साम्योथिम् इङ् 11 - लिम्बुयहवे दाङ्बे़न् के़रे़क्नुःल्ले़ यम्बा 1 यहवे दाङ्बा खिनिॽ निङ्वाॽफुमाङ्ङिन् मिःम् मे़त्ते़म्मे़ॽ, हे़क्क्याङ् खुने़ॽ कुभाङ्हाॽ, कुइङ्दत्हाॽ, कुधिम्हाॽ नु कुइङ्जाङ्हाॽ आभे़ल्ले़साङ् इःत्ते़म् नाःत्ते़म्मे़ॽ॥ 2 आइन् कन् पाःन्निन् निङ्वाॽ इःत्ते़म्मे़ॽ, यहवे दाङ्बे़ल्ले़ कुहे़न्थिम्मिन् खिनिॽ निङ्वाॽ के़घोसुम् कर खिनिॽ साहाॽरे़ निङ्वाॽ मे़ङ्घोए मे़गत्तुॽ॥ खुने़ॽ कुहाङ्वा कुमाङ्वा, खुने़ॽ मुक्साम्बा कुहुक्किन् नु सन्छुबा कुहुक्किन् खिनिॽ के़निसुम्माङ्ङे वाॽ॥ 3 मिस्र लाजेॽ लुम्मो, मिस्रबा हाङ् फारो नु खुने़ॽ के़रे़क् कुलाजेॽ कुले़ःम् खुने़ॽ ओसेःन्धाङ् चोगुबा मिक्सेन् नु याःम्बक्हाॽ खिनिॽ के़निसुम्माङ्ङे वाॽ॥ 4 मिस्रबा थक्सुबाहाॽ, अन्हाॽ नु अन्लाधाहाॽरे़ खिनिॽ के़म्नाःत्तिल्ले़ यहवे दाङ्बे़ल्ले़ हे़ःत्ताङ्बा वरःङ्ङोबा च्वाःत्तो खे़ङ्हाॽ हुम्सुसिआङ् सदादिङ्ले़ लागि मे़क्खुसिबा पाःन्निन्नाङ् खिनिॽ के़निसुम्माङ् के़वयिॽ॥ 5 कन् ते़न्नो खिनिॽ मे़ङ्गे़त् मे़म्भे़न्ने थारिक् मुरे़क् खारे़क् थेआङ् के़होप्पादे़न्नो खुने़ॽ थे़मा थे़मा चोगु खे़न् के़निबा खिनिॽ साहाॽ मेःन्॥ 6 हे़क्क्याङ् खाम्बाङ्ङिन् मुरान् हा मे़प्मनाबा कुसिङ् पःक्खे़आङ् आक्खेलॽरिक् रुबेन थाःक्कोबा एलिआबरे़ कुस्सा दातान नु अबिरामे़न्, खे़ङ्हाॽरे़ खुन्छिॽ हिम्सयङ्हाॽ, साःङ्गाहिम्हाॽ नु खे़ङ्हाॽरे़ खुन्छिॽ के़रे़क् कुहिङ्वे़त् थक्साहाॽ सोसोरिक् के़रे़क् इस्राइलिहाॽरे़ खुनिॽ तगि खे़ङ्हाॽ लरुदेसुसिबान्नाङ् खिनिॽए के़निसुम्माङ् वाॽ॥ 7 खिनिॽ आप्फेक् मिक्किल्ले़ यहवे दाङ्बे़ल्ले़ चोगुबा कन् के़रे़क् पयम् यम्बा याःम्बक्हाॽ खिनिॽ के़निसुम्माङ् वाॽरो॥ माङ्हुप् के़बोङ्बा लाजेॽओ हाङ्वागे़न् मुॽइसाम् 8 कल्ले़चोगुल्ले़ आङ्गाॽ आइन् इङ्जाङ् पिनिङ् ल पत्ता खे़ङ्हाॽ के़रे़क् इःत्ते़म् नाःत्ते़म्मे़ॽ, हे़क्केलॽरिक् खिनिॽ के़धुम्बा पोःक्खे़म्मे़ॽआङ् यर्दन वहःङ्ङिन् काःक्ताम्मे़ॽ हे़क्क्याङ् युक् चोःक्मा के़बोङ्बा लाजेन् आप्फेक् लाजेॽ चोःक्मा सुक्ते़म्मे़ॽ॥ 9 हे़क्क्याङ् यहवे दाङ्बे़ल्ले़ खिनिॽ पाधे़बाहाॽनु खे़ङ्हाॽ नु खे़ङ्हाॽरे़ खुनिॽ मुॽइदाङ्साहाॽ पिमासि माङ्हे़क् चोगुबा वे़त्ते़सरे़ पित्नु नु सक्वाघु के़गुङ्बा लाजेॽओ खिनिॽ थाःक् चाॽर॥ 10 खिनिॽ युक् चोःक्मा के़जोगुम्बा लाजेन् खिनिॽ के़लःन्दि के़भे़रिबा मिस्र लाजेॽ हे़क्तङ्बा मे़जोक्ने़न्, खे़म्मोग खिनिॽ याॽरिःम्बा के़हेॽरुम्माङ् नुधि इक्ताप्पो हे़क्के लाङ्ङिल्ले़ च्वाःत् के़साःत्तुम् के़याक्तुम्॥ 