साम्योथिम् इङ् 10 - लिम्बुमोसाःल्ले़ थिबोङ् इङ्जाङ्ङिन् याम्मो खोसु ( ला ३४:१-१० ) 1 खे़न् ये़म्मो यहवे दाङ्बे़ल्ले़ आङ्गाॽ मे़त्ताङ्, “तगिबा हे़क्केए लुङ्ङिल्ले़न् साप्लुङ् ने़त्छि खे़रे़ॽ, हे़क्क्याङ् कोःक्मा फाङ्जङ्ङो थोःक्सिङ्ङे़ॽआङ् आङ्गाॽओ थाङे़ॽ॥ लत्छा सिङ्ङिल्ले़न् सन्दोक् थिक्काङ् चोगे़ॽ॥ 2 खे़ने़ॽ के़हे़रुबा तगिबा साप्लुङ्ङो के़बप्पा पाःन्जाःक्हाॽ आङ्गाॽ कन् साप्लुङ्हाॽओ साप्तुङ् पिने़रो, हे़क्क्याङ् खे़ङ्हाॽ खे़ने़ॽ सन्दोक्को के़याक्तुर पोङ्ॽ॥” 3 खे़ब्याङ् मोसाःल्ले़ बबुल सिङ्ङिल्ले़न् सन्दोक् चोगु, तगिबा हे़क्तङ्बा लुङ्ङिल्ले़न् साप्लुङ् ने़त्छि खक्तु हे़क्क्याङ् यहवे दाङ्बाल्ले़ मे़त्तुबा कुइसिक् तानाम्सा पोगे़ॽआङ् सिनै कोःक्माओ थोःक्सिङ्॥ खुने़ॽ कुहुक्को खे़न् ने़त्छि साप्लुङ्हाॽआङ् तेॽरुआङ् पे॥ 4 हे़क्क्याङ् यहवे दाङ्बे़ल्ले़ चुम्भो ये़न्निल्ले़ याःन्दिक् कोःक्मा फाङ्जङ्ङो मिधुङ्दिङ् मिराःक् लुम्मोलाम् खिनिॽ के़बिरिबा थिबोङ् इङ्जाङ्ङिन् तगि हे़क्केए हाबा खे़न् पाःन्जाःक्हाॽ खे़न् साप्लुङ्हाॽओ साप्तुआङ् आङ्गाॽ पिराङ्॥ 5 खे़न् एगाङ् आङ्गाॽ कोःक्मा फाङ्जङ्लाम् यो थासिङ्ङा, खम्भ्याङ् यहवे दाङ्बे़ल्ले़ आङ्गाॽ इङ्जाङ् पिराङ्बा हे़क्केए आङ्गाॽ चोगुङ्बा कन् सन्दोक्को खे़न् साप्लुङ्हाॽ केःत्तुङ्, खे़ब्याङ् आल्लो खे़न् साप्लुङ्हाॽ खे़प्मो याक्॥ 6 (इस्रइलिहाॽ याकानिहाॽरे़ खुन्छिॽ वाबाक्हाॽओलाम् लाङ्मे़घेगे़आङ् मोसेराओ मे़गे़रे़ मे़भे़रे़॥ खे़प्मो हारुने़न् मासिङ्, हे़क्क्याङ् खुने़ॽ खे़प्मो मे़जिक्खु॥ खे़ब्याङ् खुने़ॽ कुदाक्फाओ कुस्सा एलाजाररे़ निङ्वाॽफुसाम्बा याःम्बक् चोःक्मा हेःक्तु॥ 7 खे़प्मोलाम् इस्राइलिहाॽ गुदगुदा थारिक् लाङ्मे़घेगे़, हे़क्क्याङ् गुदगुदालाम् वहःङ्हाॽ के़ने़बा योतबाताओ मे़बे॥ 