दानिए़ल 7 - लिम्बुदानिए़लरे़ निसुबा सुफोहाॽ ( ७:१–१२:१३ ) लिसि ताम्भुङ् थक्साहाॽ निमे़धाबे़ 1 बेबिलोनबा बेलसजरे़न् हाङ् पोःक्खे़बा थिक्सिगेक्पा तङ्बेओ दानिए़ले़न् आबाङे कुइप्नाओ सोःन्छिङ्ङाङ् ने़स्से़ल्ले़ खुने़ॽ से़प्माङ् माक्तु हे़क्क्याङ् सुफोहाॽ निसु॥ खुने़ॽ माक्तुबा से़प्माङ् पाःन्हाॽ साप्तुने़स्सु॥ 2 दानिए़लरे़ पाःत्तु, “आङ्गाॽ निसुङ्बा सुफोओ से़न्दिक् ओमे़त्तुङ्ल पत्छाङ्ङिल्ले़ आङ्गाॽ आदगि ताङ्साङ्बोबा के़रे़क् पिसाङ् लाम्बाबा सुरित् केजङ्ङिल्ले़ तुङ्गोदिङ् वरःङ्ङिन् खिर्माःत् खिर्माःत् माःत्तु ने़स्सु॥ 3 वरःङ्ङोलाम् वेॽ वेॽ परिक्पा यम्बा लिसि ताम्भुङ् थक्साहाॽ मे़लःन्दे़ मे़धाङे़॥ 4 “थिक्सिगेःक्पे़न् खिरिङ्बा हे़क्तङ्बा चोगे़, हे़क्क्याङ् खे़ल्ले़ कुलाप्हाॽ मुयाःल्ले़न् हे़क्तङ्बा पत्छे़॥ खे़ल्ले़ कुलाप्हाॽ मे़म्भुॽए थारिक् आङ्गाॽ ओमे़त्तुङ्ङाङ् पत्छाङ्, खे़ब्याङ् खे़न् मना हे़क्के कुलाङ् ने़त्छिरे़ तक्तुर खाम्बाङ्ङोलाम् पोगे़आङ् खे़न् मे़न्छाम् याप्मि निङ्वाॽ मे़बिरु॥ 5 “खे़ब्याङ् आङ्गाॽ आदगिबा निसिगेक्पा ताम्भुङ् थक्सान् माःॽयु हे़क्तङ्बा निदे़त्ते़॥ खे़ल्ले़ कुधक्किन् थिक् ले़प्माङ्लाम् थाःङ् मे़भोःक्खु, हे़क्क्याङ् खे़ल्ले़ कुम्ब्राओबा कुहाबोॽबाहाॽओ सुम्सि साबिम्बाहाॽ पत्छे़॥ खे़न् अक्तङ्बा इङ्जाङ् मे़बिरु—‘पोगे़ॽ, हे़क्क्याङ् के़सुक्सुक् सा च्ये़ॽ!’ 6 “खे़न् एगाङ् आङ्गाॽ ओमयाङ्, हे़क्क्याङ् आङ्गाॽ आदगि खे़प्मो वेॽसमा थक्सा थिक् ये़बे़, खे़न् थे़रिङ्बा हे़क्तङ्बा निदे़त्ते़॥ हे़क्क्याङ् खे़ल्ले़ कुएःक्थाःक्मो पुःल्ले़न् हे़क्तङ्बा लिसि कुलाप्हाॽ पत्छे़॥ खे़न् ताम्भुङ् थक्साःल्ले़ कुधे़गेःक्हाॽ लिसि पत्छे़, खम्भ्याङ् खे़न् हाङ्युक् चोःक्मा युक् मे़बिरु॥ 7 “खे़न् एगाङ् से़न्दिक् आङ्गाॽ सुफोओ निसुङ् हे़क्क्याङ् आङ्गाॽ आदगि यङ्मा के़गे़प्पा नु किप्मा पघु के़घुबा हे़क्क्याङ् साॽरिक् पधुम् के़धुम्बा लिसिगेक्पा थक्सान् ये़बे़॥ कल्ले़ यम्बयम्बा फे़न्जेॽ कुहाबोॽबाहाॽ युङे़, खे़ल्ले़ सानाःत्तिन् चिघाम् चिघाम् खाम्दुआङ् चदेसु हे़क्क्याङ् के़नम्बे़न् कुलाङ्ङिल्ले़ चिदोॽ चिदोॽ तोॽरु ने़स्सु॥ तगिबा ताम्भुङ् थक्साहाॽनुःल्ले़ खे़न् वेॽ परिक्पा चोगे़ हे़क्क्याङ् खे़ल्ले़ थिबोङ् कुदाङ्हाॽ युङे़॥ 8 “आल्ल आङ्गाॽ खे़न् कुदाङ्हाॽरे़ कुयाःम्बेओ इःत्छिङ्ङार पत्छाङ्ङिल्ले़ आङ्गाॽ आदगि लत्छा चुक्सा कुदाङ् थिक् खे़ङ्हाॽओलाम् लिङे़आङ् युङे़, हे़क्क्याङ् तगिबा कुदाङ्हाॽओबा सुम्सिग खे़ल्ले़ कुदगि कुबुङ् थे़र्ले़ हाॽयाक् मे़आगे़॥ मना मिक् हे़क्तङ्बाए कन् कुदाङ्ङिल्ले़ कुमिक् पत्छे़, हे़क्क्याङ् आङ्दिङ् पान् के़बाःप्पा खे़ल्ले़ कुम्ब्रा पत्छे़रो॥” सदादिङ् आभे़ल्ले़साङ् के़वाॽबे़न् निधाबे़बा सुफो 9 “ओमे़त्तुङ्ल पत्छाङ्ङिल्ले़सा हाङ्युक्नाहाॽ मे़युक्खुसिरो, हे़क्क्याङ् सदादिङ् आभे़ल्ले़साङ् के़वाॽबे़न् हाङ्युक्नाओ युङ्सिङ्लो॥ खुने़ॽ कुजाङ्ङिन् नाःङ् हे़क्के फुत्त्रिःङ्ग्याःप्पा चोगे़रो, खुने़ॽ कुधे़गेक् इःन् खि हे़क्के फदाङ्बा चोगे़रो॥ खुने़ॽ कुहाङ्युक्नान् मिधुङ् मिराक् के़दिःप्पा चोगे़रो, हे़क्क्याङ् खे़प्मोबा काप्लोःक्हाॽओ हुरुरु मि के़दिःप्पा पत्छे़रो॥ 10 खुने़ॽ कुदगिलाम् के़लःम्बार के़बप्पा मि के़दिःप्पा वहःङ् थिक् कुक्से़आङ् ने़स्से़रो॥ हे़न्छिङ् हे़न्छिङ् मनाहाॽ माङ्से़वा मे़जोगे़रो, थिबोङ् हे़न्छिङ् ले़ङ् थिबोङ् हे़न्छिङ् मनाहाॽ खुने़ॽ कुदगि मे़ये़बे़रो॥ खासे़न्ले़ लागि खासे़न्हिम् चुम्लुङ् मे़युङे़रो, हे़क्क्याङ् साप्पन्हाॽ हरे़आङ् ने़स्से़रो॥ 11 “खे़ब्याङ् कन् कुदाङ्ङिल्ले़ आङ्दिङ् लॽमा पाःन्हाॽ पाःत्तुर पत्छे़बाल्ले़ चोगुल्ले़ आङ्गाॽ ओमे़त्तुङ्ङाङ् पत्छाङ्॥ खे़न् ताम्भुङ् थक्सान् मे़स्ये़रुआङ् मिधुङ् मिराःक्को लाप्मे़देसु हे़क्क्याङ् खे़ल्ले़ कुधक्किन् खाप्पुथ्यःङ् मे़बोःक्खे़न्ल थे़म्बा आङ्गाॽ ओमे़त्तुङ्ङाङ् पत्छाङ्॥ 12 वेॽ ताम्भुङ् थक्साहाॽरे़ खुन्छिॽ युक्किन् मे़नाप्तुसिआङ् वये़, कर कुभा ये़म्ले़ लागि खे़ङ्हाॽ हिङ्मा मे़भाःक्तुसि॥ 13 “खे़न् से़न्दिक् आङ्गाॽ सुफोओ ओमे़त्तुङ्, हे़क्क्याङ् आङ्गाॽ आदगि ताङ्साङ्बोबा खाॽमिःत्हाॽनु सोरिक् के़युबार के़बप्पा मे़न्छाम् सा हे़क्तङ्बा थिक् निसुङ्॥ खुने़ॽ खे़न् सदादिङ् आभे़ल्ले़साङ् के़वाॽबाओ ये़, हे़क्क्याङ् खुने़ॽ कुदगि मे़देॽरु॥ 14 खुने़ॽ युक्, मिमिदिङ् नु हाङ्युक् मे़बिरु, हे़क्क्याङ् मे़न्छाम् याप्मिहाॽ, मे़न्छाम् सुवाङ्हाॽ हे़क्क्याङ् वेॽ वेॽ पाःन्दाङ् के़बाःप्पाहाॽरे़ खुने़ॽ माङ्से़वा मे़मे़त्तु॥ खुने़ॽ कुहाङ्युक्किन् नुप्मे़न्दिङ्बा हाङ्युक् चोक्, खे़न् आभे़ल्ले़आङ् मे़ले़ङ्ने़न्, हे़क्क्याङ् खुने़ॽ कुहाङ्जुम्मिन् आप्फाल्ले़आङ् मे़नुप्ने़न्लो॥” सुफोःल्ले़ कुबे 15 “आङ्गाॽ, दानिए़ले़न्, आङ्गाॽ निङ्वाॽओ साॽरिक् किसाङ्, हे़क्क्याङ् आङ्गाॽ निसुङ्बा सुफोहाॽरे़ निङ्वाॽ तुक्खे चामो थासाङ्॥ 16 खे़प्मो के़ये़प्पाहाॽओबा थिक्पाओ आङ्गाॽ पेगाङ् हे़क्क्याङ् कन् के़रे़क् पाःन्हाॽरे़ से़क्खाबा कुबेन् हम्मारे़ लागि खे़न् पेलि फाक्तुङ्॥ कल्ले़चोगुल्ले़ खुने़ॽ कन् पाःन्हाॽरे़ कुबेहाॽ अक्खेलॽरिक् आङ्गाॽ हन्दाङ् पिराङ्— 17 ‘कन् यम्बा ताम्भुङ् थक्साहाॽग इक्सादिङ् खाम्बेःक्मो के़बोःक्पा लिसि हाङ्जुम्हाॽरो॥ 18 कर के़रे़क्नुःल्ले़ यम्बा निङ्वाॽफुमाङ्ङिल्ले़ कुसेसे मनाहाॽरे़ सदादिङ् युक् चोःक्मा मे़घोसुॽ हे़क्क्याङ् आभे़ल्ले़साङ् सदादिङ्ले़ लागि कन् हाङ्जुम्हाॽ मे़घोसुरो॥’ 19 “खे़ब्याङ् आङ्गाॽ खे़न् लिसिगेक्पा ताम्भुङ् थक्साःल्ले़ से़क्खाबा कुबेन् कुसिङ् निःप्मा निङ्वाॽ चोगुङ्, खे़ङ्ग फे़न्जेॽ कुहाबोॽ नु कासा कुसेःम्बुॽ के़बप्पा वेॽहाॽनुःल्ले़ एःक् परिक्पा नु किप्मा पघु के़घुबा चोगे़—खे़न् ताम्भुङ् थक्साःल्ले़ सानाःत्तिन् चिघाम् चिघाम् खाम्दुआङ् चदेसु हे़क्क्याङ् के़नम्बे़न् कुलाङ्ङिल्ले़ चिदोॽ चिदोॽ तोॽरु ने़स्सु॥ 20 आङ्गाॽ खे़ल्ले़ कुधे़गेःक्को के़युङ्बा थिबोङ् कुदाङ्हाॽरे़ कुयाःम्बेओ नु खे़न् कुदाङ्हाॽओलाम् के़लःम्बा वेॽ कुदाङ्ङिल्ले़ कुयाःम्बेओआङ् कुसिङ् निःप्मा निङ्वाॽ चोगुङ्, खे़ल्ले़ कुबेसाङ् खे़ङ्हाॽओलाम् कुदाङ् सुम्सि मे़आगे़—कुदाङ्ङिन् वेॽहाॽनुःल्ले़ के़धुम्बा निदे़त्ते़ हे़क्क्याङ् खे़ल्ले़ कुमिक् नु आङ्दिङ् पान् के़बाःप्पा कुम्ब्रा पत्छे़॥ 21 आङ्गाॽ ओमे़त्तुङ्ल पत्छाङ्ङिल्ले़, खे़न् कुदाङ्ङिन् सेसे मनाहाॽरे़ खुन्छिॽ तक्ले़ङ्वाओ थङ् चोगे़र पत्छे़ हे़क्क्याङ् खे़ल्ले़ खे़ङ्हाॽ नाःन्दुसिर पत्छे़रो॥ 