11 कर खिनिॽ युक् चोःक्मारे़ लागि यर्दन नाधाःम्बि के़बेगिर के़बत्छिबा लाजेःङ्ग कोःक्मा फाङ्जङ् नु ने़ने़बादे़न्नोबा लाजेॽरो, खे़प्मोग ताङ्साङ्बोबा च्वाःत्तिल्ले़ खाम्बेःक्किन् वारक्खुॽ॥ 12 खे़न् लाजेन् ओमे़प्मा चोःक्मा याःम्बक्किङ्ग यहवे दाङ्बा निङ्वाॽफुमाङ्ङिल्ले़ए चोगुॽ॥ तङ्बेःल्ले़ कुहेःक्सिङ्माआङ्धो तङ्बेःल्ले़ कुनुप्मा थारिक्के यहवे दाङ्बा खिनिॽ निङ्वाॽफुमाङ्ङिल्ले़ नुरिक् तारिक्काङ् खे़न् ओमे़त्तुॽ॥ 13 कल्ले़चोगुल्ले़ आङ्गाॽ आइन् खिनिॽ पिनिङ्बा इङ्जाङ्हाॽ नसाःन्साबा के़बोःक्खिआङ् यहवे दाङ्बा खिनिॽ निङ्वाॽफुमाङ्ङिन् मिःम्जि के़मे़त्तुम्ॽ हे़क्क्याङ् खिनिॽ के़रे़क् सिक्लुङ्माॽ नु सक्मा साम्मिल्ले़ कुसे़वा याःम्बक् के़जोगुम्ने़भग्र, 14 आङ्गाॽ वयाम् कुइसिक् चुङ्वाःम्मा नु हाङ्वाःम्मोबा वहित्हाॽ थासुर याःन्दुङ्ॽ, हे़क्केलॽरिक् खिनिॽ कुजा, कुबोक् चे़ल्ले़क्सेॽ थि नु निःङ्गेॽ सुम्मा के़सुक्तुम्ल॥ 15 आङ्गाॽ खिनिॽ पित् थक्साहाॽरे़ लागिआङ् थक्सा चाराम्मादे़न्नो यान् पिनिङ्ॽ, हे़क्क्याङ् खिनिॽ चाहा के़जोगिबा के़रे़क् कुजाहाॽ खिनिॽ के़घोसुम्ॽ॥ 16 कल्ले़चोगुल्ले़ खिनिॽ सिङ्सिङ् ये़क्ये़क् लॽरे़म्मे़ॽ, मेःन्ने़भग्र खिनिॽ लाःत्लाःत् के़मे़त्तासिआङ् वेॽ माङ्साम्माङ्हाॽ से़वा नु माङ्से़वा के़मे़त्तुम्सिम्बिला, 17 हे़क्क्याङ् यहवे दाङ्बे़ल्ले़ कुसाक्के़न्निन् खिनिॽ तक्ले़ङ्वाओ थारो, खे़ब्याङ् वहित् मे़धाने़न्ल हे़क्क्याङ् खाम्बेःक्को पोगुगे़न् कुजा मे़धोःक्ने़न्ल फाॽआङ् खुने़ॽ ताङ्साङ्बोबा वगेःङ्मान्ने साक्तुॽ, हे़क्क्याङ् यहवे दाङ्बे़ल्ले़ खिनिॽ पिमा के़इःत्तिबा खे़न् लाजेॽलाम् खिनिॽ हाराए के़मे़गि के़मारिॽ॥ 18 खे़ल्ले़चोगुल्ले़ आङ्गाॽ कन् आबाःन्जाःक्हाॽ खिनिॽ निङ्वाॽओ नु सिक्लुङ्माॽओ युक्खे़म्मे़ॽ॥ खे़ङ्हाॽ खिनिॽ हुक्हाॽओ नु त्वाबो मिक्सेन् कुइसिक् खेःक्खे़म्मे़ॽ॥ 19 खिनिॽ हिम्मो के़वयिल्ले़, लाम्मो लाङ्गे़घेगिल्ले़, के़नाःम्मासिल्ले़ नु के़बोगिल्ले़ खिनिॽ खे़ङ्हाॽरे़ कुयाःम्बेओ पाःन्छुम् इङ्सुम् तारे़म्मे़ॽ खम्भ्याङ् खिनिॽ साहाॽ हुॽरे़म्सिम्मे़ॽ॥ 20 खिनिॽ हिम्मोबा लाम्धेःत्पुङ् नु मालाम्धेःत्हाॽओ खे़ङ्हाॽ साप्ते़म्मे़ॽ, 21 हे़क्केलॽरिक् खिनिॽ सुधे़बा ताक्थे़बाहाॽ पिमासि माङ्हे़क् चोगुबा लाजेॽओ खिनिॽ नु खिनिॽ मुॽइदाङ्साहाॽ इक्सादिङ् खाम्बेक् सम्धाङ् ताङ्साङ्बे़न् पत्ल थारिक् खुनिॽ थाःक् चाॽर॥ 