8 आइन् थारिक् के़बोङ्बा के़युबा कुइसिक् यहवे दाङ्बे़ल्ले़ कुमाङ्हुप् सन्दोक्किन् पङ्मारे़ लागि, यहवे दाङ्बे़ल्ले़ कुदगि ये़प्माआङ् खुने़ॽ कुमाङ्सेवा याःम्बक् चोःक्मा नु खुने़ॽ कुमिङ्ङो हाङ्वागे़न् मुॽइसाम् थामारे़ लागि खे़न् ये़म्मो यहवे दाङ्बे़ल्ले़ ले़बि थाःक्किन् से़न्दु॥ 9 कल्ले़चोगुल्ले़ ले़बिःल्ले़ कुमुॽइदाङ्साहाॽरे़ खुन्छिॽ फुॽनुसाॽहाॽलाम् लाजेॽसिङ्बुङ् लक् खोमा इग्र लक्खोमा मे़ङ्गत्तुन्ॽ॥ यहवे दाङ्बा खुन्छिॽ निङ्वाॽफुमाङ्ङिल्ले़ खे़ङ्हाॽ मे़त्तुसिबा कुइसिक् यहवे दाङ्बे़न्ने खे़ङ्हाॽरे़ खुन्छिॽ लक्खोमा लक्लो॥) 10 तगिबा हे़क्केए, आङ्गाॽ कोःक्मा फाङ्जङ्ङो लिबोङ् ये़न् थारिक् से़न्दिक् ले़न्दिक् वयाङ्॥ कन् लाम्बाआङ् यहवे दाङ्बे़ल्ले़ आङ्गाॽ आबेःल्लिन् खे़प्सु॥ खुने़ॽ खिनिॽ मे़ङ्मा निङ्वाॽ मे़जोगुन्॥ 11 खे़ब्याङ् यहवे दाङ्बे़ल्ले़ आङ्गाॽ मे़त्ताङ्, “पोगे़ॽ, मनाहाॽ लाम्लोसे़से़ॽ, हे़क्क्याङ् आङ्गाॽ खे़ङ्हाॽरे़ खुनिॽ पाधे़बाहाॽनु माङ्हे़क् चोगुङ्ङाङ् पिनिङ् मे़त्तुङ्सिङ्बा लाजेॽओ खे़ङ्हाॽ मे़लाःत्ताङ् खे़न् लाजेन् युक् मे़जोगुररो॥” निङ्वाॽफुमाङ्ङिन् किप्मा पोङ्ॽ 12 कल्ले़चोगुल्ले़ आल्ल इस्राइलिसे, यहवे दाङ्बा खिनिॽ निङ्वाॽफुमाङ्ङिल्ले़ खिनिॽलाम् खोमा इःत्तुबा पाःन्हाॽ हाबा कन्लो—यहवे दाङ्बा निङ्वाॽफुमाङ्ङिन्नु खिनिॽ किसे़म्मे़ॽ, खुने़ॽ के़रे़क् कुलाम्हाॽओ लाङ्घेगे़म्मे़ॽ, खुने़ॽ मिःम्जि मे़त्ते़म्मे़ॽ, खिनिॽ के़रे़क् सिक्लुङ्माॽ नु सक्मा साम्मिल्ले़ निङ्वाॽफुमाङ्ङिन् माङ्से़वा मे़त्ते़म्मे़ॽ, 13 हे़क्क्याङ् खिनिॽ नुॽमा तामारे़ लागि आङ्गाॽ आइन् खिनिॽ इङ्जाङ् पिनिङ्बा यहवे दाङ्बे़ल्ले़ कुइङ्जाङ्हाॽ नु कुधिम्हाॽ इःत्ते़म् नाःत्ते़म्मे़ॽ॥ 14 ताङ्साङ्बाहाॽ, ताङ्साङ्बान्नुःल्ले़आङ् थाःङ्धाक्पा पाःन्हाॽ, हे़क्क्याङ् इक्सादिङ् खाम्बेःक्मा नु खे़प्मो के़वाॽबा के़रे़क् पाःन्हाॽ यहवे दाङ्बा खिनिॽ निङ्वाॽफुमाङ्ङिल्ले़न्नेरो॥ 