22 खे़न् सदादिङ् आभे़ल्ले़साङ् के़वाॽबे़न् के़रे़क्नुःल्ले़ यम्बा निङ्वाॽफुमाङ्ङिल्ले़ कुसेसे मनाहाॽ ले़प्माङ् खासे़न्ले़ उवा मे़न्जोःक्के थारिक् नु ये़म् त्ये़आङ् खे़ङ्हाॽरे़ हाङ्जुम्मिन् युक् मे़न्जोःक्के थारिक् खे़ल्ले़ नाःन्दुसि॥ 23 “खे़ल्ले़ आङ्गाॽ अक्खेलॽरिक् कुबेन् चे़क्ताङ्—‘लिसिगेक्पा ताम्भुङ् थक्साःङ्ग इक्सादिङ् खाम्बेःक्मो ओसेःन्धाङ् के़बोङ्बा लिसिगेक्पा हाङ्जुम्लो॥ कङ्ग वेॽ हाङ्जुम्हाॽनुःल्ले़ एःक्समा परिक्पा पोङ्ॽ हे़क्क्याङ् के़रे़क् इक्सादिङ् खाम्बेःक्मान् खे़ल्ले़ चिसॽ चिसॽ सॽरु हे़क्क्याङ् तोॽरुआङ् लरुदेसुॽ॥ 24 थिबोङ् ताङ्हाॽग खे़न् लिसिगेक्पा हाङ्जुम्लाम् के़दाबा थिबोङ् हाङ्हाॽरो॥ खे़न् एगाङ् एःक्समा हाङ्धिक् पोक्, तगिबे़न्नुःल्ले़ खे़न् वेॽ पोङ्ॽ॥ खे़ल्ले़ सुम्ब्राङ् हाङ्हाॽ युक्तुसिॽ॥ 25 खे़न् के़रे़क्नुःल्ले़ यम्बा निङ्वाॽफुमाङ्ङिल्ले़ कुदक्ले़ङ्वाओ पात् हे़क्क्याङ् खुने़ॽ कुसेसे मनाहाॽ तुक्खे चाःत्तुसिआङ् कुदोक् के़बोङ्बा ये़म्मिन् नु कुभाङ्हाॽ ले़ङ्मा तम्सिङ् चोगुॽ॥ खे़ल्ले़ कुहुक्को सेसे मनाहाॽ ये़म्, ये़म्हाॽ नु कुभ्रे़ःङ् ये़म् थारिक् मे़धासुसिॽ॥ 26 “‘कर खासे़न्हिम्मो खासे़न् पोङ्ॽ, हे़क्क्याङ् खे़ल्ले़ कुयुक्किन् मे़नाप्तुआङ् सदादिङ्ले़ लागि युम्रे़क् मे़मे़क्खुॽ॥ 27 खे़ब्याङ् साङ्ग्राम्पेदाङ् सिगाङ्बा हाङ्जुम्हाॽओबा हाङ्युक्किन्, मुक्साम्मिन् नु पयम् यम्बा हाङ्वान् के़रे़क्नुःल्ले़ यम्बा निङ्वाॽफुमाङ्ङिल्ले़ कुमनाहाॽ मे़बिरुसिॽ॥ खुने़ॽ कुहाङ्जुम्मिन् नुप्मे़न्दिङ्बा हाङ्जुम् पोङ्ॽ, हे़क्क्याङ् के़रे़क् युक्साबाहाॽरे़ खुने़ॽ माङ्से़वा मे़मे़त्तुआङ् खुने़ॽ कुइङ्जाङ्ङिन् मे़इःत्तु मे़नाःत्तुॽ॥’ 28 “कुनुप्मा पाःन्निन् आम्भा कन्लो॥ आङ्गाॽ, दानिए़ले़न्, आनिङ्वाॽ पाःन्हाॽरे़ चोगुल्ले़ आङ्गाॽ साॽरिक् निङ्वाॽ तुक्खे चामो थ्ये़आङ् आङ्गाॽ आनारान् अम्गे़लॽबा पोःक्खे़, कर आङ्गाॽ कन् पाःन्हाॽ आनिङ्वाॽओए युक्खुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.