22 यहवे दाङ्बा खिनिॽ निङ्वाॽफुमाङ्ङिन् मिःम्जि मे़प्मा, खुने़ॽ के़रे़क् कुलाम्मो लाङ्घेःक्मा नु खुने़ॽओ खिम्सिङ्मारे़ लागि आङ्गाॽ खिनिॽ इःप्मा नाःप्मारे़ लागि पिनिङ्ल पत्ताबा कन् के़रे़क् इङ्जाङ्हाॽ खिनिॽ सिङ्सिङ् ये़क्ये़क्काङ् के़इःत्तुम् के़नाःत्तुम्ने़भग्र, 23 यहवे दाङ्बे़ल्ले़ कन् के़रे़क् सुवाङ्हाॽ खिनिॽ तगिलाम् नाःत्तुदेसुसिॽ, हे़क्क्याङ् खिनिॽनुःल्ले़ यम्बा नु के़धुम्बा सुवाङ्हाॽ खिनिॽ के़नाःन्दुम्सिम्ॽ॥ 24 खिनिॽ लाङ्दाप्पेल्ले़ के़दोॽरुम्बा के़रे़क् ते़न्हाॽ खिनिॽइन् पोङ्ॽ—मुरे़क् खारे़क् थेआङ् के़होःप्पादे़न्नाङ्धो लेबनान थारिक्, हे़क्क्याङ् पयम् यम्बा वहःङ् युफ्रेतिसआङ् कत्ना नाम्धा पिसाङ्बा लुम्बा वरःङ् थारिक्के खिनिॽ इःन्दो पोङ्ॽ॥ 25 खिनिॽ तगि आत्तिन्हाॽरे़आङ् मे़न्धरुन्ॽ॥ यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़मे़त्तिबा कुइसिक् खिनिॽ आत्तान् के़बेगिसाङ् के़रे़क् लाजेॽओ खिनिॽ के़म्गिरिआङ् यङ्मा मे़सि॥ 26 ओमे़त्ते़म्मे़ॽ, आइन् आङ्गाॽ खिनिॽ तगि हाङ्वागे़न् मुॽइसाम् नु माङ्दे साङ्ग्रा सेःक्मा सुये़म् पिनिङ्ल पत्ता॥ 27 आङ्गाॽ आइन् खिनिॽ पिनिङ्ल पत्ताबा इङ्जाङ्हाॽ कुइसिक् यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्हाॽ के़इःत्तुम् के़नाःत्तुम्ने़भग्र खिनिॽ मुॽइसाम् के़घोसुम्ॽ॥ 28 हे़क्क्याङ् यहवे दाङ्बा खिनिॽ निङ्वाॽफुमाङ्ङिल्ले़ कुइङ्जाङ्हाॽ के़न्इःत्तुम् के़न्नाःत्तुम्मिन्नाङ् खिनिॽ कुसिङ् के़न्निःत्तुम्सिम्मे़न्बा माङ्हाॽ के़दिम्दुम्सिम्ॽ हे़क्क्याङ् आङ्गाॽ आइन् इङ्जाङ् पिनिङ्बा लाम्मिन् के़ले़रुम्ने़भग्र माङ्दे साङ्ग्राःल्ले़ खिनिॽ के़दे़त्तिॽ॥ 29 आल्ल यहवे दाङ्बा खिनिॽ निङ्वाॽफुमाङ्ङिल्ले़ खिनिॽ के़लासिबा लाजेॽओ के़भे़त्तिॽ, खे़ब्याङ् खिनिॽ मुॽइसाम्मिन् गिरिज्जिम थे़गु सम्धाङ् हे़क्क्याङ् माङ्दे साङ्ग्राःन् चाए एबाल थे़गु सम्धाङ् उवा चोगे़म्मे़ॽ॥ 30 (ओमे़त्ते़म्मे़ॽ, कन् ने़त्छि कोःक्माहाॽ यर्दन नाम्धा पिसाङ्, यर्दन ने़ने़बादे़न्नो के़युङ्बा कनानिहाॽरे़ खुन्छिॽ लाजेॽओ युङ्, गिलगाल ये़क्यक् निःत्ताङ् मोरेबा यहिबा सिङ्बुङ्लाम् माःङ्घा मे़जोक्ने़न्॥) 31 यहवे दाङ्बा खिनिॽ निङ्वाॽफुमाङ्ङिल्ले़ खिनिॽ पिमा के़इःत्तिबा लाजेन् युक्मारे़ लागि यर्दन नाधाःम्बि खिनिॽ पेःक्मा के़जोगिॽ॥ आल्ल खे़न् ते़न्निन् खिनिॽ युक्मारे़ लागि खिनिॽ खे़प्मो के़युङि के़गरि, 32 हे़क्केःल्ले़ आङ्गाॽ आइन् खिनिॽ पिनिङ्बा कन् के़रे़क् थिम्हाॽ इःप्मा नाःप्मा निङ्वाॽ निःन्धो चोगे़म्मे़ॽओ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.