15 हे़क्केसाङ् खिनिॽ पाधे़बाहाॽए खुने़ॽ कुलुङ्माॽ स्याःत् मे़लॽरे़आङ् निङ्वाॽफुमाङ्ङिल्ले़ खे़ङ्हाॽ लुङ्माॽ तुक्तुसि, हे़क्क्याङ् खिनिॽ के़निसुम्बा हे़क्केए खे़ङ्हाॽरे़ खुनिॽ थिन्दाङ् सायोबोरा खिनिॽए के़रे़क् मे़न्छाम् याप्मि लुम्मोलाम् खुने़ॽ के़सेगि॥ 16 कल्ले़चोगुल्ले़ खिनिॽ निङ्वाॽओ हर्दो के़हे़क्पा पोःक्खे़म्मे़ॽ, हे़क्क्याङ् आल्लआङ्धो पान् मे़ङ्घे़म्मनाबा मे़बोःक्खे़म्मिन्ने़ॽ॥ 17 थेआङ्भे़ल्ले़ यहवे दाङ्बा खिनिॽ निङ्वाॽफुमाङ्ङिन्ने माङ्हाॽरे़ खुनिॽ निङ्वाॽफुमाङ् नु दाङ्बाहाॽरे़ खुनिॽ यहवे दाङ्बा, के़रे़क्नुःल्ले़ यम्बा निङ्वाॽफुमाङ्, मुक्साम्साबा नु किप्मा के़घुबा चोक्लो॥ खुने़ॽ आत्तिन्हाॽआङ् एःक् पएःक् मे़जोगुसिन्ॽ, खे़ब्याङ् खुने़ॽ आप्फाल्ले़आङ् स्वाःत्ताङ् सुरुत्याङ् मे़दाःक्तुन्ॽ॥ 18 खुने़ॽ ये़त्छाबाहाॽ नु मेमेदुमाहाॽ खुन्छिॽ ले़प्माङ् कुदोःप्मा खासे़न् लोःन्दु पिरुसिॽ, हे़क्क्याङ् वे़प्मिबाहाॽ लुङ्माॽ तुक्तुसिॽ खे़ब्याङ् खुने़ॽ कुजा नु चाङ् पिरुसिॽ॥ 19 खिनिॽआङ् मिस्रओ वे़प्मिबा के़वयि कल्ले़चोगुल्ले़ खिनिॽआङ् वे़प्मिबाहाॽ लुङ्माॽ तुक्मासि पोङ्ॽ॥ 20 यहवे दाङ्बा खिनिॽ निङ्वाॽफुमाङ्ङिन्नु किसे़म्मे़ॽ, खुने़ॽ कुसे़वा याःम्बक् चोगे़म्मे़ॽ, खुने़ॽ हे़प्ताम्मे़ॽ, हे़क्क्याङ् खिनिॽ माङ्के़हे़क्कासिल्ले़ खुने़ॽ कुमिङ्ङोए माङ्हे़क्कासिम्मे़ॽ॥ 21 खुने़ॽए खिनिॽ नाराफोमा लाम्लो॥ खुने़ॽए खिनिॽ निङ्वाॽफुमाङ्लो, खुने़ॽए खिनिॽ लागि खिनिॽ मिक्किल्ले़ निसुबा खे़न् पयम् यम्बा नु निङ्वाॽ के़माबा याःम्बक्हाॽ चोगु॥ 22 खिनिॽ पाधे़बाहाॽग नुबोङ्रक् मिस्र मे़बेआङ् मे़वये़, कर आल्ल यहवे दाङ्बा खिनिॽ निङ्वाॽफुमाङ्ङिल्ले़ ताङ्साङ्बोबा खेसेबाहाॽ कुइसिक् खिनिॽ निःप्मा सुक्मे़न्दे़प्मनाबा के़जोगिआङ् वाॽरो! |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.