङ् निःप्मा निङ्वाॽ मे़जोगे़म्मिन्ने़ॽ॥ आनिगे़आङ् हे़क्केए चोगुम्बे़ मे़लॽरे़म्मिन्ने़ॽ॥ 31 खे़ङ्हाॽरे़ मे़जोगुबा हे़क्के यहवे दाङ्बा खिनिॽ निङ्वाॽफुमाङ्ङिन् माङ्से़वा मे़मे़त्ते़म्मिन्ने़ॽ, थेआङ्भे़ल्ले़ खे़ङ्हाॽरे़ खुन्छिॽ माङ्साम्माङ्हाॽ से़वा मे़मे़त्तुसिल्ले़ खे़ङ्हाॽरे़ के़रे़क् परिक्पा सिक्के़ले़ःङ्बा पाःन्हाॽ मे़जोगुॽ, यहवे दाङ्बे़ल्ले़ खे़न् चिःत्तुॽ॥ खे़ङ्हाॽरे़ खुन्छिॽ माङ्हाॽरे़ लागि खुन्छिॽ साहाॽआङ् मिओ सिदुङ्जभा मे़जोगुसिॽ॥ 32 खे़ल्ले़चोगुल्ले़ आङ्गाॽ पिनिङ्ल पत्ताबा के़रे़क् इङ्जाङ्हाॽ इःप्मा नाःप्मारे़ लागि सिङ्सिङ् ये़क्ये़क् लॽरे़म्मे़ॽ॥ खे़ङ्हाॽओ कुभा थे़माआङ् मे़योॽरे़म्मिन्ने़ॽ, इग्र कुभा थे़माआङ् मे़घे़ःक्खे़म्मिन्ने़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.